ရာဇဝင်ချုပ်ဒုတိယစောင် 28:20-26

အဆီးရီးယား​ဘုရင် တိဂလတ်ပိလေသာ​မင်းကြီး​သည်​လည်း သူ့​ထံ​ချီလာ​ပြီး အကူအညီ​ပေး​မည့်​အစား ဒုက္ခရောက်​အောင် ပြု​၏​။ အာခတ်​မင်းကြီး​သည် ထာဝရဘုရား​၏​အိမ်​တော်​၊ ဘုရင့်​နန်းတော်​နှင့်​မှူးမတ်​များ​ထံမှ ဥစ္စာဘဏ္ဍာ​များ​ကို​ယူ​၍ အဆီးရီးယား​ဘုရင်​အား​ပေး​သော်လည်း သူ့​ထံမှ​အကူအညီ​မ​ရ​ချေ​။ အာခတ်​မင်းကြီး​သည် ဒုက္ခရောက်​နေ​ချိန်​တွင်​ပင် ထာဝရဘုရား​အပေါ် သစ္စာမဲ့​သော​လုပ်ရပ်​များ​ကို ဆက်​၍​သာ​လုပ်ဆောင်​လေ​၏​။ သူ​က “​ဆီးရီးယား​ဘုရင်​၏​ဘုရား​တို့​သည် သူ​တို့​ကို ကူညီ​၏​။ ထို​ဘုရား​တို့​ကို ယဇ်ပူဇော်​လျှင် ငါ့​ကို​လည်း​ကူညီ​လိမ့်မည်​”​ဟု တွေး​လျက် သူ့​ကို တိုက်ခိုက်​နှိမ်နင်း​ခဲ့​သော​ဒမတ်စကပ်​မြို့သား​တို့​၏​ဘုရား​များ​ကို ယဇ်ပူဇော်​လေ​၏​။ သို့သော် ထို​ဘုရား​တို့​သည် သူ​နှင့်​အစ္စရေး​တစ်မျိုးနွယ်လုံး​ကို ကျရှုံး​စေ​၏​။ အာခတ်​မင်းကြီး​သည် ဘုရားသခင်​၏​အိမ်​တော်​အသုံးအဆောင်​တို့​ကို စုပုံ​ပြီး ထို​ဘုရားသခင်​၏​အိမ်​တော်​အသုံးအဆောင်​တို့​ကို ချိုးဖဲ့ဖျက်ဆီး​ပစ်​ကာ ထာဝရဘုရား​၏​အိမ်​တော်​တံခါး​များ​ကို​လည်း ပိတ်​ထား​၏​။ ထို့နောက် ဂျေရုဆလင်​မြို့​လမ်း​ထောင့်​ရှိသမျှ​တို့​၌ မိမိ​အဖို့​ယဇ်ပလ္လင်​များ​ကို တည်​၏​။ ယုဒ​ပြည်​ရှိ မြို့တိုင်း​တွင် အခြား​ဘုရား​တို့​ကို နံ့သာပေါင်း​မီးရှို့ပူဇော်​ရန်​အတွက် အထွတ်အမြတ်​ထား​ရာ​နေရာ​တို့​ကို တည်​၏​။ ဤသို့ဖြင့် ဘိုးဘေး​တို့​၏​ဘုရားသခင်​ထာဝရဘုရား​ကို အမျက်ထွက်​စေ​၏​။ ကျန်ရှိ​နေ​သော အာခတ်​မင်းကြီး​လက်ထက်​အဖြစ်အပျက်​များ​၊ သူ​လျှောက်​ခဲ့​သမျှ​သော​လမ်း​အစ​အဆုံး​တို့​ကို ယုဒ​ဘုရင်​နှင့် အစ္စရေး​ဘုရင်​တို့​၏​ရာဇဝင်မှတ်တမ်း​တွင် ရေးမှတ်​ထား​၏​။