တောလည်ရာကျမ်း 23

ဗာလမ်ဆင့်ဆိုသောစကား

1ထိုအခါ ဗာလမ်က ဗာလက်မင်းကြီးအား “ဤအရပ်၌ ငါ့အတွက် ယဇ်ပလ္လင်ခုနစ်ခုကိုတည်၍ နွားထီးခုနစ်ကောင်နှင့်သိုးထီးခုနစ်ကောင်ကိုလည်း ပြင်ဆင်လော့”ဟု ဆို၏။ 2ဗာလက်မင်းကြီးသည်လည်း ဗာလမ်ပြောသည့်အတိုင်း ပြု၍ သူတို့သည် ယဇ်ပလ္လင်တစ်ခုစီ၌ နွားထီးတစ်ကောင်နှင့်သိုးထီးတစ်ကောင်ကို ပူဇော်ကြ၏။ 3ဗာလမ်က ဗာလက်မင်းကြီးအား “သင်၏မီးရှို့ရာယဇ်ဘေး၌ သင်ရပ်နေလော့။ ငါတစ်နေရာသို့သွားမည်။ ထာဝရဘုရားသည် ငါနှင့်လာတွေ့ကောင်းလာတွေ့တော်မူမည်။ ငါ့အား ထာဝရဘုရားဖော်ပြသော မည်သည့်အရာမဆို သင့်အား ငါကြားပြောမည်”ဟု ဆိုပြီးနောက် တောင်ကုန်းပေါ်သို့ တက်သွားရာ

4ဘုရားသခင်နှင့် တွေ့လေ၏။ ထိုအခါ ဗာလမ်က ဘုရားသခင်အား “အကျွန်ုပ်သည် ယဇ်ပလ္လင်ခုနစ်ခုကိုပြင်ဆင်၍ ထိုယဇ်ပလ္လင်တစ်ခုစီ၌ နွားထီးတစ်ကောင်နှင့်သိုးထီးတစ်ကောင်ကိုပူဇော်ပါပြီ”ဟု လျှောက်လေ၏။ 5ထာဝရဘုရားသည် ဗာလမ်၏နှုတ်၌စကားကိုသွင်းပေးတော်မူပြီးလျှင် “ဗာလက်မင်းကြီးထံသို့ ပြန်သွား၍ ဤစကားကိုပြောလော့”ဟု မိန့်တော်မူ၏။ 6ဗာလမ်သည် ဗာလက်မင်းကြီးရှိရာသို့ ပြန်ရောက်သောအခါ ဗာလက်မင်းကြီးသည် မောဘလူမျိုးအကြီးအကဲအပေါင်းတို့နှင့်အတူ မီးရှို့ရာယဇ်နား၌ ရပ်နေသည်ကို တွေ့ရ၏။

ပထမအကြိမ်ဗာလမ်ဆင့်ဆိုသောစကား

7ထိုအခါ ဗာလမ်က ပရောဖက်ပြုလျက် “မောဘဘုရင်ဗာလက်မင်းကြီးသည် ငါ့ကို အရှေ့တောင်ရိုး အာရံပြည်မှခေါ်လာ၍ ‘လာပါလော့။ ငါ့အဖို့ ယာကုပ်အမျိုးကိုကျိန်ဆဲပါလော့။ လာပါလော့။ အစ္စရေးလူမျိုးကိုရှုတ်ချပါလော့’ဟု ဆို၏။

8ဘုရားသခင် ကျိန်ဆဲတော်မမူသောသူကို ငါ မည်သို့ကျိန်ဆဲဝံ့မည်နည်း။ ထာဝရဘုရား ရှုတ်ချတော်မမူသောသူကို ငါ မည်သို့ရှုတ်ချဝံ့မည်နည်း။

9သူ့ကို ကျောက်ဆောင်ထိပ်မှ ငါတွေ့ရ၏။ သူ့ကို တောင်ကုန်းပေါ်မှ ငါမြင်ရ၏။ ထိုလူမျိုးသည် တသီးတခြားနေ၏။ လူမျိုးခြားတို့နှင့်ရောနှောခြင်းမရှိ။

