Mat 12

Kuʋiʋi ní Lizemɔniwe le su

1Lipoetɔ kede, gi Yesu azɛɛga aza ní idoli ɔnyrɔ ɔtɔ mɛ ní Lizemɔniwe le aʋa ɛ, kuʋɛ kwizeeku yɛ badɔkpasi ba, lɛ loso e bekpese idoli le kuyasi uta. 2Agi Farisianɛ ma bɛmɔ kibitɛɛ liɛ klɔ ɛ, bɛsi Yesu si, “Di ke, blɔ ɔsã nɔ ɔ́ki kude si wɔ badɔkpasi ba babitɛ kiboebitɛ liɛ ya ní Lizemɔniwe le aʋa a.”

3Lɛ Yesu ebu lɛ onu si, “Mlákla edi liwewe kidiliɛ gi Dawid abitɛ ní lipoe lɛ klɔ mɛ gi kuʋɛ kwizeeku ye ni yɛ banima na a? 4Eti eku ní Aya yɛ kepea mɛ lɛ yɛ ni yɛ banima bɛzɛɛtà Aya yɛ akla na ní lipoe lɛ klɔ mɛ gi liyɔ kedu ní Ɔsã nɔ su xe e; lɛ ese linu si kusumu yo baka ba ko linu si biata akla la klɔ ʋa. 5Aloo, mlákla ní Mose Ɔsã nɔ mɛ si ní Lizemɔniwe kakaa aʋa ɛ, kusumu yo baka ba bizɛɛta Mose ɔsã nɔ ese ní Lisɔligba lɛ mɛ baa pɔ̀ baʋíŋa lipɔ na a? 6Sugba ɛ, mɛɛsi mlɔ si, kiditɔ gi kiŋa kedzi i sani Lisɔligba lɛ ni Yerusalem i, kilí ní mlɔ kusi i. 7Aya liboe le lipani si, ‘Lipomepɛpɛ mɛɛpɛ ɛ; aní baga bisumudɔ kukɔkɔ ɔ.’ Atɛsi mlenu eboa la ya ese e nya mlatrábu banima 8lipɔ ní lipoe lɛ klɔ mɛ gi báŋa lipɔ xe e; lɛ ese linu si Ɔnɔɛ Yebi ye e, yɛ onu Lizemɔniwe le lɛ Ɔkaɛ.”

Yesu ayɔni onyime ɔtɔ gi yɛ ɔwla tole ètse e ní Lizemɔniwe le aʋa a

9Agi Yesu asɛ niklɔ ɛ, atrɛ ní Yudanɛ ma ɔtsaklɔ. 10Lɛ amɔ onyime ɔtɔ gi yɛ ɔwla tole ètse e niklɔ ɛ. Banɔatɔ gi bɛpɛ si beebu Yesu lipɔ ɛ, beʋi ye si, “Ɔsã nɔ ɛki kude si bayɔni ɔnɔ ní Lizemɔniwe le aʋa na a?”

11Lɛ Yesu ebu le onu si, “Xe oʋesi ɔlɛ ní ɔnutɔ awla xe ɛdɔ eku ní lizokpo dzudzuitɔ mɛ ní Lizemɔniwe le aʋa ɛ, ɔ́trabu lo edono na a? 12Lɛ Yesu asi ba si ɔnɔ gbagbe e, aŋa kedzi a sani oʋesi! Lɛ loso e, blɔ Ɔsã nɔ ɛki blɔ kude si kupɔni ɔnɔ ní Lizemɔniwe le aʋa a.” 13Niklɔ Yesu asi onyimee gi yɛ ɔwla tole ètse si “Nina wɔ ɔwla lɔ “Onyimee anina yɛ ɔwla lɔ lɛ edzì iku lɔ mɛ ŋwisi ɔʋla lɔ kiniɛ. 14Lɛ Farisianɛ ma bɛsɛ lɛ bɛzɛbitɛ batrɔtrɔ ʋa si biaye Yesu i.

