LUKE 23
23
Pé ma Jesu troʔo wa Pilate ma we
(Mat 27:1-2,11-14; Mar 15:1-5; Jan 18:28-38)
1Janma mì bɛfu à mi jɛ kpo mà kɛri Jesu ní Pilate krugu we, 2mà yáa baʔa wí na Pilate wi yɛʔɛ̀ na ge mà yo: «Wó ma ki naŋa ŋa nya wí na wò klo hɛɛn pe yuru cɔʔɔ de naʔa nyu pé ma mà yo pò gáa misari fara klòʔo fɔlɔ ma we. Wɔ̀ɔ naʔa nyu nɛ mà yo wiì wí nyɛ Nyɛʔɛlɛ li wofràa, ŋa masa naŋa we.» 3Pilate wɔ̀ɔ wi yugu mà yo: «Mo wi má nyɛ Juwifiyee pe masa naŋa we yo?» Wɔ̀ɔ wí po: «Kí nyɛ nɛ pa mo má maʔa yo ge.» 4Pilate wɔ̀ɔ kí yo sraʔá farafɛɛ kpandoo ma be, ní janma ní me mà yo: «Mi ìn klomo mà nya ki naŋa ŋa na we.» 5Di à pe hanri mà yereʔe na mà naʔa nyu gbanʔa ceŋge mà yo: «Wí ma hɛɛn wa be pè na wi krɛʔɛmɛ nì me wa Jude klɛnmɛ mì bɛfu ni mà kpe Galile klo ni le fɔ mà bâ no naʔamɛ ge.»
Pé ma Jesu troʔo we wa Erɔde ma we
6Pilate wi gâ ki woʔo ga loʔo ge, wɔ̀ɔ pe yugu mà yo: «Ki naŋa ŋa wí nyɛ Galile klo woo wà wi yo?» 7Pɔɔ gáʔà cɛn mâ yo wí nyɛ Erɔde wi klo woo wà wi ge, wɔ̀ɔ yo pe kɛri wí ni Erɔde kan we, mɛjɛn Erɔde wi dá bo wa kpo Jerusalɛmu kàʔà ni ki nyiŋi na ge. 8Erɔde pɔɔ da gâ Jesu nya we, àʔa klan wí ni ceŋge. Mɛjɛn wi dá wi kayoʔo loʔo ge. Wɔ̀ɔ cori bùu nya mà kpe nyifafaʔa na. Wi dáa ki honri mà yo Jesu wí bi yà kafonlo là hanri wi li nya. 9Wɔ̀ɔ Jesu yugu mòo ceʔe kafafaʔagaa ní. Di Jesu wi ìn kayoʔo kà yo.
10Sraʔá farafɛɛ kpandoo ní Furu sɛbɛ cɛnfɛɛ ní be à pe baʔa Jesu na we mà ákpoʔo fafaʔagaa kon mà ke pa wí na. 11Erɔde nì, wi sorasiyee ní be à pe noo faʔara na pè kle wí na nɛ. Ki kruʔu ma, à pe masaʔa dreʔe le wí na mòo nuŋu wa nɛ Pilate ma we.
12Ki wlɛdege na, Erɔde nì, Pilate nì à pe tanma co, ali mà ja bo pe da glú na pè bɛnʔɛ fan ge.
Pilate wí ma Jesu kan poo kpo
(Mat 27:15-26; Mar 15:6-15; Jan 18:39 - 19:16)
13Pilate wɔ̀ɔ sraʔá farafɛɛ kpandoo yeri be, ní lagwɔɔ ní, ní hɛɛn pe tɔɔ ní be mà pe kpoʔolo, 14mà bâ pe po: «Ye dí ban ná kan naŋa ŋa nì mâ yo wí na hɛɛn fanla be ge. À mi bɔ́ɔ̀ yugu mòo ceʔe yè yɛ̀ʔɛ̀ na. Di mi ìn kakloʔo là nya wí na, gee yé yo wí ma hanri ge. 15Erɔde wi ìn yà kaklolo là nya wí na. Mɛjɛn wí moo troʔo naʔa wo ma nɛ. Yeʔe wèlé, kala la lí bi gân poo kpó ge, wi ìn ki kala là hanri. 16Ki kala na, mí buu kmo aple nì bùu yaʔa wii sye.» 17[Mɛjɛn Toromo srɛʔɛ fɛti o fɛti nà wà bí no, ki na po jiji wi fɔ Pilate wi kaso fɔlɔ wà wa pé kan.] 18Di pè bɛfu à pe taʔara teme na mà yo: «Ma ki woo ŋa kpo we, ma Barabasi yrigi, moo kan wo ma.» 19Barabasi wɔ̀ɔ po pe dɔɔ́ le kaso nî, mɛjɛn wi dá hɛɛn pri mà pe wa klo fɔlɔ na we mà hɛn wà kpo. 20Pa Pilate wi dáa ki ca bí Jesu wa we, wɔ̀ɔ ní mà yo pé ni nɛ. 21Di à pe na taʔara mà yo: «Wi kan tipraʔa na. Wi kan tipraʔa na,» 22Wɔ̀ɔ kí yo pé ma tanriwoʔo na mà yo: «Ki naŋa ŋa wí ma nyaʔa kapere tyɛnlɛ hanri? Mi ìn kùʔù kala là nya wí na fyeu. Ki kala na, mí buu kmo aple nì bùu yaʔa wii sye.» 23Di à pe noo nyɛri su mà na taʔara gbanʔa ceŋge mà yo: «Moo kan tipraʔa na.» Pe taʔaraʔa àʔa Pilate wi fanŋa kɔ ge. 24Wɔ̀ɔ yo ga pé ma nyɛri ge, ki hanri ban. 25Ŋa pe dá le kaso nî ga na wi dá hɛɛn pri mâ pe wa pè na mâ hɛn wà kpo ge, wɔ̀ɔ ki woo yrigi mòo kân pé ma nɛ pa pe dá jɔɔ nyɛri ge mà yo pe ya Jesu kpo we mà yala hɛɛn pe nadanma ní me.
