ဝတ်ပြုရာကျမ်း 11

စင်ကြယ်သောကုန်းနေသတ္တဝါ၊ မစင်ကြယ်သောကုန်းနေသတ္တဝါ

1တစ်ဖန် ထာဝရဘုရားက မောရှေနှင့်အာရုန်အား 2“အစ္စရေးအမျိုးသားတို့အား ဆင့်ဆိုလော့။ မြေကြီးပေါ်ရှိ တိရစ္ဆာန်အပေါင်းတို့ထဲမှ သင်တို့စား၍ရသောတိရစ္ဆာန်ဟူမူကား 3တိရစ္ဆာန်တို့ထဲမှ ခွာနှစ်ခြမ်းကွဲ၍ စားမြုံ့ပြန်သောတိရစ္ဆာန်ဟူသမျှ သင်တို့စားခွင့်ရှိ၏။ 4သို့သော်လည်း စားမြုံ့ပြန်သောအကောင်၊ ခွာကွဲသောအကောင်တို့ထဲမှ သင်တို့စားခွင့်မရှိသောအကောင်ဟူမူကား ကုလားအုတ်သည် စားမြုံ့ပြန်သော်လည်း ခွာမကွဲသောကြောင့် သင်တို့အဖို့ မစင်ကြယ်၊ 5ရှာဖန်ယုန်သည် စားမြုံ့ပြန်သော်လည်း ခွာမကွဲသောကြောင့် သင်တို့အဖို့ မစင်ကြယ်၊ 6တောယုန်သည် စားမြုံ့ပြန်သော်လည်း ခွာမကွဲသောကြောင့် သင်တို့အဖို့ မစင်ကြယ်၊ 7ဝက်သည် ခွာနှစ်ခြမ်းကွဲသော်လည်း စားမြုံ့မပြန်သောကြောင့် သင်တို့အဖို့ မစင်ကြယ်၊ 8ထို့ကြောင့် ထိုအကောင်တို့၏အသားကိုမစားရ။ အသေကောင်ကိုလည်း မထိရ။ ထိုအကောင်တို့သည် သင်တို့အဖို့ မစင်ကြယ်။

စင်ကြယ်သောရေနေသတ္တဝါ၊ မစင်ကြယ်သောရေနေသတ္တဝါ

9ပင်လယ်ထဲမှဖြစ်စေ၊ ချောင်းများထဲမှဖြစ်စေ ရေနေသတ္တဝါအားလုံးထဲမှ ဆူးတောင်နှင့်အကြေးရှိသောအကောင်အားလုံးကို သင်တို့စားခွင့်ရှိ၏။ 10သို့သော် ပင်လယ်ထဲမှဖြစ်စေ၊ ချောင်းများထဲမှဖြစ်စေ ရေထဲ၌အုပ်စုလိုက်နေထိုင်သွားလာသည့် ဆူးတောင်နှင့်အကြေးမရှိသောသတ္တဝါအားလုံးနှင့် ရေထဲ၌အသက်ရှင်နေထိုင်သည့် ဆူးတောင်နှင့်အကြေးမရှိသောသတ္တဝါအားလုံးတို့သည် သင်တို့အဖို့ ရွံရှာဖွယ်ရာဖြစ်၏။ 11ထိုသတ္တဝါတို့သည် သင်တို့အဖို့ ရွံရှာဖွယ်ရာဖြစ်သောကြောင့် ၎င်းတို့၏အသားကိုမစားရ။ အသေကောင်ကိုလည်း ရွံရှာရမည်။ 12ရေထဲမှ ဆူးတောင်နှင့်အကြေးမရှိသောသတ္တဝါအားလုံးသည် သင်တို့အဖို့ ရွံရှာဖွယ်ရာဖြစ်၏။

