MAREKÙT 8
8
Yesùt en apùnì logolek ap enek inebe 4.000 nen sùpùrùk seik-peik hogo wogisasike wene
(Mat.15:32-39)
1Atì'nogo hagasukwama nen ineki hamùlùgat aike welagaukwasik en, apùnì logolegat hobuk Yesùt oba atogosi wagaukwa. Atì'nogo wagaukwasik sùpùrùk motok lek agaikomo re, nena mene na heat haga'lagaike. Atìnogo haga'lagaikomo re, at Yesùt en agoromì ane wanhì lagaukwa mene amanogo waisasikomo wagaukwama re, mel yogoisasike:
2“Nagoromì yì sani. It apùnì logolek yoma ninom nineki hìnagan oba nogo ogosi'mo nogo nen he, inapùrùk motok lek agama, nena mene nogoin heat haga'lagama werek atì nen, netawì nen netaùken hiselhe.
3It sùpùrùk welegat inaua laksamo, it he'na inaua walegat en wagaikasi'mo re, ebekalem laganem ya koranga ta koranga lanogo,” ìlùk yogoisasike. 4Atì'nogo yogoisasikomo at agoromì ane wanhì lagaukwa mene amanogo nen he, mel yogosukwa:
“O leimo apùnì inawì wùrìk motok le'ma yoma, it inebe apik yoma sùpùrùk horoti mene inalabut ning hogo noagalùk, ebe koma mene waganogo melagisasak. Mea o,” ìlùk yogosukwama re, 5at en he:
“Hit sùpùrùk horoti mene aike mìren hesogo welagep,” ìlùk hinok wogisasikomo re, it en he:
“Lek o. We, ebe 7 nen hesogo welago,” ìlùk yogosukwa. 6Atì'nogo yogosukwama, at en he, apùnì apik atogorek welagaukwa mene amanogo kweangma hù'lasuagalùk yogoisasike. Yogoisasikesik sùpùrùk horoti mene 7 nen aremnogo ekim wanhikesik he, Ala hai warogo re, eki nen sùpùrùk horoti mene aremnogo kùrogo apùnì logolek amanogo sùpùrisoagalùk, agoromì ane wanhì lagaukwa mene amanogo wogisasikomo sùpùrisasukwa. 7Sùpùrisasukwasik he, ikan eagwìtek mene we, hamùlùgat aike welagaikomo, Yesùt wogosukwama, Ala hai warogo atì'nogo sùpùrisoagalùk yogoisasike. 8-9Atì'nogo yogoisasikomo re, it en sùpùrisasukwama nen he, inalabut ning hogo nasukwa. Apùnì inebe logolegat ineki wenagasogo re, 4.000 hake nasukwasik, ato titelogo hesukwama re, Yesùt agoromì nen mùl ugu 7 nen kalogo hesukwa. Atì'nogo hagasukwama nen, Yesùt en apùnì amanogo inauakwe laksasike. 10Laksalùk aremnogoat, Yesùt agoromì ane wanhì lagaukwa mene amanogo inomat i so ba kìlìk so warogo o Talamanuta wùlìbi wagaukwa.
Ap Parisi mene nen he, “Nit en hùthagagùkwe, hat en elalin mene aike hagasin he,” ìlùk Yesùt yogosukwa wene
(Mat.16:1-4)
11At Yesùt lak o Talamanuta wùlìbi wagaukwama re, ap Parisi mene aike Yesùt inom wene ane ìkì logolìk oabùt paluogolùk, oba wagaukwasik he, mel yogosukwa:
“Hat hebe Ala nen lakhagei wagama wagen halok he, nit en hùthagagùkwe, hat en elalin mene aike hagasin he,” ìlùk yogosukwa. 12Yogosukwama re, at ane agaukwak a'marogo isikesik he, mel yogoisasike:
“Hit apùnì o yogotak welagep yoma nen ìkì logolìk he:
Nit en hùthagagùkwe hat en elalin mene aike hagasin he, ìlùk yogoneti lagep yoma re, nahalok. An nane eberogoat yogohisak:
Hùthanuageip ìlùk an nen elalin mene aike hagasigin motok lek o,” ìlùk yogoisasike. 13Atì'nogo yogoisalùk he, it apùnì amanogo o atoma heraksalùk i so ba kìlìk he, so warogo hobuk i aik ìlì ba wùlùpukwa.
