တောလည်ရာကျမ်း 1

အစ္စရေးလူမျိုးတို့ကို သန်းခေါင်စာရင်းကောက်ခြင်း

1အစ္စရေးအမျိုးသားတို့သည် အီဂျစ်ပြည်မှထွက်လာပြီးနောက် ဒုတိယနှစ်၊ ဒုတိယလ၊ ပထမနေ့၌ သိနာတောကန္တာရ၊ တွေ့ဆုံစည်းဝေးရာတဲတော်တွင် ထာဝရဘုရားက မောရှေအား 2“အစ္စရေးအမျိုးသားလူထုအပေါင်းတို့ထဲမှ ယောက်ျားအားလုံး တစ်ဦးချင်းစီ၏အမည်စာရင်းကို သူတို့၏မျိုးနွယ်စုအလိုက်၊ ဘိုးဘေးတို့၏အိမ်ထောင်စုအလိုက် စာရင်းကောက်ယူလော့။ 3သင်နှင့်အာရုန်သည် အစ္စရေးလူမျိုးထဲမှ အသက်နှစ်ဆယ်အရွယ်နှင့်အထက် စစ်မှုထမ်းနိုင်သောသူရှိသမျှတို့ကို တပ်ဖွဲ့အလိုက် ရေတွက်ရမည်။ 4အမျိုးအနွယ်အသီးသီးထဲမှ တစ်မျိုးတစ်ယောက်စီ သင်တို့နှင့်အတူရှိရမည်။ သူတို့တစ်ဦးစီသည် မိမိဘိုးဘေးတို့၏အိမ်ထောင်စု၌ အကြီးအမှူးဖြစ်ရမည်။ 5သင်တို့ကိုကူညီမည့်သူတို့၏အမည်များကား

ရုဗင်အမျိုးမှ ရှေဒုရ၏သား ဧလိဇုရ၊

6ရှိမောင်အမျိုးမှ ဇုရိရှဒ္ဒဲ၏သား ရှေလုမျေလ၊

7ယုဒအမျိုးမှ အမိနဒပ်၏သား နာရှုန်၊

8ဣသခါအမျိုးမှ ဇုအာ၏သား နာသနေလ၊

9ဇာဗုလုန်အမျိုးမှ ဟေလုန်၏သား ဧလျာဘ၊

10ယောသပ်၏သားတို့တွင် ဧဖရိမ်အမျိုးမှ အမိဟုဒ်၏သား ဧလိရှမာ၊ မနာရှေအမျိုးမှ ပေဒါဇုရ၏သား ဂါမလျေလ၊

11ဗင်္ယာမိန်အမျိုးမှ ဂိဒေါနိ၏သား အဘိဒန်၊

12ဒန်အမျိုးမှ အမိရှဒ္ဒဲ၏သား အဟေဇာ၊

13အာရှာအမျိုးမှ ဩကရန်၏သား ပါဂျေလ၊

14ဂဒ်အမျိုးမှ ဒွေလ၏သား ဧလျာသပ်၊

15နဿလိအမျိုးမှ ဧနန်၏သား အဟိရ တို့ဖြစ်ကြ၏။

16ထိုသူတို့သည် လူထုထဲမှ ရွေးကောက်ထားသောဘိုးဘေးတို့၏အမျိုးအနွယ်ခေါင်းဆောင်များဖြစ်ကြ၏။ အစ္စရေးမျိုးနွယ်စု#1:16 တိုက်ရိုက်ပြန်ဆိုလျှင် “အစ္စရေးအယောက်တစ်ထောင်”။တို့၏အကြီးအမှူးများဖြစ်ကြ၏”ဟု မိန့်တော်မူ၏။

17မောရှေနှင့်အာရုန်သည် နာမည်အရွေးခံရသော ထိုသူတို့ကိုခေါ်၍ 18ဒုတိယလ၊ ပထမနေ့၌ လူထုအပေါင်းတို့ကို စုရုံးစေပြီးလျှင် အသက်နှစ်ဆယ်အရွယ်နှင့်အထက်ရှိသူ တစ်ဦးချင်းစီ၏အမည်စာရင်းကို သူတို့မျိုးနွယ်စုအလိုက်၊ ဘိုးဘေးအိမ်ထောင်စုအလိုက် စာရင်းကောက်ယူလေ၏။ 19မောရှေသည် ထာဝရဘုရားမိန့်မှာသည့်အတိုင်း သိနာတောကန္တာရ၌ ထိုသူတို့ကိုရေတွက်လေ၏။

