MATIYUT 24
24
”Ala awi wurik langgunogo nappugun o” yoragagerak wone
(Mrk 13:1-2, Luk 21:5-6)
1At Yetut Ala awi wurik me nen wundi nage kagak, at oone waganggwi nogo Ala awi taati wurik nogo titigiruwok nduk, Yetut owagam wogo mbareegwa, 2at Yetut nen it yorage logonet, ”Kit o ya'i wurik abok aret kinigen kogwe ilik lek a? Yugum ambi oba lu'luk aago logorak lek o. Ata, abu tigitogon langgunogo nappugun o, yinuk, abet aret yokkiragi o,” yoragagerak.
”Piyak-payak eerogo aaninggin-paaninggin kinoba pinagagun,” yoragagerak wone
(Mrk 13:3-13, Luk 21:7-19)
3Ti'nuk, puurom Tayitun paga lagangge nagagirik, alik taati kwi'ndak wonage me, at oone waganggwi nogo owagam wogo nogogwaarik, ”Kat yo'niragandak nogo mandenom arigin o? Ndi, kat woroorak inom, o age yobok ariyak inom, panggoni wage kenok, nineenu ariyak nduk, nano eeke kaagun o?”
4-5Yogo mbareegwa, at Yetut nen, ”It aakumi ambik nen an nendage kunit wogo logonet, Keritut ti, an aret o, yinuk, aakumi ambik iniki nomongginabugun me, kit togon nomongginakwi iyo, kiniki tum wako logonip o. 6Wim nggaganggwi, wim nambukwi, eekwi abok kinaruk konenggo logomonggotik, kiniki lek arugup o. Ti arit woramenggerak kwe, age yobok ari wage logonet eeke mbarubok o. 7Aakumi inanebenu ndegek wim nambukwi, aap endagembogut ambi awuri nen aap ambi awuri inom wim nambukwi, o yi awi ndi awi mbi noogelo age, mi nggwok nuk ari, eerigin ti, 8kumi elege enegen paganak yagan wako mengga kwak, togop aret kinoba aaninggin-paaninggin eeppinagage kaamunggup o.
9O ti eyom paga it aakumi nen pigogo kinoba andi-pandi eeppinaganuk, kinooruwak nduk, wogorogwe, kit an noone waganggotak paga, it aakumi inanebunu lombok nen inanini agaket kinombakwi, eerugun o. 10Ti eyom paga aap ambik ineebi nombakwi, at ambi nen at ambi wariyak abok mbangge, at ambi nen at ambi anini agaket ombake, eerugun o. 11Ndi, aap ambik wogo logomenggaarik, we piliret, Ala wone ambi yokkira o, yinuk, aakumi ambik iniki nomoninabugun o. 12It aakumi nen Ala wone taganogo mbo punuk, maluk lombok eekwi ti, nggwok arigin me, aakumi ambik iniki aganggen paga Ala wone mugurok nogo logomenggaarak kwe, iniki miin age logonet, anggon aret aganabigin o. 13Togop aret arit wage kagak kwe, kiniki kwi'ndak nu'lek kiigak, o age yobok yi wage kenok, kinagap ndarigin o. 14Ala abu'me piyoorak obeelom wone yi, yi aakumi ndi aakumi ineenu aruwak nduk, yi awi ndi awi abok aret abu paganogo yoranet nogwe kiinok perak, o age yobok aret arigin o,” yinuk, yoragagerak.
