Matayo 6
6
1Kulleń kaaṛa mutaniingye misimbika yanu mbele ya vandu, amu mulolyo. Amu mukantana kuro, mumakii ikooya isekye kwa Nde yanu wa iṛuvewu ndi. 2Kyasia iwe ili kwiniingyaa nsimbika wafo, manya kutakabe wembe mbele yafo, sheeli vamakavili vatanaa ifo numba ta fisomyo na shień, amu vaitikiswa vvandu. 3Nkue namuia: Wo vammaa iniingwa maṛe awo. Kake iwe ili kwiniingyaa nsimbika, manya uko lwafo umuso lutamanyi kilya uko lwafo usha lukee itana. 4Nsimbika wafo uve kwa kiṛisi, na Nde yafo alolye kwa kiṛisi akutaa na baa.
5Lingi ili mwiterevaa, manya mutave sha vamakavili. Amu vafurie nnu itereva vaselele ifo numba ta iterevya na ifo mbaai ya shia ta miri, amu valolyo vvandu. Nkue namuia: Vammaa ikooya maṛe awo. 6Kake iwe ili kwiterevaa, aka kiṛiń kyafo kya kari. Kwammaa iraya mwaango, kutereve Nde yafo kiṛisiń. Na Nde yafo alolye kiṛisiń akwishuṛyaa na baa. 7Neeli mwiterevaa, manya mutaware iki na iki sha vayavaṛumu. Amu iwo vakusaṛye sheeli vamakii iitiwa kiimba kya wiingi lwa firero fawo. 8Kyasiań namuia: Manya mutavakani nawo. Amu Nde yanu eeshi kilya kimutinye na kitaare mwammutereva. 9Kyasia ini tereveń kuri: Nde yeru kukee ifo iṛuvewu! Irina lyafo liindyo. Umangi lwafo lushe. 10Kilya kukundye kitanike kunu isangeń sheeli kikee itanika ifo iṛuvewu. 11Kutiniinge nnu shoonga teru ta itisindisa. 12Kutitie na sile ta mareko eru, sheeli neese tikee itia valya vantirekyo̱, 13Kutatiotoṛye tiwe nreyoń, kake kutuute fikasha. 14Amu kwakooya mutiaa vandu vengi mareko awo, na Nde yanu wa iṛuvewu amutiaa neeni. 15Kake kwakooya mutatiaa vandu mareko awo, nta na Nde yanu wa iṛuvewu amutiaa mareko anu neeni ndi.
16Lingi mukasinda kuro, manya mutave sha vamakavili, fulya wo vakunarisaa. Amu wo valemaa fisangu, naamu vamanyike vasindye kuro. Nkue namuia: Vammaa ikooya maṛe awo. 17Kake iwe ili kusindye kuro, amba nrwe mafura kwisangyaa na kisangu. 18Amu kutamanyike vanduń sheeli kusindye kuro, kake kumanyikaa ifo kwa Nde yafo ito akee kiṛisiń. Na Nde yafo alolye kiṛisiń akwishuṛyaa na baa.
19Manya mutave vakusańiṛya masaa kunu isangeń. Amu aliwaa nkurukuru na nguraa na manini aremaa numba na iiva. 20Kake fiseń masaa iṛuvewu, mfo kitaare aliwaa nkurukuru na nguraa ana ateefo manini asumaa numba aive. 21Amu alya kufisye masaa afo, wwo na ngoo yafo ikai.
22Kilya kimulikyaa nndu ni iriso. Kyasia kwankooya iriso lyafo ni isha, na vvili wafo woose uvaa nnuru. 23Kake kwakooya iriso lyafo fikashaa, na vvili wafo woose uvaa llema. Kyasia langa yo ikee kari kafo ikawa llema, a llema muni uvaań are?
24Eefo nndu amakii iṛundya womi vavili ndi. Fulya asuaa ulya umwi akunde ulya ungi. Ana akusuranaa na ulya umwi abiṛe ulya ungi. Nta mumakii iṛundya Iṛuva andu emwi na iṛundya masaa ndi. 25Kiimba kya iki namuia kuri: Mutakwareese kya muu wanu kindo muiyaa ana munwaa, nta kya vvili wanu kindo muṛaa. A muu nkindo kinini kita shoonga ndii, na vvili wanu nkindo kinini kita kya iṛaa ndii? 26Lleń ndee ta kwa si ya iṛuvewu te! Nta teeṛaa mbeu ana tiilulaa ndi ana tisańiṛyaa makumbiń ndi. Na Nde yanu wa iṛuvewu yye awuurusaa ndee tilya. A ini ni ini mutiilanyi se? 27A kunu kwanu eefo nndu amakii yengeṛya waasha lwamwi na akwaa ni irambo limwi, na kakutimbiṛita are? 28Na kya iṛaa nki ili mukee ikwareesa nakyo? Kufundeń na fivaṛo fa usakeń sheeli fimiaa fitaṛundaa fitaokaa miseto. 29Niń namuia: Na akwaa ni Salomon utoṛeń lwamwi loose nta aṛaa kinuru sha fivaṛo fi ndi. 30Kyasia maṛe a ifo usakeń ayyo nnu na ndesi akandeeṛwa muroń, Iṛuva amaambika kuro, aengeṛyaa imutania ini se? Nki ili mutankusuraań? 31Kyasiań nta mutakwareese mwinumbuaa: Tikalya ki? Ana: Tikanwa ki? Ana: Tikaṛaa ki? 32Amu valya vateeshi Iṛuva wwo valangye findo fa mikae yo. Amu Nde yanu wa iṛuvewu yye eeshi sheeli muuṛi ifi foose. 33Bookeń ilanga lya mbele umangi lwa Iṛuva na usumani lwayo, na filya fingi foose muniingwaa. 34Kyasiań mutakwareesye fa ndesi, fulya nkonu wa ndesi ukwareesaa na findo fayo. Nkonu woose ukufile na kima kyayo.
လက်ရှိရွေးချယ်ထားမှု
Matayo 6: RWK72
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
