Génesis 18
18
Tumpa jei umeeta oï Abraham pe taɨrä
1Abraham jare jëtara reta ndiwe yureko rambuewe pëti kuimbae Mamre jee wae iɨwɨrayapetururenda pe, Tumpa ikoño mái wae uyekuaa ye Abraham pe kuärái:
Pëti ara Abraham uwapɨ uputuu iko jëta wakapi pewa jöke pe ara mbɨte rupi. 2Jare Abraham umae yawe, aramoiño uecha yuweru ñonoï ikotɨ mbapɨ kuimbae reta. Jáeramo Abraham upüa wɨrae oo owäiti jare uñeñono ɨwɨ re uipɨu rewe. Jukuärái jae umbɨsaluda.
3Jare jei chupe reta: “Chemburuwicha reta, piyerowia mii che ndiwe jare awɨye mii peasa wɨrae chewi. Peasa mii pepou chepɨ,” jei. 4“Peputuu mii kua ɨwɨra iwarasɨ̈a íɨwɨ pe jare taruruka mii pewe ɨ piyoe waerä pepɨ. 5Pewäe ma ko cherëta pe, jayawe aruta pewe mbɨyape peu waerä jare pekɨrëɨ ngatu ye waerä. Pepɨta mii michi pewa chepɨ ndei peasa mbowe,” jei chupe reta.
Jare jae reta jei chupe: “Jaekawi. Iyapo nde ndere rami,” jei reta.
6Jayawe Abraham osi oo jare uike jëta wakapi pewa Sara oï wae pe, jare jei chupe: “Eki woi veinte kilo harina ipuasɨ wae, jare iyapo woi mbɨyape jare emboyɨ,” jei chupe.
7Joko wi Abraham osi oo waka reta ñonoï wae pe, jare uiparawo toro taurusu wae ikɨra kawi wae, jare umee pëti ipione pe. Jayawe ipione jawoi pewa uyuka jare uyapo tembiu jëe ngatu wae. 8Jare opa uyapo yawe jokua tembiu reta, Abraham ueru wara jare neche jare toro taurusu wae isoo oyɨkue, jare umee imboupa reta pe. Jare imboupa reta ukaru yureko rambuewe, Abraham uyemboɨ koiño ɨwɨra reta iwarasɨ̈a íɨwɨ pe uyeyokui waerä chupe reta.
9Jare opa ukaru reta yawe, pëti mboupa upɨrandu Abraham pe: “¿Kiape pa oï nembireko Sara?” jei.
Jare Abraham jei chupe: “Jae oï o pe,” jei.
10Jayawe mboupa jei Abraham pe: “Kua wi ïruwe año pe ayu yeta aï. Jare nembireko Sara imembɨta ma oï kuimbae,” jei chupe.
Jare Sara oï jae reta jaɨkue kotɨ jëta wakapi pewa japɨpe, jare uyapɨsaka wɨari oï jese öke wi. 11Abraham jare Sara mokui rewe indechiete ma, jare uasa ma Sara wi iaño reta ipuereta tëi imembɨ wae. 12Jáeramo uyandu yawe mboupa jei wae, Sara upuka wɨari jare uyemɨngeta ipɨa pe: “¿Këraita ra ayembɨyerowia cheme ndiwe? Chendechiete ma jare cheme indechiete ma wi,” jei uyemɨngeta ipɨa pe.
13Jayawe Tumpa jei Abraham pe: “¿Maera pa upuka Sara? ¿Maera pa jae jei iyupe jae ko kuña indechiete ma wae, jare jei wi ndarau ma ipuere imembɨ?” jei. 14“Che ko jae Tumpa aikoño mái wae. Mbaetɨ ko mbae yawái chemaerä. Kërái che jae ndewe rami, ayu yeta apou aï ndepɨ kua wi ïruwe año pe. Jare Sara imeta ma imembɨ kuimbae,” jei Tumpa Abraham pe.
15Erëi Sara jokua ñee uyandu yawe, ukɨye jare jei: “Che apuka’ä,” jei.
Jayawe Tumpa jei chupe: “Añetete ko, ndepuka,” jei.
Abraham uyerure Tumpa pe tëta wasu Sodoma re
16Joko wi jokua mboupa reta upüa yuraa ye reta waerä tëta wasu Sodoma jee wae kotɨ. Jare Abraham oo umɨïru imboupa reta omondo ye reta waerä. Jare yuraa uwäe reta pëti ɨwɨtu wasu ɨwate wae re. Joko wi ipuere umae reta tëta wasu Sodoma re.
