Génesis 17
17
Tumpa umbɨpɨau jokua yemɨngeta Abram ndiwe wae
1Abram ime wɨreko noventa y nueve año yawe, Tumpa uyekuaa ye chupe jare jei chupe: “Che ko jae Tumpa chembaepuere tuichaete wae,” jei chupe. “Iñemɨïru kawi che ndiwe jare iyapo jupi waeño. 2Jayawe ayapota nde ndiwe pëti yemɨngeta ikawi wae, jare ambɨjetaeteta aï niñemoñaa reta,” jei chupe.
3-4Jayawe Abram uñeñono ɨwɨ re uipɨu rewe. Jare Tumpa jei chupe: “Che ayapo aï pëti yemɨngeta ikawi wae nde ndiwe. Jetaeteta ko niñemoñaa reta jare jae reta uyeyapota jeta ambɨe ɨwɨ pewa retarä,” jei chupe. 5“Jare ndarau ye ma nderee Abram. Añawe wiwe nderee ko Abraham, echa’ä che nduyapota aï jeta ambɨe ɨwɨ pewa reta tamɨrä. 6Jetaeteta ko niñemoñaa reta, jare jae reta onoita mbaepuere jeta ïru ambɨe ɨwɨ reta re. Jare amokue niñemoñaa reta ipɨte wi ikota mburuwicha wasu retarä,” jei. 7“Jare jaeño mái pewa chemanduata aï kua yemɨngeta ikawi wae re ayapo nde ndiwe jare niñemoñaa reta ndiwe wae. Jare che aikota jaeño mái pewa ndeTumparä jare niñemoñaa reta iTumparä wi,” jei. 8“Kua ɨwɨ Canaán nde neï pɨpe wae pëti ambɨe ɨwɨ pewa rami, ameeta aï ndewe nemaerä jare niñemoñaa reta imaerä wi jaeño mái pewa. Jare che aikota jae reta iTumparä,” jei Tumpa Abraham pe.
9-10Jare jei wi chupe: “Nde jare niñemoñaa reta imeta ko jekuaeño piyapo kua yemɨngeta jei wae rupi,” jei. “Piyapota ko kuärái: Tuyembɨcircuncidaka#17.9-10 Uyembɨcircuncidaka ko jae “circuncisión” jei chupe reta karái ñee pe wae. Kua ñee uipota jei uikɨ̈tika chuwi jäkuipire mii. Jokua umbɨjaanga yemɨngeta Tumpa arakae uyapo Abraham jare Abraham iñemoñaa kuimbae reta ndiwe wae re. opaete kuimbae reta pepɨte pe ñonoï wae,” jei. 11“Opaete pe reta kuimbae piko wae reta imeta ko piyembɨcircuncidaka kɨse pe. Jare jokua ikota pëti yembɨjaanga kua yemɨngeta ayapo aï pe reta ndiwe wae re,” jei. 12“Añawe wiwe pembɨcircuncidakata ko opaete kunumi raɨ pepɨte pe oa reta wae juri ara ma onoi yawe. Jukuärái wi pembɨcircuncidakata ko opaete pepione kuimbae reta pepɨte pe ñonoï wae, jare jae reta taɨ pepɨte pe oa reta wae, jare ïru kunumi raɨ reta pewakue ambɨe ɨwɨ wi wae,” jei. 13“Pëti pëti wae tuyembɨcircuncidaka. Kua ikota yemɨngeta jaangarä perete pe oï wae uikuaaka waerä kua yemɨngeta ayapo aï pe reta ndiwe wae jaeño mái pewa ko,” jei. 14“Ipotawe kuimbae uyembɨcircuncidaka mbae wae chembae’ä ko. Jáeramo pemondo ye peyuwi, echa’ä jae uyapo’ä che jae wae rupi jeko pewa,” jei Tumpa Abraham pe.
15Jare Tumpa jei wi chupe: “Nembireko ndarau ye ma jee Sarai. Añawe wiwe jeeta Sara,”#17.15 Tee Sara uipota jei “mburuwicha wasu tayɨ” hebreo ñee pe. jei. 16“Jare chiñee rupi ayapota ikawi wae chupe, jare Sara rupi ameeta ndewe nderaɨrä. Añetete ko ayapota ikawi wae chupe jare Sara ikota jeta wae reta iyarɨrä. Jare amokue jae iñemoñaa reta ipɨte wi ikota mburuwicha wasu retarä,” jei chupe.
17Jayawe Abraham uñeñono ɨwɨ re uipɨu rewe. Erëi ipɨa pe uyemɨngeta kua Tumpa jei wae rewa yawe, upuka: “¿Këraita ra chepuere amɨmembɨ chembireko ime ma anoi cien año rupi wae? Jare ¿ipuereta ra Sara imembɨ ime ma onoi noventa año rupi wae? Yawaiete ko,” jei uyemɨngeta ipɨa pe. 18Jayawe Abraham uyerure Tumpa pe: “Kërái moná ndiyapo Ismael pe jare jae iñemoñaa reta pe jokua mbaembae ikawiete wae ndere ma chewe wae,” jei chupe.
19Jayawe Tumpa jei chupe: “Kua yemɨngeta ayapo nde ndiwe wae, jae’ä ko Ismael pewarä. Echa’ä Sara etei imembɨta nemaerä jare nembɨjeeta Isaac.#17.19 Tee Isaac uipota jei “puka” hebreo ñee pe. Jae jare iñemoñaa reta pewarä ko kua yemɨngeta jaeño mái pewa ayapo nde ndiwe wae,” jei chupe.
20“Erëi ayandu ma nde ndiyerure chewe Ismael rewa wae. Jáeramo ayapota ikawi wae chupe wi chiñee rupi. Ambɨjetaeteta aï chupe isambiaɨ retarä jare iñemoñaa retarä. Doce jae taɨ reta ikota mburuwicha retarä. Jayawe tayapo Ismael iñemoñaa reta wi imbaepuerete wae,” jei chupe.
21“Erëitu ayapota aï kua yemɨngeta ikawi wae Isaac jare iñemoñaa reta ndiweño. Ïruwe año pe kua nunga ara rupi, oata oï Sara imembɨ Isaac,” jei Tumpa Abraham pe.
22Jare Tumpa opa uyemɨngeta Abraham ndiwe yawe, oo ye chuwi.
23Joko wi, jokua ara etei, Abraham uyapo Tumpa jei wae rupi jare uyembɨcircuncidaka. Jare umbɨcircuncida wi taɨ Ismael, jare opaete ïru kuimbae reta jëta pewa, jare ipione kuimbae ipɨte pe oa wae reta, jare owa wae reta wi. 24-25Uyembɨcircuncidaka reta yawe, Abraham ime wɨreko noventa y nueve año jare taɨ Ismael wɨreko trece año. 26Jare jokua ara etei mokui rewe uyembɨcircuncidaka. 27Jare opaete ïru kuimbae reta jëta pewa reta ndiwe, jare ipione kuimbae ipɨte pe oa wae reta wi, jare kuimbae owa wae reta wi, opaete uyembɨcircuncidaka Abraham ndiwe.
လက်ရှိရွေးချယ်ထားမှု
Génesis 17: gnwPB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2017, Ethnos360 (New Tribes Mission). All rights reserved.