MATIYUT 25
25
Komologwe ineebe 10 eereegwaarak wakkagak yoragagerak wone
1Yorage nagagirik, Yetut nen ambinom yorage logonet, ”An wage logominggirik, at mbogut paga mendek abu'me piyoorak ti, komologwe ineebe 10 inelampu wuninik ko'nok aap kwe kolage nogo wage me, ka wundi nogogwaarak pogom aret kaamunggup o. 2It komologwe ka wundi nogogwaarak nogo ti, ineebe 5 iniki lek, ndi, ineebe 5 iniki warak me, 3it komologwe iniki lek nogo nen inelampu yigani o'lu iluk toolak wonok nogogwaarak kwe, lek age kenok tooliyak ambi wonok noolik o. 4Ndi, it iniki warak nogo nen perak, inelampu paga yigani tookkologwe, ndi, lek age kenok tooliyak ambi inom kologwe, ee'nuk wundi nogogwaarak. 5Wundi nogo nogogwaarik, kwe kolage nogo waga'lek elaambirik mbareegi, it komologwe nogo wulamo'ndi aganake mbareegi, nogo yereegwaarak.
6Ndi, nogo iniki mbere eeke paga aap ambi nen oone nggwok paga ari logonet, Aap kwe kolage nogo wage yi aret me, wa'nip o. 7Ari mbareegi, it komologwe nogo nen mi'nogo nogogwaarik, inelampu keele nogo ogobakkigiko logonet, 8it iniki lek mendek nogo nen it iniki warak mendek yorogo logonet, Ninayigani abu lek age nagaarik, noguk ari me, kit kinayigani ambi wo'niraanip o. 9Yorogo mbareegwa, it komologwe iniki warak mendek nogo nen, Lek o. Ando mogonogo kit wokkirogwe, nit kologwe, eerugun kenok ti, lek arigin me, kit nen it onggo kunggo menggaarak nogo, inoona kunggola nanip o. 10Yorogo mbareegwa, onggo kunggola nogwe iigak, at kwe kolage nogo wage nagagirik, it pipuk-papuk eereegwaarak nogo inom laago larak noorak nduk, oome unggunuk, tu nareegwaarak.
11Tu nappunuk wonogwe me, it komologwe ando nogo nen wogo nogogwaarik, Ai ninogoba. Tu paa'niyet o, 12yogo mbareegwa, at kwe kolage nogo nen it yorage logonet, Kit an neenggo'lek me, mbaganinip o, yinuk, abet aret yokkiragi, yoragagerak o,” yinuk, at Yetut nen at oone waganggwi nogo yoragagerak.
13Yorage nagagirik, at Yetut nen, ”O ndiyom paga woroorak inom, oonegen ndi paga woroorak inom, nogo kit kineenggo'lek me, kiniki tum wako logonip o,” yinuk, yoragagerak.
Aap ambi ayeloman ineebe 3 eereegwaarak wakkagak yoragagerak wone
(Luk 19:11-27)
14Yorage nagagirik, Yetut nen ambinom yorage logonet, ”An woraagin nogo ti, aap ambi o ambi me noorak nduk eeke logonet, at ayeloman wiirage mbareegi, wogogwaarak me, amindik-amendek unde logorak nduk, wogoragagerak nogo pogom aret o. 15It eeko logorak ineraambe yelok maloppiige nagagirik, aap ambi wu 5000 wogoge, aap ambi wu 2000 wogoge, aap ambi wu 1000 wogoge, eeppege nagagirik, o ambi me nagagerak. 16Nage kagak, at wu 5000 kolagagerak nogo nen yi mendek ndi mendek kunit nage logonet, wu 5000 ambinom nabenggolage, 17ndi, at wu 2000 kolagagerak nogo nen togop aret wu 2000 ambinom nabenggolage, 18ndi, at wu 1000 kolagagerak nogo nen perak, ame nage nagagirik, nggween kabunogo ogoba awu nogo kumaappege, eeppunuk 19nogo apit yippunuk wonogwe me, inogoba nogo iyok paga wage nagagirik, Nawu nogo paga it mande nabenggolagaarak kaamun? yinuk, wiirage mbareegi, 20at wu 5000 kolagagerak nogo aa'nduk owagam wage nagagirik, Nogoba wa. Kat nen wu 5000 aret wo'nereegindak kwe, wu 5000 ambinom nabenggolagarak o. 21Yoge mbareegi, ogoba nogo nen, Naput wa. Kat nayeloman obeelom liirogon eeke menggendak yi, mondok op aret eekendak o. Kamendek mbuuluk paga liippunuk unde wonagandak me, nggwok apit unde logonok nduk, mippagaminggirak logonet, an kogoba nale'nggen kage minggirak nimbirak ndak-ndak kage logonok nduk, mok o.
22Yoge mbareegi, at wu 2000 kolagagerak nogo wage nagagirik, Nogoba wa. Kat nen wu 2000 wo'nereegindak nogo kwe, 2000 ambinom nabenggolarak yi ket o. 23Yoge mbareegi, ogoba nogo nen, Naput wa. Kat nayeloman obeelom liirogon eeke menggendak yi, mondok op aret eekendak o. Kamendek mbuuluk paga liippunuk unde wonagandak me, nggwok apit unde logonok nduk, mippagaminggirak logonet, an kogoba nale'nggen kage minggirak nogo nimbirak ndak-ndak kage logonok nduk, mok o.
