LUKE 24
24
Jesu wí ma nyɛ̀ mà nyini kuu ni be
(Mat 28:1-10; Mar 16:1-8; Jan 20:1-10)
1Katiwlɛʔɛ ki jɛfantutuʔu na ge, cɛɛ à pe kɛri fanʔa deʔe na pe nudanʔa ca ga nì pe dá hanri ge. 2À pe yâ ŋglɛnʔɛ nya pé maʔa kloʔo màʔa laʔa wa fanʔa nó na ge. 3Di pe gâ je wa ge, pe ìn wò fɔlɔ Jesu wi wre nya de wa. 4À pe na pè yugu ki kala na le. Pe kacɛnlɛ, à nabii syɛn ma pan mà bâ yere be pè tanla. Pe drere ti dáa fligi pere pere. 5Cɛɛ à pe fya ceŋge mà pe yɛrɛ culu de. Ki nabii à pe pé po: «Nyaʔa na yé na hɛnwyee ca kuu pe nulala ni le? 6Woò naʔa. Wí ma nyɛ̀ mà nyini kuu ni be. Ye lama to kayoʔo ga na wi dá yo ye ma nyiŋi ga na wi dá bo wa Galile klo ni le,#24:6-7 ma wèle wa Mat 16:21; 17:22-23; 20:18-19; Mar 8:31; 9:31; Luk 9:22; 18:31-33 ni wè. 7mâ yo: ‹Kí ma yala pe Hɛn Pyɔ le hɛnpee pe kyɛrɛ̀ ni, poo kan tipraʔa na, wlɛʔɛ tanriwoʔo na ge, wi ba nyɛ, wi nyini kuu ni be.› »
8À pe lama to wi kayoro ní de, 9mà na nyini wa fanʔa ni ge mà hru mà kɛri mà yáa ki kaʔa kè bɛfu nyu wi hɛɛn kɛ̂ mà kɛ nigbe ma we, ní sɛrifɛɛ pe tɔɔ ní be. 10Ki cɛɛ pe dá bo Mari ní, ŋa Magidala kàʔà woo we, ní Jane nì, ní Mari ní, ŋa Jake wi no we. Cɛɛ pe tɔɔ bee pe dá bo pé ni ge, à pe kayotege yo pitunbee ma be. 11Di ki kayoro da, ti dá bo pitunbee ma be kayofara. Pe ìn dà ba tí na. 12Pyɛri wɔ̀ɔ nyini mà fɛ̀ mà kɛri wa fanʔa deʔe na ge mà yâ jɛlɛ mà wele wa mà kpasyoro tiì nigbe nya wa kpo. Wɔ̀ɔ hru mà kɛri wi go nî ge. Ga kí ma hanri wa ge, àʔa wí fo ceŋge.
Ploʔofɛɛ syɛn ma Jesu nya wa
(Mar 16:12-13)
13Ki wlɛdege na ge, wi ploʔofɛɛ syɛn dá bo na sye kàʔà kà ni pé naʔa yeri Emayusi. Ki kàʔà nì, Jerusalɛmu kàʔà nì, ti kpafoʔo kí ma cilo pii kɛ̂ mà kɛ nigbe kɔ we. 14Kaʔa gee ke dá hanri ge, à pe na ke nyu pè kân. 15Pe da gáa nyu ná kakara wa ná sye ge, Jesu wiì wì tala wɔ̀ɔ flo wa pè tanla mà plɛn pé ni na sye. 16À poo nya, di pe ìn gban bùu cɛn. 17Wɔ̀ɔ pé po: «Nyaʔa kayoro di yé na nyu yè kân ná sye ge?» À pe yere yɛpɛnrɛ ní de. 18Wà dà bo wa ki hɛɛn syɛn ni we, pé noo yeri Klewopase. Wɔ̀ɔ wi po: «Mo nigbe wi má nyɛ wa Jerusalɛmu kàʔà ni ge, mɛ ìn kaʔa gee cɛn ké ma hanri wa ki wlɛrɛ da ni de kɛ?» 19Wɔ̀ɔ pé po: «Nyaʔa kaʔa gɛ?» À pe yo: «Kaʔa gee ké ma Jesu