MAREKÙT 10
10
“Hìmìap waganek mene lologo heraksasak motok lek o,” ìlùk yogoisasike wene
(Mat.19:1-12; Luk.16:18)
1At Yesùt en wene atì'nogo yogoisalùk, o atoma hebùlùk, o Yurea pisikesik, i Yoretan aik ìlì bakwe wùlìpike. Wùlìpikomo re, apùnì logolegat hobuk at oba atogosi wagaukwama re, wene ninhùp-nanhùp yakùlisìkì lagaike hagat yakùlisasike. 2Yakùlisikenem he, ap Parisi mene aike Yesùt oba wagaukwaat. Wagaukwasik he, mel yogosukwa:
“Yesùt. Ap en he, hìgì waganek mene lologo hebisasak elok a? Mea a,” ìlùk oabùt paluogolùk hinok wanhukwa. 3Hinok atì'nogo wanhukwama, at Yesùt en he, mel yogoisasike:
“At Musa nen he, wene nìkì'nogo hinasuk wasike nogo,” ìlùk isikomo, 4#Ul.24:1-4 it en he, mel yogosukwa:
“At Musa nen, wane ninasuk watì logolìk he, mel yogoisasike:
Ap aike nen hìmì waganek mene heraksagalùk halok he,
He yì hebe nabìt. Arat herakhagagì o, ìlùk helal waganogo wogorìk he, elok heraksasagat o,
ìlùk yogoisasike,” ìlùk Yesùt yogosukwa. 5Atì'nogo yogosukwama, at Yesùt en he, mel yogoisasike:
“At Musa nen,
Atì'nogo elok hagatì logousak, ìlùk, inasuk warogo helal wanhike atì re, hit hina'la motok pùk logolìk yogohisikenem hinasuk holusak motok mea atì nen, atì nenat yogoisasike. 6#Kej.1:27, 5:2 Atì'nogo yogoisasike meneat he, ero ba Ala nen elalinapike atì hesik he, helal mel ìlùk waganek werek:
Ap elalhìk, he elalhìk, elalinapike.
7 #
Kej.2:24 Ati nen, ap en, agosa opase hebisalùk agwe eperak hano logolìk he,
8it atì, inebe pìre meneat he, omakeat logouak o,
ìlùk isikomo helai waganek werek atì nen he, hobuk it atì inebe pìre hùk. Omakeat agaikasik werek o. 9At Ala nenat atì'nogo eperak hù'nogo hisasikesi'mo re, it apùnì inokawerek en tetelasak motok lek o,” ìlùk yogoisasike. 10Atì'nogo yogoisalùk he, at agoromì ane wanhì lagaukwa mene amanogo inom ouma kìlìk, Yesùt oba hinok wanhì logolìk mel yogosukwa:
“Wene yogoisegen atì ebe nìkì'nogo. Sekek hogo yogonisan,” ìlùk oba hinok wanhukwa. 11Hinok wanhukwama, at Yesùt en he, mel yogoisasike:
“Ap sa nen, agwe waganek mene lologo heraksìlìk he, he hunigat mene aike wanhe halok he, agwe alep mene atì eil salogo, agwe hobuk mene eperak pailagat hagasugun o. 12Nen, it hìmì sa nen inagonì waganek mene heraksalùk ap hunigat mene aike woginabi laga halok he, pailagat hagatesik werek o,” ìlùk yogoisasike.
“Yekerùgì magatek atì noba we'nìk,” ìlùk yogoisasike wene
(Mat.19:13-15; Luk.18:15-17)
13At Yesùt en, wene atì'nogo yogoisasikesik were'ma, it apùnì aike nen yekerùgì magatek mene Yesùt en eki hagisoagalùk oba wogisek wagaukwa. Wagaukwama re, at agoromì ane wanhì lagaukwa mene amanogo nen wenagisasukwa. 14Atì'nogo wenagisikenem, at Yesùt eileken isìlìk a'mage lagalìk he, mel yogoisasike:
“Apùnì inoabùt it yekerùgì arì inoabùt atì hake haga'lasugun halok he, Ala nen awe a'ma hisikere'ma atoma esewerek asugun atì nen he, yekerùgì magatek aroma an noba we'nìk. Wene palhe hùk o. 15Sa nen, yekerùgì magatek mene Ala nen awe a'ma hisikerek wene atì wìlìk kagarek atì hak kìgì'lek halok he, kigin motok lek o, ìlùk eberogoat yogohisìgì,” ìlùk yogoisasike. 16Ati'nogo yogoisasikesik he, yekerùgì magatek amanogo inebe lopok agoumo woginabìk eki inùkùloak sebelogo, apùnì nen mokareke wogisagarek atì hak, at en he,
“Ala nen hanothinapì logouak,” ìlùk woginabìk yogoisìlìk lagaike.