17Jayawe Tumpa uyemɨngeta ipɨa pe: “Kua ayapota aï tëta wasu Sodoma pe wae añomita’ä aï Abraham wi. 18Echa’ä Abraham iñemoñaa reta rupi ayapota aï pëti tëta wasu tuicha wae jare imbaepuerete wae. Abraham rupi opaete ɨwɨ pewa reta uyekouta. 19Che aiparawo ma Abraham uikuaaka waerä iñemoñaa reta pe uyapo reta waerä che jae wae rupi, jare uyapo reta waerä ikawi wae jare jupi wae. Jáeramo che tayapo Abraham pe jare iñemoñaa reta pe opaete jokua ikawi wae che jae aï wae.” Jukuärái Tumpa uyemɨngeta ipɨa pe.
20Jayawe Tumpa jei Abraham pe: “Jeräkua ma opaete rupi tëta wasu reta Sodoma jare Gomorra pewa reta jeko kachiete ma reta. 21Jáeramo ata aï joko pe aikuaa waerä añetete ra jokua. Jukuärái aikuaata mbae ayapota wae,” jei chupe.
22Jare mokui jokua mboupa reta oë yuraa Abraham oï wae wi yuraa tëta wasu Sodoma kotɨ. Erëi Abraham upɨtaño Tumpa jowai.
23Jayawe Abraham oya katu Tumpa re jare upɨrandu chupe: “¿Nembaita ra jupi wae reta wi jupi mbae wae reta ndiwe? 24Aramoi ime ñonoï yawe cincuenta jupi wae reta tëta wasu pe, ¿nembaita ra jesewe jokua jupi wae reta ïru wae reta ndiwe?” jei chupe. “Ndarau etei ikawi ndiyapo waerä jukuärái. Neakañɨta ko jokua tëta wasu pewa reta pe jeko kachi jokua cincuenta jupi wae reta jeko pewa. 25Ndarau nembái jupi wae reta jupi mbae wae reta ndiwe. Ndarau jupi wae reta nemboyowakeño jupi mbae wae reta ndiwe. Nde ko jae opaete ɨwɨ pewa reta iYa jupi wae, jare ndiyapota jupi wae rupi,” jei Abraham Tumpa pe.
26Jayawe Tumpa jei Abraham pe: “Awäe cincuenta jupi wae reta tëta wasu Sodoma pe yawe, ambaita’ä tëta wasu pewa reta jokua cincuenta jeko pewa,” jei chupe.
27Jare Abraham jei ye chupe: “Erupɨa mii chewe, cheYa, echa’ä aipɨu mbae echa ayemɨngeta aï nde ndiwe,” jei. “Yepe tëi nde ko jae Tumpa imbaepuere tuichaete wae, erëi ɨwɨkuí ko che, jesewe emaeño mii cheré apɨrandu ye waerä ndewe,” jei. 28“Aramoi mbaetɨ cincuenta, erëi ime yawe jaeño cuarenta y cinco jupi wae reta, ¿nembaita ra jokua pandepo uata wae jeko pewa?” jei.
Jayawe Tumpa jei chupe: “Ambaita’ä tëta wasu pewa reta awäe yawe jaeño cuarenta y cinco jupi wae reta,” jei.
29Jare Abraham jei ye chupe: “¿Mbae pa ndiyapota newäe yawe cuarentaño jupi wae reta?” jei.
Jayawe Tumpa jei chupe: “Ambaita’ä tëta wasu pewa reta awäe yawe jaeño cuarenta jupi wae reta,” jei.
30Jare Abraham jei ye chupe: “Ayerure ndewe awɨye mii ndepochɨ waerä chewe, echa’ä kuärái ayemɨngeta aï nde ndiwe ramo. Erëi emaeño tapɨrandu ye ndewe, ¿mbae pa ndiyapota newäe yawe treintaño jupi wae reta?” jei.
Jayawe Tumpa jei chupe: “Ambaita’ä tëta wasu pewa reta awäe yawe jaeño treinta jupi wae reta,” jei.
31Jare Abraham jeiete jei ye chupe: “Mase, aipɨu mbae echa ye ayemɨngeta cheYa ndiwe kua rewa,” jei. “¿Mbae pa ndiyapota newäe yawe veinteño jupi wae reta?” jei.
Jayawe Tumpa jei chupe: “Ambaita’ä tëta wasu pewa reta awäe yawe jaeño veinte jupi wae reta,” jei.
32Jare Abraham jei ye chupe: “Ayerure ndewe awɨye mii ndepochɨ chewe, echa’ä kuärái ayemɨngeta ye aï nde ndiwe ramo,” jei. “Erëi emaeño cheré apɨrandu ndewe pëti wese ye, ¿mbae pa ndiyapota newäe yawe jaeño payandepo jupi wae reta joko pe?” jei.
Jayawe Tumpa jei chupe: “Ambaita’ä tëta wasu pewa reta awäe yawe jaeño payandepo jupi wae reta,” jei.
33Jayawe Tumpa opa uyemɨngeta Abraham ndiwe yawe, oo ye. Jare Abraham oo ye jëta wakapi pewa pe.
လက်ရှိရွေးချယ်ထားမှု
Génesis 18: gnwPB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2017, Ethnos360 (New Tribes Mission). All rights reserved.