Nasarɛti kàʔà woo ta we kee gɛ. Wi dá bo Nyɛʔɛlɛ li leyoo. Wɔ̀ɔ po fanŋa nì, Nyɛʔɛlɛ ní, hɛɛn pè bɛfu ní pe yɛʔɛ̀ na ge wa wi kaʔa ni, ní wi kayoro ní de. 20Sraʔá farafɛɛ kpandoo ní, wò lagwɔɔ ní à pe kiti kon wí na mà yo wi yala poo kpo. À poo kán tipraʔa na. 21Àʔa hín bo wo dáa honri na pa wí na ceŋge mà yo wiì wi wí bi ba Israyɛli klo woo syɔ be. Mà haʔa ki woʔo na ge, ki kaʔa gee ké ma hanri alaʔa nyɛ ki wlɛrɛ tanriwoʔo gi. 22Ɛɛn di, kiì nì kì bɛfu ní, wò cɛɛ à pèè ma kayoʔo kà yo wo kan, ga kí ma wo fo ge. Pe da gɛrí wa fanʔa deʔe na jɛfantutuʔu na ge. 23Di pe ìn yà wi wre nya de wa fanʔa ni ge. À pe báʔà yo mà yo pe dá mlɛŋɛyee pèè nya wa nɛbo ŋloʔo gi. Ki mlɛŋɛyee à peʔe yo mà yo wí nyɛ nyuwyeʔe na. 24À wò woo pèè ma kɛri wa fanʔa deʔe na ge mà yáʔà nya nɛ pa cɛɛ pe da báʔà yo ge. Di pe ìn dɔ̀ɔ nya.»
25Ki nyiŋi na ge, Jesu wɔ̀ɔ kí yo pé ma mà yo: «E yèé letɔɔ be, kanyɛmɛ na, yoò na pa ticaʔaga Nyɛʔɛlɛ leyoo pe kayoro na de. 26Ki ìn dà bo jiji wi yo Nyɛʔɛlɛ li wofràa wi cɔlɔ ki kaʔa ni ge, wi je wa wi kpɔʔɔmo ni me?» 27Ga ki da nyoŋó wa Nyɛʔɛlɛ li sɛbɛ ni we wi kala na le, mà kpe Mowisi kayoro na fɔ mà bâ no Nyɛʔɛlɛ leyoo pe woro tì bɛfu na, wɔ̀ɔ tì bɛfu ti kɔ̀rɔ́ tyɛʔɛ we pe na.
28Pe dáa sye kàʔà ga ni, pe yâ noʔo na ge, Jesu wɔ̀ɔ kí hanri nɛɛ wí bi gɛri yɛʔɛ̀ na. 29À poo nyɛri mà yo: «Maʔa yaʔa, ma ba drìgì naʔa wo na, mɛjɛn yaa kí na cɛn bì gɔ.» Yebliʔi àʔa na kmo. Wɔ̀ɔ je bì drigi wa pe na. 30Nyiŋi ga na wi gâ glɛn bí li pe ní ge, wɔ̀ɔ bru kpe we mà Nyɛʔɛlɛ syeri le mòo konʔolo mòo kân pé ma. 31Ki nyiŋi na ge, pe yɛrɛ à ti konʔolo pé na. À poo wele mòo cɛn. Wɔ̀ɔ taʔa mâ punŋu pe na kpo. 32À pe naʔa nyu pè ma mà yo: «Nyiŋi ga na wi dáa nyu wo nì wa kloʔò ni ge ná Nyɛʔɛlɛ kayoro ti kɔ̀rɔ́ teri wo na ge, kanyɛmɛ na, wò lama mi dáa firi wo na ceŋge.»
33Ki nyidege na ge, à pe jɛ mà hru mà kɛri Jerusalɛmu kàʔà ni ge mà yâ wi hɛɛn kɛ̂ mà kɛ nigbe nya kpoʔoloboo ní hɛɛn bee ní pe dá bo pé ni ge. 34Ki woo à pe naʔa nyu mà yo: «Kayocɛnŋɛ gi. Wò fɔlɔ wí ma nyɛ̀ mà nyini mà wì tyɛʔɛ Simo na we.» 35Ki hɛɛn syɛn fanna, à pe ga tyɛʔɛ pé na kí ma pe ta kloʔò na ge, ní ga nì pe dá Jesu cɛn we, nyiŋi ga na wi dá bru konʔolo we.