Ap aike agarok apik mene Yesùt oba wagaike wene
(Mat.19:16-30; Luk.18:18-30)
17Wene atì'nogo yogoisalùk he, at Yesùt o atoma nen kwe pìkìt lagalùk laganem, ap aike humusegat oba wagaike. Wagaikesik eitep awì yagasogo awe a'ma hù'lasi wìrìk he, mel yogosike:
“Guru noe. Wene yakùlnisìkì lagen atì, hat hano o. An nabùlal-habùlal haga'nabuak en he, an noabùt nìkì'nogo hagatì logousak,” ìlùk yogosikomo, 18at Yesùt en he, mel yogosike:
“Hat hano o, ìlùk yogoneten atì nìkì'nogo nen yogoneten At aike hana lek o. We, Ala aligat hano o. 19#Kel.20:12-16 Wene at en,
Yì'nogo haga'no, tì'nogo haga'no, ìlùkk ninasuk watì logolìk, mel isikomo werek:
Apùnì inebe inoasusak lek o. Pailak haksasak lek o. Yogot wanusak lek o. Hinapeliagat inabok palusak lek o. Lalinabusak lek o. Hinopase hinagosa inane hologo agaugerinapì logousak o,
ìlùk ninasuk wasike wene a'nogo hat heluat o,” ìlùk yogosikomo, 20at en he, mel yogosike:
“Noe. Wene yogoneten atì, obogat he, an nebe yekerek oba nenat nasuk hologo higit hogo hagatìrek meneat o,” ìlùk yogosikomo, 21at Yesùt eileken oba hìlìk etawì arìk he, mel yogosike:
“Hat he, wene omakeat enek aike hagatì'lek welagen o. Hat yoma nen lìlìk he, hagarok yì mene tì mene atoma obogat it aike inoba abasi lan o. Abarìk he, oko wokhesugun mene atì, it apùnì aike inagarok lek inelageik mene atì sùpùrogo wogisano. Atì'nogo wogisegen halok he, hat pogot oba mene hùkoat esewerek asigin o. Halok, atì'nogo arat sùpùrogo wogisalùk he, an nopolik nìkì logoinok en we'no,” ìlùk yogosikomo, 22wene atì asuk holhìkesik he, agarok motok api'mo nogo nen he, elokoken age lagalìk he, a'la weak a'lùk lagaike. 23Lagaikomo, at Yesùt en he, agoromì ane wanhì lagaukwa mene amanogo eileken isìlìk lagaikesik he, mel yogoisasike:
“Apùnì inagarok apik mene Ala nen awe a'ma hisikere'ma atoma nìkì'nogo ku heat o,” ìlùk yogoisasikomo re, 24wene yogoisasike atì ba inayùk agaukwa. Inayùk agaukwama, at Yesùt en hobuk mel yogoisasike:
“Nagoromì. Ala nen awe a'ma hisikere'ma atoma nìkì'nogo ku heat o. 25Wam unta huko me atì re, lisu eketma kelabumo elok kusak meneat he, it apùnì inagarok apik mene atì Ala nen awe a'ma hisikere'ma atoma nìkì'nogo kusak motok mea o,” ìlùk yogoisasike. 26Atì'nogo yogoisasikomo, it inayùk apik agaukwasik, it-it mel isukwa:
“Halok he, Ala nen apùnì sanì hak elok telinabusak he,” ìlùk isukwa. 27Atì'nogo ikenem, at Yesùt eileken it inoba hìlìk he, mel yogoisasike:
“Apùnì nen hagasusak motok mea meneat he, Ala nen hagasusak mea hùk. At en yì mene tì mene hagasusak elok enek o,” ìlùk yogoisasike. 28Ati'nogo yogoisasikomo at Peterùt en he, mel yogosike:
“Mene re, nit hat hopolik nìkì logouogolùk yì mene tì mene obogat heraksalùk wagosik nìkì lago mene yì nek he, nìkìnik,” ìlùk yogosikomo, 29at Yesùt en he, mel yogosike:
“Nane eberogoat yogohisak. Sa nen, an etawì nen, wene hano wene yì walok en, awì wùrìk mel, oe agot mel, erùgì mel, agosa opase mel, againapùrì mel, eyabu siok mel, heraksalùk waga halok he, 30atì ebe lopok obùlù'mo re, yogotak ya awì wùrìk mel, agaiya'lak mel, erùgì mel, agosa mel, againapùrì mel, eyabu siok mel, apigat 100 hake wogoto kolek he, apùnì nen weagathìkì logogunat o. Weagathiko were'ma, hobuk o wùrep oba haga'lasigin atì haga'laga halok he, nabùlal-habùlal wogosiginat o. 31Atì'nogo meneat he, it apùnì o yogotak inetagewerek mene logolegat he, hobuk inetage lek asigin. Nen, it aike yogotak inetage lek werek mene inetagewerek asigin o,” ìlùk yogoisasike.