“Ap Parìsì mene mel. Herotet mel, inawene re, eken sùpùrùk horoti mene hisuagalùk a'la pelaparek mene atì hake,” ìlùk yogoisasike wene
(Mat.16:5-12)
14I yekelek a'nogo aik ìlìbakwe wùlùbuogolùk he, Yesùt agoromì amanogo sùpùrùk horoti mene lì'mathùlùk omakeat enek i so a'la wolok wùlùpukwa. 15Wùlùpukwasik he, Yesùt en inasuk warogo mel yogoisasike:
“It ap Parisi mene mel, at Herotet mel, eken sùpùrùk horoti mene hisuagalùk a'la pelaparek a'nogo mene hake werek atì ba weagathinabinogo ìlùk, hinepe hebelogo logoino,” ìlùk inasuk wasike. 16Inasuk atì'nogo wasikomo re, it-it ìkì logolìk, mel isukwa:
“Nit sùpùrùk horoti mene lek atì nen ike hìgì,” ìlùk ìkì lagaukwama re, 17at Yesùt en enagat hùrisasikesik he, mel yogoisasike:
“Hit-hit ìkì logolìk,
Nit sùpùrùk horoti aike lek atì nen ike, ìlùk wene ìkì lagep atì nahalok. Hit oan hinelu agì'legat hùthìgì'legat logolìk, hinetaùken kagale'lek abirat welagep yoma rì! 18-19Hit he, hineileken werek meneat he, hìgì'legat, hinesako werek meneat he, holhì'legat, logolìk ìkì lagep yoma rì! An nen sùpùrùk horoti mene ebe 5 nen kùrogo apùnì logolegat 5.000 nen wogisìgì a'nogo hina'la lì'mathegep a? It en nekasik titelogo hagama mùl ugu mene mìren apem hesogothìgìk kalogo hegep nogo,” ìlùk yogoisasikomo, it en he:
“12 nen kalogo hogo akìgì,” ìlùk yogosukwama, 20at en he, aike mel yogoisasike:
“Nen, an nen sùpùrùk horoti mene ebe 7 nen kùrogo apùnì logolegat 4.000 nen wogisìgìma nekasik titelogo haga mene mùl ugu mene mìren apem hesogothìgìk kalogo hegep nogo,” ìlùk yogoisasikomo, it en he,
“7 nen kalogo hogo akìgì,” ìlùk yogosukwama, 21at en he:
“Mene re, hit wene oan hùthìgì'lek welagep yoma rì!” ìlùk yogoisasike.
Yesùt en ap eileken mùm o Pesaira mene hano hagasike wene
22Yesùt agoromì inom wene atì'nogo ìlìk ìlìk he, o Pesaìra wùlùpukwa.Wùlùpukwama re, it apùnì o atoma mene nen he, ap aike eileken mùm mene Yesùt en eki hakoagalùk oba wolok wìrìk he, inane inelageik ane yogosukwa. 23Yogosukwama re, at en ap atì eki hagasogo wolok o silimo nen legeta'ma wùlìpike. Wolok wùlìbìk he, wesi eileken oba hìlìk he, eki hakìkì logolìk mel yogosike:
“Yogotak heileken yì mene tì mene aike lakhìkì lagen a? Lek a,” ìlùk hinok oba wokhasikomo re, 24at eileken lakhìlìk he, mel yogosike:
“Apùnì laganem isìgì meneat he, e he a, akìgì,” ìlùk yogosikomo re, 25at Yesùt en hobuk eki eileken oba hakasikomo re, eileken tek ìlìk hanao arìk he, yì mene tì mene tùkùm hogo hasike. 26Eileken tùkùm hogo hasikomo, at Yesùt en he, mel yogosike:
“O kota hobuk kìgì'lek pìkìrat lan o,” ìlùk aua lakhesike.