Pé ma Jesu kán we tipraʔa na
(Mat 27:32-44; Mar 15:21-32; Jan 19:17-27)
26Pa pe da gáa sye wí ni ge, à pe yâ flin naŋa wà nì pé noo yeri Simo, Sirɛne klo woo wà wi. Wi dá bo wi jɛ́ kere ni na pan. À poo co mà tipraʔa pa ge wi ma mà yo wi pàʔá ni Jesu na we, pee sye.
27À hɛɛn fafaʔabaa ma pa wí na na sye. Cɛɛ fafaʔabaa dá bo na kpele na yoolo wi kala na le. 28Jesu wɔ̀ɔ wa mà krɛʔɛ mà pe po: «Yèé Jerusalɛmu kàʔà cɛɛ be, yò gáa gbele na kala na le. Di ye da gbèlé yè kân ní yè pii ní be. 29Mɛjɛn wlɛʔɛ kà na pan wa, hɛɛn pé bi baa ki nyu bì yo: ‹Cɛɛ bee pé nyɛ cɛbaheyee be mâ po pe ìn pii he bì pe kân pe ŋori ge, ki woo pé nyɛ frɛmɛ ní.› 30Ki nyiŋi na, hɛɛn pé bi baa ki nyu angoro ma de bì yo: ‹Ye to wo na,› bì daʔa nyu nɛ tindinyee ma be bì yo: ‹Ye wo hra.›#23:30 ma wèle wa Ose 10:3; Tyɛ 6:16 ni wè.
31Nà pe da ki woʔo ga hanri titipriri na de, ti waʔara ti woʔo paʔa bo mɛlɛ si?»
32À pe kɛri tipere hanrifɛɛ pèè ní syɛn bì yà pe plɛn bì pe kpo Jesu ní we.
33Nyiŋi ga na pe da yâ no wa deʔe ga na pé na yeri “yugrɔʔɔ deʔe ge”, à poo kán tipraʔa na wa ki deʔe na ge, wiì nì, tipere hanrifɛɛ ní be. Wà dà bo wi kaligi na. Wi tɔ wɔ̀ɔ po wi kamolo na. 34Jesu wɔ̀ɔ yo: «Na To, ma pe kapere yaʔa de pe kân, mɛjɛn ga pé na hanri ge, pe ìn ki kɔ̀rɔ́ cɛn we.» À pe nyaʔala le wi drere kala na le, jango bì ti tiʔibi pe na.#23:34 ma wèle wa Ŋuʔu 22:19 ni wè.
35Hɛɛn à pe yere na wele wa. Juwifiyee pe lagwɔɔ fanna, à pe noo pɛʔɛri noo tyɛʔɛ mà yo: «Wi dáa hɛɛn pe tɔɔ syo be. Nàʔa po wiì nyɛ Nyɛʔɛlɛ li wofràa ŋa Nyɛʔɛlɛ li dá fara ge, wi wì syɔ.» 36Sorasiyee fanna, à pe na pè kle wí na kpo. Pe dá flo wa wì tanla mà yâ finɛgri kan wí ma,#23:36 ma wèle wa Ŋuʔu 69:22 ni wè. 37mà yo: «Nàʔa po mo má nyɛ Juwifiyee pe masa naŋa, ma mà syɔ.» 38Pe dá kayoʔo kà nyoŋo wa wi namuru ni de mà yo: “KI WOO ŊA WÍ NYƐ JUWIFIYEE PE MASA NAŊA”.