မစင်ကြယ်သောငှက်များ

13ရွံရှာဖွယ်ဖြစ်သည်ဟု မှတ်၍ မစားရမည့်ရွံရှာဖွယ်ငှက်များမှာ

လင်းယုန်၊ လင်းတ၊ ဝန်ပို၊

14စွန်ခေါင်းဖြူ၊ စွန်နက်နှင့်တကွ စွန်အမျိုးမျိုး၊

15ကျီးကန်းမျိုးရှိသမျှ၊

16ငှက်ကုလားအုတ်၊ မြေဝပ်ငှက်၊ စင်ရော်ငှက်၊ သိမ်းငှက်အမျိုးမျိုး၊

17ဇီးကွက်၊ တင်ကျီးငှက်၊ ဒီးဒုတ်၊

18လင်ကောင်ပိုး၊ ငှက်ကြီးဝန်ပို၊ ဝန်လက်၊

19ငှက်ကျား၊ ငဟစ်ငှက်အမျိုးမျိုး၊ တောင်ဘီစူးငှက်၊ လင်းနို့ တို့ဖြစ်ကြ၏။

စင်ကြယ်သောအတောင်ပံပါပိုးမွှားများ၊ မစင်ကြယ်သောအတောင်ပံပါပိုးမွှားများ

20ခြေလေးချောင်းဖြင့်သွား၍ အတောင်ပံပါသောပိုးမွှားသတ္တဝါအားလုံးတို့သည် သင်တို့အဖို့ ရွံရှာဖွယ်ရာဖြစ်၏။ 21သို့ရာတွင် ခြေလေးချောင်းဖြင့်သွား၍ အတောင်ပံပါသောပိုးမွှားသတ္တဝါအားလုံးတို့ထဲမှ မြေကြီးပေါ်၌ခုန်ပျံရန် ခြေနှစ်ချောင်းထပ်ပါသည့်အကောင်များကို သင်တို့စားခွင့်ရှိ၏။ 22ထိုသို့သောအကောင်များဖြစ်သည့် အညိုရောင်ကျိုင်းကောင်အမျိုးမျိုး၊ အစိမ်းရောင်ကျိုင်းကောင်အမျိုးမျိုး၊ ပုရစ်အမျိုးမျိုးနှင့် နှံကောင်အမျိုးမျိုးတို့ကို သင်တို့စားခွင့်ရှိ၏။ 23ခြေလေးချောင်းရှိ၍ ပျံတတ်သော ပိုးမွှားသတ္တဝါအားလုံးသည် သင်တို့အဖို့ ရွံရှာဖွယ်ရာဖြစ်၏။

အသေကောင်နှင့်ထိမိသူကို စင်ကြယ်စေခြင်း

24ထိုအကောင်များအားဖြင့် သင်တို့သည် မစင်မကြယ်ဖြစ်မည်။ ၎င်းတို့၏အသေကောင်ကိုထိမိသောသူတိုင်းသည် နေဝင်ချိန်အထိ မစင်ကြယ်။ 25၎င်းတို့၏အသေကောင်ကို ကိုင်သောသူတိုင်း မိမိ၏အဝတ်ကိုလျှော်ရမည်။ ထိုသူသည် နေဝင်ချိန်အထိ မစင်ကြယ်။ 26ခွာနှစ်ခြမ်းမကွဲသောတိရစ္ဆာန်၊ စားမြုံ့မပြန်သောတိရစ္ဆာန်အားလုံးတို့သည် သင်တို့အဖို့ မစင်ကြယ်။ ၎င်းတို့ကိုထိသောသူအားလုံးတို့သည်လည်း မစင်ကြယ်။ 27ခြေလေးချောင်းဖြင့်သွားသောတိရစ္ဆာန်အားလုံးတို့ထဲမှ ဖဝါးဖြင့်သွားသောအကောင်ရှိသမျှတို့သည် သင်တို့အဖို့ မစင်ကြယ်။ ထိုအကောင်တို့၏အသေကောင်ကိုထိမိသောသူတိုင်း နေဝင်ချိန်အထိ မစင်ကြယ်။ 28ထိုအသေကောင်ကို ကိုင်သောသူသည် မိမိ၏အဝတ်ကိုလျှော်ရမည်။ ထိုသူသည် နေဝင်ချိန်အထိ မစင်ကြယ်။ ထိုတိရစ္ဆာန်တို့သည် သင်တို့အဖို့ မစင်ကြယ်။

