SEMPANHNAK 25
25
Abraham Ai A Dang Tesinfate
(1San 1:32-35)
1Abraham in nupui dang hoi lehsal ai a hming Katurah i. 2Katurah thawn a naihnak fate tu Zimran, Jokshan, Medan, Midian, Ishbak le Shuah i. 3Cen Jokshan ai fapate tu Sheba le Dedan i ai Dedan ai naihnak fate tu Asshurim, Lethusim le Leummim i. 4Midian ai fapate tu Ephah, Epher, Hanock, Abida le Eldaah i. Amahte veksen in Katurah ai fate i. 5Abraham in a naih hmuahhmuah Isaac pe i. 6Ikhalselai a thi hlanah a nunawn ai fapate hnenah lehsawng zem ai Isaac thawn um tlang tuh loin hmundang nisuah lam ramah fehruai sek i.
Abraham Thihnak Le Vuihnak
7Abraham tu kum za le kum sawmsarih le kum nga tian nung i. 8Hlombawr khakhun hnua tian nung ai cia hnuaah thi ai, a miphunpuite hnenah taikhawm leh i. 9Hit mi Zohar ai fapa Epharon hnenai a laihnak lairam, Mamre nisuah lam Makpelah lungkhukua songah a fapate Isaac le Ishmael in phum kawm i. 10Hit miphunte hnenin amah Abraham in a laiciahnak ram i. A nupui Sarah thawn a pahnih in ciata ah phum kawm i.#Sem 23:3-16 11Abraham thi hnua fangin a fapa Isaac tu Pathian in hmuifu pe ai Beer-lahai-roi namkum hiangah um i.
Ishmael Ai Tesinfate
(1San 1:26-31)
12Sarah ai sal nu, Egypt mi Hagar thawn cawihnak Abraham fapa Ishmael ai fasuante tu a hnia lamai bangin i. 13Ishmael ai fapate hming a sangsang in, upa ber tu Nabaioth, cen Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Naphish le Kedemah i. 16Hemite heh Ishmael ai fapate i ai amahte khua le amahte umhnak ram hming tu amahte hming suang in bawnhnak i. Anite tu miphunte hlaihnih sentu cang tlang i. 17Ishmael tu kum za le kum sawmthum le kumsarih nung i. A thi fangin a miphunpuite thawn taikhawm tlang i. 18Ishmael ai tesinfate tu Egypt ram nisuah lam, Assyria ram fehhnak lam Havilah le Shur karlak ai ramah um i. Abraham ai tesinfa hnenah um loin a dangniu in um tlang i.
Esau Le Jacob Tehnak Thu
19Abraham ai fapa Isaac tluanthu tu hetihin i. 20Masopotamia ram Aram mi Bethuel ai fanu, Laban ai farnu Rebecca a hoi fangin Isaac tu a kum sawmli i. 21Rebecca in fa nai lo manin Isaac in Bawipa hnenah sawnget de i. Bawipa in a sawngenhnak a za fangin Rebecca in naupai i. 22A pum songah faphir pai ai heng dun hnelhno de i, ti a ling fangin a thinhar in, “Hetih lekhaw nun man nai lo ing?” tiin ti i. Cen Bawipa hnenah sawngen i.
23 Bawipa in,
“Na pum songah
miphunte pahnih pai isi;
Ral dun phun hrimhrim in
te kawm tuh i;
Pakhat tu a khatta tahin
a tha hat tuhai,
A upa sawn in nauta sawn
ai cengfa cang tuh i,” tiin ti i.#Rom 9:12
24Rebecca tu a nihla a khim fangin nau a phir in nai i. 25A suak hmasa pa tu misan i ai a ruang pumpalah hmul nai i. Ciamanin a hming Esau#25:25 Esau tihnak tu Hebrew in a umhnak ram Sair tihnak a sawhnuamhnak i, Sair tihnak le hmulnai tihnak tu a awsuah bang dun i. tiin bawn i. 26A naupa a te fangin a upa Esau ai kedo awh meng kongin suak i. Ciamanin a hming Jacob#25:26 Jacob tihnak tu Hebrew in kedo ti ihlahle zawl ti thawn a awsuah bang dun i. tiin bawn i. Fapa a nai fangin Isaac tu kum sawmruk i.
Esau In Fa Upa Covo Zuar I
27Cen amahte unau in khang kawm zianzo ai Esau tu sakap thai i ai hampalak vak a hiamthaitu cang i. Jacob tu midap niu i ai inn lek ah um menma de i. 28A sakaphnak sa ai de manin Isaac in Esau heh daih deuh i. Ikhalselai a nu Rebecca in Jacob daih sawn i.
29Nikhat ah Jacob in pe tihang a suang laitak ah Esau tu hampalak a sazulhnak in tlung i. 30A rikam ze manin a nau Jacob hnenah, “Ril i kam ze lawmlam i, na tihang san niu ka khat tal i pe tu,” tiin ngen i. (Ciamanin Edom#25:30 Edomtihnak tu Hebrew in a san ti thawn a awsuah bang dun i. tiin a kohnak i). 31Ikhalselai Jacob in, “Na fa upa covo i pe tulai rong na pe tuh ing,” tiin ti i. 32Ciafangin Esau in, “Na pe tuh ing; rikam in i thi dawn ai, i covo tu kaimah ca ziang hnempui i,” tiin ti i. 33Cen Jacob in, “I covo na pe tuh tengteng ing, tiin thutiam hmasa rih tu,” tiin ti i. Ciatihin Esau in thutiam ai a fa upahnak covo heh Jacob hnenah zuar i.#Heb 12:16 34Cen Jacob in sang le pe tihang a suanghnak pe i. Esau in ai le ding hnuaah tho ai feh i. Fa upa ihnak covo zaisiar loin um i.
လက်ရှိရွေးချယ်ထားမှု
SEMPANHNAK 25: RZB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Zanniat Bible © Bible Society of Myanmar, 2018.