Matayo 19
19
Jeso Wayiisha Makani Aakulekana
(Maako 10:1-12)
1Inzho Jeso amane kubaambila mazwi aza wakakuhwa ku Galilaya, waya mucishi ca Judiya kumutala wa Joodani. 2Makamu makamu a bantu akamucilila, ubobo wakabaponya nkukona koko.
3Ba Falisi bakeza kumusunka bakamubuzha ati, “Sa muntu ulyeelele kumuleka mwinakwe kufwumbwa kaambo?” 4#Mata 1:27; 5:2Walo wakaingula ati, “Sa mwiina nimwakabala ati kumalengelo mulengi wakalenga mulombwana u mukaintu? 5#Mata 2:24Ubobo mulombwana ulakashiya ushi u baina ukukakatila kumwinakwe. Ulimwi babo bobile ulaba mubili womwi. 6Tabacili bobile baba mubili womwi. Ubobo ncaaswaanganya Leza, kutabi muntu ucaandaanya.” 7#Ciz 24:1-4; Mat 5:31Bamane bamubuzha ulimwi ati, “No nkaamboonzhi Mozesi wakalailila ati mulombwana ape mwinakwe luŋwalu lwa kumuleka amana amuleke?” 8Jeso wakaingula ati, “Nkaambo kakuti muli bazumu myonzo ncaakamuhumizhizha Mozesi kuleka benenu, pele kumalengelo kacitali bobo pe.” 9#Mat 5:32; 1 Bako 7:10, 11Inzho ndamwaambila ati, “Kufwumbwa uuleka mwinakwe kukaambo kamwi bulyo katali kakubucilwa, amana watwala uunji, wezo ati wacita bumambe.”
10Bamane ba shiciiya bakamwaambila ati, “Naa kuti mbukabele kaambo bobo ku makani a mulombwana u mwinakwe, nkukwaamba ncibotu kutatwala.” 11Jeso wakabeta ati, “Lolu lwiiyo tabali bantu boonse bakonzha kulutambula, cita bulyo kuli babo Leza mbaalupele. 12Nkaambo nkubali bamwi batakonzha kutwala ukaambo kabuzhalwe bwabo. Bamwi tabatwali kaambo bantu bakabacita bobo. Ulimwi nkubali ubamwi batatwali ukaambo ka bwami bwa kwizeulu. Kufwumbwa wezo uukonzha kutambula lolu lwiiyo naacite bobo.”
Jeso Wabalongezha Bana Bashoonto
(Maako 10:13-16; Luka 18:15-17)
13Bamwi bantu bakaleta bana bashoonto kwa Jeso kwaamba abaampe matashi ukubakombela, pele ba shiciiya bakabalemanina babo bantu. 14Jeso wakaamba ati, “Amubaleke bana beze kwangu mutabakasha pe, nkaambo bwami bwa kwizeulu mbwabo bali bolya.” 15Ubobo wakabaampa matashi amane wakabashiya.
Muhubi mukubushi
(Maako 10:17-31; Luka 18:18-30)
16Umwi mulombwana wakeza kwa Jeso waamba ati, “Mwiiyi anu ncite nzhi cibotu kwaamba nkabuyane bumi butamana?”
17Wakamwaambila ati, “No kaamboonzhi ncuumbuzha ati nciciliye cibotu. Mubotu uli womwi bulyo. Kuti naa ulazanda kuya kunjila mu bumi butamana cilila milawo.”
18 #
Kul 20:13; Ciz 5:17;
Kul 20:14; Ciz 5:18;
Kul 20:15; Ciz 5:19;
Kul 20:16; Ciz 5:20 Walo wakabuzha ati, “Anu milawo nzhi?” Jeso wakaamba ati, “Utayaya, utaciti bumambe, utebi, utalenjelezha mweenzhinoko kaambo, 19#Kul 20:12; Ciz 5:16; Bale 19:18Lemeka uso u banoko, ulimwi fwuna mweenzhinoko umbona mbuulifwini umwini?” 20Wezo mulombwana wakaamba ati, “Yezhi yoonse ndeebamba. No kwashaala nzhi?” 21Jeso wakamwiingula ati, “Kuti naa ulazanda kulondoka, koya ukauzhe shoonse nshuukwete. Mali nguukayana ukape bapushi. Buhubi ulakabuyana kwizeulu. Wamana uzhize uncilile.” 22Wezu mulombwana naakaateelela aza makani wakaya ulyuusile nkaambo kakwete lubono lunji lunji.
23Jeso wakabaambila ba shiciiya ati, “Cini cini ndamushimwina ati ncizumu ku muntu muhubi kwaamba akenjile mu bwami bwa kwizeulu. 24Ulimwi ndamwaambila ati ncuubauba inkamela kunjila mukapulo kansonde kubaala muntu muhubi kwaamba anjile mu bwami bwa Leza.” 25Ba shiciiya nibakaateelela aza bakazhingwa cini cini u kwaamba ati, “Alo kulakaba ukaafwutuka?” 26Pele Jeso wakabalanjilila wabaambila ati, “Ku bantu ceci ncizumu, pele kwa Leza shoonse shintu shilakonzha kucitika.” 27Pita wakaingula ati, “Kayi bona uswe twakashishiya shoonse twakakucilila, no tulakapewaanzhi?” 28#Mat 25:31; Lk 22:30Jeso wakabaambila ati, “Cini cini ndamwaambila ati mubulenge bupiya, lelyo Mwanaa Muntu naakaakala acuuna cakwe ca bulemu, amwe numuncilila mulakakala a shuuna shili ikumi ushuuna shobile sha bwami u kubeteka mishobo iili ikumi iitwesha yobile ya Izilaili. 29Ubobo kufwumbwa wezo wakashiya munzhi nibaba banina balombwana u bakaintu, naa ushi naaba baina naa bana, niiba myuunda yakwe ukaambo kezhina lyangu ulakatambula shishika ku mwaanda kubaala nshaakashiya ulimwi ulakakona bumi butamana. 30#Mat 20:16; Lk 13:30Pele banji banji bataanzhi balakaba bashaalizhi, abo bashaalizhi balakaba bataanzhi.”
လက္ရွိေရြးခ်ယ္ထားမွု
Matayo 19: ILL
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Ila New Testament © Bible Society of Zambia, 2015.