ṬŌNTLOHEI 17
17
Thessalonica khōa
1Paul leh Silas khan Amphipolis leh Apollonia anpetana Thessalonica kahong jo hei, khava hmun a khan intûpna innpui inkhat leika-om. 2Atlo-ngai kapōa Paul kha innpuia leikase. Khana khan Châmhngat kani ni 3 shunga mipuihei kha inhoulimna aneipui hei, ṭong intheng apan a 3ahri manchên pek hei khana Messiah khan inrimna athōk a thina inphut athōisōt sik ṭong kha malârna aleinei pek hei. “Nanhnenga kaphôngsōt hiva Jesu hi Messiah kha kae,” tia Paul in aleihri. 4Ankâra mi ṭhahrep anhri manhnōm heia Paul leh Silas kahnung anleijui jo; khang’khan hlamkakei nuhmei katamtak leh Pathen inmuk Greek mi katamtak he’n anleijui jo hei.
5Tâk-kha Jehudi ṭhahrep anthang kase joa hnemna kase, hlamlena akalôn lele hei kha anchom heia mipui inchokna anleitlo jo. Anmani’n khōpui pumpui anmanbōicher joa Paul leh Silas jongsōt heia mipui ângkunga keisōna sik a Jason intipa inn kha anleibuhlu jo. 6Tâk-kha anhmumak hei pha, Jason leh takkasen alak-hei kha khōpui vaikarônhei ângkunga ankei heia, “Hiva mihei hin ahmun rakip a inchok inhângna anmasō! Tûn nôk hin kankhōpuia kahong heia, 7Jason in a-inna amathlung hei. Anmani’n Caesar dân heirakip ansukkhōia, Jesu inti Reng hlop inkhat ka-om anti,” tia ka-ông hei. 8Khava anṭonghri khan a’ntûp mipui leh khōpui vaikarônhei kha anmanhrâng jo hei. 9Vaikarônhei khan Jason leh aralak-hei kha masō anchangna sik sêr anmantei heia, anmasō jo hei.
Berea Hmun a
10Jân ahong changlim leh takkasen he’n Paul leh Silas kha Bereating antir jo hei. Anmani antlung pha intûpna innpuia leikase hei. 11Khava hmun a ka-om mihei kha Thessalonica mihei kanek a anmalung le’ntheng. Anmani’n ṭong inhri kha malung kahluttak a anleirangei, khana Paul tahri kha akadik khet mo ti hmusōtna sik a nitina Ṭong intheng anleiteia kae. 12Mi katamtak in anleitaksen khana kalen kahrâng Greek nuhmei hingja leh pase katamtak he’num anleitaksena kae. 13Tâk-kha Thessalonica a ka-om Jehudi he’n Berea khana’m Paul in Pathen ṭong aphông jo ti ṭong anthei pha kahong heia mipuihei kha anmathok heia anmanchōr jo hei. 14Inrangtak a takkasen he’n Paul kha tui-ôngpui pangting anvathaksōt jo; tâk Silas leh Timothy chu Berea a khanga leika-om hei. 15Avakathaksōt mihei khan Paul kha Athen katlung anvajui khana Silas leh Timothy in a’nrangthei chen a antava’n chunpui sik a Paul mansena ṭong leh inṭhōia Bereating he’nle jo hei.
Athena
16Athena Paul in Silas leh Timothy aleihngâk hei lai khan, akhōpui shunga limsyem kasiptak kha ahmu sōt pha amalung leihōi hêrmak. 17Khava jâra kamukna innpuia Jehudihei leh Pathen inmuk Jât-hlop hei, khana tetlânga ani tina akalônle mihei a’nhoulimpui hei. 18Epicure leh Stoic inti hei oja he’num inkhena anleineipui. Ankâra mi ṭhahrep in ander, “Hiva manhretna neiloa inhretsakpa hin heimo hri sik arei?”
