SEMPANHNAK 24
24
Isaac Ca Nupui Sihnak
1Abraham tu kum upa ai hlombawr ihang; Pathian in a bawnhnak le a perhnak zongza ah hmuifu burh i. 2Cen Abraham in a naihnak hmuahhmuah a kilkhawltu, a hnenum upa ber pa hnenah, “Na kut i kal kualak#24:2 Kal kualaktihnak tu cia san ahcen thupui ngai i, aisu inkhai thleng thil nawn lo thukhamhnak a bawn fangin amahte zahmawh awh in thukham dun de manin i. ah dah tulai thu i kham tu. 3Lai le van Pathian Bawipa ai hmai le i hnenah, i fapa Isaac nupui tuhin i umhnak Canaan ramai nupang lang tuh hrimhrim lo ing, tiin cukcam in thu i kham tu. 4Hlanlai i umhnak i khua i ramah feh tulai i songkhatte songin i fapa ca nupui si sah tu,” tiin ti i. 5Ciafangin a hnenum pa in, “Cia nupang nu in i hlun nuam loin a inn ah um nuam sawn selai akontih tuh i? Na fapa sawn na um awnghnak ramah letpui tuh ing maw?” tiin zawt i.
6Cen Abraham in, “I fapa tu letpui tuh loin tawlrel tu; 7Bawipa van ai Pathian in i pa inn le i suahkeh hmun ram an i suakruai ai tunin he ram heh, ‘Na tesinfa hnenah pe tuh ing,’ tiin cukcam in thu i kham cia i. Amah Pathian in a vancungmi na hmaiah fehruai tuhai i fapa ca nupui ngah thil tuh isi. 8Ikhalselai nupang nu in na hlun nuam lo ngaingai lekhaw i hnenai na thukhamhnak in na luat tuh i. Zaikhai ita tuseh, i fapa tu cia ramah letpui tuh hrimhrim lo isi,” tiin ti i. 9Ciatihin a hnenum pa khai a bawipa Abraham kalkua lakah a kut dah ai a relhnak bawn tuh tengteng in thutiam dun i.
10Cen a hnenum pa in a bawipa ai kalaukte songin kalauk sawmkhat lang in ralring ai lehsawng tuhin thil mankhung tampui keng i. Cen Masopotamia#24:10 Masopotamia tihnak tu Aram Naharaim ti awng i. ram Nahor umhnak khua ah feh i. 11Cia khua a hleng fangin khua pua ai namkum hiangah a kalaukte bualruai i. Zan lam hang manin khua songai nupangte tu ti cawi tuhin kawi tlang i. 12Ciafangin Abraham hnenum pa tu sawngen ai, “Maw Bawipa, i bawipa Abraham ai Pathian, i bawipa hnenai na thukham khimruai in tun nia tun tikcucan ah i hlawhtlingruai tu hram law. 13Hemi i dinghnak namkum ah ti cawi tuhin khua songin fenute kawi tuh i. 14Fenu pakhat hnenah, ‘Ninghioniu in na tibel hma tulai tidap niu ding tuh ing,’ ti tuhai ani in, ‘Ding tu, na kalaukte khai tidap tul tuh ing,’ tiin iti lekhaw ciami fenu nu heh na sal pa Isaac ca na rilhnak fenu tuh ihang. Ciatihin cang peupeu lekhaw i bawipa hnenah na thukham khimruai isi, tiin ling tuh ing,” tiin ti i.
15Cen a sawngen rin a ben hlanah, Rebecca tihnak fenu nu ciah a kodar vumah tibel phur kongin kawi i. Rebecca tu Bethuel ai fanu i. Bethuel tu Milcah ai fapa i ai Milcah tu Abraham unau pa Nahor ai nupui i. 16Rebecca tu a mawi roh ai fenu him lamsamniu lai i. Namkum lamah zu zianzo ai a tibel dim in ti a thun ben fangin hong leh ngiarngo i. 17Ciafangin Abraham hnenum pa tu dawp ai a hnenah, “Ninghioniu in, na tibel songai ti ding i siang tu,” tiin ngen i. 18Rebecca in, “Bawipa ding tu,” tiin ti ai a tibel rang ngai in hma ai tibel khai kho ngai in awh sah meng ai dingruai i.
19Ti dingruai hnuaah Rebecca in, “Na kalaukte ca inkhai ti cawi sah tuhai amahte duhzah in ding tuseh,” tiin ti i. 20A rang ngai in sumhnam tikuang songah tidap tu bung ta sek ai, kalaukte a kham hlanlo ti cawi sah hnelhno i. 21Abraham ai minung pa inkhai Bawipa in i hlawhtlingruai nimaw, tiin dapthen in sik ngio i.
22Cen kalaukte tu Rebecca in ti a pe ben fangin Abraham hnenum pa in a mankhung sui hnarkhaih suah ai a hnar ah khaih sah i; a lianpui suingunte pahnih lang ai a kut ah ruk i. 23Cen, Aisu ai fanu isi? Na pa inn ah kin cam hmun tuh a khan um nitur im?” tiin zawt i. 24Rebecca in, “Nahor le Milcah ai fapa Bethuel ai fanu ing. 25Na kalaukte ca hampa le rong tampui nai ai ning cam hmun tuh a khan khai um i,” tiin ti i. 26Ciafangin Abraham hnenum pa tu ut in, Bawipa Pathian bia ai, 27“I Bawipa Abraham ai Pathian, Bawipa tu thangphat in um tuseh! Amah in i bawipa Abraham hnenai a thukhamhnak le rinsantlak a ihnak khimruai zo i. I bawipa Abraham ai unau inn ah Pathian in hlursuah in kong i hoi zo i,” tiin ti i.
28Fenu nu tu a nu hnenah dawp ai ciami thula hmuahhmuah rel i. 29Ciafangin Rebecca ai hmingpa Laban in ciami thula heh ling ai, 30Rebecca ai sui hnarkhaih le a zawngngel ai suingunte pahnih khai a hmu fangin namkum lamah dawp ai Abraham hnenum pa tu namkum hiangah a kalaukte thawn a ding lai khiah hmu i. 31Ciafangin Laban in, “Kin inn ah kawi tu, Bawipa ai hmuifu burhhnak isi. Zaimanin hnarpua lamah ding ngio isi? Kin inn tu ning cam hmun tuhin sel zo liang ai na kalaukte ca ahkhai umhnak um i,” tiin ti i. 32Ciatihin Laban in amahte inn ah lutpui ai kalauk vumai thilte hma sah ai hampa le rong khai pe i. Ciatihin Abraham ai hnenum pa le a minungte kesomhnak tuhin ti koih sah i. 33Cen zanfak ai tuh a bawn fangin Abraham ai hnenum pa in, “I thurelnuamhnak ning rel hlanlo rong ai tuhlai lo ing,” tiin ti i. Cen Laban in, “Na relnuamhnak rel tu,” tiin ti i.
34A thu khiah rel pan ai, “Kai tu Abraham hnenum ing. 35Pathian in i bawipa tu a khimliang in hmuifu pe ai milian ngai in bawn i. Bawipa in tuu, me, le kawlpaw a rualrual in pe ai sui le ngun, sal pa le sal nute, kalaukte le Laakte tampui khai pe i. 36Cen i bawipa ai nupui Sarah in a hlombawr hnuaah fapa nai i. I bawipa in a naihnak thil hmuahhmuah heh a fapa pe sio i. 37I bawipa in, ‘I fapa Isaac ai nupui tuhin tun kin umhnak Canaan ramai fenute songin ril tuh lo isi. 38I pa ai miphun le i songkhatte hnenah i fapa ca nupui tuh si hlahle sikhaw na vumah cukcamhnak hleng tuseh,’ tiin a hmai rori ah thutiamhnak i bawnruai i. 39Cen i bawipa hnenah, “Ciami nupang nu in i hlun nuam lo selai akontih tuh i?” tiin i zawt fangin, 40i bawipa in, “A thu i hlun ngiodehnak Pathian in a vancungmi na hnenah hlat tuhai na hlawhtlingruai tuh i. I pa ai songkhat le i suahpuite songin i fapa nupui hoi sah tuh tengteng isi. 41Ciatihin bawn lesikhaw i cukcamhnak songin na luat tuh i; cen i songkhatte hnenah feh ai na el lekhaw i cukcamhnak songin na luat tuh i,’ tiin iti i.