20အစ္စရေး၏သားဦးဖြစ်သော ရုဗင်၏သားမြေးတို့တွင် သူတို့၏မျိုးနွယ်စုများအလိုက်၊ ဘိုးဘေးတို့၏အိမ်ထောင်စုအလိုက်၊ သူတို့၏ဆွေစဉ်မျိုးဆက် တစ်ဦးချင်းစီ၏အမည်စာရင်းအလိုက် အသက်နှစ်ဆယ်အရွယ်နှင့်အထက် စစ်မှုထမ်းနိုင်သော ယောက်ျားအားလုံး၏အရေအတွက်မှာ 21ရုဗင်အမျိုးအနွယ်ထဲမှ လေးသောင်းခြောက်ထောင့်ငါးရာ ရှိ၏။

22ရှိမောင်၏သားမြေးတို့တွင် သူတို့၏မျိုးနွယ်စုများအလိုက်၊ ဘိုးဘေးတို့၏အိမ်ထောင်စုအလိုက်၊ သူတို့၏ဆွေစဉ်မျိုးဆက် တစ်ဦးချင်းစီ၏အမည်စာရင်းအလိုက် အသက်နှစ်ဆယ်အရွယ်နှင့်အထက် စစ်မှုထမ်းနိုင်သော ယောက်ျားအားလုံး၏အရေအတွက်မှာ 23ရှိမောင်အမျိုးအနွယ်ထဲမှ ငါးသောင်းကိုးထောင့်သုံးရာ ရှိ၏။

24ဂဒ်၏သားမြေးတို့တွင် သူတို့၏မျိုးနွယ်စုများအလိုက်၊ ဘိုးဘေးတို့၏အိမ်ထောင်စုအလိုက်၊ သူတို့၏ဆွေစဉ်မျိုးဆက် အမည်စာရင်းအလိုက် အသက်နှစ်ဆယ်အရွယ်နှင့်အထက် စစ်မှုထမ်းနိုင်သောသူအားလုံး၏အရေအတွက်မှာ 25ဂဒ်အမျိုးအနွယ်ထဲမှ လေးသောင်းငါးထောင့်ခြောက်ရာ့ငါးဆယ် ရှိ၏။

26ယုဒ၏သားမြေးတို့တွင် သူတို့၏မျိုးနွယ်စုများအလိုက်၊ ဘိုးဘေးတို့၏အိမ်ထောင်စုအလိုက်၊ သူတို့၏ဆွေစဉ်မျိုးဆက် အမည်စာရင်းအလိုက် အသက်နှစ်ဆယ်အရွယ်နှင့်အထက် စစ်မှုထမ်းနိုင်သောသူအားလုံး၏အရေအတွက်မှာ 27ယုဒအမျိုးအနွယ်ထဲမှ ခုနစ်သောင်းလေးထောင့်ခြောက်ရာ ရှိ၏။

28ဣသခါ၏သားမြေးတို့တွင် သူတို့၏မျိုးနွယ်စုများအလိုက်၊ ဘိုးဘေးတို့၏အိမ်ထောင်စုအလိုက်၊ သူတို့၏ဆွေစဉ်မျိုးဆက် အမည်စာရင်းအလိုက် အသက်နှစ်ဆယ်အရွယ်နှင့်အထက် စစ်မှုထမ်းနိုင်သောသူအားလုံး၏အရေအတွက်မှာ 29ဣသခါအမျိုးအနွယ်ထဲမှ ငါးသောင်းလေးထောင့်လေးရာ ရှိ၏။

30ဇာဗုလုန်၏သားမြေးတို့တွင် သူတို့၏မျိုးနွယ်စုများအလိုက်၊ ဘိုးဘေးတို့၏အိမ်ထောင်စုအလိုက်၊ သူတို့၏ဆွေစဉ်မျိုးဆက် အမည်စာရင်းအလိုက် အသက်နှစ်ဆယ်အရွယ်နှင့်အထက် စစ်မှုထမ်းနိုင်သောသူအားလုံး၏အရေအတွက်မှာ 31ဇာဗုလုန်အမျိုးအနွယ်ထဲမှ ငါးသောင်းခုနစ်ထောင့်လေးရာ ရှိ၏။

