Mat 11
11
Yohanes Kuni yo ɔkpɛkpɛɛ yɛ banɔkpɛkpɛ ba
1Agi Yesu abasi yɛ badɔkpasi liɔfɔ ni tiaʋa ba ikli odukɔ pɔ́ ɛ, asɛ niklɔ lɛ azɛ basɛ bidɔ, lɛ apani liboe gbã nɛ a klanɔ ní Galilea ima nɛ mɛ ɛ.
2Ní lipoe lɛ klɔ mɛ ɛ, Yohanes kuni yo ɔkpɛkpɛɛ eze ligba lɛ. Enu Kristo yɛ axwɛwawa la. Nite si akpɛ yɛ badɔkpasi ba ní Kristo klɔ ɔ. 3tɔ beʋi ye si, “Wɔ wonu ɔniliɛ gi yɛ su Yohanes apani aplɛ si atrába, loo kudi kudeonu ɔki ɔnɔ dzedze na a?”
4Lɛ Yesu ebu le onu si, “Mledzi a trɛ tɔ mlasi Yohanes eboa la gi mlenu, ani eboa la aŋu mɛ gi mlɛmɔ ɛ. 5Kuŋupoo kwimɔ, lɛ bafa ba bɛɛga a; kunya kyikyĩ yɔ banyanya ba ɛ, ba isu iidra a, lɛ itoku le kyɛ iinu i. Bekpo ʋa beedzi ligbã, lɛ bɛpani liboe gbã nɛ ɛsi bepiplinete ba a. 6Aya aakrira ɔnɔ kakaa gi ógbe me ní eboa la gi mɛɛbitɛ loso e!”
7Agi Yohanes yɛ badɔkpasi ba bɛzɛsɛ̀ ɛ, Yesu ekpese kupani ní Yohanes su u, kí linɔkpi le si, “Gi mlɛdzi Yohanes klɔ ní ɔyaya klɔ ɛ, ege mlegyo edi si mlɛtrɛ ɛmɔ ɔ? Kize eze ŋwisi oxugbe ní liwɔ onu loo o? 8Ege mledo etrɛ si mlɛtrɛ ɛmɔ ɔ? Onyime gi ɔkpasi liwu gbã mɛ loo o? Banama gi bizɛkpɛ ewu gbã na ɛ, kekusipe me bizeeze e. 9Mlasi mɛ, ege mledo etrɛ si mlɛzeedi i? Aya yɛ oboedoplɛ loo o? Nite ɖii; pɔ ɔniliɛ gi mlɛmɔ ɛ, ekeme a sani oboedoplɛ ɛ. 10Yohanes yɛ onu ɔniliɛ gi yɛ su Aya liboe le lipani i plɛ si, “‘Maatsisi mɛ ɔxwɛdzɛɛ kpɛ ɔtɔ tɔ aadra kudeo ki wɔ ɔ.’ 11Sugba ɛ, mɛɛsi mlɔ si Yohanes kuni yo ɔkpɛkpɛɛ ekeme a sani ɔnɔ kakaa gi aga ɔdzɛ kupɔpɔ mɛ ɛ. Pɔ̀ ɔniliɛ gi onu ɔsisami yɛ ní Aya yɛ kaʋaŋaa mɛ ɛ, ekeme a sani yɛ ɛ. 12Dɔni lipoe lɛ klɔ gi Yohanes apani yɛ eboe la, gakɔ nani ablahate e, Aya yɛ kaʋaŋaa kɛtrɛ ɔtɔ ni kigagla, lɛ banɔ aŋu mɛ gagla benete bɛpɛ si bɛzi ka ní kigagla a. 13Gakɔ nani Yohanes lipoe le e, Aya yɛ beboedoplɛ ba ni Mose yɛ isã nɛ bɛpani ní Aya yɛ kaʋaŋaa su. 14Lɛ xe mlɛpɛ si mlaazi ba eboe la aʋa ŋa ɛ, kɔlɔ, Yohanes yɛ onu Eliya gi yɛ kubabaa su u bɛpani i plɛ ɛ. 15Ɔniliɛ gi kutu kuli yɛ ɛ, atɔ onu le.
16“Lɛ abla ɛ, ege maakɔ omono kelea mɛ banima kusrɔnɔ ɛ? Balɛ ŋwisi ɔnuvɔ ha gi odi ní kedzi me kinɛ ɛ. Ɔha tole ɛkpɛ ozi ɛtsisi ba ɔhanuglɔ ba si,
17“ ‘kwikpɛ kudzɛgbanɔ idzi iki mlɔ,
pɔ̀ mleyo o.