Peterùt en, “Hat hebe Karìsùt at o,” ìlùk pak hogo Yesùt yogosike wene
(Mat.6:13-20; Luk.9:18-21)
27Ati'nogo haga'lùk, at Yesùt agoromì ane wanhì lagaukwa mene amanogo inom, o atoma nen o kota Kaisarea ap Pilipi nen hùkothesike ba atoma era'lukwe o sili hamùlùk mene aike ebe lopok ha'larik lùogoluk lagai wagaukwa. Lagai waga logolìk he, agoromì amanogo inoba hinok wanhì logolìk he, mel yogoisasike:
“It apùnì yoma nen, an nebe hesik ìkì logolìk he, sa ìlì'lùgì nogo,” ìlùk yogoisasikomo re, 28it en he, mel yogosukwa:
“Apùnì aike nen he,
At ebe re, Yohanet ima pelaginapì lagaike mene a'nogo, ìgìk it aike nen he,
At ebe re, Elia ìgìk, it aike nen he,
At ebe re, ap Ala ane yogoisìkì lagaukwa mene amanogo aike ìgìk, ìlì'lùgì,” ìlùk yogosukwa. 29Atì'nogo yogosukwama at en he:
“It en atì'nogo ìlì'lùgì meneat he, hit enek he, an nebe hesik, sa ìkì lagep nogo,” ìlùk yogoisasikomo, at Peterùt a'nogo nen he:
“Hat hebe re, Karìsùt nit telninabuagalùk Ala nen lakhei wesigin ìlùk abok yogonisasike a'nogoat o,” ìlùk isikomo re, 30at en agoromì obogat yogoisìkì logolìk:
“An nebe hesik ìke atì re, hit en apùnì aike motok yogoisagùp o,” ìlùk inasuk wasike.
At Yesùt en he, “Yì ùkùm tì ùkùm noba hìlìk noasugun o,” ìlùk emakum yogoisasike wene
(Mat.16:21-28; Luk.9:22-27)
31At Yesùt en atì'nogo inasuk wasikesik he, wene hobuk aike mel yogoisasike:
“An abat ta'lasi wagagi a'nogo re, it ap inalùgetek mel, Ala esewerek mene inogogì kaintek mel, Ala ane helal waganek esewerek mene mel, inom en an nebe inabìt arik yì aik tì aik apigat haga'nabìk, nebe noasugùn o. Noasumo nebe neki pìre warek logopik he, aike nen, neluk asigin o,” ìlùk 32agoromì amanogo pak hogo yogoisasikomo re, at Peterùt en, Yesùt ebe alepma wolok lagaikesik he, mel yogosike:
“A! Hat egen atì'nogo ùgùn o!” ìlùk asuk wasikomo re, 33at Yesùt en agoromì ane wanhì lagaukwa mene aike amanogo epe hebek hogo eileken lagìsìlìk he, Peterùt mel ìlùk wenagasike:
“Hat Ibilit hìgì. Ala a'la akikerek mene higit hogo ebetì'lek, we, apùnì nen akagarek hak ebetlì lagen yì riì! Hat hebe nelokoma yoma logogùn. Hela Ian o,” ìlùk wenagasike 34Wenagasikesik he, apùnì logolek amanogo inom, agoromì ane wanhì lagaukwa mene amanogo inom, waisasikomo wagaukwama re, mel yogoisasike:
“At sa nen an nopolik nìkì logoigìlùk halok he, oabùt okawerek hesik hagaterek mene atì,
Nabìt, ìlùk heraksalùk he, e ba menhisìlìk inoatarek mene atì ageiyo meneat wolok he, an nopolik nìkì logoigìlùkk wesuak o. 35Sa nen,
An nebe neluk logousak walok, ìlùk ebe elele helegein halok he, wa'larik nong akegein o. Meneat he, sa nen, an nebe hesik mel, hano wene yì hesik mel, wa'lasigin halok he, ebe telegein o. 36Atì'nogo meneat he, sa nen, yì mene tì mene kweangma mene obogat esewerek asigin meneat he, ebe nong asigin halok, at en he,
An aike elok sabùrogo hakìgì, usak nogo? Motok lek o. 37Ebe nong asigin atì, obùlù'mo nena mene eperak okosusak nogo. Mea o. 38Apùnì yoma inoabùt weak logolìk Ala ebe inom lopok hogo welagì'lek, yì weak tì weak hagarì'lùgì mene atì hinomat logolìk, it ineilhanem sa nen,
An Yesùt agot, ìgìk, an nane atì yogoisìgìk, u re, ape ekalì halok he, an abat ta'lasi wagagi a'nogo hobuk nopase hogorato motok welagaikarek hak haga'la'lùk, it malaikat Ala okawerek hesik yoko pelaksa wagarek mene amanogo ninom wìrìk he,
လက်ရှိရွေးချယ်ထားမှု
MAREKÙT 8: LAIDNI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
