ṬŌNTLOHEI 15
15
Jerusalema Intûpna
1Judea a inphut mi ṭhahrep Antioch a kahong heia, “Moses Dân dungjuia nanvun nantan mak inchu hukmanhringna chenmak tin chei,” tia takkasenhei hneng anleimanthei hei.#Lev 12.3 2Hiva ṭong chunga Paul leh Barnabas in rahnak a inkhe puina anleinei hei, khava jâra Paul leh Barnabas khana Antioch a takkasen ṭhahrep hei, sonlehei leh upahei inhmupui sik a Jerusalema avakase sik a le’nhnōm hei.
3Khang’khan Bekrup in anleitir hei; khanga Phoenicia leh Samaria anhlut pha, heikhong mo Jât-hlop hei hi Pathen langa ahe’nhe hei ti ṭong hi thang anleikōi; hiva ṭong hin takkasen rakip hei inpâk hêrna leikachang. 4Jerusalem antlung pha khana ka-om Bekrup leh sonlehei khana Sehmang-pachong he’n rahlângna anleinei hei, khang’khan anmania inphut Pathen in atlo ṭōn heirakip kha anleihri pek hei. 5Tâk-kha takkasenhei kâra Pharisee rup a invei mi ṭhahrep hong kangirsōt heia, “Jât-hlop hei kha’m anvun antatan nger sik khana Moses Dân anjuina sik a’m nihri pek nger sik hei kae” anleiti.
6Hiva ṭongder chunga mandon sōmna kanei sik a sonlehei leh upahei le’nbe hei. 7Pha kasôttak inhmutōna anneisōa Peter kangirsōt a ahri, “Sōpuihei, Jât-hlop he’n Ṭong kaṭha hi antheia antaksenna sik, anhnenga ṭong kaphông sik a nankâra inphut Pathen in akadeisōt eng hi nanmanhret pet.#Ṭōn 10.1-43 8Khana mi rakip malung mandon inhretsō Pathen khan eini apek me kapōa anmani chunga’m Rathla Intheng ajōng pek hei hin ahnōm pekna hei kha amanchên jo kae.#Ṭōn 10.44; Ṭōn 2.4 9Ama’n einihei leh anmani anikhōi ṭhenna heite damak jo, ajârchu anmani’m antaksenna jâra ansetnahei arangei mandam pek jo hei. 10Kha achang inchu, heisa mo tûnhin pi leh pu he’num, eini’num nileirôn tor mak jo phur kahrik kha anmani khōn chunga manrôn heia Pathen hi enmansin sik nantala madu mo? 11Changthei mak ning! Anmani kapōa, eini’n nitaksena khana Reng Jesu maritna me khan ahuksōt jo me kae.”
12Pathen in Jât-hlop hei chunga det-hla leh ṭōn-inlak Paul leh Barnabas heia inphut atlona thangkōi kha anthei pha a’ntûp ankhenga kadai hnger jo hei. 13Anṭonghri a’nchai pha, James kha heikaṭong, “Rangei ruh kasōpuihei! 14Ama ta kachang sik mihei kha ankâra inphut alosōt heia, heituk-hrep mo Pathen in Jât-hlop hei kha amankhôk sak hei ti kha tuna khan Simon in ahri manchên jo. 15Hivahi sânkathemhei ṭong inum ahnōma kae. Ṭong intheng in ahri kapōa:
16‘Hivasō leh kei he’nle sik eng, Rōngpu’n ati,#Am 9.11,12
khana David rengram kha kamatung ther sik.
Akaṭetsa kha kasakther sik
khana kamanngar nôk sik.
17Mihring phung leh jât rakip kahnenga kahong sik hei,
kata kachang sik a kabek Jât-hlop rakip hei kha’m.
18Hmalaia inphut manhretna anikapek Rōngpu’n hinga ati.’
19James in aleihrisa, “Hivahi kei mandonna kae, Pathen langa ahe’nhe jo Jât-hlop hei hi bōina pek mak hei rih. 20Khava kanek a, anhnenga chithi mazet jôk me sona bek chônngaia akabōk bu leh thlai ansâk makna sik, ajârchu khahei kha limsyem hnenga tōknahei kae; jông leh kîk a inphut anbinga an-inkhâmna sik; khana karâk-hlon ranhring leh thisen ansâk makna sik a manthei hei rih.#Sōk 34.15-17; Lev 18.6-23; Lev 17.10-16 21Ajârchu hmalaia inphut Moses Dân hi Châmhngat kani ning akaia intûpna inna ale’ntei ṭhak jo kae, khana aṭonghei hi’m khōpui rakip a ale’nhrile ṭhak jo kae.”
