Matyu 28
28
Jisas notanima nohafel wapoti'
(Mk 16:1-10; Lu 24:1-10; Jo 20:1-18)
1Nemaf anama esis Juda sapoma noma'wanai Sabat nafe' hi'alana, ea' Sande#28:1 Basef ofagema ma nemaf Sande mape na'ama. Diga Griki naloma diga Inglisi na'i nemaf nali'i ma wik. Ea' basef amama ma'i maina nemaf? Amama ina alihima epes hiesi, owa'. Ea' dei' basef amama Sande mape buk anae'. nemaf nali'ma wik kuhimbita atona felefele'ma aon nielatowi, nematawa awama biawa Maria Makdalai'wi kwaloma ano'w agel atotona Maria wafi'i ma wieti hi'agif. 2Ea' sowambon lu'unai nasol mehip. Ea' anona ensel Dembinai nisila'i gani heven, nafe' hi'agif nelefata owap anama nowalo uta nafe' na'oh wa'ol ea' natomana. 3#Mt 17:2; Ap 1:10Amaga ananinai howalona nafifil endilisi si'i otaga pelele'ala howalagon ea' lu'waguf maim ananimi afitim endilisi si'i ais mandati. 4Ea' soldia amama mumafi hi'agifi umbamaham kwapete'am endilisi mowa ma'oh etap si'i saga'i.
5Ea' ensel anama na'ipa awau biawa na'i, “Ipe' bipa ina umbamehepa, owa'. Ae' egawa ipe' pafi'i pa'i piti Jisas, aman anama esis sahana naga' lawag usi'inai tu'wanainai. 6#Mt 12:40, 16:21Anan ina ata' nape na'ae, owa'. Notanima nohafel ea' si'i fowa' nali' na'ipipa! Ipe' fi'i ma ata' piti na'ae na'oma. Dei' wafigin nape. 7#Mt 26:32Dei' ipe' fo'o mehip pi'ipa alupumi ananimi pi'i, ‘Anan nahafel wapoti' ea'. Peme'. Anan nali'ipa nafe' etap hiagoma Galili. Ipe' fo'o potolona gani.’ Basef ae'ami ea' amama.”
8Ea' awau umbamahawa ea' wandanifel endilisi wapoti', mehip wakwaha hi'agif wasagih wafe'ma wie'ipa amam alupumi ananimi. 9Dei' atef Jisas nati awau eaf nanda'mawa gude na'i, “Nemaf bu'unai ipe'.”
Ea' awo wafe' felefele'ma anan wahapila bo'wagah ananimi ma onda' lotuma anan.
10Ea' Jisas na'ipawa na'i, “Ipe' ina umbamehepa, owa'. Ipe' bipa pefe' pi'ipa amam owape ae'ami mofo'o Galili. Atuwasi motolowe ganima.”
Basef amam soldia mumafi hi'agif
11Nematawa awama biawa ata' wafe' eaf etin, anom soldia mumafi hi'agifi mafe' mawis taun anama ma'ipa amam pris dambami ma amamaga amama matagai. 12Ea' pris amama maloma agufumi esis Judai ma'i anom basef mandame'mam ea' mase'ama moni hianai nafe'ma soldia amama ea' 13ma'ipam ma'i, “Ipe' pi'iam na'ama pi'i, ‘Owamb afa' wa'ihi, amam alupumi ananimi mafi'i makoalopana mofa'ana.’ 14Ama gavman dembinai neme' basefana, afa' onda' okom ananinai awanena ipe' basef a'epa.”
15Ea' amam soldia mofa' moni anama mame' basef amamumi magi'mam. Ea' basef amama ea' mafe'agon hi'alagon wambel hiagoma esis Juda, ea' ata' sa'iam etin mafi'i matagama dei' sa'iam la'ela'ef.
Jisas nase'ama maol amam alupumi ma mofe' meawalapa basef bu'wami ananimi
(Mk 16:14-18; Lu 24:36-49; Jo 20:19-23)
16Ea' amam alupumi 11-peleim mafe' Galili mataga halaf anama Jisas nali' na'ipam meafe'ma. 17Ea' mati Jisas mafela agel ananinai manifelona. Ea' anom ukup biambiefim mapeim.
18Ea' Jisas nafi'i felefele'ma amam na'ipam na'i, “God nase'eana agel lu'unai ma pepel ilifanai etapanai ea'. 19Na'ama dei' ipe' pefe' wambel hiagoma piwalipa amam nematawa sape wambotogw hiami piwalipasa basef bu'wami ae'ami, penda'as sotaga alupisi ae'asi ma siela basef Ae'ami andeande' ea' pipisi'as embela agel Ahalomei noloma Ae'anai noloma Ambal Bu'unai Ananinai. 20Ea' piwalipasa sila basef bu'wami hiami ae'ami fowa' awalipipami ma basef la'ifimi. Endilisi ae' ape alomepa ma nimeguf hiami danda, pefe' pefe' ma nemaf akutainai nogota hi'ilana.”
လက္ရွိေရြးခ်ယ္ထားမွု
Matyu 28: aojF
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2013, Wycliffe Bible Translators, Inc. All rights reserved.