MATIO 9
9
Yeso yɛ mu' gɛ po'tə nɑ́
(Mk 2.1-12; Lk 5.17-26)
1Yeso lə́ piŋ ŋkho kənu', biŋ sa'shyə lɑpʉə, bɑnyə tisuŋ e. 2Pu lɑ mu' gɛ po'tə nɑ́ sɔ' bi e, bɑ pu kwa e dəm kodyə. Yeso lə yɔ piŋnthʉm yap, gɔm bi gɛ po'tə nɑ́ gɑ: Kaktʉɔ m mú a, pu lɑ mhɔ mǔ shwyɛ' o. 3A lə́ pɑ po'o shɑ pɑ zhyə́ mco' pɑ gɔm cəcɑ̌ pú gɑ: Mbɛ yəŋ gɑ yəmtə Si. 4Yeso lə́ zhyə́ pa' wap wə sɛ nthʉm tʉm pú a gɔm gɑ: Nwə́ kɑ́ po ghə mɔ gɑ nthi mkwɛnyə́ cwəpuŋ nthʉm tʉm pó? 5A ghɔ nə́ nə ghɔm gɑ: Pu lɑ mhɔ mǔ nə shwyɛ' o, pu nə ghɔm gɑ: Lusi gǐŋ, bɑ ya yɛ̀? 6Po'o! Tə́ po nə́ jyə gɑ́ tʉɔ bɑ bi Mú mo dəmcǎ' nə lɑ mhɔ pɔmnəŋ nə shwyɛ' wap, e ghɔm bi gɛ po'tə nɑ́ gɑ: Lusi ŋkwa kodyə o nə gɔ la' o! 7Bɛ bɔ lə lusi gɔ la' e. 8Pɔmnəŋ lə nə́ yɔ po'o bwɔk, biŋ gu'tə́ Si pa' e hɑ yə bɔ nthi tʉɔ̀ bi pɔmnəŋ a.
Pa' Yeso ŋkhe Matio a
(Mk 2.13-17; Lk 5.27-32)
9Yeso lə lǔ tsʉ'u, biŋ nə cyə jɔ mu' mbɛ pu pɑ ŋkhe é gɑ Matio. Bɑ e cwə́si dyə ma' shwɔp. Yeso ghɔm bi e gɑ: Yap jʉ̌m m̀, Matio lusi jap jʉm é. 10Pú Yeso lə́ pɑ́ tɑpe dyə e, pɑ kwi shwɔ̀p pu a mghɛ mhɔ jɔmyɔ̌m sɔ' pu a pɑkhʉ Yeso pɑ yap Si. 11Pɑ Farisai lə nə yɔ po'o, gɔm bi pɑkhʉ̌ Yeso gɑ: Nwə kɑ́ tá yɔ pu a pɑ kwi shwɔ̀p ba mghɛ mhɔ pəmtə dzʉ́ywə? 12Da'gɑ́ Yeso yu' gɔm gɑ: Tɑ́ pɑ nɑ nthʉ̀ɔ nə shəŋ gəgɛ pɑ̀, mghɛ ghó nə shəŋ e. 13Po ghɔ ji'tə nwə nə ywə yə yəŋ nwə nthutə a gɑ: Ywə yə gɑ̌ shəŋ a, a bɑ́ cɔmmtso, a tə bɑ nə nuŋpwɔ' pɑ́. Nə pa' ŋ da tə sɔ' m nə ké pɔ dəŋdəŋ pɑ́, ŋ də sɔ' m nə ké mghɛ mhɔ.
Yeso nə nwə zhwiŋ
(Mk 2.18-22; Lk 5.33-39)
14Pɑkhʉ̌ Yohane lə sɔ' jɔ Yeso gɔm bi e gɑ: Nwə kɑ́ wɔk pyə a pɑ Farisai pɑ́ shwə tə tsʉ̌ywə, la' pɑkhʉ pǔ pɑ shwə yap tə tsʉ̌ywə? 15Yeso ghɔm bi pú gɑ: Bi a pɑ msǒ la'nwə pyə pú gó wap la'nwə á zhwiŋ nə cwə yə tá la'nwə cəcɑ̌ pu a? Da' gɑ tyɛ'dzʉ́ wə yə pu gɔ té tá la'nwə cəcɑ̌ pu a? A gɔ pɑ́ tyɛ' o bɔ, wap zhwiŋ. 16Sɔmmo tə dɑ pak dzə́ sə ntham bvo dzə pɑ́. Nə pa' bɑ pak dzə́ bɔ gɔ fəŋ dzə, a piŋ ŋkhi pɑ́ bɔkbɔk e. 17Pu tə nyəŋ mlu' sə nthʉm mvo nthǔ' pɑ́, tak po'o bɑ mvo nthǔ' gɔ vyətə, mlu' pfyə́, pú pi mnthu'. Pu nyə́ŋ mlu' sə́ pɑ nthʉm mnthu' sə́, guŋ e awɛ cwə pɑpuŋ.