Inoba aaninggin-paaninggin mondok alik lombok eeppiyoorak wone
(Mrk 13:14-23, Luk 21:20-24)
15(Kit liiru mbanak pekkogwe yi, kiniki liippinip o.) ”Ogole warak lombok mendek at Ala wone yorage nagagerak nabi Ndaniyen nen woraagin abok yereegerak nogo, Ala ake leenak minggim taati mi'nari wage kinigen kogo logomonggotik, 16-18kit o Yureya monggotak yi, kiname ugun wonogwe nogo nen kinamendek tilaabaga kola laganggwi, kineyabu me wonogwe nogo nen kinayum kiname kola wogwe, eeriyak mage o. Ata, time nen aret kole mbaganit puurom paga lagit nanu o. 19O ti eyom paga it kumi inabila inom, inaagalogwe awo inelak kuninakwi inom, ti perak, inabuwa o. 20Kit kole mbaganiyak nogo o mayu tit kunik eeke paga ilik, tamban eekwi paga a? age kero, tamban mban eeko logonip o. 21At Ala nen yi mendek ndi mendek wakkagagerak kuli nen, yogondak kuli aakumi inoba aaninggin-paaninggin eeppiigo nogogwaarak kwe, ti we mbuuluk negen aret eeppiigo nogogwaarak. Yogondak kunduk mbuuluk aret eeppiigwi kwe, o ti eyom paga kinoba aaninggin-paaninggin alik tam warak lombok eeppinagage kaamunggup o. 22Aaninggin-paaninggin kinoba pinagarak eyom nogo, Ala nen kuli panggo pi woraagin lek kenok, aakumi inagap ndarigin lek abok aret inoorigin me, at Ala nen at apuri miirogo leeninabeegerak mendek nogo inookwi iyo, kuli pigin aret o.
23Ti eeremenggerak kagak, aap ambi nen, Keritut nogo yi kaanip o. Ndi, ambi nen, Keritut nogo, ti kaanip o, yokkirogwe iinok, kiniki abet aret mbarubok o. 24It ando nen pilit wone yokkirogo logonet, Keritut nogo an aret o, ndi, Ala wone yokkirogo nogogwaarak mendek nogo ti, an aret o, yinuk, agan wogo logomenggaarik, It Ala apuri miirogo leeninabeegerak nogo nomoninaburak op kaamun ilik? yinuk, nomoninabuwok nduk, inagabiti warak mendek inom, eerubok mendek inom, eerumenggaarak kwe, 25ti awo eeka'lek kagak wone yi paganogo yokkirage me, kiniki liippinip o.
26It nen, O karume aakumi lek me wonage o, yokkirogwe iinok, pekka nogwe, Oome aken time agaarik o, yokkirogwe iinok, abet mba'nuk pekka unggwogwe, eerubok o. 27Oonegen alome nen o yabok pindanggegetak abinak o eneeri-ambut nok woreni nage minggi kwak, an aap aret nda'nagagirak woroorak nogo togop aret eerigin o.
28Wam pili agaatak wonage me nogome aret ti'neebon ninggiko menggaarak o,” yinuk, yoragagerak.
”An aap aret nda'nagagirak woraagin” yoragagerak wone
(Mrk 13:24-27, Luk 21:25-28)
29Yorage nagagirik, ”Kineebe aaninggin-paaninggin eeppinagago mbarumengga, oonegen apit age, tut abinak lek age, laaluguragan mbogut paga nen nggaru-nggaru nggween paga wambit wage, it mbogut oolo yime inomaawi menggaarak nogo, inaganak nuk irage, eerigin o. 30Eeke mbariminggi, an aap aret nda'nagagirak woroorak ineenu ariyak mendek ambi mbogut paga time eeke kenok, it aakumi nggween paga inanebunu lombok nen leenggu maakwi iigak, an aap aret nda'nagagirak nogo nobaanggi-nobaangge li'luk eekko'nok, nomaawi warak logonet, mbogut paga ndugwi enggela'me wage neyaagun o. 31Ndi, an nen it nayeloman mbogut paga yonggo nugu menggaarak melaikat nogo nappiige logonet, mbuti luu'ngget paga kuum-keek ari kenok, an napuri miirogo leeninabeegirak nogo o alom-alom ilin-nggut nen aret kuwak eeginabugun o,” yinuk, yoragagerak.
Eyo ara paga eegu laarogo yoragagerak wone
(Mrk 13:28-31, Luk 21:29-33)
32Yorage nagagirik, wone eegu laarogo ambi yorage logonet, ”Eyo ara anggup labenikit nduk eeke menggerak nogo kiniki wakkaanip o. Anggup mbilangge nagaatik, labenikit nduk eeke kenok, O kinikit nduk panggo yegerak o, yogo menggaarak nogo pogom, 33Togop eerigin o, yinuk, yokkiragarak nogo, eeke kinigen kogo logomonggotik, Koorok panggo yegerak kogo o, yinuk, mbarumunggup o. 34Kit yogondak wonogwe yi, awo lek aga'lek kiigak eeriyak abok yokkiragarak nogo, a'me lik ari kaamunggup o, yinuk, abet aret yokkiragi o. 35Mbogut-nggween yi, lek arigin aret kwe, an noone ti perak, lek arigin lek mondok aret logogin o,” yoragagerak.
