HARURUAR 1
1
Halak Israel diparkanciti di Mesir
1Angka on ma anak ni si Jakob na rap dohot ia kehe tu Mesir dohot sude halahi na sabagas, i ma:
2Ruben
Simeon
Levi
Juda
3Isakar
Zebulon
Benyamin
4Dan
Naftali
Gad
Aser.
5Bilangan ni pomparan ni si Jakob i sude adong do pitu pulu halak. Si Josep madung parjolo maringanan di Mesir. 6Dung i mate ma si Josep, bope kahanggina dohot halak na satorbang dohot ia. 7Anggo pomparan ni halahi, i ma angka halak Israel, maranak marpahompu bahat situtu, jana bilangan ni halahi pe mur martamba-tamba, pola sude luat i digohi halahi.
8Dung i adong ma sada halak na baru bangkit raja, mangarajai di Mesir, na so mananda si Josep. 9Didok ia ma tu rayatnia i, “Na gabe parmaraan do halak Israel on di hita, hara ni bahat ni halahi boti gogona. 10Sugari masa ma porang, aropku satahi ma halahi dohot musu i, mangalo hita, dung i tinggalkonon ni halahi ma luat on. Angkon jalahanta ma dalan laho mangambati anso ulang mur tu bahatna halahi.” 11Dung i diangkat halak Mesir i ma angka mandur ni parkarejo tu halak Israel laho mamparkanciti halahi. Angka halak Israel disuru karejo paksa, pauli angka kota inganan ni parbalanjoan di raja i, i ma kota Pitom dohot kota Ramses. 12Tapi mur diparkanciti halak Mesir i halak Israel, mur mabahat do halahi, jana mur digohi halahi luat i, pola tehe mur mabiar halak Mesir i mida halahi. 13Gabe mur jahat ma halak Mesir i mamparkanciti halak Israel, 14mambaen ngolu ni halahi markancit. Saotik pe nada adong ibo ni roha di halahi, dipaksa do halahi markarejo di angka proyek pambangunan dohot di ladang-ladang.
15Dung i ninna raja Mesir i ma tu angka bidan na manolong angka ina ni halak Ibrani di na laho manubuhon dakdanak. Bidan i na sada margoar si Sipra, na sada nari margoar si Pua. 16Ninna raja ni Mesir i ma tu angka bidan i, “Muda ditolong hamu ina ni halak Ibrani na giot manubuhon dakdanak, ingot ma on: Muda halaklahi do na sorang i, bunu hamu! Tapi anggo dadaboru do, padiar hamu ma mangolu.” 17Tapi anggo bidan i, halak na manghabiari Debata do. Nada dioloi halahi parenta ni raja i, dipadiar halahi do anak halaklahi mangolu. 18Dung i dipio raja i ma bidan i lalu disapai ia, “Biasi ma dipadiar hamu dakdanak halaklahi i mangolu?”
19Dialusi halahi ma, “Nada songon ina-ina ni halak Mesir anggo ina ni halak Ibrani i. Momo do halahi mardakdanak. Taran so ro dope bidan, madung sorang dakdanak i.” 20-21Dung i dibaen Debata ma na denggan tu angka bidan i, dilehen ma pomparan ni halahi, angke halak na mabiar mida Debata do halahi. Jana halak Israel pe mur mabahat dope jana mur gogo. 22Jadi diparentahon raja i ma mangulahi tu sude rayatnia, “Sude anak halaklahi di halak Ibrani na baru sorang angkon niambungkon tu Batang aek Nil, tapi sude dakdanak dadaboru, padiar ma mangolu.”
လက်ရှိရွေးချယ်ထားမှု
HARURUAR 1: LAIAKB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Indonesian Bible Society