Alak in anmasôn, “Ramlak Pathenhei chungchânga ahri kachang sik.” Paul in Jesu leh athōisōtna chungchânga mantheina aleinei hei jâra khanga anta leihri kae. 19Khava jâra Paul kha khōpuia Sehmang-pachong, Areopagus hei ângkunga anheiṭhōia, “Hiva nahri intheina ther chungchâng hi kanmanhret hnōm. 20Nahria kantathei ṭhahrep hei hi keini sik a chu det-hla inkhat alachang jâra heitina mo kanmanhret hnōm,” anleiti. 21(Athena ka-om mi rakip leh khava hmun a ka-om ram hlop mi rakip in heite tlo loa tûntûna ṭongther rangeina leh hrisōmna sik a anphat rakip kha hmang sik anleimadu).
22Khōpui Sehmang-pachonghei hma a Paul kangirsōt a hiva ṭong hi aleihri, “Ahlam rakip a Athena ka-om nangni hi bektinga nanmalung kahlut ti hi kahmu sōt. 23Nankhōpuia hin kalônle enga nankamukna hmunhei ka-en in, maichâm inkhat chunga, ‘Manhret lo Pathen hneng’ tia a’nzet kahmu sōt. Kamuk chu nantakamuk a, manhret chu manhret lo chei, khava Pathen kha tûnhin nanhnenga kaphôngsōt kae. 24Vânhnōi leh heirakip kasyem Pathen hi marvân leh ralei Rōngpu kae, khana ama chu mihring kutsyem Bek-inna om mak.#1 Rn 8.27; Is 42.5; Ṭōn 7.48 25Ama sik tlopekna leh pekna ninei sik heite ama’n rangei mak, ajârchu mi rakip sik a hringna leh kaphuk sânna khana heirakip kapek kha ama kae. 26Mihring inkhat a inphut phung tin jâttin rakip hi asyema raleichung pumpui kadap a aman om hei. Hmapet a inphut aphat hrep atep a an-omna sik ramri tepsa a ada heia kae. 27Hing’hin aleitlodek ajârchu ama rangeina annei pha leh ama anjong theina sik khana anhmu theina sik a kae. Kha’num eini tûte inkhatbek a inphut Pathen hi kahla a om mak; 28tu mo inkhat tahri kapōa,
‘Ama a kahring me, inhling me khana ka-om me.’
Hivahi nanhla kaphō ṭhahrep hei tahri kapōa,
‘Eini hi’m ama sa me kae.’
29Eini hi Pathen sa nichang jâra, ama ara-âng hi mihring kutthem leh tlotheina vâng hlung, dangka khana sana vânga insyem lim kha apō sik tia nimandon mak sik kae. 30Mihring he’n Pathen anleimanhret mak laia pha kha Pathen in-enmak jo, tâk tûnchu hmun rakip a mi rakip hneng anṭhatmakna hlam a inphut anhong inhena sik ṭong pekna anei jo hei. 31Ajârchu akadeisōt mi inkhatpa jâra vânhnōi pumpui hi akadik a ṭong atanna sik kanikhō kha atep jo. Amapa kha thina inphut akei mathōi jo jâra khan hivahi mi rakip hneng malâr manchênna anei jo!”
32Paul in thia inphut thōisōt ṭong ahri kha anthei pha, mi ṭhahrep in anleimanuisō, tâk alak inchu, “Hiva ṭong hi avea nahri pek nôk sik unga kanmadu,” anleiti. 33Khang’khan inkhômna hmun kha Paul in aleidahlon jo. 34Mi ṭhahrep in anjuia khana taksenna annei jo, ankâra inkhat kha Sehmang-pachonghei kâra Dionysius intipa kha kae; khana alak mi ṭhahrep leh Damaris inti nuhmeinu kha kae.
လက်ရှိရွေးချယ်ထားမှု
ṬŌNTLOHEI 17: KOMRBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.