”Ti eyom woroorak kineenggo'lek o,” yoragagerak wone
(Mrk 13:32-37, Luk 17:26-30,34-36)
36Yorage nagagirik, ”An aap aret nda'nagagirak yi, o ndi eyom paga woroorak inom, oonegen ndi paga woroorak inom, nogo aakumi abu ineenggo'lek aret o. It mbogut paga yonggo nugu menggaarak melaikat kunduk, ineenggo'lek aret. Ndi, an Ala aput kunduk, neenggo'lek mban aret o. An nogoba perak, alik eenu menggerak o. 37It aakumi aap Nu wonage kagak eeko nogogwaarak nogo pogom, an aap aret nda'nagagirak woroorak eyom paga togop aret arigin o. 38It yi nggwok awo yenggenit lagangga'lek kagak, mbi nunggwi, amburu nunggwi, aap nen kumi kologwe, kumi nen aap kologwe, eekwi iigak, at Nu nogo yiiro wurik me unggwagagerak. 39Unggwage mbareegi, it aakumi iniki we ugun kobak iigak, yi nggwok yenggenit lagangge logonet; it ineebe apit yi ndonggoninabeegerak nogo pogom, an aap aret nda'nagagirak woroorak eyom paga togop aret eeginabi woraagin o. 40O ti eyom paga aap mbere imbirak yabu eekwi me, ambi wagangge, ambi teppege, eeke kaamunggup o. 41Ndi, kumi mbere imbirak mbi worakwi me, ambi wagangge, ambi teppege, eeke kaamunggup. 42Togop me, kinogoba endagembogut nogo, o ngge eyom paga woroorak kineenggo'lek me, kiniki tum wako logonip o. 43At aap awi unde nen, Yogoot iyagalo ne ndi eyom paga woraagin, eenu a'netak en, tu paappunuk, amendek kiraari unggwage kero, nogo yega'lek mondok-mondok tum wake logonetak o, yinuk, kineenu a'nip o. 44Togop me, an aap aret nda'nagagirak yi, kit nen. Ne ndi eyom woroorak, mbaka'lek kiigak, woraagin aret me, kit mondok pipuk-papuk aago logonip o,” yinuk, yoragagerak.
Aap ambi nen ugun-ugun eeke, ambi nen li'lak eeke, eereegwaarak wone
(Luk 12:41-48)
45Yorage nagagirik, ambinom yorage logonet, ”Ti kenok, aap nggwok ayeloman ambi apuri inarum logonet, inambi noorak wogorage logowak nduk, mippereegerak iniki warak yabu li'lak eeke menggerak nogo ta o? 46Ogoba nen ayeloman togop eeke me ka wage kenok, ayeloman iniki ale'nggen arigin o. 47Ogoba nen at amendek abok aret ayeloman nogo unde logowak nduk, mippigin o, yinuk, abet aret yokkiragi o. 48Ndi, aap ayeloman obaabut abu maluk ambi nen, Nogoba elaambirik logonuk woraagin mbaki o, yinuk, 49ayeloman ando nogo yawi inooke, it amburu nenok, kumili aganako menggaarak mendek inom lambunik logonet mbi nunggwi, amburu nunggwi, 50eeke kenok, aap ayeloman nogo nen, Nogoba ne ndi eyom paga woraagin o, ndi, oonegen ndi paga woraagin o, mbaka'lek ugun kobak kagak wage logominggirik, 51ayeloman nogo eebe nibik-nabek mbanogo it aakumi iniki laakot logonet, eeko menggaarak piige minggim nogome nappemenggerak logonet, leenggu maake, eyak nggilik maake, eeke logogin o,” yinuk, yoragagerak.
လက်ရှိရွေးချယ်ထားမှု
MATIYUT 24: WNO
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
