Matius 9
9
Si Yesus sumama' si tou késo'
(Mrk. 2:1-12; Luk. 5:17-26)
1Kekawus in itu, si Yesus wo sé murit-Na sumaké an londéi en lumewet maangé an lewet in lour. Wo icateka'o Sia an doong-Na in esa. 2Wo paalinai é tou a si Yesus si esa tou késo' aitekel am patekelanna. An tutuw sérén-Na em paémanen éra, kinailekan-Nao sapaoka séra maéman ai Sia, wo icua-Na a si tou késo' itu, “Ketereno mangé en atému éi toyaang-Ku, eng kamesé-meséaanmu niampungano.”
3Kelinga in aicua i Yesus itu, sé piraan tou makailek wutul in Torat kumua an untep in até, “Si Tou anio' mengaojat si Amang Kasuruan.”
4Taan kailekan i Yesus em pawero-weroten éra, wo icua-Na ai séra, “Kéitu réén kamu mawerot andumoro' sé léwo' an untep in até miow? 5Si wisa en lébé taporak icua-Ku, ‘Eng kamesé-meséaanmu niampungano’, kuma'pa ‘Tumooro wo maya'o’? 6Taan intarépé', musti kailekan iow sapaoka ang kayo'baan anio' si Toyaang i Tou awéan kawasa e méé kaampungan ang kamesé-meséaan.” Wo icua i Yesus a si tou késo' itu, “Tumulungo, angkaieno en tinekelanmu wo maréngo am balému.”
7Wo si tou késo' itu ka'i tumulung wo maréng. 8Keséré in itu, sé tou keli maindé' wo rumayo si Amang Kasuruan si méé ing kawasa wangko' a sé tou.
Si Yesus tumowa si Matius kumiit Sia
(Mrk. 2:13-17; Luk. 5:27-32)
9Kekawus in itu si Yesus tumela'u in tampa itu, sérén-Na si esa tou makangaran Matius makalukut an tampa é tou mawér im pajak, wo icua i Yesus ai sia, “Kumiito mai Yaku.” Si Matius ka'i tumulung wo kumiit si Yesus.
10 #
Luk. 5:30, 15:1-2 Kekawus in itu si Yesus wo sé murit-Na kuman am balé i Matius, wo mai sé matagi im pajak walina wo sé tou iméma' ing kamesé-meséaan mai mewali-wali kuman ang karapi éra. 11An tutuw é tou Farisi suméré si Yesus makan ang karapi é tou itu, icua éra a sé murit i Yesus, “Kéitu si Guru miow makan ang karapi é matagi im pajak wo sé tou méma' ing kamesé-meséaan itu?”
12Lininga i Yesus en aicua éra itu, wo icua-Na ai séra. “Ra'ica sé tou makaowak sama' e maperlu si dokter taan sé tou sumakit. 13#Hos. 6:6; Mat. 12:7 Anaé, pangéréno eng kaangéan si aicua i Amang Kasuruan anio': En icasalé'-Ku ra'ica raragés, taan kaupusan, ampa'paan Aku maai ra'ica tumowa sé tou wutul taan sé tou iméma' ing kamesé-meséaan.”
En andumoro' im puasa
(Mrk. 2:18-22; Luk. 5:33-39)
14Wo mai a si Yesus sé murit i Yohanes Mabaptis wo icua éra, “Kami wo sé tou Farisi mapuasa, taan kéitu réén sé murit i Tuang ra'ica?”
15Isowat i Yesus ai séra, “Ro'na réén sé kara-karapi i pengantén tuama mala'lu ang kauré i pengantén itu mewali-wali wo i séra? Taan mai oka en témpona si pengantén itu indon é tou an uner éra wo asi témpo ituo séra muasa oka. 16Ra'ica wana esa tou en tumampal ing kaéng weru ang karai matu'a. Ampa'paan sa eng kaéng weru itu sumusut, ro'na kumésé' ing karai itu wo makawangkero eng késé'na. 17Taniitu ka'i, ra'ica wana tou e mumpun in anggor weru an tampa matu'a si niéma' ang kulit i binatang owo, ampa'paan sa taniitu en tampa matu'a itu makenta' oka akar en anggor itu icatiya' wo en tampana itu ka'i materi. Taan en anggor weru ipumpun ka'i é tou an untep in tampa weru, wosama' en anggor wo en tampana tumang uré.”
Si toyaang tinou sumawel wo si esa wéwéné sinama' i Yesus
(Mrk. 5:21-43; Luk. 8:40-56)
18Ang karoro'an i Yesus maroma' a sé murit i Yohanes Mabaptis, wo mai ai Sia si capala im balé paapo'an é agama Yahudi. Si tou itu kumuru en sumiri' Sia wo kumua, “Guru, si toyaangku wéwéné makapatépé'. Taan pekiupusenku sa woo ro'na si Guru mai am baléku wo maro ing kama ai sia, wosama' sia ro'na tumou sumawel.”