39Tipere hanrifɛɛ syɛn bee pe dá hlu wì tanla ge, à wà noo teri mà yo: «Mo ban Nyɛʔɛlɛ li wofràa we yo? Mà ma syɔ, ma wo syɔ.» 40Di wi nibo wɔ̀ɔ taʔara wí na mà yo: «Moò na fyaʔa Nyɛʔɛlɛ na le yo? Àʔa hín bo mo ní wiì nì, yé na cɔlɔ teme na. 41Wòó wó ma yala wò cɔlɔʔɔ ní ge. Mɛjɛn wó na cɔlɔ wò tipere kala na. Di ki naŋa wi ìn tipeʔe kà hàri.» 42Wɔ̀ɔ wa mà krɛʔɛ na nyu Jesu ní we mà yo: «Jesu, nà ma gá ban bí ba glɛn ma masaʔa na nyiŋi ga na ge, ma lama to ná ni.» 43Jesu wɔ̀ɔ wí po: «Mí biʔi yo kanyɛmɛ na, alaʔa nî ge, má bi bo wa na ní frɛmɛ deʔe na ge.»
Jesu wi kùʔù kala
(Mat 27:45-56; Mar 15:33-41; Jan 19:28-30)
44-45Yaagbanʔa na, yaa paʔa da gâ je wɔmo ni ge, yebliʔi àʔa kmo naʔa tra na de fɔ mà bâ no yaakrɛʔɛ na. Kpasyoʔo ga pe dá bwɔ wa Nyɛʔɛlɛ li sràʔá go ni ge, àʔa hlugu syɛn.#23:45 ma wèle wa Nyi 26:31-33 ni wè.
46Jesu wɔ̀ɔ taʔara gbanʔa mà yo: «Na To, mí ma na nyìli le ma kyɛrɛ̀ ni.» Wi gâ ki woʔo ga yo kɔ ge, wɔ̀ɔ ku.#23:46 ma wèle wa Ŋuʔu 31:6 ni wè.
47Sorasiyee lagwɔ wi da gâ ki woʔo ga nya kí hanri, wɔ̀ɔ na Nyɛʔɛlɛ kpɔʔɔ le mà yo: «Kayocɛnŋɛ gi, ki naŋa ŋa wi dí bo hɛnsinŋi.» 48Janma hɛɛn pè bɛfu bee pe dá gboʔolo be ná wele ge, pe da gâ ki woʔo ga nya kí hanri ge, à pe hru na sye na pe digiyɛrɛ kmo, mɛjɛn pe dá bo yɛpɛnʔɛ ní. 49Di Jesu wi cɛnfɛɛ pè bɛfu ní, ní cɛɛ bee ní pe dá jɛ wa Galile klo ni le mâ pa wí na ná sye wì krugu ge, pè bɛfu à pe yere deleʔege na na ki kaʔa wele ge.#23:49 ma wèle wa Luk 8:2-3 ni wè.
Jesu wi leme fanʔa ni
(Mat 27:57-61; Mar 15:42-47; Jan 19:38-42)
50-51Naŋa wà dà bo wa, à pe noo yeri Josɛfu. Wi dá bo Juwifiyee pe kàʔà kà woo pé naʔa yeri Arimate. Wi dá bo hɛnkmaa mà po hɛnsinŋi. Wɔ̀ɔ na Nyɛʔɛlɛ li masaʔa hanni ge. Ali wi dá bo Juwifiyee pe kpoʔolomo kaʔa conrifɛɛ wà dà wi, di wi ìn dàʔa ta bì ba wi syɛnwoo pe honriʔi nì, ní pe kahranʔa na ge. 52Wɔ̀ɔ kɛri Pilate krugu we mà yâ Jesu wi wre nyɛri de wi ma, 53mà yɔ́ɔ̀ trigi wa tipraʔa na ge mòo le kpasyofiʔi ni mòo kpe mà yɔ́ɔ̀ le wa fanʔa kà ni, ga pe da gón ŋglɛnʔɛ na ge. Àʔa po pe ìn je glu bì kpó wà le waʔa nî. 54Ki dá bo acumu na. Fyonriwlɛʔɛ àʔa po kí na cɛn bì hli.
55Cɛɛ bee pe dá jɛ Galile klo ni mâ plɛn Jesu ní we, à pe pa Josɛfu na we na sye mà yâ fanʔa wele ge, mà Jesu wele, pe dɔɔ sinŋí pomo ma na ge, 56mà hru mà kɛri mà yâ nudanʔa ca kpe ní nudanʔa hùnmù nì mà pi tyɛʔɛ.
Fyonriwlɛʔɛ na ge, à pe fyonri nɛ pa Nyɛʔɛlɛ furu kayoro tí naʔa nyu ge.#23:56 ma wèle wa Nyi 20:10; Lado 5:14 ni wè.
လက်ရှိရွေးချယ်ထားမှု
LUKE 23: NLK10
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Bible Society of Côte d'Ivoire
