Matius 10
10
Si Yesus sumisir sé sangapulu' rua tou e mamuali ruru'du'an-Na
(Mrk. 3:13-19; Luk. 6:12-16)
1Asi makasa tinowa i Yesus sé sangapulu' rua murit-Na, wo wéan-Na kawasa séra e musér sé roh-roh léwo' wo sumama' waya in sakit wo sé ra'ica lekep en owak. 2Sé anioo e ngaran é sangapulu' rua ruru'du'an i Yesus itu: Si kataré Simon si pengatuulen Petrus, Andreas si metuari wo si Simon, Yakobus wo Yohanes toya-toyaang i Zebedeus, 3Si Pilipus, Bartolomeus, Tomas, Matius si mengatagi im pajak, Yakobus toyaang i Alfeus, wo si Tadeus, 4Simon tou Zelot,#10:4 “Zelot”: Ngaran i esa reru' si rumaméji mekar sé bangsa Israel ang kakawasaan ing kakolanoan Romawi. wo si Yudas Iskariot si kumianat oka si Yesus.
Si Yesus imutus sé sangapulu' rua ruru'du'an-Na
(Mrk. 6:7-13; Luk. 9:1-6)
5Yutus i Yesus sé sangapulu' rua murit-Na itu wo itaar-Na ai séra, “Tioo kamu mangé am paento'an é tou ra'ica Yahudi kuma'pa muntep ang kota é tou Samaria. 6Aweso taré kamu mangé a sé tou Israel sé tanuoka domba-domba sé icasélé'kowo. 7Mangém wo yabaro ai séra, ‘Makatawio en orasna si Amang Kasuruan kumawasa tanu Kolano.’ 8Samaano mangé sé tou sumakit, toueno sé tou imatéo, samaano mangé sé tou kusta wo yuséro sé sétang asé tou. Tinerimao miow waya en itu si asaloke' aitambér, ampa'paan in itu itambéro ka'i mangé en itu a sé tou walina. 9Sa kamu maangé, tioo maali roit mas, roit pérak, kuma'pa roit tambaga an sompoi iow. 10#1Kor. 9:14; 1Tim. 5:18 Tioo ka'i kamu maali pawalunan am bawayaan, tioo ka'i kamu maali karai ipasawel, selop kuma'pa weka', ampa'paan si tou matawoi patus makéré in laasana.
11Sa kamu muntep asi esa kota kuma'pa roong, mangéréo mio' esa tou am bitu e ro'na tumerima icamu wo mentoo mio' am bitu akar kamu kumesot asi tampa itu. 12Sa kamu muntep am balé é tou, mééo mangé in siri' ai séra. 13Sa sé tou am balé itu tumerima icamu, iwayao mio' en siri' miow itu mewali-wali oka wo séra. Taan sa sé tou asi walé itu ra'ica kiim tumerima icamu, en siri' aiwéé miow itu maréng oka sumawel ai camu. 14#Kis. 13:51 Wo sa awéan tou ra'ica kiim tumerima wo ra'ica kiim luminga in aicua miow, kumesoto mangé wo itela'uo mio' em balé kuma'pa eng kota itu wo itangkaro mio' en awu ang kécéi iow. 15#Kej. 19:24-28; Mat. 11:24 En ulitna icua-Ku mangé ai camu, asi endo kaka'puan ing kayo'baan sé tou ang kota Sodom wo ang Gomora lébé porakai en ukumanna wo taré sé tou ang kota itu.”
En okoi si maai oka
(Mrk. 13:9-13; Luk. 21:12-17)
16 #
Luk. 10:3 “Wéan rékén en anio'! Yutus-Ku kamu mangé tanuoka sé domba an uner é serigala. Ampa'paan in itu kamu musti mapinte-pinter tanu ula', wo lekep en até tanu mombo. 17#Mrk. 13:9-11; Luk. 12:11-12, 21:12-15 Kamu musti maténga-téngam a sé pakasa in tou! Ampa'paan awéan oka tou en sumarakan icamu an sidang agama wo samboken oka éra kamu am balé-walé paapo'an éra. 18Iwali oka éra ka'i kamu an dior é makakawasa wo sé kolano ampa'paan kamu mengakua in andumoro' Yaku. Wo en témpo itu musti pakén iow en sumairi andumoro' Yaku ai séra wo a sé bangsa sé ra'ica makatuus si Amang Kasuruan. 19Sa isarakan éra kamu in akimen, tioo kamu maindé' andumoro' in sapa si musti icua miow. Ampa'paan iwéé oka mai i Amang Kasuruan ai camu sapa si musti icua miow asi témpo itu. 20Ampa'paan ra'ica icamu in esa e rumoma' taan si Roh i Amang an até miow e rumoma'.
21Wo mamuali oka ka'i, si esa tou sumarakan oka si poowna in esa em patén. Tanu siitu ka'i e mamuali a si esa amang wo sé toyaangna. Sé toyaang ka'i sumundur oka sé matu'a wo maté iséra. 22#Mat. 24:9, 13 Wo pakasa in tou masuut oka icamu ampa'paan kamu makiit Yaku. Taan sé tou le'tek makiit Yaku akar imaté makéré oka ing kalowiran. 23Sa kamu okoien é tou an esa kota, tumincaso mangé ang kota walina. En ulitna icua-Ku mangé ai camu, ra'ipé' pinakaangéan iow waya eng kota-kota an Israel, si Toyaang i Tou imayo.
24 #
Luk. 6:40; Yoh. 13:16, 15:20 Kailekan iow ra'ica wana murit en lumébémai wo si guruna. Wo ra'ica wana ata en lumébémai wo si tuangna. 25#Mat. 9:34, 12:24; Mrk. 3:22; Luk. 11:15 Loor sa si esa murit mamuali puté wo si guruna wo si esa ata puté wo si tuangna. Sa si makawalé patuulen im Beelzebul, wopé'taré pakasa sé am balé itu, tantu ngaranan oka éra in lébé wurukai.
26 #
Mrk. 4:22; Luk. 8:17 Ampa'paan in itu, tioo kamu maindé' iséra. Ampa'paan ra'ica wana si makakelew wo ra'ica mawuka' oka wo ra'ica wana sé ipakaenep wo ra'ica kakailekan oka. 27Sapa sé aicua-Ku ai camu ang kerapi im paene-enep, musti mangé cua miow in da'ica ipaene-enep. Wo sapa sé aicewit-Ku an lunteng iow, musti mangé icua miow en itu am bawo im balé. 28Tioo kamu maindé' a sé tou sé asalo makawoo maté in owak iow taan ra'ica wana kawasa e maté i mu'kur iow. Taan maindé'o mangé a si Amang Kasuruan si makakawasa e maté in owak wo i mu'kur iow a naraka. 29Ra'ica réén sé rua rincéng sa iwangkér em bééna esa roit logam si tumeki-tekic? Taan ra'ica wana esaan asé rincéng itu en lumepok an tana' sa ra'ica kasalé'an i Amangmu. 30Taniitu ka'i wo icamu, eng kakeli im buuk an do'kos iow kailekan waya i Amang Kasuruan. 31Anaé, tioo kamu maindé', ampa'paan kamu en lumébémai asé rincéng.
32Si séi e mangaku an dior é tou sapaoka sia makiit Yaku, pangakun-Ku oka ka'i sia tou-Ku an dior i Amang-Ku an sorga. 33#2Tim. 2:12 Taan si séi en sumangkal Yaku an dior é tou, sia ka'i sangkalen-Ku oka an dior i Amang-Ku an sorga.”
Si Yesus maai ra'ica maali ing kaeluran taan ing kaperéndéran
(Luk. 12:49-53, 14:26-27)
34 #
Mi. 7:6; Luk. 12:51-53 “Tioo paweroten iow sa Aku maai ang kayo'baan e maali mai ing kaeluran. Yaku maai ra'ica maali mai ing kaeluran taan maali mai ing kaperéndéran. 35Ampa'paan Aku maai en tumané si toyaang tuama wo si amangna, si toyaang wéwéné wo si inangna, wo si paémpon wéwéné wo si inang émpona. 36Wo si kaséké' é tou, sé tou an untep im balé éra in esa.
37 #
Luk. 14:26-27 Si séike' e mengaupus si amang kuma'pa si inangna lumébémai in upusna a Yaku, sia ra'ica patus mamuali tou-Ku. Wo si séike' e mengaupus si toyaangna tuama kuma'pa wéwéné lumébémai in upusna a Yaku, sia itu ka'i ra'ica patus mamuali tou-Ku. 38#Mat. 16:24-25; Mrk. 8:34-35; Luk. 9:23-24, 17:33; Yoh. 12:25 Si séike' ra'ica muléng in salipna in esa wo ra'ica kumiit Yaku, sia ra'ica patus mamuali tou-Ku. 39Si séike' e menonou asaloke' in owakna in esa, sia itu ra'ica makéré ing katouan akar ing kauré-uré. Taan si séike' e méé ing katouanna eng kumiit Yaku, sia makéré oka ing katouan akar ing kauré-uré.
40 #
Mrk. 9:37; Luk. 9:48, 10:16; Yoh. 13:20 Si séike' en sumungkul icamu, en itu meputé sia isumungkulo Yaku. Wo si séike' en sumungkul Yaku, sia ka'i isumungkulo si Amang Kasuruan si mutusai Yaku. 41Si séike' en sumungkul si esa nabi ampa'paan sia nabi, terimanna oka en laasa nabi. Wo si séike' en sumungkul si tou sama' ampa'paan sia itu sama', terimanna oka en laasa tanu tou sama'. 42#Mrk. 9:41 Si séike' e méé elepen, mandé wayake' in sanga gelas rano uting a si esa tou wawa' anio' ampa'paan sia mengakiit Yaku, en ulitna icua-Ku mangé ai camu, sia ra'ica kawisa katalaan in laasana.”
လက်ရှိရွေးချယ်ထားမှု
Matius 10: TNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
En Taar Weru a nunuwu' é Tontemboan @ LAI 2018