19Kelinga in itu tumulungo si Yesus, Sia wo sé murit-Na kumiito a si tou itu e maangé am baléna.
20An uner in lalan, awéan esa wéwéné si sangapulu' rua ngata'uno sumakit pengeso-ngesotan in enda'. Sia rumuru an somoi i Yesus wo misu' in tempok in juba-Na. 21Si wéwéné itu méma' in taniitu ampa'paan icuana an untep in até, “Mandé asaloke' misu' in juba-Na, tantu aku masama' oka.”
22Si Yesus suméléng wo tuméinteng ai sia wo icua-Na, “Ketereno mangé en atému éi toyaang-Ku, em paémanenmu lumowiro ico.” An tutuw ituke' si wéwéné itu imasama'o.
23An tutuw i Yesus icateka' am balé i capala im balé paapo'- an itu wo suméré sé masengo im peloit wo sé tou mengamé-ngamé', 24wo icua-Na ai séra, “Kumesoto, ampa'paan si toyaang anio' ra'ica imaté, sia asaloke' tumekel.” Taan aicé'ké'ke' taré éra si Yesus.
25Kekawus é tou keli itu airu'du' kumesot, muntepo Sia ang kamar i toyaang itu. Timboian-Na eng kama i toyaang itu, wo si toyaang itu tumou sumawel wo tumoor. 26Eng kamamualian itu aicaseraro am pakasa in sangkum itu.
Si Yesus sumama' sé rua tou wola
27An tutuw i Yesus lumala'us im bawayaan-Na, sé rua tou wola makiit Sia mengangko-ngangko' wo makua, “Éi taranak i Daud, caupusai kami.”
28An tutuw i Yesus muntep an esa walé, sé rua tou wola itu mai ai Sia. Wo wuéien-Na ai séra in dua, “Percayan iow réén sa Aku ro'na sumama' icamu?”
Isowat éra, “Én, percayan ami, é Tuang.”
29Wo isuun-Na ing kama em beren éra in dua, wo icua-Na, “Mamualio ai camu tanu im paémanen iow.” 30Asi témpo ituke' séra ro'nao maséré. Wo ang kerapi in depet ilupu-Na ai séra, “Tioo ipakua-kua a si séike' mangé tumambisa em beren iow ro'na maséré.”
31Taan an tutuw éra in dua kumesot asi walé itu, mangé sisil éra en abar andumoro' i Yesus am pakasa in sangkum itu.
Si Yesus sumama' si esa tou wowo'
32Kekesot é rua tou wola sé imasama'o itu, wo wali éra mai a si Yesus si esa tou wowo' si rinasuk i sétang. 33Kekawus i Yesus musér si sétang asi tou wowo' itu, an tutuw ituke' si tou itu ro'nao maroma'. Sé tou keli am bitu mangaya-ngaya'ka' wo mengkuanan, “Ra'ipé' sumangkum ako sérén ami eng kamamualian tanu si anio' an Israel.”
34 #
Mat. 10:25, 12:24; Mrk. 3:22; Luk. 11:15 Taan ipakua é tou Farisi, “Si kikiiten é sétang e méé ing kawasa ai Sia e musér sé sétang.”
Eng kaupusan i Yesus a sé tou keli
35 #
Mat. 4:23; Mrk. 1:39; Luk. 4:44 Wo si Yesus mangé lumi'cir im pakasa ing kota wo in doo-roong. Sia masusui am balé-walé paapo'an é agama Yahudi wo makua in Abar Kaaruien andumoro' ing Kakolanoan i Amang Kasuruan. Wo Sia ka'i sumama' sé tou sé membam-balinaan en sakit wo sé ra'ica lekep en owak. 36#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mrk. 6:34 An tutuw i Yesus suméré sé tou keli makiit Sia, mai eng kaupusan in até-Na ai séra, ampa'paan séra makepéo wo icawayao tanuoka sé domba ra'io wana gembala. 37#Luk. 10:2 Wo icua-Na a sé murit-Na, “Sé tou anio' tanuoka wua'na in tinanem an uma an témponao in upuun. Taan sé tou maupu' wayake' im pira. 38Ampa'paan in itu, pangilekeno a si makauma itu, wosama' icirim-Na mai tou en tumawoi mupu'.”
လက်ရှိရွေးချယ်ထားမှု
Matius 9: TNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
En Taar Weru a nunuwu' é Tontemboan @ LAI 2018