Yesu yɛ onu Aya yɛ ɔnɔ kyakya yɛ

15Agi Yesu enu ba keduyɔyɔ a batrɔtrɔ ʋa ní yɛ su i, asɛ niklɔ; lɛ linɔkpi ʋidi itɔ likuni yɛ kude e. Ayɔ ni banyanya ba petee ni ba kusi. 16Lɛ etsi kude akí ba si, bakípani ní yɛ su asi ɔnɔnɔ ɔ. 17Abitɛ lɛ nite atɔ yikɔ ebu í basɛ si, liboe lɛ gi Aya apani agani yɛ oboedoplɛ Yesaya aʋa ɛ liba lɛ mɛ si:

18“Mɛ ɔwxɛdzɛɛ gi makya ɛ, yɛ iliɛ ya,

yɛ onu ɔniliɛ gi madimɛ nɔ xe mamɔ isami ní yɛ su u.

Maakpɛ mɛ Ɔfuɛfuɛ nɔ ní yɛ mɛ;

aasa kamasa ní mɛ litsi me kutsatsa dradra su u ki banima petee ní kelea mɛ.

19Ɔ́traŋwlɛ liboeboe ni ɔnɔnɔ ɔ;

lɛ ɔ́trakpɛ ozi ni ablɔ ba aʋa a.

20Aaplɛ litɔ kese akí banama gi ɔna eedo ní ba lipo e.

Lɛ banama gi bɛziã kupɔnɔ ɛ, aadi ba asigaga a.

Aatrɛ ní lɛ aʋa zɛkɔ nani lipoɛ lɛ klɔ gi Aya yɛ litsi me kutsatsa dradra kupɛpɛɔ kwiaŋa aʋa ɛ.

21Nite si kelea petee kiakɔ ka aŋu kutrɔ ni yɛ aʋa a!”

Yesu ni Beelzebul

22Liba lɛ mɛ si banɔatɔ bɛgbani onyime ɔtɔ mɛ gi ifuɛfuɛ zimizi ize e manɔ ní Yesu klɔ. Niteme onyimee, eze kaŋupo ni omúmu. Yesu ayɔni yɛ, niteme si ekpese kunugu yo kugu lɛ azɛɛtani kumɔ kyɛ ɛ. 23Yesu yɛ kiboebitɛ kiki si banima pɔ́ ba inugu itse e. Lɛ beʋi si, “Mlɔ ma! Aní Dawid yɛ lipo me obi ye iliɛ ya lò o?”

24Agi Farisianɛ ma benu liboe le e, lɛ bebu le onu si, “Belzebul, ifuɛfuɛ zimizi ne okusi ye, yɛ ko ɛɛki Yesu kigagla ɛ xe ɛɛbitɛ eboa la nite e.”

25Yesu ete ba begyodi ʋa, lɛ asi ba si,” Kaʋaŋaa kakaa gi kalɛ ɛ, xe kɛyɔ kedu ya ní ka isu ya su i, kiayaʋi. Lɛ ɔma loo kepe kakaa mɛ gi kulɛlɛ nì eboese monumonu bi lɛ ɛ, kiakyrɔ̃. 26Lɛ loso xegi Satana ɛɛkpikpini Satana ɛ kɔ libasɛ si ayɔ kedu ya ni yɛ isu ya su i, lɛ kitɛ yɛ kaʋaŋaa kia lɛ ɛ? 27Mlɛɛpani si, Beelzebul yɛ aki mɛ kigaglaɛ xe mɛɛkɔ ɛ kpikpini ifuɛfuɛ zimizi ne edono o. Xe lilɛ te e, kɔ nyaŋwɛ kigagla ʋa mlɔ kude bezenozeno ba bizɛkpikpini ifuɛfuɛ zimizi ne dono e? Kibitɛɛ liɛ gi mlɔ kude bezenozeno ba bizɛbitɛ ɛ, kibasɛ si mlɛta kese lɛ loso e, ba biaxwa litsi ni mlo. 28Pɔ̀ Aya yɛ Ɔfuɛfuɛ nɔ lɔ ɛki mɛ kigaglaɛ xe mɛɛkpikpini ifuɛfuɛ zimizi ne dono o; Niteme si lɛ liibasɛ si Aya Kaʋaŋaa kalɛ ni mlɔ kusi kooko.