“An noasugun o,” ìlùk eki pìre ba yogoisasikesik en, hobuk aike yogoisasike wene
(Mat.20:7-19; Luk.18:31-34)
32Hobuk he, at Yesùt atì'nogo yogoisalùk, agoromì ane wanhì lagaukwa mene inom o Yerusalem puogolùk, kwe ebekalem pìkì logolìk he, at Yesùt kwe wanhikomo it agoromì amanogo inayùk arìk hogorasukwa. Nen, it apùnì aike inopolik pìkì logolìk inayùk agaukwaat. Atì'nogo inayùk arìk, pisukwa pisukwa it ap inebe 12 nen amanogo inalepma hek hogo wogisek pìkì logolìk, at en he, mel yogoisasike:
“An hobuk yì'nogo haga'nabugun, tì'nogo haga'nabugun,” ìlùk yogoisìlìk pisike. 33Atì'nogo yogoisìkì logolìk he, mel yogoisasike:
“Nagoromì. Nit yogotak o Yerusalem pìkì Lago. Arat pìlì'mo nen he, an abat ta'lasi wagagi a'nogo re, ap en yoko lìlìk, an nebe it ap Ala esewerek inogogì kaintek mel, Ala ane helal waganek esewerek mene mel, ineki ba hanumo ap aike nen noasuagalùk ùkùm noba hìlìk he, it en it ap etakwe mene ineki ba hanugun o. 34Atì'nogo hanumo re, it en inane kerethìgìk yogonetik, wesi hanhìk, tùgì labìsake noatìk, ìlìk he, nebe arat noasugun o. Noatenem he, neki pìre warek logopik en, aike nen neluk asigin o,” ìlùk yogoisasike.
Yakobùt Yohanet eperak Yesùt aike kìno yogosukwa wene
(Mat.20:20-28)
35Yesùt en wene atì'nogo yogoisasikesik were'ma re, ap Sepeteùt againapùrì Yakobùt Yohanet eperak Yesùt oba borok hogo wagaukwasik he, mel yogosukwa:
“Noe. Nit en aike kìno yogohetenem, hat en haga'nisanogolùk hoba wago,” ìlùk yogosukwa. 36Yogosukwama, at en he, mel yogoisasike:
“An nen nìkì'nogo hagathikoagalùk walok en wagep,” ìlùk yogoisasikomo, 37it en he, mel yogosukwa:
“Hat hobuk Hetagepogot arìk hagatenem, apùnì nen hogothapi logogun atì sat he, ninom kainat logouok en he, nit aike heki ebekwe, nen aike heki peikkwe, logouagalùk menhinanogolùk wago,” ìlùk yogosukwama, 38at en he, mel yogoisasike:
“Kìno yogonetep atì re, wene ebe hinokorat logolìk yogonetep o. An yì aik tì aik haga'nabugun atì re, hit atì'nogo hagathinabusak elok akegep?” u hak he:
“An nagei hinago negein atì re, hit elok nasak akegep? Nen, ima pelaginaparek hak pelakhanugun atì re, hit elok pelakhikasak akegep?” ìlùk oba lìrogo yogoisasikomo, 39it en he:
“Elok nasagat o,” ìlùk yogosukwama, at en he, mel yogoisasike:
“An yì aik tì aik haga'nabugun atì hak, hit atì'nogoat hagathinabugun o. Nen, ima pelaginaparek hak, an pelakhanugun atì re, hit atì'nogoat pelakhikogoinat o. 40Meneat he, hat aike an neki ebekwe, nen, aike neki peikkwe ninom kain logouogolùk, an nen menhikasak mea o. We, hageat Ala a'la nen he,