Kwikpɛ ibemidzi i ki mlɔ,
pɔ̀ mlébemi i.’
18Agi Yohanes aba ɛ azaanya onugu lo lɛ ɔ́ŋwɛ wain kyɛ ɛ; lɛ ɔnɔ kakaa apani si, ‘Ɔfuɛfuɛ zimizi ɔkpasi ní yɛ mɛ!’ 19Agi Ɔnɔɛ Yebi ye aba ɛ, azaaŋa bidɔ, lɛ azaaŋwɛ wain yɛ kyɛ, lɛ ɔnɔ kakaa apani si, ‘Mledi onyime liɛ ya a! onu ɔŋazi nɛ ni ɔdaŋwɛmu, babɔgyɔ ba ni “banɔ zimizi ba” ɔʋia nɛ.’ Kuboeteo kɔ kiboebitɛ kɛ kizebu isu ya ɛbasɛ si kwina a.”
Imaɛ lɛ klɔ gi izi Yesu yɛ liboe le aʋa ɛɛŋa ɛ
20Agi banama gi bali ní imaɛ lɛ klɔ mɛ gi Yesu abitɛ yɛ enugutseboe la begbe xe békyi ní ba eboe zimizi na mɛ ɛ, Yesu atɛni ba a. 21Yesu apani si, “Lianyani iki wɔ Korazin! Lianyani ki wɔ Betsaida fɛ! Xe enugutseboe ala gi bɛbitɛ ní wɔ mɛ ɛ, atɛsi Tiro ni Sidon, bɛbitɛ la ɛ, nya banima beenyime akpanya basa e fuflu kusuʋɔtɔ ní isu ya kokooko tɔ bɛbasɛ si bekyi ní ba eboe zimizi na mɛ ɛ. 22Mɛɛsi mlɔ sugba sugba si ní Litsixwawe le aʋa ɛ Aya aadi banama gi bali ní Tiro ni Sidon asigaga a sani mlɔ. 23Lɛ wɔ Kapernaum kɔ ɛ! Kipɛ́ wɔpɛ si wumuni wɔ isu ya kɔna ni lifunu ne na a? Aya aawɔli wɔ kɔŋwia kpɛ ní kifu monimoni ye me! Atɛsi enugutseboe ala gi bɛbitɛ ní wɔ mɛ ɛ, xe bɛbitɛ la ní Sodom i, nya Sodom aaze kɔ bana ni omono o! 24Mɛɛtrɔ likla ní lɛ aʋa ɛ, kimlɔ si, ní litsixwawe le aʋa ɛ, Aya aadi Sodom asigaga a sani wɔ ɔ!”
Mlaba mɔklɔ tɔ mleze amɔni
25Ní lipoe klɔ mɛ ɛ, Yesu apani si, “Medo wo ɖase Ɔka, Lifunu ne ni kesea Ɔkaɛ! Lɛ ese linu si wobu ɔbasɛ banama gi béte keplekpa ɛ, kidiliɛ gi wɔkɔ okpo beboete ba ni beplekpate ba ɛ. 26Ee, Ɔka, nite wɔpɛ si liba lɛ mɛ ɛ.
27“Mɛ ɔka akɔ kidɔ kakaa aki mɛ. Ɔnɔnɔ óte Obi ye sani Ɔka yɛ ko, lɛ ɔnɔnɔ fɛ óte Ɔkaɛ, sani Obi ye ko, ani banama gi Obi ye apɛ si yibu ye e basɛ ɛ.
28“Mlaba a! Mlɔ banama petee gi mletu adɔtu la xe mlɔ adɔtu la eepè mlo e, mlaba mɔklɔ atɔ maaki mlaayɔ isu mɛ ɛ. 29Mlabubɔ isu ya akpɛ mɛ ese tɔ mlakpasi mɛ ɛ. Lɛ ese linu si mayɔ ɔ, lɛ mepleni isu ya ní Ɔfuɛfuɛ nɔ mɛ ɛ, atɔ mlamɔ isu mɛ kuyɔyɔ ɔ. 30Mɛ ese kuzezeo kuli i plɔplɔ ɔ, lɛ mɛ lidɔtu le gi maatrɔ wɔ ɛ, líma ɛnyipu.”
လက်ရှိရွေးချယ်ထားမှု
Mat 11: avn
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