29မြေကြီးပေါ်၌ တွားသွားသောသတ္တဝါတို့တွင် သင်တို့အဖို့ မစင်ကြယ်သောအကောင်များဟူမူကား မြွေပါ၊ ကြွက်၊ ပုတတ်အမျိုးမျိုး၊ 30တောက်တဲ့၊ ဖွတ်၊ အိမ်မြှောင်၊ ကင်းလိပ်ချောနှင့်ပုတ်သင်ညို တို့ဖြစ်ကြ၏။ 31တွားသွားသတ္တဝါရှိသမျှတို့တွင် ထိုအကောင်တို့သည် သင်တို့အဖို့ မစင်ကြယ်သောအကောင်များဖြစ်၏။ ထိုအကောင်များသေသောအခါ အသေကောင်ကိုထိမိသောသူတိုင်း နေဝင်ချိန်အထိ မစင်ကြယ်။ 32ထိုအကောင်များထဲမှ တစ်ကောင်ကောင်သေ၍ အသေကောင်သည် အလုပ်လုပ်ရာတွင် အသုံးပြုသောပစ္စည်းဖြစ်သည့် သစ်သား၊ ပိတ်စ၊ သားရေ၊ လျှော်တေဖြင့် ပြုလုပ်ထားသောအသုံးအဆောင်တစ်စုံတစ်ခုပေါ်သို့ကျလျှင် ထိုအရာသည် မစင်ကြယ်။ ထိုအရာကို ရေထဲ၌ နှစ်ရမည်။ ထိုအရာသည် နေဝင်ချိန်အထိ မစင်ကြယ်။ ထို့နောက်မှ စင်ကြယ်လိမ့်မည်။ 33ထိုအသေကောင်သည် မြေဖြင့်ပြုလုပ်ထားသောအိုးခွက်တစ်စုံတစ်ခုထဲသို့ကျလျှင် ထိုအိုးခွက်ထဲရှိသမျှသည် မစင်ကြယ်။ ထိုအိုးခွက်ကို ခွဲပစ်ရမည်။ 34ထိုအိုးခွက်မှရေသည် စားမည့်အစားအစာတစ်စုံတစ်ရာပေါ်သို့ကျလျှင် ထိုစားစရာသည်မစင်ကြယ်။ ထိုအိုးခွက်ထဲရှိ သောက်မည့်အရည်တစ်စုံတစ်ရာသည်လည်း မစင်ကြယ်။ 35ထိုအသေကောင်၏အစိတ်အပိုင်းတစ်ခုခုသည် တစ်စုံတစ်ရာပေါ်သို့ကျလျှင် ထိုအရာသည် မစင်ကြယ်။ ထိုအရာသည် မီးဖိုဖြစ်စေ၊ ဖိုခနောက်ဖြစ်စေ ဖျက်ပစ်ရမည်။ ထိုအရာတို့သည် မစင်ကြယ်။ သင်တို့အတွက် မစင်ကြယ်။ 36စမ်းရေ၊ သို့မဟုတ် ရေလှောင်တွင်းထဲသို့ ကျလျှင်မူကား ၎င်းတို့သည် စင်ကြယ်၏။ အသေကောင်ကို ထိမိသောသူသည်သာ မစင်ကြယ်။ 37ထိုအသေကောင်၏အစိတ်အပိုင်းတစ်ခုခုသည် မျိုးကြဲရန် မျိုးစေ့တစ်စုံတစ်ရာပေါ်သို့ ကျလျှင် ထိုမျိုးစေ့သည် စင်ကြယ်၏။ 38သို့ရာတွင် ထိုအသေကောင်၏အစိတ်အပိုင်းတစ်ခုခုသည် ရေစိမ်ထားသောမျိုးစေ့ပေါ်သို့ကျလျှင် ထိုမျိုးစေ့သည် သင်တို့အတွက် မစင်ကြယ်။

