ṬŌNTLOHEI 18
18
Corinth khōa
1Hivasōa Paul in Athen kha adahlona Corinthting kase jo. 2Khava hmun a khan Pontus a a’nte arahming Aquila inti Jehudi mi inkhat leh le’nhmu hei, lasôt lolaia Italy a inphut a nuhmei Priscilla leh inṭhōia akahong hei kae, ajârchu Caesar Claudius khan Jehudi rakip in Rome andahlonna sik ṭong aleipek hei. Anmani inhmupui sik a Paul kha leikase, 3khana anmani leh ka-omsap heia ṭōn um aleitlosap pui hei, ajârchu ama’m anmani kapōa pōn-inn kaṭhuina vânga a’nvei mi kae. 4Jehudihei leh Greek-hei malung surna sik a Châmhngat kani akaia kamukna inna kasea houlim aleineipui hei.
5Macedonia a inphut Silas leh Timothy anheitlung pha khan chu, Jehudihei hneng Jesu hi Messiah kae tia ṭong phôngsōtna leh sâkhi pekna Paul in apha nei rakip aleipek sōt a kae. 6Anmani’n achunga dōina leh ṭongse anhri pha ama’n atheikada a apōna vaiphin kha akathing thlōn heia hing’hin ahri pek hei, “Nangni nan-inhmang inchu, nanbinga maset nanta’nrôn sik kae! Ke’n mô kha rônmak ning. Tûna inphut chu Jât-hlop hei hneng kase sik jo eng.” 7Khava jâra anmani kha adahlon heia, Pathen inmuk Jât-hlop mi inkhat, Titius Justus intipa inna vaka-om jo; ama inn kha intûpna innpui hnengbât a aka-om kae. 8Intûpna inna hlamkakei Crispus intipa leh a-innshung mi rakip in Rōngpu antaksen jo; khava ṭong kha Corinth a ka-om milak he’num antheia, antaksena, tui kahlut jo hei.
9Jân khat hin Paul in hmangtalâr inkhat aneia, ahnenga Rōngpu’n hing’hin aleihri pek, “Ṭitna neimak roh, khang’khan bângloa ṭong kha hri ṭhak roh, 10ajârchu ke’n ka-ompui che. Tûte’n nang sukset tor mak hei tin, ajârchu hiva khōpuia hin kami hingja ka-om hei.” 11Khang’khan Paul kha khava hmun a khan kum khat leh aher leika-oma mipuihei kha Pathen ṭong aleimanthei heia kae.
12Gallio kha Achaia ram a Rome vai karôna matungsōt aheichang pha, khana ka-om Jehudihei kha intûp heia, Paul kha ansura, ṭongtan hmun a anleiṭhōi. 13“Hiva mipa hin dân dōina hlam a Pathen ankamukna sik mipui mathlem mathlâkna sik arei!” anleiti.
14Paul kha heiṭong rong atilaitak Gallio khan Jehudihei hneng, “Hivahi ṭōnse a-emak leh a’nṭhe intlona chungchânga achang inchu Jehudi nangni ṭong karangei sik hi ahlam akasōktak kae. 15Tâk-kha hiva hichu nanṭong, nanrahming khana nandân chungchânga inkhena akachang khan-e nanbinga intlo jo ruh. Hinghiva kapō hei ṭongkatan kha changmak eng!” atipek hei. 16Khana ṭongtan hmun a inphut ahnong sōt jo hei. 17Anmani’n intûpna innpui hlamkakei, Sosthenes kha ansura, ṭongtan hmun hma a khan anleirachâk jo. Tâk-kha khavakha Gallio khan chu heite’m leingeisak mak a kae.
Antioch a A’nle
18Corinth a khan Paul kha takkasenhei leh kanikhō katamtak leika-omsap hei, khava sōa Priscilla leh Aquila a’nṭhōi heia Syria kajōn sik a rakōnga le’ntôr jo hei. Cenchreae a inphut a’ntôr mak hma intepna inkhat aleinei jâra asam aleivoa kae.#Mj 6.18 19Ephesus katlung heia, khava hmun a khan Paul in Priscilla leh Aquila aleidahlon hei. Ama chu intûpna inna vakahlut a Jehudihei leh inbektōna avaneia kae. 20Mipuihei khan a-omsôt detna sik anleingek, tâk leihnōm pek mak hei. 21Khava kanek a, ama’n, “Pathen lungdo achang inchu nanhnenga kahong nôk sik eng,” atia adahlon jo hei. Khang’khan Ephesus a inphut le’ntôrsōt jo.
22Caesarea atlung pha, Jerusalema kasea bekrup kha chibei avapek khana, Antioch ting kase jo. 23Khana khan phat ṭhahrep a-omsōa, adahlona Galatia leh Phrigia ramṭhen aleihroa takkasenhei ratha alei manngar pek hei.
Ephesus leh Corinth a Apollos
24Khava pha Alexandria a a’nte, Apollos inti Jehudi mi inkhat Ephesus a kahong. Ama kha ṭonghri kathemtak leh ṭong intheng kaṭha nenga manhretna kanei mi kae. 25Rōngpu hlam kha anta hongmanthei jo kae, khana Jesu chungchânga ratha kahroktak a aleiphôngsōt a kadik a mi aleimanthei heia kae. Kha achang inum, John tui manhlutna rōk kha aleimanhret a kae. 26Kangamtak a intûpna inna ṭonghri aleiphut jo. Khavakha Priscilla leh Aquila he’n anthei pha, inna anṭhōia, Pathen hlam kha kadiktak a anleihri manchên peksa jo. 27Khang’khan Apollos khan Achaia ting se sik a mandonna aleinei, khava jâra Ephesus a ka-om takkasen he’n Achaia a takkasenhei hneng ama kha anleiralamna sik a lekha anleimazet pek a kae. Ama avatlung pha, Pathen maritna jâra takkasenhei sik a khan inṭangpui kaṭhatak hongkachang jo. 28Ajârchu mi makhe athemna vâng Jesu’n Messiah achangna kha ṭong inthenga inphut malârna apek a tlângpui inkhena shunga Jehudihei kha aleitor heia kae.
လက်ရှိရွေးချယ်ထားမှု
ṬŌNTLOHEI 18: KOMRBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.