ṬŌNTLOHEI 21
21
Jerusalema Paul Ase
1Chibei kanpek heia kandahlon jo hei. Intlunhrek a intôr unga Cos katlung ung; ajîng kania Rhode katlung ung, khana khava hmun a inphut Patarating kase thang unga kae. 2Khava hmun a khan Phoenicia kajōn sik rakōng kanhmua, khang’khan kachōng unga intôr jo ung. 3Cyprus heihmu phâkna hmun kantlung pha, khana inphut thlâng ting intôr unga Syria kanjōn jo. Tyre neinâk manrōkna sik rakōng ṭhumhmuna leikase ung. 4Khava hmun a khan takkasen ṭhahrep kan-intōpui heia kani vekhat leika-omsap ung. Rathla rathahrat vânga Paul kha Jerusalemting asemakna sik anmani’n anleihri pek. 5Tâk-kha anmani leh kanphât hmang a’nchai jo pha kandahlon heia kanhma kansong jo. Annuhmei ansahei leh ankhenga khōpuia inphut tui-ôngpui pang katlung anijui unga khava hmun a khan kanmarkhup kanthlep a derna kannei. 6Khava sōa inkhat leh inkhat inchibeitō unga, keini seng kha rakōnga kahlut unga anmani chu innting inle jo hei.
7Tyre inphut Tolemai kajōna khanga intôr unga, khava hmun a khan takkasenhei leh inralamtō ung khana anmani leh ni khat pha kanlei hmangsap. 8Abân kania kase nôk unga Caesarea katlung jo ung. Khava hmun a khan Jerusalema mikabôm sik a kadeisōt mihring 7 kâra inkhat, ṭong kahrile Philip inna leikatlung ung.#Ṭōn 6.5; 8.5 9Ama’n Pathen ṭong kasânsōt, inn lakanei mak sanuhngâk 4 aleinei hei. 10Khana khan kanikhō kasôt-hlek kan-om shunga Judea a inphut Agaba inti sânkathem inkhat hong katlunga kae.#Ṭōn 11.28 11Kanhnenga ama kahonga, Paul khōnkir kha aloa, abinga akut ake inkhōp a khana ati, “Hivahi Rathla Intheng tahri kae, Jerusalema ka-om Jehudi he’n hiva khōnkir kaneipa hi hinghina antakhit sik kae, khana jât-hlop hei kut a antapek sōt sik kae.”
12Hivahi kanthei pha, keini leh alak aka-om seng khan Paul kha Jerusalemting asemakna sik a kanleingek. 13Tâk-kha ama’n, “Heimo nantatlo jo, hinga akaṭap cheia kamalung nantamakhōi pek eng hi-e? Jerusalema khōp karâk sik rōk changloa Rōngpu Jesu sik jâra khana khan thi sik katlunga a’ntluk jo eng kae,” tia aleimasôn ung.
14Keini’n jôr manhnōm tor mak jo ung, khava jâra kanbânga, “Rōngpu lungdo kha chang jo rasoh,” kanleiti.
15Khava hmun a khan pha ṭhahrep kanhmangsō joa, kanneinâk hei kanmantluk a Jerusalem kajōn sik a kandahlon jo. 16Caesarea a inphut sonle ṭhahrep leh le’nṭhōi ung khana ahma inkei takkasen kâra ale’nvei Cyprus a inphut Manason intipa mi inkhat inna kantlungna sik anṭhōi jo ung.
Paul in James Avaphak
17Jerusalem kantlung pha takkasen he’n inpâktak a anleiratō ung. 18Ajîng kania Paul leh kankhenga James inhmupui sik leikase ung; khana Bekrup upa rakip um khan leika-om hei. 19Paul in ralamna chibei apek heia, aṭōn tloa inphut Jât-hlop hei kâra Pathen ṭōntlo kha pui katluktak a ṭong phôngna aleinei. 20Anrangeisō pha, ankhenga Pathen anleimanpâk jo. Hing’hin anmani’n antipek, “Sōpui Paul, Jehudi lishing heija mo takkasen aheikachang jo hei, khana Dân a hin heituk a anmalung akahlut jo mo ti hi nang in nahmu tor jo. 21Jât-hlop ram a ka-om Jehudi rakip hei hneng Moses Dân dahlona ansahei anvun antanpek makna sik khana Jehudihei chônngaihei anjui makna sik a nang in namanthei hei tia anmani hi anhri pek jo hei. 22Nahong tlung jo ṭong hi anmani’n anleithei nger sik. Achang inchu heimo nitlo sik jo? 23Kantamantlo hnōm che khachu hi kae. Intepna kanei mi 4 hinahin ka-om hei.#Mj 6.13-21 24Anmani leh sesap ina insuk inthengna rōia va’nvei roh khana ansêr manhlut sik kha nang in kadompek hei roh; khang’khan anmani’n anlu anvothei sik jo. Khang’khan nang chungchânga anta leihripek heirakip kha akadik changmak tâk nang chu Moses Dân dungjuitak a kahring che ti kha mi rakip in anmanhret sik jo. 25Tâk-kha takkasen jo Jât-hlop hei hneng chu limhei hnenga intōk thlai, thisen, a-emak leh a’nrâk-hlon ranhring him-him ansâk makna sik leh jông leh kîk a inphut ani’nhrungna sik ṭong mathlâkna kannei jo ti mantheina lekha kanleitir jo.”#Ṭōn 15.29
26Khava jâra ajîng kania Paul in mihei kha aṭhōi heia insuk inthengna rōi kha avatlopui jo hei. Khava sōa Bek-inna kasea an-insuk inthengna pha kha kanikhō heija mo a’nchai leh anbing et a inthoina neitōk anneina sik amanthei hei.