32ယောသပ်၏သားမြေးဖြစ်သော ဧဖရိမ်၏သားမြေးတို့တွင် သူတို့၏မျိုးနွယ်စုများအလိုက်၊ ဘိုးဘေးတို့၏အိမ်ထောင်စုအလိုက်၊ သူတို့၏ဆွေစဉ်မျိုးဆက် အမည်စာရင်းအလိုက် အသက်နှစ်ဆယ်အရွယ်နှင့်အထက် စစ်မှုထမ်းနိုင်သောသူအားလုံး၏အရေအတွက်မှာ 33ဧဖရိမ်အမျိုးအနွယ်ထဲမှ လေးသောင်းငါးရာ ရှိ၏။

34မနာရှေ၏သားမြေးတို့တွင် သူတို့၏မျိုးနွယ်စုများအလိုက်၊ ဘိုးဘေးတို့၏အိမ်ထောင်စုအလိုက်၊ သူတို့၏ဆွေစဉ်မျိုးဆက် အမည်စာရင်းအလိုက် အသက်နှစ်ဆယ်အရွယ်နှင့်အထက် စစ်မှုထမ်းနိုင်သောသူအားလုံး၏အရေအတွက်မှာ 35မနာရှေအမျိုးအနွယ်ထဲမှ သုံးသောင်းနှစ်ထောင့်နှစ်ရာ ရှိ၏။

36ဗင်္ယာမိန်၏သားမြေးတို့တွင် သူတို့၏မျိုးနွယ်စုများအလိုက်၊ ဘိုးဘေးတို့၏အိမ်ထောင်စုအလိုက်၊ သူတို့၏ဆွေစဉ်မျိုးဆက် အမည်စာရင်းအလိုက် အသက်နှစ်ဆယ်အရွယ်နှင့်အထက် စစ်မှုထမ်းနိုင်သောသူအားလုံး၏အရေအတွက်မှာ 37ဗင်္ယာမိန်အမျိုးအနွယ်ထဲမှ သုံးသောင်းငါးထောင့်လေးရာ ရှိ၏။

38ဒန်၏သားမြေးတို့တွင် သူတို့၏မျိုးနွယ်စုများအလိုက်၊ ဘိုးဘေးတို့၏အိမ်ထောင်စုအလိုက်၊ သူတို့၏ဆွေစဉ်မျိုးဆက် အမည်စာရင်းအလိုက် အသက်နှစ်ဆယ်အရွယ်နှင့်အထက် စစ်မှုထမ်းနိုင်သောသူအားလုံး၏အရေအတွက်မှာ 39ဒန်အမျိုးအနွယ်ထဲမှ ခြောက်သောင်းနှစ်ထောင့်ခုနစ်ရာ ရှိ၏။

40အာရှာ၏သားမြေးတို့တွင် သူတို့၏မျိုးနွယ်စုများအလိုက်၊ ဘိုးဘေးတို့၏အိမ်ထောင်စုအလိုက်၊ သူတို့၏ဆွေစဉ်မျိုးဆက် အမည်စာရင်းအလိုက် အသက်နှစ်ဆယ်အရွယ်နှင့်အထက် စစ်မှုထမ်းနိုင်သောသူအားလုံး၏အရေအတွက်မှာ 41အာရှာအမျိုးအနွယ်ထဲမှ လေးသောင်းတစ်ထောင့်ငါးရာ ရှိ၏။

42နဿလိ၏သားမြေးတို့တွင် သူတို့၏မျိုးနွယ်စုများအလိုက်၊ ဘိုးဘေးတို့၏အိမ်ထောင်စုအလိုက်၊ သူတို့၏ဆွေစဉ်မျိုးဆက် အမည်စာရင်းအလိုက် အသက်နှစ်ဆယ်အရွယ်နှင့်အထက် စစ်မှုထမ်းနိုင်သောသူအားလုံး၏အရေအတွက်မှာ 43နဿလိအမျိုးအနွယ်ထဲမှ ငါးသောင်းသုံးထောင့်လေးရာ ရှိ၏။