Jesu wí ma wì tyɛʔɛ wi ploʔofɛɛ na be
(Mat 28:16-20; Mar 16:14-18; Jan 20:19-23; Pit 1:6-8)
36Nyiŋi ga na pe dáa ki kaʔa nyu ge, pè bɛfu à pe Jesu nya wa kpo pe nulala ni yerehaʔa. Wɔ̀ɔ kí yo pé ma mà yo: «Nyimi bí bo ye ma.» 37Fyara à ti pe co ceŋge, mɛjɛn pe dáa ki honri mà yo nyìli là li pé ma nya ge. 38Wɔ̀ɔ pé po: «Nyaʔa ma kan yè lama á mi cruʔu ye na ge? Dee di, nyaʔa ma kan yè dihon wí na ye kon syɛn syɛn ge? 39Ye na kyɛrɛ̀ wele de ní na cyeʔe ní ge, yeʔe cɛn ye yo mì tala wi. Ye màʔà na na kpo, ye wèlé, mɛjɛn kara nì, ní kaclere wò nyɛ nyìli ma le nɛ pa yé ma ti nya domi na we.»
40Nyiŋi ga na wi gâ ki kayoro da yo de kɔ ge, wɔ̀ɔ wi kyɛrɛ̀ nì, ní wi cyeʔe tyɛʔɛ ge pé na. 41Pa pe ìn dà gâ gban bì baʔa na lafiʔigbɔmo kala na le, ní ga nì ki da pé fo ge, wɔ̀ɔ pe yugu mà yo: «Hro nyɛ naʔa ye ma yo, jango bì li?» 42À pe fyɔkonʔo kpe fwɔgɔʔɔ màʔa kân wí ma. 43Wɔ̀ɔ kí syɔ màʔa ka pe yɛʔɛ̀ na. 44Wɔ̀ɔ pé po: «Mi dá bo na ki kaʔa gee nyu ge, nyiŋi ga na mi dá bo wa ye nì ge mà yo: Kayoro tì bɛfu da ti da nyoŋó na kala na wa furu sɛbɛ ni we, ní Nyɛʔɛlɛ leyoo pe woo ní be, ní ŋuru sɛbɛ ní we, kí ma yala tì bɛfu ti ba fùnŋù.» 45Ki nyiŋi na, wɔ̀ɔ pe lama nyɛʔɛ me jango pe Nyɛʔɛlɛ kayoro ti kɔ̀rɔ́ cɛn we. 46Wɔ̀ɔ pé po: «Ga kí nyɛ wa nyoŋoʔo Nyɛʔɛlɛ li sɛbɛ ni we kí ga: Kí ma yala Nyɛʔɛlɛ li wofràa wi ba jɔlɔ, wi kù, wlɛrɛ tanriwoʔo na, wi nyɛ wi nyini kuu ni be.» 47Mà yo nɛ: «Pa pe da ki kayoro jari de hɛɛn pè bɛfu ma wi yele na le bì yo kí ma yala pe kruʔu wa pe kapere ma de ti yaʔa pé kan. Pa pe baʔa hli wa Jerusalɛmu kàʔà kiì ni. 48Yèé bee yé ma ki kaʔa nya ge, yé bi baa ke nyu hɛɛn ma be. 49Mi fanna, ga na To wí ma ki nofele kon ye ma ge, mí bi yàʔa trigi ye na. Di kí ma yala ye kò naʔa Jerusalɛmu kàʔà ni ge fɔ bì ba no nyiŋi ga na yé gà ba namuru fanŋa ta ge.»#24:49 ma wèle wa Pit 1:4 ni wè.
Jesu wi krɛlɛ namuru ni de
(Mar 16:19-20; Pit 1:9-11)
50Wɔ̀ɔ pé co mà nyini pé ni wa kàʔà ni ge na sye pé ni fɔ mà yâ no wa Betani kàʔà na ge mà yâ wi kyɛrɛ̀ jrɛʔɛ de mà Nyɛʔɛlɛ wa pe kân. 51Nyiŋi ga na wi gâ Nyɛʔɛlɛ wa pe kân kɔ ge, wɔ̀ɔ jɛ be pè tanla. Nyɛʔɛlɛ à luu kpe mòo luʔu wa namuru ni de.
52À pe noo kpɔʔɔ mà hru mà kɛri Jerusalɛmu kàʔà ni lafiʔigbɔmo nì. 53Pe dáa gori wa Nyɛʔɛlɛ li sràʔá go ni ge nyiŋi kì bɛfu na na Nyɛʔɛlɛ kpɔʔɔ le.
လက်ရှိရွေးချယ်ထားမှု
LUKE 24: NLK10
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Bible Society of Côte d'Ivoire