29“Ɔnɔnɔ ɔ́tratani kuti ku ní ɔnɔ gagla yɛ kepe me xe aahali yɛ exo la a, xegi aní kivu evu ɔnɔ gagla liɛ klɔ anya kpɛ ɔtɔ ɔ; lɛ ko aatani yɛ exo la kuhali i.

30“Ɔniliɛ gi ɔ́ma ní mɛ aʋa ɛ, lɛ mɛ lidra si ayɔ kedu ní mɛ su u. Lɛ ɔniliɛ gi ɔ́trapɔnɔ xe biakpɛ bidɔ likpɔ ɛ, yɛ ɖii ehle ʋe e. 31Lɛ loso mɛɛsi mlɔ si, liboe zimizi kakaa elu gi banima biabitɛ ɛ, ani liboe zimizi kakaa gi biapani i, Aya aakɔ̀ lɛ kukyɛ ba a. Pɔ̀, ɔnɔ kakaa liɛ gi aapani liboe zimizi kuyurɔ Ɔfuɛfuɛ dradra lɔ ɛ, bátrakɔ kɔ lɛ kyɛ yɛ ɛ. 32Ɔniliɛ gi aapani liboe gi liyɔ kedu ní Ɔnɔɛ Yebi ye su i, biakɔ lɛ kukyɛ yɛ, pɔ̀ ɔniliɛ gi aapani liboe gi liayɔ kedu ní Ɔfuɛfuɛ Dradra lɔ su i, bátrakɔ lɛ kyɛ yɛ ní kelea lia loo kakɔlɔ gi kɛtraba mɛ ɛ.

Lisebi le e, lɛ lizɛbasɛ ose lo kilɛlɛɛ

33“Xe wɔamɔ lisebi gbã ɛ, linu si ose lo ɔpɛ; xe ose nyani nyani ɔlɛ ní wɔ awla ɛ, wɔamɔ esebi nyani nyani. Esebi la izɛɛbasɛ ose lo kilɛlɛɛ mɛ ni ose lɔ klɔ elu gi onu i. 34Mlɔ bagblaga ʋa kipɔ̀pɔ̀ mɛ gi mlɛnyani i, kitɛ mlaapani eboe gbã a? Lɛ ese linu si onugu lo izɛpani eboa la gi alɛ ní ɔna nɔ mɛ ɛ. 35Ɔnɔ gbã ɛ izebu bidɔ gbã ʋɛ dɔni yɛ bidɔ gbã ʋɛ ɔbla klɔ. Nite ke ɔnɔ zimizi kyɛ izebu bidɔ zimizi i dɔni yɛ bidɔ zimizi ʋɛ ɔbla klɔ.

36“Mɛɛtrɔ likla ní lɛ aʋa ɛki mlɔ si, ní litsixwawe le aʋa ɛ, ɔnɔ kakaa aabu isu ya onu ní liboe futsufutsu kakaa gi apani edi su u. 37Lɛ ese linu si wɔ tutɔ wɔ eboe la biakɔ tsã litsi le ɔki wɔ, lɛ wɔ tutɔ wɔ eboe la biakɔ bu wɔ lipɔ.”

Ɔsã nɔ badɔbasɛ batɔ ni Farisianɛatɔ beʋi i dɔni Yesu awla si ɔbitɛ linugutseboe

38Lɛ Mose Ɔsã nɔ Badɔbasɛ ba ni Farisianɛ batɔ bɛpani si, “Ɔdɔbasɛɛ, kwipɛ si bitɛ linugutseboe gi liabasɛ si Aya yɛ akpɛ wɔ ɔ.”