Yeso yɛ̀ mu' mjwǐ biŋ jám mú go mu' ŋkham
(Mk 5.21-43; Lk 8.40-56)
18Yeso lə́ pɑ́ gɔm bi pú po'o, mu' ŋkhám sɔ' bəŋ e, ŋkhám mkwi'tə myə́ si gɔm bi e gɑ: Mú a yə mjwǐ pfʉ pɑ cwəlɔ. Da' gɑ sɔ' jap pu nə é e vɔk. 19Yeso lə́ lusi, pu a pɑkhʉ pyə́ jap jʉm e.
20Wap lə pɑ gɔ, mu' mjwǐ gho mcyə pɑ nə e tə fɑ gu' shwɔppʉə mgham təm m jʉ́m, sho' pú nə mto dzə́ Yeso. 21Nə pa' mjwǐ bɔ lə bɑwə gɔm nthʉm tʉm é gɑ: Ŋ gɔ sho' pú nə dzə́ e bɑ gɑ gɔ vɔk. 22Da' gɑ Yeso lə fɛ́ nɑ́ e, jɔ e gɔm bi e gɑ: Kaktʉɔ m go a! Piŋnthʉm o vɔk o. Mjwǐ bɔ lə wuŋ bvɔk pɑ cwəo.
23Yeso lə́ nə́ ŋwak dyə ŋkhǎm bɔ̌, jɔ pɑ túŋdúŋ pu a zhəzhəŋ pɔmnəŋ gɔm gɑ: 24Po təm; go yɑ́ ka pfʉ, e bɑwə diti; pɔmnəŋ piŋ bɑ jəmtə é. 25Pú lə cwə tə nthe pɔmnəŋ dyə, Yeso kó dyə́ nthɔm pú mú gò, e yàm. 26Mcùŋ bɔ sɛ̀ nə ghə̌ŋ tsʉ'u bɔ awɛ.
Yeso yɛ mfʉ́ pɑ́pʉ́ə
27Cwə yə Yeso lə pɑ gɔ a, shɑ mfʉ̀ pɑpʉ́ə yapjʉ̀m e bɑ shwé gɑ: Cɔmmtso mɔk m Mú David!
28Yeso lə kodyə́ cwəlɔ, mfʉ bɔ fʉ'tə nɑ tsap sɔ' bəŋ e, e piŋ gɔm bi pu gɑ: Po kwɛ gɑ bi a pɑ́ gə ywə bǎ a? Wap ghɔm bi e gɑ əŋ m Cyəpɔ. 29A pɑ po'o e co' pu nə mnyə map gɔm gɑ: A nwə yə po wə shəŋ a pəmtə nə piŋnthʉm yɔ. 30Mnyə map lə ghyɛ̌'. Yeso piŋ gɔm shɔkcɔk bi pu gɑ: Pɔm gɑ sɔmmo kɑ zhyə. 31Da' gɑ́ wap lə́ wuŋ nə təm dyə gɔm nwə é nə guŋ ghəŋ tsʉ'u awɛ.
Yeso yɛ tə ghɔm
32Wap lə́ nə́ təm pu lɑ mu' təghɔm, zhwenyə cwəpuŋ pɑ́ nə e sɔ' bi Yeso. 33E lə zhəŋ zhwenyə cwəpuŋ nə́ tə ghɔm bɔ, e to' nə ghɔmnwə. Pɔmnəŋ pɑ́ ŋwɛnyə nə́, bɑ gɔm gɑ: pu la m jɔ nwə po'o nthʉm guŋ Israɛl. 34Da' gɑ pɑ Farisai pɑ́ gɔm gɑ: E shyə a m nə tadyə mzhwenyə cwəpuŋ jəŋ mzhwenyə cwəpuŋ.
Mtso pɔmnəŋ ŋkhu Yeso
35Yeso lə́ giŋ nə guŋ mtisuŋ pu a m nə guŋ mla' awɛ, bɑ ji'tə pɔmnəŋ dyə sinagogə pú, bɑ siŋ cuŋ pɑpuŋ nə Nəfò, biŋ bɑ́ jɛ́ guŋ mghɛ gho pu a guŋ mkhʉm awɛ.
36Yeso lə nə yɔ pɔmnəŋ, mtso map kú e nə pa' a lə bɑ wap pwa, gʉ' lə piŋ jɑ nə pú, wap pɑwə shwə pa' jʉ̀jʉ̀ tə gɛ pyap wap a. 37A pɑ́ po'o, Yeso ghɔm bi pɑkhʉ pyə gɑ: Tsə́ lɑ nyəŋ dyə yɔm pe, mghɛ fa' kɔk. 38Po cwyɛ'nyə Ta tsə dɑlɑ gɑ e cya mghɛ fa' nə tsə dɑlɑ tsyə́.
လက္ရွိေရြးခ်ယ္ထားမွု
MATIO 9: NTGomala
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nouveau Testament Ghomala © Bible Society of Cameroon, 2002.