ṬŌNTLOHEI 14
14
Iconiuma
1Iconiuma kha’num khang tlit a leikasōk: intûpna innpuia Paul leh Barnabas kase heia anṭonghri them jâra khan Jehudi leh Jât-hlop katamtak akataksen loi hongkachang jo hei 2Tâk-kha takkasenmak Jehudihei khan Jât-hlop hei kha ankachok heia takkasenhei kadōi anmanchang hei. 3Sonlehei kha khava hmun a khan pha kasôttak leika-om heia, Rōngpu chungchâng kha kangamtak a anleihri, ama khan det-hla leh ṭōn-inlak tlotheina ratha apek heia ama maritna chungchânga anṭongsem dikje kha amanchên pek heia kae. 4Khava khōpui mihei kha rup hnia le’nṭhen jo hei: ahlek in Jehudihei langa, khana ahlek in Jât-hlop hei langa.
5Khang’khan Jât-hlop leh Jehudi ahlek hei, anhlam kakeihei leh intûp heia sonlehei kha tlomanset sik heia inhnōmtō jo hei khana hlung vâng anleidêng jo hei. 6Khava ṭong kha sonle he’n anthei pha Lycaonia shunga Lystra leh Derbe khōpui heia leh akimve ram shunga katlân jo hei. 7Khava hmun heia khan Ṭong kaṭha kha anphông joa kae.
Lystra leh Derbe
8Lystra a khan a’ntetbia inphut ake kangōi, akalôntor hêrmak pase inkhat leika-om. 9In-onga Paul ṭonghri kha aleirangei. Kadam sik eng tia taksenna anei kha Paul in ahmu jâra, kasang kanga a-enna, 10rasa inhnaktak a, “Nakea ngir intlun roh!” aleitipek. Mipa kha inthok a ankimvea khan kalônle jo. 11Mipuihei khan Paul ṭōntlo kha anhmu pha an-Lycaonia ṭonga, “Pathenhei mihring kapō hongkachang heia nihnenga jōng kaṭum jo hei!” tia ông le’nphut jo hei. 12Barnabas kha Zeus antia khana Paul kha Hermes anleiti, ajârchu ama kha ṭongpui kahripen leikachanga kae. 13Khōpui vângbât a ka-om, Zeus Bek-inna thempupa khan reihrui leh seche hei sōngkot a aheiṭhōi hei, ajârchu mipuihei khan sonlehei hneng inthoina neitōk anleitlo hnōma kae.
14Khava tlo sik a an-intlukna ṭong kha Barnabas leh Paul in anthei pha, anpōnhei ankeihlera, mipuihei kâra katlân inhlut heia, leika-ông hei, 15“Heisik a mo hivahi nantatlo? Keini’m nangni kapōa mihring inkhat-hrep ung kae! Keini hi marvân, ralei, tui-ôngpui leh ashunga ka-om rakip kasyempa, akahring ṭhak Pathen sik a, hnemna kase neinâk heia inphut nan-inhesōtna sik a, Ṭong kaṭha kaphôngsōt sik a hiva hmun a akahong ung kae.#Sōk 20.11; Hl 146.6 16Hmalai chu mi rakip hi ama ama lungdo et a anse theina sik aleihnōm pek hei. 17Tâk-kha pha rakip a ṭōn kaṭha atlona vânga akahring ṭhak achangna kha amalâr: marvâna inphut khōtui amansûr pek chei, khana aphahrep a hmuchi-bechi amanra a, thlai apek cheia nanmalung inpâkna amansip pek chei.” 18Hiseng hi anhri jo katlunga’m sonle he’n anhnenga inthoina antōkna sik a inphut mipuihei kha leikhâmtor vet mak jo hei.
19Pisidia ram a Antioch a inphut leh Iconiuma inphut akahong Jehudi ṭhahrep in, mipuihei kha anlangting anleijôr mathlâk heia, Paul kha hlung vâng andenga, kathi jo tia anmandon jâra khōpui vângting anleikeisōt jo. 20Tâk-kha akataksenhei kha ahnenga anhe’ntûp pha, heikathōia khōpui shunga khan inle nôk jo. Ajîng kania ama leh Barnabas Derbeting leikase jo hei.
Syria Ram a Antioch a An-inle
21Derbea khan Paul leh Barnabas in Ṭong kaṭha anphônga mi katamtak sonle anleimanchang hei. Khang’khan Lystra, Iconium khana Pisidia ram a Antioch katlung kha anvachōn malet nôk a kae. 22Takkasenhei kha anmanhnet hei khana kadik a an-om ṭhakna sik a mathokna anleinei hei. “Pathen Rengram hlutna sik a khōdeng theina hingja nide nger sik kasōk,” tia anleimanthei hei. 23Bekrup rakip a upahei anleikadei pek hei khana derna leh thlai hngōi inṭhōia antataksen jo Rōngpu hnenga pek sōtna annei heia kae.
24Pisidia ram kha anchōnsōa, Pamphiliah ting kahong jo hei. 25Perga inti hmun a ṭong anleiphôngsōt, khava sōa Attaliating leikase jo hei. 26Khana inphut, anmani tuna pui antamathluk jo ṭōn jâra, Pathen maritna thōia an-omna sik a anlei mannganna hei hmun, Antioch kajōna rakōnga intôr inle jo hei.
27Antioch antlung jo pha, Bekrup mi rakip ankhôm mantûp heia, anchunga Pathen in atlo pekna hei rakip khana Jât-hlop he’num antaksen theina sik a kot amahlang pekna hei kha anleihri pek jo hei. 28Khava hmun a khan takkasenhei leh pha kasôttak leika-om sōm heia kae.
လက်ရှိရွေးချယ်ထားမှု
ṬŌNTLOHEI 14: KOMRBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.