Johanes 2
2
Merbayo i kuta Kana
1Enggo kessa dua ari, lot mo merbayo i kuta Kana sini Galilea. I sidi ma ngo dekket inang Jesus. 2Jesus pe dekket sisinNa dekket ngo idilo merbayo i. 3Nai tupung mo kerri karina anggur sukut i, nai idokken inang Jesus mo taba Jesus, “Enggo kerri anggur sukut i.”
4Ialoi Jesus mo, “Nangè, ulang pasulak Aku; ai makdèng dapet tikkingku lako mem- maing barang kadè.”
5Nai idokken inangna i mo taba perkebbas nisidi, “Barang kadè idokken Jesus taba kènè, bahan kènè mo.”
6Lot mo isidi hantar ennem goci siat-siat ualuhpuluh soh mi serratus sellup laè mahan pemmorih nèhè, mengèkutken hatoren agama kalak Jahudi. 7Idokken Jesus mo taba perkebbas i, “Domi kènè mo goci i dekket laè.” Nai idomi kalak i mo laè mi goci i. 8Idokken Jesus mo nola taba kalak idi, “Taku mo cituk laè ni goci i, embahken mo taba induk perkebbas.” Iembah kalak i mo laè nitakuna i taba induk pèsta i, 9iakapi mo laè i, keppè enggo mobah gabè anggur. (Oda ngo ibettoh barang i dikè nai rohna anggur i, ai pellin perkebbas i ngo kessa bettoh-bettohen). Nai idiloi induk perkebbas i mo kèla i, 10nina mo mbangsa, “Biasana anggur simerrasana ngo lebbè ihidangken dèba, tapi mula enggo karina tamuè mengènum mbuè anggur, baru pè asa ihidangken nola anggur biasa. Keppèken kono isimpan kono dèng ngo anggur simerrasana, janah bagèndari dèng ngo asa ihidangken kono!”
11Idi mo tanda kellengangen perlebbè ihanaken Jesus, i kuta Kana sini nagerri Galilea. Merkitè tanda kellengangen i, ipacidah Jesus ngo kemulianNa. Nai percaya mo sisinNa i tabaSa.
12 #
Mat. 4:13
Enggo kessa i, laus mo Jesus bak inangNa rebbak dekket sisinNa i mi Kapernaum, janah i sidi mo kalak i merian barang piga-piga ari.
Ibengketti Jesus Bages Dèbata
(Mat. 21:12-13; Mrk. 11:15-17; Luk. 19:45-46)
13 #
2 Ms. 12:1-27
Tikan enggo ndessing Ari Raya Paskah kalak Jahudi, laus mo Jesus mi Jerusalem. 14Idapet Jesus mo jelma merdèa lembu, biri-biri dekket ndarapati i Bages Dèbata i Jerusalem; bagidi ma dekket simenukari kèpèng merkundulen isidi. 15Nai ipelias Jesus mo ligas-ligas ipas tinali nai, ijalang mo karina pinakan-pinakan idi i Bages Dèbata nai, biri-biri bak lembu pè. Ipengongkitken mo mèja penukaren kèpèng, merhamburen mo kèpèng kalak idi. 16Idokken mo taba kalak simerdèa ndarapati, “Embah karina ndrapatimi. Ulang baing kènè gabè bekkas pertiga-tigaan Bages BapangKu!” 17#Ps. 69:10 Nai ièngèt sisinNa i mo ayat Bibèl èn, “Mergollah-gollah ngo bagè api menutung ukum kelleng atèngKu midah Bagesmu alè Pa!”
18Ialo penguasa-penguasa kalak Jahudi mo Jesus merkitè kata-kata mpingas, nina mo, “Tuduhken bai nami tanda kellengangen mahan bukti, lot kuasamu memmaing bagidi!”
19 #
Mat. 26:61, 27:40; Mrk. 14:58, 15:29 Ialoi Jesus mo, “Rumpakken kènè mo Bages ni Dèbata èn, nai Kupajek nola mo i mengolihi ibagasen tellu ari.”
20“Empatpuluh tahun mo dekkahna pelliasken Bages Dèbata èn, keppèken ipellias kono nimu ibagasen tellu ari sambing?” nina kalak i.
21Tapi dagingna sendiri ngo sinidokken Jesus Bages Dèbata. 22Asa balik nggelluh kessa Jesus i kemmatèen nai ièngèt sisinNa i mo nidokken Jesus idi kin. Gabè percaya mo kalak idi mi sitersurat ibas Bibèl, dekket mi kata sinidokken Jesus.
Itandai Jesus ngo karina jelma
23Nderrang i Jerusalem Jesus mer Ari Raya Paskah, nterrem ngo kalak percaya bana kumarNa tanda kellengangen sinipehanaNa. 24Tapi ukum Jesus oda tok midah kalak i, kumarna itandai ngo karina jelma. 25Oda pella perlu ibagahken dèba keterrangen baNa, ai ibettoh ngo kadè siturah ibagasen pusuh perratèen jelma.
လက်ရှိရွေးချယ်ထားမှု
Johanes 2: LAIBTD
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
