ṬŌNTLOHEI 20
20
Macedonia leh Achaia Hnenga
1Ṭong inhnok kha adaisō pha, takkasenhei kha Paul in aleibek mantûp hei khana mathokna ṭong leh inṭhōia ale’n thlâpui jo hei. Khava sōa adahlon heia Macedonia ting kase jo. 2Khava ramṭhenhei kha ahroa mipuihei kha ṭong katamtak vâng mathokna aleinei hei. Khava sōa Achaia a kahonga, 3khava hmun a khan thla 3 leika-om. Syria ting se sik a a’ntluksō jo ravâng khana ka-om Jehudi he’n that sik a anṭōn mantluk kha amanhretsōt pha Macedonia hroa a’nle sik a amandon jo. 4Berea a inphut Pyrrhus sapa Sopater kha ama leh inṭhōia leikase sap hei; khang’khan Thessalonica a inphut Aristarchus leh Secundus, Derbea inphut Gaius, Asia ramṭhen a inphut Tychicus leh Trophimus khana Timothy hei seng leh leikase sap heia kae. 5Kanhma a leikase heia Troas a anleihngâk ung. 6Che philo buhlom rehōisōa Philippia inphut intôr unga, ni 5 sōa Troas a inhmutō jo ung, khana khava hmun a khan kani vekhat leikachōng ung.
Troas a Paul Avase Hnung Kakhôrpen
7Châmhngat kani ning khōhleia lenkhôm thlai kasasōm sik a le’ntûp ung. Ajing kani leh chu akase sik jo ung achang jâra mihei hneng khan jân ṭhangṭim katlung Paul in ṭong aleihri. 8Kan-inkhômna chunga innden shunga khan thaihmei katamtak le’ndet invâra kae. 9Eutychus inti rether inkhat kha thlikot a le’n ong, khana Paul in ṭong ahri shunga khan ama chu inngui-nguia, achai-chaina chu kaje hnger joa, inn chung thō 3 a inphut raleia jōngkatla joa kae. Anmani’n anvaphon pha leikathi jo. 10Tâk-kha Paul jōng kaṭuma kakhup a akakōa, “Nanmalung mandong mak ruh, ama lakahring!” ati. 11Khava sōa chungting kaketoua buhlom akhōia ansâk jo. Kani ahong sōk katlunga a’nbekpuisō heia, Paul in adahlon jo hei. 12Rether naipang kha kahringa innting anṭhōia anmalung leikamōng hrânghra a kae.
Troas inphut Miletus a
13Assos hmun a khan Paul kha rakōng kanta manchōng sik achang jâra keini chu rakōnga le’ntôr masa ung. Ama chu kehlama akajōng sik achang jâra hinghina kantatlo sik a aleihri pek ung. 14Assos hmun a kan inhmutō pha, rakōnga kanman chōnga Mitilen ting kase jo ung. 15Khana inphut intôr unga ajîng kania Chios katlung jo ung, nikhatsōa Samos katlung ung khana abân kania khan Miletus katlung jo ung. 16Asia ramṭhen shunga oma phat manhmang makna sik, Ephesus khehlona intôrthang sik Paul in aleimandon. Achangthei sik a a-enchu Pentecost kani mak hma det a Jerusalem tlungtor ngerna sik a le’nhnot hêra kae.
Ephesus Upahei Hnenga Paul Mathlâna Ṭonghri
17Ephesus a Bekrup upahe’n anlei ratōna sik a Miletus a inphut Paul in ngekna ṭong aleimanrôn hei. 18Anmani anheitlung pha hing’hin aleihri pek hei, “Asia ramṭhen kahei tlung ninga inphut ka-ompui cheia kaphât rakip kahmang kha nangni’n nanmanhret. 19Jehudi ṭhahrep he’n ṭōnse anmantluk jâra kachunga phat intak aleikatlung shung heia khan malung innem leh hmit-rathli pum a Rōngpu sōk changna kaṭōn kha kaleitlo. 20Nan-innheia leh tlâng kâra ṭong kahrina leh kaman theina chei shunga ṭhatchômna nantaneipui sik inkhatbek hrisōt loa damak eng ti kha nanmanhret. 21Jehudihei leh Jât-hlop hei hneng in-angtlinga ansetna inphut Pathen langa anhong inhena sik leh ni-Rōngpu Jesu antaksenna sik a khôk saktak a kaleihri pek hei. 22Khana khan kachunga heimo akasōk sik ti manhret loa Rathla Intheng ṭong kajuia Jerusalemting tûn kase sik eng. 23Ke’n hirōk hichu kamanhret khachu kurkhum leh khōdeng theina’n ahngâk eng tia kasena khōpui rakip a Rathla Intheng in aleimanthei eng. 24Tâk-kha ke’nchu kahringkhō hi kei sik a chu heite kahnemmak inkhat a kamandon jo; kahlam hro hi pui mathluk sik khana Pathen maritna chunga ṭong kaṭha phôngsōtna sik Rōngpu Jesu tapek eng ṭōn hi chaihlon sik rōk hi kamadu jo.#2 Ti 4.7
25“Pathen rengram ṭong kahrilea nankâra leikaleng eng. Khana tûnchu nangni tu inkhat in avea ahmu nôk mak jo tin chei ti hi kamanhret jo. 26Khava jâra tuning chu kakhôktak a kaphôngsōt jo kae, nankâra tu mo inkhat a’nhmang inchu ke’n rahno rônmak jo eng. 27Ajârchu Pathen ṭōnmantluk rakip kha thup leh ṭhen neiloa kaphôngsōt pek jo chei. 28Khava jâra nanbing et leh Rathla Intheng in nankut chunga anganse jo chei rup-hei hi kaṭhatak a ching jo hei ruh. Asapa thisen jâra atâ amanchang jo, Pathen Bekrup sik akemōng kakhem chang ruh. 29Kadahlon chei kahnunga nankâra kahne kahrâng heikahlut sik hei, khana kemōng rup kha that loa damak hei ning ti hi kamanhret. 30Nanrup shunga kalan a mi ṭhahrep in takkasenhei kha ṭhōisōtna sik a maleisei anhonghrina sik pha kha alakahong sik kae. 31Khava jâra insing thei ruh, khana kum 3 katluk set, sûn leh jân tiloa hmit-rathli pum a nangni inkha-khat mantheina kaleinei chei kha mandonsōt ruh.
32“Khana tûnchu Pathen in ami rakip sik a amantluk, nankasyemsōt tor leh mahâmṭhatna kapek tor Pathen leh ama maritna ṭong ta-ensuina shunga nan-omna sik ṭong pekna kanei jo chei kae. 33Ke’n tûte inkhat dangka, sana, pōnsi derkei madu mak eng. 34Kei leh kaloihei tamadu tarangei hei kha pekna sik a hiva kakutkhet vâng hin ṭōn katlo hi nangni khet in nanmanhret a kae. 35Rōngpu Jesu atak-khet in aleihri, ‘Rahlâng kanek a pek hin inpâkna ka-om chet,’ ṭong hi mandonsōt pum a ahlam rakip a hinga rahnak a ṭōntlo hin akatlasam hei bômtorna amannei me ti hi kamalârpek jo chei.”
36Paul in ahrisō pha, anmarkhup anthlep a derna anleinei jo. 37Inthlâna sik a ankakōa anleimajôp lai, ankhenga leikaṭap jo hei. 38Avea inhmu nôk mak jo min aleitipek hei jâra anmalung aleitôn hêra kae. Khang’khan rakōng katlunga anvathak jo.
လက်ရှိရွေးချယ်ထားမှု
ṬŌNTLOHEI 20: KOMRBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.