Yeso‑ka yo‑yose mai tamine 26
26
1“Baoro, tiwati omitaboneni.” Akiriba ati ne.
Baoro yehe daatone, ati yanane,
2“Hidi Akiriba, owati timitabone, ya‑yai·oneni. Towe oha‑mone Yodeo mai ati na tiwatowahaboneni.
3Yodeo mai ihi tiwatoteni. Mai ibi weena, mai tiwato tina, owati timita, tiyawariyahi.
4Hibati‑ya yetene ohiya, Yerosare‑ya mai‑ya odaba, owa ene‑ya Yodeo mai watoneni.
5Fariseo mai one ihi‑nima owa ene namaro‑ya mai watoneni. Owa ene‑ya mai awamaro, owa ene tamine‑ya mai hiyari awirani.
6Hibati‑ya oda‑ka idi mai‑ya i‑di Deoso hiyaremata, Deoso ati onofe ene owa‑ya mai ati nanahabi kofinineni.
7Isara·eo‑ka nodi mai‑ya Deoso hiyaremata, mai‑ya kasomebona ati ne. Oda‑ya kasomebona oda nafi nimanineni. Oda‑ya kasomebona ati nemata‑nima owa‑ya kasomebona ona, owa‑ya mai kaka, owa‑ya mai ati nanahabateni.
8Ai owa abe Deoso hinakitame, hini yamata ihi dai kasawariti?
9Hibati‑ya Yeso Nasare‑ke okako, Yeso‑ya mai no‑nofa mai okakoharemaroni.
10Yerosare‑ya Yeso ati‑ya mai no‑nofa mai bisi·onamaroni. Deoso‑ka yama‑bone‑ya mai da‑daa mai‑ka hidi mai ati ihi Yeso ati‑ya mai no‑nofa kadeya‑ya mai onafoya, makobote mai‑ya mai nanahaba, mai ihi ya‑yai·onamaroni.
11Deoso‑ya mai hi‑hiyara‑ke yobe dami‑ya oka, mai bisi·onani, Yeso oni‑ya mai towe tonihebonehe. Owa yawi kita, wami bara‑ya mai siba·onabone, okamaroni.
12Fara mai‑ya owatabone, Damaso‑ya okomakineni. Deoso‑ka yama‑bone‑ya mai da‑daa mai‑ka hidi mai‑ka yama hani dama·okanani, mai‑ya owatabonehe.
13Hidi Akiriba, Damaso hawi‑ya yaka·ona, mahi nokorise‑ya neme‑ya yama wahi kake, oawa, owa‑ya mai sa‑sawi mai toha na, oda‑ya yama wahi kobona, mahi wehene‑ya fiyakanamaroni.
14Yama wahi ihi oda nafi sona, ati omite, ebereo oda ati‑nima ati ne, owa‑ya hiyare,
‘Saoro, Saoro, hini yamata‑bone owa‑ya bisitiniti? Tiwa‑ta tiwa komene kitaboneni.’ Ati nemarine.
15‘Ayo, eme tiwa oni niti?’ Ona.
‘Yeso ama·oni. Owa‑ya bisitinani.
16Tiwaamisamahi. Tiwa oyosewahaboneni. Hibayata yama tiawa tamine tihiyaraboneni. Makobote yama one yofi·okanamakiya, tamine tihiyaraboneni.
17Tiwa‑ya mai watiya, tiwa okasoma, Yodeo tiwa‑ya mai watiya, tiwa okasoma, Bara mai‑ya tiwa oyose, tiwa okasoma onaboneni.
18Owa tamine Bara mai‑ya tihiyariya, mai noki weetokana‑nima mai nabone, hibayata yama soki‑nima na‑ya mai wina, tiwati‑ya mai mitiya, yama tehe‑nima na‑ya mai winawahaboneni. Satanasi‑ka mai tohamarabone, Deoso‑ka mai tohaboneni. Mai‑ya owati somawamabone, owati‑ya mai one nofa‑nima yama amosa‑ya mai kayafaboneni.’ Yeso ati nemarine.
19Hidi Akiriba, neme‑ya ati omite, ati‑nima oteni.
20Damaso‑ya Deoso tamine ohiyara, Yerosare‑ya, Yodeya‑ya Deoso tamine ohiyara, Bara mai‑ya Deoso tamine ohiyaramaki, oneni, Yeso ati‑ya mai nofabonehe.
‘Deoso‑ya dai‑ya dai kamina, dai ati‑nima dai ene nawawahi.’ Onani.
21Owati ihi Deoso‑ka yobe‑ya owa‑ya Yodeo mai waratonani, owa‑ya mai nanahababonehe.
22Deoso owa‑ya kasomanadi ene hasi·ona, hidi mai toha, mai ati kita mai‑ya ohiyara, hidi mai tohara, mai ati kitara mai‑ya ohiyara ona, i‑di Mose ati‑mata‑nima yama nawaha, Deoso ati‑ya mai mi‑mita‑mete mai ati‑nima yama nawaha, tamine okamina oteni.
23‘Kirisito komene kitebona, mai hinahabebona, abeya, kitamebonane. Kirisito kitami bahe, ai‑ya nakitamaharibonane. Kitame ene yama wahi‑nima Yodeo mai awa, Bara mai awa nabone, Deoso hawine‑ya mai watowahaboneni.’ Mose ati tohe, Deoso ati‑ya mai mi‑mita‑mete mai ati toha neni.” Baoro ati nemonane.
24Ati‑ya Fesito mite, Baoro‑ya haane,
“Baoro, ka‑kana amatini. Yama hani nafi tikadika, tiwa tati tohiya awineni.” Fesito ati nane.
25Ati‑ya Baoro mite, ati yanane,
“Kofenado Fesito, ka‑kana oni awirini. Owati‑nima yama neni. Owati amosani.
26Yama tamine okamina‑ya hidi Akiriba watone, owa habo siitora, yama‑ya Akiriba awemarine. Owatibodi ati nineni. Haa‑nima yama na kemoterani.
27Hidi Akiriba, Deoso ati‑ya mai mi‑mita‑mete mai ati tinofiraniha? Mai ati tinofamone owatibodi ati neni.” Baoro ati nane.
28Akiriba ati yanane,
“Baoro, tiwati fa‑famaraba niya, Yeso ati onofabone tina awineni.” Ati nemonane.
29Ati‑ya Baoro mite, ati yanane,
“Owati fa‑famaraba na toha, owati dama toha na, Deoso ati tinofabone owati nofani. Owati dai nafi mita, owa‑nima dai na‑mani, yama amosa neni. Koheti‑ya soki·okana‑nima dai‑ya owati sokini nofarani.” Ati nemonane.
30Baoro ati fawane, Hidi Akiriba, kofenado Fesito, Berenisi, mai one naho na, mai nahomisa, mai tokomineni, mai nafi.
31Yobe kote‑kaya mai toka, mai ibi hiyara,
“Ati sibarane. Haa‑nima ai ati na, ai nanahabarihi, ai sokikarihi ai teni.” Mai ati na.
32“Sesa‑ya ati koboni awire‑mana, ai seekane nane.” Fesito‑ya i‑di Akiriba ati nemonane.
လက်ရှိရွေးချယ်ထားမှု
Yeso‑ka yo‑yose mai tamine 26: jaaNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