10ယာကုပ်အမျိုးမြေမှုန့်ကို မည်သူရေတွက်နိုင်မည်နည်း။ အစ္စရေးလူမျိုး၏လေးပုံတစ်ပုံကို မည်သူရေတွက်နိုင်မည်နည်း။ ဖြောင့်မှန်သောသူတို့သေသကဲ့သို့ ငါသေပါရစေ။ ငါ၏နိဂုံးသည်လည်း သူ၏နိဂုံးကဲ့သို့ဖြစ်ပါစေ”ဟု ဆိုလေ၏။

11ထိုအခါ ဗာလက်မင်းကြီးက ဗာလမ်အား “သင်သည် အကျွန်ုပ်ကိုမည်သို့ပြုသနည်း။ အကျွန်ုပ်၏ရန်သူတို့ကိုကျိန်ဆဲရန် သင့်ကိုအကျွန်ုပ်ခေါ်ခဲ့၏။ သင်ကား သူတို့ကို လုံးလုံးကောင်းချီးပေးလေပြီတကား”ဟု ဆို၏။

12ဗာလမ်ကလည်း “ငါ၏နှုတ်၌ ထာဝရဘုရားသွင်းပေးတော်မူသောစကားကိုသာပြောရန် ငါသတိပြုရမည်မဟုတ်လော”ဟု ဆိုလျက် ပြန်ဖြေလေ၏။

ဒုတိယအကြိမ်ဗာလမ်ဆင့်ဆိုသောစကား

13ဗာလက်မင်းကြီးကလည်း ဗာလမ်အား “အစ္စရေးလူမျိုးအားလုံးကိုမမြင်ရသော်လည်း သူတို့၏တပ်စခန်းအစွန်အဖျားကိုသာမြင်နိုင်သည့် အခြားတစ်နေရာသို့ ငါနှင့်အတူလိုက်ခဲ့ပါလော့။ ငါ့အတွက် သူတို့ကို ထိုနေရာမှ ကျိန်ဆဲပါလော့”ဟု ဆိုလေ၏။ 14ထို့နောက် သူသည် ဗာလမ်ကို ပိသဂါတောင်ထိပ်ရှိ ဇောဖိမ်ကွင်းပြင်သို့ ခေါ်သွား၍ ယဇ်ပလ္လင်ခုနစ်ခုကိုတည်ပြီး ထိုယဇ်ပလ္လင်တစ်ခုစီ၌ နွားထီးတစ်ကောင်နှင့်သိုးထီးတစ်ကောင်စီကို ပူဇော်လေ၏။

15ဗာလမ်က ဗာလက်မင်းကြီးအား “သင်၏မီးရှို့ရာယဇ်ဘေး၊ ဤနေရာ၌ သင်ရပ်နေလော့။ ငါသည် ထိုနေရာသို့သွား၍ ထာဝရဘုရားနှင့်တွေ့ဆုံမည်”ဟု ဆို၏။

16ထာဝရဘုရားသည် ဗာလမ်နှင့်တွေ့၍ ဗာလမ်၏နှုတ်၌စကားကိုသွင်းပေးတော်မူပြီး “ဗာလက်မင်းကြီးထံသို့ ပြန်သွား၍ ဤစကားကိုပြောလော့”ဟု မိန့်တော်မူ၏။ 17ဗာလမ်သည် ဗာလက်မင်းကြီးထံသို့ပြန်ရောက်သောအခါ ဗာလက်မင်းကြီးက မောဘလူမျိုးအကြီးအကဲများနှင့်အတူ မီးရှို့ရာယဇ်နား၌ ရပ်နေသည်ကို တွေ့ရ၏။ ဗာလက်မင်းကြီးက ဗာလမ်အား “ထာဝရဘုရားမည်သို့မိန့်တော်မူသနည်း”ဟု မေး၏။

18ထိုအခါ ဗာလမ်က ပရောဖက်ပြုလျက် “ဗာလက်မင်းကြီး၊ ထလော့။ နားထောင်လော့။ ဇိဖော်သား၊ ငါ့စကားကို စူးစိုက်နားထောင်လော့။

19လိမ်လည်ပြောဆိုရအောင် ဘုရားသခင်သည် လူဖြစ်သည်မဟုတ်။ စိတ်ပြောင်းလဲရအောင် လူသားဖြစ်သည်မဟုတ်။ ကိုယ်တော်သည် မိန့်တော်မူပြီးမှ မပြုဘဲနေတော်မူမည်လော။ ကတိထားတော်မူပြီးမှ မတည်ဘဲနေတော်မူမည်လော။