44ထိုသူတို့မှာ မောရှေ၊ အာရုန်နှင့် ဘိုးဘေးတို့၏အိမ်ထောင်စုအသီးသီးမှအစ္စရေးခေါင်းဆောင်တစ်ဆယ့်နှစ်ဦးတို့ ရေတွက်သောသူတို့၏အရေအတွက်များဖြစ်ကြ၏။ 45သူတို့သည် ဘိုးဘေးများ၏အိမ်ထောင်စုအလိုက် အသက်နှစ်ဆယ်အရွယ်နှင့်အထက် အစ္စရေးလူမျိုးထဲမှ စစ်မှုထမ်းနိုင်သောအစ္စရေးအမျိုးသားအားလုံးတို့၏အရေအတွက် ဖြစ်၏။ 46သူတို့အားလုံး၏အရေအတွက်မှာ ခြောက်သိန်းသုံးထောင့်ငါးရာ့ငါးဆယ် ရှိ၏။

လေဝိအမျိုးတို့၏တာဝန်

47သူတို့၏ဘိုးဘေးအမျိုးအနွယ်ထဲမှ လေဝိအမျိုးတို့ကိုကား သူတို့နှင့်အတူ မရေတွက်ပေ။ 48ထာဝရဘုရားက မောရှေအား

49“လေဝိအမျိုးအနွယ်တို့ကိုကား သင် မရေတွက်ရ။ အစ္စရေးအမျိုးသားတို့နှင့်အတူ သူတို့၏လူဦးရေစာရင်းကိုလည်း မကောက်ရ။ 50လေဝိအမျိုးတို့ကို သက်သေခံချက်ထားရာကိန်းဝပ်တော်မူရာတဲတော်၊ ထိုတဲတော်၏တန်ဆာပလာရှိသမျှ၊ ထိုတဲတော်နှင့်ဆိုင်သမျှတို့ကို ထိန်းသိမ်းဖို့ ခန့်အပ်လော့။ သူတို့သည် ကိန်းဝပ်တော်မူရာတဲတော်နှင့် ထိုတဲတော်၏ တန်ဆာပလာရှိသမျှတို့ကို သယ်ဆောင်ရမည်။ ကိန်းဝပ်တော်မူရာတဲတော်၏အမှုကိုဆောင်ရွက်၍ ထိုတဲတော်၏ပတ်ပတ်လည်၌ စခန်းချရမည်။ 51ရွှေ့ပြောင်းသောအခါ လေဝိအမျိုးတို့သည် ကိန်းဝပ်တော်မူရာတဲတော်ကို ဖြုတ်သိမ်းရမည်။ စခန်းချသောအခါ လေဝိအမျိုးတို့သည် ကိန်းဝပ်တော်မူရာတဲတော်ကို စိုက်ထူရမည်။ မဆိုင်သောသူချဉ်းကပ်လျှင် အသတ်ခံရမည်။

52အစ္စရေးအမျိုးသားတို့သည် တပ်ဖွဲ့အလိုက် မိမိတို့၏စခန်း၌လည်းကောင်း၊ မိမိတို့၏အလံနားတွင်လည်းကောင်း စခန်းချရမည်။ 53လေဝိအမျိုးတို့မူကား အစ္စရေးအမျိုးသားလူထုပေါ်သို့ အမျက်တော်မသက်ရောက်စေရန် သက်သေခံချက်ထားရာကိန်းဝပ်တော်မူရာတဲတော်၏ပတ်ပတ်လည်၌ စခန်းချရမည်။ လေဝိအမျိုးသည် သက်သေခံချက်ထားရာကိန်းဝပ်တော်မူရာတဲတော်ကို စောင့်ရှောက်ရမည်”ဟု မိန့်တော်မူ၏။ 54အစ္စရေးအမျိုးသားတို့သည် မောရှေအား ထာဝရဘုရားမိန့်မှာတော်မူသမျှအတိုင်း တစ်သဝေမတိမ်းပြုကြ၏။

လက်ရှိရွေးချယ်ထားမှု

တောလည်ရာကျမ်း 1: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။

တောလည်ရာကျမ်း 1