Bek-inna Paul Anta leisur
27Tâk-kha ni 7 kha a’nchaiting, Asia ramṭhen a inphut akahong Jehudi ṭhahrep he’n Paul kha Bek-inna anleihmua kae. Anmani’n mipuihei kha anmathok heia Paul kha anleisur jo. 28“Eh Israel mihei! Abôm ruh! Hmun rakip a akasea Israel mipui leh Moses Dân khana hiva Bek-inn kadōia mi rakip mantheina kanei kha hiva mipa hi kae. Khana tûnhin um Bek-inn shunga Jât-hlop hei aheiṭhōi manhlut a hmun intheng hi amanbok a kae!” tia anlei-ôn. 29(Paul kha Ephesus a Trophimus leh khōpui shunga anlônle anhmu jâra Paul in Bek-inn shunga aleiṭhōi manhlut jo kachang sik ti jâra hivahi antahri kae).#Ṭōn 20.4
30Khōpui shung pumpui kha inhâng jo, mipui rakip hei khan anhnonga Paul kha ansur jo, khana Bek-inn vângting ankeisōt jo. Inrangtak a Bek-inn kot-hei kha ankam jo. 31Mipui khan Paul kha that sik a anreilai Rome sepei rehlam kakeipa hneng Jerusalem pumpuia bōina kasōk jo ti ṭong anleimantheia kae. 32Rehlam kakeipa khan inrangtak a ṭōnpui karôn leh sepei ṭhahrep aṭhōi heia mipui langting aleisorpui hei. Sepeihei leh anhong kha mipui he’n anhmu pha Paul antavōk kha anbâng jo. 33Rehlam kakeipa khan Paul ajōna, asur jo, khana thirkehrui 2 vâng antakhōp sik a ṭong aleipek hei. Khava sōa ama’n aleider hei, “Hiva mipa hi tu mo, khana heitlo setna mo anei?” 34Mipui kâra ṭhahrep in inkhat anhria ka-ông hei, alak he’n ahlop a ka-ông hei. Khana khan inhmakna ka-om joa ṭōn kasōk ajâr kadiktak kha rehlam kakeipa khan hmusōt tor mak jo, khava jâra Paul kha kur shunga anṭhōina sik a amihei ṭong apek jo hei. 35Chung kena kechōnna omna katlung anphakpui pha mipui hnuk natna kha atirei jo jâra ama kha antakadom sik leikasōk jo. 36Anmani ankhenga akahnung anhei juia, “That ruh!” tia leikapeng hei.
Abinga Paul A’nhrungna
37Sepeihei khan Paul kha kurshung anhlutpui sik jo ting ama’n rehlam kakeipa hneng khan, “Heimo khat kahri pek thei sik che mo?” aleiti.
Rehlam kakeipa khan ader, “Greek ṭong akaṭongthei che mo? 38Pha ṭhahrep mak hma rerûk aphut a mihring 4,000 re hmangchâk kachoihei nêrdiram a aleikaṭhōisōt Egypt mipa khachu changmak che nu?” aleiti.
39Paul in amasôn, “Kei hi khōpui rahming kanei Cilicia khōpui Tarsus hmun a a’nte, Jehudi mi inkhat eng kae. Lungset a mipuihei hneng ṭong amanhri roh,” tia aleingek.
40Rehlam kakeipa khan hnōmna ṭong aleipek, khava pha Paul kha, chung kena kechōnna chunga kangirsōt a anrasa anmandaina sik a mipuihei kha akut vâng aleijâp hei. Anrasa adai jo pha, Hebrew ṭonga Paul in hing’hin ahri pek hei:
လက်ရှိရွေးချယ်ထားမှု
ṬŌNTLOHEI 21: KOMRBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.