ဆာလံကျမ်း 36

လူ၏ဆိုးယုတ်ခြင်းနှင့် ဘုရားသခင်၏မေတ္တာတော်

ဂီတမှူးအတွက်၊ ထာဝရဘုရား၏အစေအပါးဒါဝိဒ်၏ဆာလံ

1ဆိုးယုတ်သောသူကျူးလွန်သောအပြစ်နှင့်ပတ်သက်၍

ငါ၏စိတ်နှလုံးအထဲမှမိန့်ကြားတော်မူချက်မှာ

“သူ၏မျက်စိရှေ့တွင် ဘုရားသခင်ကိုကြောက်ရွံ့ခြင်းမရှိ။#ရော 3:18။

2အကြောင်းမူကား သူသည် မိမိကိုယ်ကိုမြှောက်ပင့်ပြောဆို၍

မိမိဒုစရိုက်ကိုမမြင်နိုင်၊ မမုန်းနိုင်ချေ။

3သူ၏နှုတ်ထွက်စကားတို့သည် ယုတ်ညံ့၍လိမ်လည်လှည့်ဖြားတတ်၏။

သူသည် ပညာသတိရှိခြင်းနှင့် ကောင်းသောအမှုပြုခြင်းကို စွန့်လေပြီ။

4သူသည် မိမိအိပ်ရာပေါ်၌ပင် အပြစ်ဒုစရိုက်ကိုကြံစည်တတ်၏။

မကောင်းသောလမ်းသို့အမြဲလိုက်၍ မကောင်းမှုကို စွန့်ပယ်ခြင်းမရှိ။”

5အို ထာဝရဘုရား၊ ကိုယ်တော်၏မေတ္တာကရုဏာတော်သည် ကောင်းကင်သို့ရောက်၍

ကိုယ်တော်၏သစ္စာတော်သည် မိုးတိမ်ထိတိုင်အောင် ရောက်ပါ၏။

6ကိုယ်တော်၏ဖြောင့်မတ်ခြင်းသည် မြင့်မားသောတောင်များ#36:6 သို့မဟုတ် “ဘုရားသခင်၏တောင်များ”။ကဲ့သို့လည်းကောင်း၊

ကိုယ်တော်၏တရားစီရင်ခြင်းတို့သည် အလွန်နက်ရှိုင်းရာအရပ်ကဲ့သို့လည်းကောင်း ဖြစ်ပါ၏။

အို ထာဝရဘုရား၊ ကိုယ်တော်သည် လူနှင့်တိရစ္ဆာန်တို့ကို ကယ်တင်တော်မူ၏။

7အို ဘုရားသခင်၊ ကိုယ်တော်၏မေတ္တာကရုဏာတော်သည် အဖိုးတန်လှပါ၏။

လူသားတို့သည် ကိုယ်တော်၏ အတောင်တော်အရိပ်အောက်၌ ခိုလှုံကြပါ၏။

8သူတို့သည် ကိုယ်တော့်အိမ်တော်၏ကြွယ်ဝခြင်းဖြင့် ကျေနပ်အားရကြပါလိမ့်မည်။

ကိုယ်တော်သည် ကိုယ်တော်၏ ကြည်နူးခြင်းစမ်းရေကိုလည်း သူတို့အားတိုက်တော်မူ၏။

9အကြောင်းမူကား ကိုယ်တော့်ထံ၌အသက်စမ်းရေတွင်းရှိပါ၏။

ကိုယ်တော်၏အလင်းတော်ထဲ၌ အကျွန်ုပ်တို့သည် အလင်းကိုမြင်ရကြပါ၏။

10ကိုယ်တော်ကိုသိသောသူတို့၌ ကိုယ်တော်၏မေတ္တာကရုဏာတော်ကိုလည်းကောင်း၊

စိတ်နှလုံးဖြောင့်မှန်သောသူတို့၌ ကိုယ်တော်၏ဖြောင့်မတ်ခြင်းကိုလည်းကောင်း တည်မြဲတည်စေတော်မူပါ။

11မာန်မာနရှိသောခြေသည် အကျွန်ုပ်အပေါ်မရောက်လာပါစေနှင့်။

ဆိုးယုတ်သောသူတို့၏လက်သည်လည်း အကျွန်ုပ်ကိုနှင်ထုတ်ခွင့်မရပါစေနှင့်။

12ကြည့်လော့။ အပြစ်ဒုစရိုက်ပြုသောသူတို့သည် လဲကျသွားကြပြီ။

သူတို့သည် တွန်းချခံရ၍ ပြန်မထနိုင်ကြပါ။

လက်ရှိရွေးချယ်ထားမှု

ဆာလံကျမ်း 36: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။

ဆာလံကျမ်း 36