Takkasen Jât-hlop hei Hnenga Lekha Manrôn
22Khava pha Sonlehei khana upahei leh Bekrup pumpui khan Paul khana Barnabas leh inṭhōia Antioch a avakase sik a ankâra inphut mi ṭhahrep kadei sik le’nhnōm jo hei. Anmani’n takkasen he’n inshângtak a kajana antanei mi 2, Barsabbas inti Judah leh Silas kha anleikadei hei. 23khana hiva ṭong hi anleimanrôn hei:
“Nansōpui, Sonle leh upa, keini seng in, Antioch, Syria leh Cilicia a ka-om, Jât-hlop a a’njōr kansōpui nankhenga kanhei chibei chei. 24Kanrup kâra inphut mi ṭhahrep aleikase he’n anṭong hri vâng anmanbōi jo chei ti ṭong kanthei, kha achang inum anmani kha keinia inphut mansena heikhat antahmu changmak. 25Khava jâra ṭongkarôn ahlek kadei heia nanhnenga heitir sik a kankhenga intûp unga inhnōmtō jo ung. Anmani kha kanṭhōn marit Paul khana Barnabas leh he’nṭhōi sik hei. 26Anmani hi Rōngpu Jesu ṭōn sik a anhringkhō kaphesōt jo hei kae. 27Khan chu hiva kanlekha heimazet hi antakkhet a ṭong mathlungna kanei sik a Judas leh Silas kanheitir hei. 28Hiva juimak kaṭhamak dânhei teilochu aralak phur hrikna pek mak sik cheia Rathla Intheng leh inhnōmtō jo ung: 29Lim inthoi insânna thlai sâk mak ruh: thisen sâk mak ruh, karâk-hlon ran sâk mak ruh, khana jông leh kîk a inphut nanbinga inting ruh. Hivahei senga inphut nan-inhrungthei inchu akaṭha katlo kha kachang sik chei. Maritna chibei kanhei pek et chei.”
30Ṭongkarônhei kha Antioch kajōn sik a antir jo hei, ahmun antlung pha takkasenhei seng kha anmantûp heia anlekha heirôn kha anpek jo hei. 31Mipuihei khan aṭong kha antei pha, anta heimazet mathokna ṭong khan inpâkna amansip jo hei. 32Judah leh Silas, sânkathem he’n phat kasôttak inbektōna anneipui heia malung ngamna leh ngarna anleipek hei. 33Khana khan pha bongkhat anhmang sōa, takkasenhei khan kamōng leh katlai senga anmathla heia, anheikatir hei hnenga sik inle nôk jo hei. 34Tâk-kha Silas chu khava hmun a aleika-om sik a le’ntluk jo.
35Antioch a khan Paul leh Barnabas kha pha bongkhat leika-om heia, mi ralak katamtak leh inṭhōia Rōngpu ṭong kha anphônga anleimanthei hei.
Paul leh Barnabas Inṭhen
36Pha bongkhat sōa Paul in Barnabas hneng ati, “Rōngpu ṭong nileiphôngna khōpui rakip kha vachōn male me sona khana ka-om sōpui rakip hei vaphâk hei rih, khana heikhonga alaka-om hei mo ti kha’m vamanhret sōt rih.” 37Barnabas in John Mark kha inṭhōipui sik a aleimadu, 38tâk Paul inchu ama ṭhōi nôk sik hi kadik tia leimandon mak, ajârchu ankhōhme leisena khan achaina katlunga anmani leiompui mak hei, Pamphiliah a inphut akahnung amalea aleidahlon heia kae.#Ṭōn 13.13 39Khana khan rahnak a le’nkhe heia, le’nṭhen jo hei: Barnabas khan Mark a’nṭhōia Cyprus ting rakōnga le’ntôr jo. 40Paul in Silas kha akadeia ansesōt pha, takkasenhei khan Rōngpu maritna ensuina shunga an-omna sik anleipek sōt jo hei. 41Syria leh Cilicia ahroa kasea, Bekrup-hei kha aleisuk manhnet heia kae.
လက်ရှိရွေးချယ်ထားမှု
ṬŌNTLOHEI 15: KOMRBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.