39သင်တို့စားခွင့်ရှိသောတိရစ္ဆာန်များထဲမှ တစ်ကောင်ကောင်သေလျှင် ထိုအသေကောင်ကိုထိမိသောသူသည် နေဝင်ချိန်အထိ မစင်ကြယ်။ 40ထိုအသေကောင်ကိုစားသောသူသည် မိမိ၏အဝတ်ကိုလျှော်ရမည်။ သူသည် နေဝင်ချိန်အထိ မစင်ကြယ်။ ထိုအသေကောင်ကို ကိုင်သောသူသည်လည်း မိမိအဝတ်ကိုလျှော်ရမည်။ သူသည် နေဝင်ချိန်အထိ မစင်ကြယ်။

မစင်ကြယ်သောတွားသွားသတ္တဝါများ

41မြေကြီးပေါ်၌တွားသွားသောသတ္တဝါတိုင်းသည် ရွံရှာဖွယ်ရာဖြစ်၍ မစားရ။ 42ဝမ်းဗိုက်ဖြင့်တွားသွားသောအကောင်၊ ခြေလေးချောင်းဖြင့်တွားသွားသောအကောင်၊ ခြေများစွာဖြင့်တွားသွားသောအကောင်စသည့် မြေကြီးပေါ်၌တွားသွားသောသတ္တဝါရှိသမျှတို့သည် ရွံရှာဖွယ်ရာဖြစ်၍ မစားရ။ 43မည်သည့်တွားသွားသတ္တဝါနှင့်မျှ သင်တို့ကိုယ်သင်တို့ မညစ်ညူးစေနှင့်။ ထိုသတ္တဝါတို့အားဖြင့် သင်တို့ကိုယ်သင်တို့ မစင်မကြယ်ဖြစ်အောင်၊ ညစ်ညူးအောင်မပြုနှင့်။ 44ငါသည် သင်တို့၏ဘုရားသခင်ထာဝရဘုရားဖြစ်၏။ ငါသည် သန့်ရှင်းသောကြောင့် သင်တို့သည်လည်း သင်တို့ကိုယ်သင်တို့ သန့်ရှင်းစေ၍ သန့်ရှင်းသောသူများဖြစ်ရမည်။ မြေပေါ်မှာတွားသွားသော မည်သည့်သတ္တဝါနှင့်မျှ သင်တို့ကိုယ်သင်တို့ မညစ်ညူးစေနှင့်။ 45ငါသည် သင်တို့၏ဘုရားဖြစ်မည့်အကြောင်း သင်တို့ကို အီဂျစ်ပြည်မှ ထုတ်ဆောင်ခဲ့သောထာဝရဘုရားဖြစ်၏။ ငါသည် သန့်ရှင်းသောကြောင့် သင်တို့သည်လည်း သန့်ရှင်းရမည်။#ဝတ် 19:2၊ 20:7၊ ၁ပေ 1:16။

46ဤသည်ကား သားယဉ်သားရဲတိရစ္ဆာန်၊ ငှက်၊ ရေထဲ၌လှုပ်ရှားသွားလာသောသက်ရှိသတ္တဝါအားလုံး၊ မြေကြီးပေါ်၌ တွားသွားသောသတ္တဝါအားလုံးတို့နှင့်ဆိုင်သောပညတ်တရားဖြစ်၍ 47စင်ကြယ်သောအရာနှင့် မစင်ကြယ်သောအရာ၊ စားခွင့်ရှိသောတိရစ္ဆာန်နှင့် စားခွင့်မရှိသောတိရစ္ဆာန်တို့ကို ခွဲခြားနိုင်ရန်ဖြစ်၏”ဟု မိန့်တော်မူ၏။

လက်ရှိရွေးချယ်ထားမှု

ဝတ်ပြုရာကျမ်း 11: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။

ဝတ်ပြုရာကျမ်း 11