20ကောင်းချီးပေးမည့်အကြောင်း အမိန့်တော်ကို ငါခံရပြီ။ ကိုယ်တော်သည် ကောင်းချီးပေးတော်မူသည်ဖြစ်၍ ထိုကောင်းချီးကို ငါမပြောင်းလဲနိုင်။

21ယာကုပ်အမျိုး၌ အမင်္ဂလာကိုမမြင်။ အစ္စရေးလူမျိုး၌ အခက်အခဲပြဿနာကိုမတွေ့။ သူ၏ဘုရားသခင်ထာဝရဘုရားသည် သူနှင့်အတူရှိတော်မူ၏။ သူ့ထံ၌ ရှင်ဘုရင်၏ဝမ်းမြောက်စွာကြွေးကြော်သံကိုကြားရ၏။

22ဘုရားသခင်သည် နွားရိုင်း၏ခွန်အားကဲ့သို့ သူတို့ကို အီဂျစ်ပြည်မှ ထုတ်ဆောင်ခဲ့၏။

23ယာကုပ်အမျိုးကို မှော်အတတ်ဖြင့်မပြုစားနိုင်။ အစ္စရေးလူမျိုးကို ဂမ္ဘီရပညာဖြင့်မလှည့်ဖြားနိုင်။ ယခုတွင် ‘ဘုရားသခင် မည်သို့ပြုတော်မူပါသနည်း’ဟူ၍ ယာကုပ်အမျိုး၊ အစ္စရေးလူမျိုးကိုရည်ဆောင်၍ ပြောဆိုရလိမ့်မည်။

24ဤလူမျိုးသည် ခြင်္သေ့မကဲ့သို့ထကြွ၍ ခြင်္သေ့ထီးကဲ့သို့ မာန်ဝင့်နေ၏။ သူသည် သားကောင်ကိုမစားရမီ၊ သူကိုက်သတ်သောအကောင်၏သွေးကိုမသောက်ရမီ လဲလျောင်းနေမည်မဟုတ်”ဟု ဆိုလေ၏။

25ထိုအခါ ဗာလက်မင်းကြီးက ဗာလမ်အား “သူတို့ကို ကျိန်လည်းမကျိန်ဆဲပါနှင့်။ ကောင်းချီးလည်း အလျှင်းမပေးပါနှင့်”ဟု ဆိုလေ၏။

26ဗာလမ်ကလည်း ဗာလက်မင်းကြီးအား “ငါသည် ထာဝရဘုရားမိန့်တော်မူသမျှအတိုင်းသာပြုရမည်ဟု သင့်အား ငါပြောခဲ့သည်မဟုတ်လော”ဟု ပြန်ပြော၏။

တတိယအကြိမ်ဗာလမ်ဆင့်ဆိုသောစကား

27တစ်ဖန် ဗာလက်မင်းကြီးက ဗာလမ်အား “လာပါလော့။ သင့်ကို အခြားတစ်နေရာသို့ ခေါ်သွားမည်။ အကျွန်ုပ်အတွက် သူတို့ကို ထိုနေရာမှကျိန်ဆဲလျှင် ဘုရားသခင်နှစ်သက်ကောင်းနှစ်သက်တော်မူလိမ့်မည်”ဟု ဆို၏။ 28ထို့နောက် ဗာလက်မင်းကြီးသည် ဗာလမ်ကို ကန္တာရမြေကိုစီးမြင်ရသော ပေဂုရတောင်ထိပ်သို့ခေါ်သွား၏။

29ဗာလမ်ကလည်း ဗာလက်မင်းကြီးအား “ဤနေရာ၌ ငါ့အတွက် ယဇ်ပလ္လင်ခုနစ်ခုကိုတည်၍ နွားထီးခုနစ်ကောင်နှင့် သိုးထီးခုနစ်ကောင်ကိုလည်း ပြင်ဆင်လော့”ဟု ဆို၏။ 30ဗာလက်မင်းကြီးသည် ဗာလမ်ပြောသည့်အတိုင်းပြု၍ ယဇ်ပလ္လင်တစ်ခုစီ၌ နွားထီးတစ်ကောင်နှင့်သိုးထီးတစ်ကောင်စီကို ပူဇော်လေ၏။

လက်ရှိရွေးချယ်ထားမှု

တောလည်ရာကျမ်း 23: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။

တောလည်ရာကျမ်း 23