It ta menhisegein, ìlùk akasike mene werek o,” ìlùk yogoisasike. 41Atì'nogo yogoisikenem he, at Yesùt agoromì ane wanhì lagaukwa mene he'nakit inebe 10 nen inasuk holhukwasik he, ina'mage Yakobùt Yohanet eperak inoba hesukwa. 42Ina'mage atì'nogo inoba hesukwama re, at Yesùt en inebe obogat atogosuagalùk waisasikomo atogosukwama mel yogoisasike:
“Nagoromì. It apùnì etakwe mene inogogì pemerintah mene nen,
Hinogogi kaintek he, nirat o, ìlùk, mep lagai'-lagak hogo hagarinapìk, nen, it ap kaintek atì nen, set kwìl-kwal hogo yogoisìgìk, egarek atì hinelu. 43-45Mene re, hit en it hagatarek atì hak atì'nogo hagatì logousak motok lek o. An abat ta'lasi wagagi a'nogo re, hit apùnì nen lebe'nìkì logouageip ìlùk wagagi lek o. At he, an hit lebethisìkì logolìk, hinebe hele homago negen welagep mene atì hinebe logolegat hele hikalhinabigìlùk anat noasuagalùk wagagi atì. Atì nen he, hit aike sa nen,
An inoe kain asigin, ìluk akiko halok he, hinagorat asuak. Nen, ht aike sa nen,
An netagewerek asìgìn, ìlùk akiko halok he, at ebe hit obogat hinatitigeke asuak o,” ìlùk yogoisasike.
Paretimeyùt eileken mùm mene hagasike wene
(Mat.20:29-34; Luk.18:35-43)
46At Yesùt ebe mel, agoromì ane wanhì lagaukwa mene manogo mel, wene atì'nogo ìlì pisukwa pisukwa, o Yeriko sili elokolokwe tùlem kwe pisukwasik, hebùlùk wùlùpenem he, apùnì he'na inebe logolegat inopolik wùlùpukwa. Wùlùpenem, ap Timeyùt aput etage Paretimeyùt eileken mùm mene yì mene tì mene ape kìno weak ìkì lagaike mene atì ebekalem hùrek were'ma wùlùpukwa. 47Wùlùpenem apùnì nen he:
“Yesùt awì o Nasaret mene a'nogo wìrì'logo o,” ìlùk isukwama, at ap a'nogo asuk holhikesik he, ane hùkorogo Yesùt mel yogosike:
“Yesùt Taùt en tagokwe mene noe a! Hetawì nean o,” ìlùk yogosikomo, 48it apùnì logolek amanogo nen he,
“Hane o,” ìlùk wenagasukwa meneat he, hobuk ebenageik ane hùkorogo mel yogosike:
“Taùt en tagokwe mene noe a! Hetawiì nean o,” ìlùk yogosikomo, 49at Yesùt ebe melagaikesik he, apùnì amanogo mel yogoisasike:
“Wesuak en wae'ni o,” ìlùk yogoisasikomo, it en he, waeti logolìk he, mel isukwa:
“Yesùt en waherì'logo atì re, ha'la hai hìlìk melame o,” ìlùk yogosukwa. 50Atì'nogo yogosukwama re, asu etakwe laberek mene nokologo po laksalùk he, uapare'ma melarìk he, Yesùt oba wagaike. 51Wagaikomo, at en he, mel yogosike:
“An nen nìkì'nogo hagathabuagalùk yogoneten,” ìlùk hinok wokhasikomo re, ap eileken mùm mene a'nogo nen he, mel yogosike:
“Noe. Neileken hano haga'nabinogolùk yogohetì o,” ìlùk yogosikomo, 52at Yesùt en he, mel yogosike:
“Hetaùken noba hìpìrethegen atì baat hano agen o. Halok he, lan o,” ìlùk yogoto kolek aremnogoat eileken mùm mene a'nogo hano agaikesik he, Yesùt ebekwe laganem opolik inomat lagaukwa.
လက်ရှိရွေးချယ်ထားမှု
MAREKÙT 10: LAIDNI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