39Lɛ Yesu ebu le onu si, “Kitɛ mɛ abla bebi ba bɛnyani xe béte Aya kyɛ na a! Mleʋi si mibitɛ linugutseboe! Owo lítra ba lɛ mɛ ɛ! Linugutseboe tile gi biaki mlɔ ɛ, lɛ ko linu Yona oboedoplɛɛ su linugutseboe le e. 40Kiliɛ gi Yona eze ní bosoe yɛ lipo le me ewe tata ni elesi tata la ɛ, nite ke Ɔnɔɛ Yebi ye fɛ aaze ní sise se me, ewe tata ni elesi tata a. 41Lɛ Yesu apani dzɛ si, ní litsixwawe le aʋa ɛ, banima pɔ́ ní Ninive biayɔ lɛɛ gi biabu biwlaʋi kpɛ mlɔ aŋu mɛ, lɛ ese linu si bekyi ní ba ina nɛ mɛ gi benu Yona liboe le e; lɛ mɛɛsi mlɔ abla si ɔnutɔ ɔlɛ ni ya gi ekeme asani Yona ɛ! 42Ní litsixwawe le aʋa ɛ, Sheba Okusidzɛɛ, aayɔ lɛɛ gi aabu kiwlaʋi kpɛ́ mlɔ aŋu mɛ ɛ, lɛ ese linu si aga kude gblamadza dɔnɔ ní yɛ kesea ʋa gi aba enu Okusi ye Salomo yɛ kuboeteo me bidɔbasɛbasɛ ʋɛ. Lɛ mɛɛtrɔ likla ní lɛ aʋa ɛ ki mlɔ si ɔnutɔ ɔlɛ ní ya gi ekeme asani Salomo e!

Kiliɛ gi Ɔfuɛfuɛ zimizi no izedzi ba ɛ

43Xegi Ɔfuɛfuɛ zimizi ɔtɔ edo ní ɔnɔ mɛ ɛ, izɛklanɔ ní kuse pluplu yo aʋa gi ɛɛpɛ ozemɔnikɔ ɛ. Pɔ̀ xe ɔ́mɔ ɔkɔkɔ ɛ 44kɔ ɛsi isu ya si, “Madzi itrɛ ní mɛ kepe kokoa mɛ.” Xegi edzì trɛ ɛ, xe ɛmɔ si bɛgba kepea mɛ lulɔ ɛ, 45kɔ ɛtrɛ, kɔ ɛzɛɛgbani ifuɛfuɛ tigloele dzedze gi inyani sani lɔ ɔtutɔ lɔ ɛ manɔ ɛ, kɔ ikɔ niklɔ ɛbitɛ lɛ ozekɔ ɛ. Gɔgɔ ɛ, ɔnɔɛ yɛ kude gbaa ligbãzeze ne lianyani i sani kutɔpu yɔ ɔ. Nite ke liaba lɛ mɛ ɔki abla banɔ zimizi ba.”

Yesu abasi banama gi ba benu yɛ benete ba ɔtutɔ lɔ ɛ

46Yesu azɛɛpani kí banima xe yene ni yɛ beneminyime ba bɛba eku u. Bɛlɛɛ ní oŋwe no gi bɛpɛ si beegu kunugu ni yɛ ɛ. 47Lɛ banama gi beze ní yɛ su i, ba mɛ tole asi Yesu si, “Dike, wone ni wɔ beneminyime ba balɛ ní oŋwe no, gi bɛɛpɛ si beegu kunugu ni wo o.”

48Yesu ebu le onu si, “Nyaŋwɛ onu mone e? Lɛ nyaŋwɛ ba benu mɛ beneminyime ba a?” 49Lɛ ebu kiwlaʋi yɛ akpɛ badɔkpasi ba klɔ, lɛ apani si, “Dike! banama benu mone ni mɛ beneminyime ba a. 50Lɛ loso e, ɔnɔ kakaa gi izɛbitɛ ní Mɔka ní lifunu ne yɛ kupɛpɛ ɔ aʋa ɛ yɛ onu moneminyime, monemidzɛ ani mone e.”

လက်ရှိရွေးချယ်ထားမှု

Mat 12: avn

အရောင်မှတ်ချက်

မျှဝေရန်

ကူးယူ