24Yoge mbareegi, at wu 1000 kolagagerak nogo wage nagagirik, Nogoba wa. Kogogumbuk logonet, kat awi yarulik kwe, anggen mbangge, ndi, anggen yumbunulik kwe, kuwak eeke, eeke menggendak neenu me, 25nagabiti nen nage nagagirik, kawu 1000 wo'nereegindak nogo nggween kabunogo kumaappereegirak wonagaarak me, wonok wagarak yi, kawu unde kolet o.
26Yoge mbareegi, ogoba nogo nen. Kat nayeloman keebi mbake logonet, maluk lombok eeke menggendak yi, an awi yarulik kwe, anggen mbangge, ndi, awi yumbunulik kwe, kuwak eeke, eeke minggirak keenu me, 27an wage neenok, nawu inom, porogo logomenggaarik, onggo inom, wa woraakit nen, it aakumi inawu nggwok aruwak nduk eeko menggaarak nogo wogoragagimbok wonagagindak o. 28Yoge nagagirik, awuri yorage logonet, Aap yi, togop eekerak me, wu 1000 nogo at eenggi me nen ndinogo, at 10,000 kolegerak nogo wogo'nip o. 29Kit kinamendek wonage kenok, ambinom, luunogo wokkiramenggerak me, kilu-kilu wundigin o. Ndi, kinamendek lek kenok, mbuuluk porogo wonogwe nogo aret ndinogo kolage kaamunggup o. 30An nayeloman obeelom eeriyak kobak kagarak yi, endekem o apit me leenggu maakwi, ineyak nggilik maakwi, eeko menggam time wumbinip yoragagerak o,” yinuk, Yetut nen at oone waganggwi nogo yoragagerak.
O age yobok paga aakumi inowak looninabigin wone
31Yetut wone ambinom yorage logonet, ”An aap aret nda'nagagirak nobaanggi-nobaangge li'luk eekko'nok, it mbogut paga yonggo nugu menggaarak melaikat ninom wage logominggirik, an wone lengganinake minggim tiyanak nogome neegak, 32it mbogut paga yonggo nugu menggaarak melaikat nogo nen aakumi inanebunu lombok an nowagam kuwak eeppiigo mbarumengga, an ndomba unde nen kambing-ndomba pogom leenogo piyaagin o. 33Leenogo piige logonet, it ndomba mendek kenok ti, neenggi abe'nggan piige, ndi, kambing mendek kenok ti, neenggi kwaare'nggan piige, eerigin o. 34-36Piige logominggirik, an nendagembogut aret me, it aakumi neenggi abe'nggan piyaminggirak nogo yorage logonet, An nogoba ale'nggen kinoba pinagi o. An mbi abu me, kit nen mbi wo'nugwi, yi abu me, yi too'niri nogwe, aap nggiru me, wo'nakwi, nayum yirik lek me, yum yippanugwi, andi warak me, pe'neya wogwe, an keele maarak me, kit neya wogwe, eeko nogogutak me, an nogoba nen o mbogut nggween awo wakkaga'lek kagak, kit aap nggwok kinendagembogut logobagip nduk, punogo pinagareegerak nogo ndak-ndak, kit mondok tiyanak logobagip nduk, wa'nip o.
37-39Yorage mbariminggi, it iniki koonak menggaarak nogo nen at yogo logonet, Ai, ninogoba. Kat mbi abu eekkake me, mbi wokkugwi, yi abu eekkake me, tookkiri nogwe, aap nggiru me, wokkakwi, kayum yirik lek me, yippagagwi, ndi, kat andi warak keele maarak wonage me, pekkeya nogwe, eeko nogotak yo'niragandak nogo, mandenom eekkabeegurak me, yagan o. 40Yo'nogo mbarumengga, an nendagembogut nogo nen it nogo yorage logonet, Lek o. Kit nen an nawuri maluk-malak eeginabeegutak nogo ti, an aret ee'nabeegutak o, yinuk, abet aret yokkiragi yoraagin o.
41Yorage logominggirik, ti'nuk, it neenggi kwaare'nggan piyaminggirak nogo yorage logonet. Kit Ala nen pulunogo pinagareegerak yi, 42An mbi abu ee'nake me, mbi wo'nugwi, yi abu ee'nake me, yi too'niri nogwe, 43aap nggiru me, wo'nakwi, nayum yirik lek me, nayum yippanugwi, andi warak keele maarak me, pe'neya nogwe, ee'nako logolik me, yime nen wundi nogo logomonggotik, at Ibilit inom, at awuri apit inom, kani omoonuk wunuk mban ari minggim an nogoba nen ogobakkigirogo piyareegim nogome aret nanip o, yinuk, yoraagin o.
44Yorage mbariminggi, it nen an yo'nogo logonet, Ai ninogoba. Mbi abu eekkake, yi abu eekkake, aap nggiru nage, kayum yirik lek nege, andi warak keele maarak wonage, eeke keegak, mandom ninigen keego nogogurik, yeenggwagirulik teppagareegurak me yagan o? 45Yo'nogo mbarumengga, an nen it yorage logonet, Lek o. Kit nen it aap maluk-malak mendek yi togop eeginaka'lek wonogogutak nogo ti, an aret ee'naka'lek wonogogutak o, yinuk, 46yorage logominggirik, it aap nogo maluk onggo mondok-mondok yagan wako logowak nduk, nappiyaagin kwe, it iniki koonak menggaarak nogo perak, ineenik mondok-mondok logowak nduk, eeginabigin o, yinuk, yoraagin,” yoragagerak.
လက်ရှိရွေးချယ်ထားမှု
MATIYUT 25: WNO
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
