Matayo 7
7
1Mutaumisye vandu, amu neeni mutaumisyo. 2Amu myumisye ilya neeni mukee yumisya yyo meni muumisyoo nayo. Na kyelelyo kilya mwelelyaa, nkyo kyeni mwelelyoo nakyo. 3A iwe nki ili kwalla kinana kikee irisoń lya mwanamae wafo na kisinde kikee irisoń lyafo kutakiishi? 4Ana naare kuiaa mwanamae wafo: Vera nkuute kinana kyo kikee irisoń lyafo, neekai ifo irisoń lyafo ku muni kiifo kisinde? 5Iwe makavili, uta mbele kisinde kikee irisoń lyafo ku muni, llyo kulolyaa kisha kinana kikee irisoń lya mwanamae wafo kukyute. 6Manya mutaniinge makite kilya kikee kisongori. Ana manya muteeṛe samana tanu mbele ya nguve, amu titashe ivariavaria na marende ayo timwaṛuke timusambuesambue.
7Tereveń amu muniingwaa. Ruyeń amu mukooyaa. Kabekabeń yoondi amu muruyoo. 8Fulya ulya woose akee itereva aniingwaa, na ulya akee iṛuya akooyaa, na ulya akee ikabakaba yoondi aruyoo. 9Ana ni i umwi wanu mwana wamwi anterevaa imbumbu lya mangolo, anniinge iwe? 10Ana katereva ikunga, anniinge shoka? 11Kyasiań kwakooya ini mukee varekwa mwishi iniinga vana vanu findo fisha, a Nde yanu wa iṛuvewu yye kilanya se aniingaa valya vakee intereva fisha? 12Kilya kyoose mufurie vandu vamutanye ini, neeni vatanyeń kuro da. Amu kuro llyo yawutya mavavaso na miloshye ya vaauya fisuku.
13Akeń mwaangoń ito nsuse. Amu wifo mwaango uwore mbari na shia yayo yalamukye, yyo ifikaa uretiń na valya vairaa shia yo vveengi. 14Na lingi wifo mwaango nsuse na shia yayo isaangi, yyo ifikaa muuń na vaira-fo waangu.
15Kusembekeń valosha va wongo vamusheaa vakee vawoo sha maanri, kake kari kawo vafisye ushaa sha ngwe. 16Muvamanyaa mitanyeń yawo. A nndu amakii iminya maṛuu ifo masangaṛyuń ana iyaa nroo ifo nrueń? 17Mfo kuro kikai: Nri woose ukee nnuru uvikaa nunda shinuru. Na nri nkasha uvikaa nunda shikasha. 18Nri nnuru umakii ivika nunda shikasha ndi ana nri nkasha umakii ivika nunda shinuru ndi. 19Mfo kuro na nri woose utavikaa nunda shinuru uminyoo weeṛwa muroń. 20Kyasia muvamanyaa mitanyeń yawo. 21Nta ni nndu woose ashisendaa Nndumi Nndumi afikaa umangiń lwa iṛuvewu ndi kita ulya akee itana filya Nde yakwa wa iṛuvewu afurie. 22Nkonu ulya wa ifurumya veefo veengi vashiiaa: Nndumi Nndumi, tanringisya na irina lyafo se? Ana tamuumbuta mimuyo mikasha na irina lyafo se? Ana tantana mashoṛa manini na irina lyafo ndi? 23Llyo warambuyaa na baa: Mmwishi ini kutu ndi. Ukeń kwakwa, ini mwanshiliya kavili.
24Kyasia ulya woose aaranyaa firero fi fakwa na iirikya kafiirikya, ito avakanaa na nndu ndango andetanya numba yamwi iweń. 25Neeli fua nini indekaba na mifu ikaeka na mburaato ikavivita na finya fikakaba numba ilya, nta iituula. Fulya mfulo wayo wiremyee iweń. 26Na nndu woose aaranyaa firero fi fakwa kara atafiirikya, ito avakanaa na nndu ntondo andetanya numba yamwi shia ya mfu. 27Neeli fua nini indekaba na mifu ikaeka na mburaato ikavivita na finya fikakaba numba ilya, nayo ikawa boto.
28Kyasia ili Yesu andemandisa miloshye ii yamwi, vandu valya woose veeyoo vakariika koṛoń kiimba kya miloshye yo yamwi. 29Fulya ye andevalosha na finya aavyo ni Iṛuva muni kita vaana valya vawo va mitisine.
လက်ရှိရွေးချယ်ထားမှု
Matayo 7: RWK72
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