42“Tunnia namkum hiang i hleng fangin sawngen ai, “Bawipa, i bawipa Abraham ai Pathian, i thil bawnhnak vumah hlawhtlinghnak i pe tu. 43Sik tu, namkum hiangah i ding laitak ah ti cawi tuhin fenu nu a kawi fangin a hnenah, na tibel songai tidap niu i pe tu hram ti tuhai, 44fenu nu in, ding tu, na kalaukte khai ti pe tuh ing, ti lekhaw cia fenu nu heh i bawipa ai fapa ca Bawipa ai rilhnak i tuhang seh,’ tiin ti ing. 45Ciatihin dap niu in sawngen ai i sawngen ben hlanah Rebecca heh a kodar ah tibel phur in kawi ai namkum ah ti cawi i. Cen a hnenah, ‘Ninghioniu in tidap niu i pe tu,’ tiin ti ing. 46A rang ngai in a kodar ai a tibel hma ai, ‘Ding tu; na kalaukte khai pe tuh ing,’ tiin ti i. Ciatihin a ti ding sah ai i kalaukte khai amah in ti pe i. 47‘Na pa aisu i?’ tiin i zawt fangin, ‘Nahor le Milcah ai fapa Bethuel ai fanu ing,’ tiin iti i. Ciafangin a hnar ah hnarkhaih khaih sah ing; ngun khai a zawngngel ah ruk ing. 48I lu ut in i bawipa Abraham ai Pathian, lamtluang ngai ai kong i hoitu Bawipa bia in thangphat ing. Pathian in i bawipa unau hnenah i hlenpui i; i bawipa ai fapa ca fenu tawk zo ing. 49Ciatih imanin i bawipa ca thupha ruat in rem ti le i sikhaw tunin i hliah tu hram ih. Kin thula rem thiam tuh lo inkhai i rel tu ilai hmundang ah feh tuh ing,” tiin ti i.
50Ciafangin Laban le Bethuel in a hnenah, “Hemi thu tu Bawipa hnenai hlenghnak imanin kin in relcat tuhhnak ilo i. 51Ciamanin heta ah Rebecca um i; hawl tulai fehpui tu. Bawipa amah in a rel cia bangin na bawipa fapa ai nupui in cang tuseh,” tiin ti i. 52Cia thu a za fangin Abraham hnenum pa tu Bawipa Pathian hmaiah lai tong in a lu ut in anghnak thu rel i. 53Cen sui le ngun hlawnthil le thilthuamte khai suah ai Rebecca pe i. A hmingpa le a nu khai thil mankhung bikbik sum i.
54Ciatihin Abraham hnenum pa le a minungte tu ai le ding in zancam tlang i. A thangha zing ah a tho tlang fangin, “I bawipa hnenah i hlat leh tuhang ih,” tiin ti i. 55Ikhalselai a nu le a hmingpa in, “Kin fenu tu kin hnenah ni tlawmniu, ni hra dung um rih tuseh, cia hnuaah feh tuseh,” tiin ti i. 56Ani in, “I hen mahang ih; Bawipa in i lampui tluangruai zo i. Ciamanin i bawipa hnenah i let siang tu ih,” tiin ngen i. 57Cen anite in, “Kin fenu ko nga ingkhaw zawt rih nga ing,” tiin ti i. 58Rebecca heh ko ai, “Hemi pa thawn feh tuhin lung na khim awm?” tiin zawt i. Rebecca in, “Lung i khim i,” tiin sawn i. 59Ciamanin amahte farnu Rebecca tu a kilkhawltu nupang pakhat thawn Abraham ai hnenum pa le a minungte hnenah fehruai i. 60Cen Rebecca heh hetihin sawnget tlang i;
“Kin farnu, mi thawng tampuite ai
nu ah na cang tuseh,
Na tesinfate in a ralte ai
khualianpui pawl neh tusek seh,”
tiin ti i.
61Cen Rebecca le a hnenum nupangte tu kalauk vumah to tlang ai Abraham hnenum pa khiah hlun tlang i. Hnenum pa in konghoi ai fehpui i.
62Ciateng ah Isaac tu “Beer-lahai-roi” tihnak hmun an thawn ai Nageb ramah um i. 63Nikhat ah zan lam fangin Isaac tu lamleng ai kalaukte hleng lianglo hmu i. 64Rebecca inkhai Isaac hmu ai a kalauk vuman tolh vut i. 65Abraham ai hnenum pa hnenah, “Hampalak ai kin tawk tuhin a kawitu pa tu aisu i?” tiin zawt i. Hnenum pa in, “I bawipa i,” tiin sawn i. Ciafangin Rebecca in a hmai huphnak pon paniu lang ai a hmai hup i. 66Hnenum pa inkhai a tawlrelhnak thu le la hmuahhmuah Isaac hnenah rel sio i. 67Cen Isaac in Rebecca heh a nu Sarah um awnghnak hlambuk songah tlumpui ai a nupui cang i. Isaac in Rebecca tu daih ze ai a nu Sarah thi khelleh ah a thinhnemtu ah cang i.
လက်ရှိရွေးချယ်ထားမှု
SEMPANHNAK 24: RZB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Zanniat Bible © Bible Society of Myanmar, 2018.