Zan 5
5
Zozii ya nclɔɔ bhlo nyɔkwɛclɩɩ 'kʋ jabha
1Ɩmɩ ‑naa 'la leen, Zifʋnyaa* 'la 'fɛtlɩ bhlo ya ŋeni 'nyɩ Zozii ya Zolizalɛmʋ ‑gblaa. 2'Nyikle bhlo ‑kʋa duu ‑naa nɩkplaan, gbinea ma la 'lɛ 'bhlabhlɩ 'la gbinea na cɩ. Ebleewɔlɩɩn, 'nyikle ‑naa ma la 'lɛ Bɛzataa. A ‑kaa 'plɩlɩdɩ ‑ngbi, ‑ɩ ‑gblio 'lɛ na. 3Guzenya ‑bhutukpa pʋaa 'mɩɩ ‑zɔn: 'Citutunya, bhɩbhlinya ɩya bhubhubhubhunya. [4]#5.4 ‑Godogodofluwia ‑anɩ ya wɔɔke ‑naa Zieziewɔlɩa nɩkplaan ‑pla: «Ma ‑bɛa le 'nyɩa 'ka 'dɩdɔ, sa ‑Kwlenyɔ 'la 'bhlaandlee kwlia 'nyia nɩkplaan 'nyɩ ɔ 'dɩdɔa 'mɛɛ. 'Nyɩ ɔ ‑kɛɛ 'dɩdɔ ‑jaa na, ‑bɛka guzenyɔa ‑ɔ bhlilia 'mɛɛ 'lɛ nɩkplaan na, saa 'fɩan ɔla gua cɩa 'lɛ kʋkʋlʋ na, ka ‑tɛɛ ɔ jabhaa 'lɛ.»
5Nclɔɔ bhlo ‑kʋa 'dɛ, ɔ ‑glɩa bhubhubhubhunyɔ 'nyɩ ɔ ya dɩpɩa liowli -glʋʋ ɩya 'kʋgba ‑ngbaata li. 6Zozii yɔɔ 'lɩ, ɔ pʋa 'nyɩ ɔ 'nu 'lɛ lebhe ɔ ya gua nikplaan ‑gwlɛlɩ na, ɔ yɔɔ neencla lebhe: «‑N ‑wa lebhe ‑n cɩ jabha bha?» 7Bhubhubhubhunyɔa yɔɔ neenŋonu lebhe: «‑Kwlenyɔ n 'ta nclɔɔ ‑ka ɩya ɔ 'kaan 'nyiklea nɩkplaan 'pa, daa 'nyua bhɔ 'lɛ 'dɩdɔlɩɛ na. 'Nyɩ da n ‑ka 'cla le n mʋ na, ‑buun -naanɔ bhlo ya 'yɛpɩ tooto kwli.» 8Zozii yɔɔ 'cla lebhe: «‑Bho 'kʋ, 'ma ‑naa 'kʋpʋlʋʋa ɩya ‑n namʋ.» 9'Nyɩ 'kplookʋ, nclɔɔa ya jabha. Ɔ ya ɔla 'kʋpʋlʋʋa 'ma 'nyɩ ɔ ya 'namʋ zʋ. 'Dɛ 'la clɩɩa ‑glɩa Zifʋnyaa 'la nyɔkwɛclɩɩ*. 10Na, Zifʋnyaa ya ɔmɔa ‑ɔ wlʋa 'lɛ jabhada na, 'cla lebhe: «‑Yaka ‑glɩ nyɔkwɛclɩɩ, ‑n 'ta ‑jioli ‑ka ɩya ‑n ka ‑naa 'kʋpʋlʋʋa bhɛ.» 11‑Ma ɔ ya maa 'cla lebhe: «Ɔmɔa ‑ɔ jabhaan 'lɛ na, ka ɔ 'claan 'lɛ lebhe: 'Ma ‑naa 'kʋpʋlʋʋa ɩya n namʋ.» 12Ma yɔɔ neencla lebhe: «Ncaasaa ‑ɔ ‑glɩa 'lɛ ɔmɔa ‑ɔ 'clɔɔ 'lɛ lebhe ‑n 'ma ‑naa 'kʋpʋlʋʋa ɩya ‑n namʋa na bha?» 13‑Ma ɔmɔa ‑ɔ jabhaa 'lɛ na, 'taa nclɔɔa ɔ ‑glɩa 'lɛ na ‑ci. Sa Zozii ya ‑alawleea ‑ɔ ‑kʋa 'lɛ dɩpɩa na, sidiin mlɔnʋ na.
14Ɩla leen, Zozii ‑ya nclɔɔ ‑naa ya Laagɔpaakadiea* ‑zɔn 'cɩlɩ 'nyɩ ɔ yɔɔ 'cla lebhe: «Kopeka ncɩ, ‑n ya jabha. ‑Naa nʋanɩ nyinyi ɩya wɔlɩa ‑ɩ zi 'lɛ ‑anɩ ‑naa 'kʋ na, ɩ 'la kasɛnɩɔ ŋeni.» 15Nclɔɔa ya mʋ 'nyɩ ɔ ya Zifʋnyaa 'cla lebhe Zozii ‑ɔ jabhaa 'mɔɔ 'lɛ. 16Ɩla gbʋ na, Zifʋnyaa ya Zozii wɔlɩ 'kʋ gɩlɩɛ bhɔ, sa ɔ ya ɩmɩ ‑naa mala nyɔkwɛclɩɩ 'kʋ nʋ. 17‑Ma Zozii ya maa 'cla lebhe: «N To nʋ ka ‑azla lobholi. ‑Amʋ ‑ma, n ‑kʋ lobholiin.» 18Wɔɔkle ‑naa 'la gbʋ na, ma 'matɩnɩa ɔla 'bhlada, ‑n 'ta le mala nyɔkwɛclɩɩa ɔ zʋ 'ta 'lɛ na 'la gbʋ ‑tɛɛ, ‑ma ɔ la ‑awlɛ 'lɛ Laagɔ ɔ to, 'nyɩ ɔ pala 'lɛ ‑sa lebhe ka ɔya Laagɔ 'wlʋlʋ 'lɛ na, ɩla gbʋ.
Laagɔ 'la 'Cʋa 'la ‑jiolia
19Zozii ya ‑awlɛ wɔɔnyɩtʋ 'ma, 'nyɩ ɔ ya maa 'cla lebhe: «N solu anyɩ ɩ ‑glɩ ‑nʋawlɛ, 'Cʋa mino 'ta ɩya ɔ 'ka ɔla 'wluun lʋʋ bhlogbɩɩ nʋ, ‑n 'ta le ɩmɩa ‑tɛɛa ɔ 'lɩ 'lɛ Toa nʋda na. Sa ɩmɩa Toa nʋ 'lɛ na, ɩmɩ 'