Israelfɔ Ɩlʋ 149
149
Aha Ánɩ́ Bʋtamakpa Mʋ Ɔma Numnyam
1Mlɩkanfʋ Nana Bulu!
Mlɩwa ɩlʋ pɔpwɛ ha mʋ,
amlɩkanfʋ mʋ aha ánɩ́ bʋtamakpa mʋ ɔma ɔpasuatɔ.
2Israelfɔ, ɩwɩ ɩsankɩ mlɩ mlɩ Ɔbwɛpʋ ɩwɩ.
Sionfɔ, mlɩnya mlɩ Owie ɩwɩ ansigyi.
3Mlɩtsa, amlɩda nsankuo ɔtsantsan.
Mlɩwa ɩlʋ, amlɩkpɩnkɩ akatsa kanfʋ mʋ ɩda.
4Tsufɛ Nana Bulu ansɩ tegyi mʋ aha ɩwɩ.
Ɔtɔpʋ nkpahɔ dɩda ɩwɩasɩ abapʋ.
5Mlɩá mlɩtamakpa mʋ ɔma, mlɩnya ansigyi,
tsufɛ alawa mlɩ numnyam.
Mlɩwa ansigyi ɩlʋ mlɩ ɔklansʋ.
6Bulu-kanfʋ ɩhɩɛ dɩnka mlɩ ɔnɔsʋ,
ɔdayi ɩya anyɔ itsia mlɩ ɩbɩtɔ,
7mɛnɩ mlɔ́pʋka ɔmá-ɔmá ɩkɔ,
bɩtɩ aha ɩsʋ.
8Mlɔ́wa amʋ́ awie kplakitsi,
wa amʋ́ aha ánɩ́ numnyam bʋ amʋ́sʋ datɔ-ɩkan.
9Mlɔ́pʋ asʋn ánɩ́ bɔwanlɩn tswɩ bɩtɩ amʋ́ ɩsʋ.
Ɩnɩgyi aha ánɩ́ bʋtamakpa mʋ ɔma fɛ́ɛ́ numnyam nɩ.
Mlɩkanfʋ Nana Bulu!
လက်ရှိရွေးချယ်ထားမှု
Israelfɔ Ɩlʋ 149: nko
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation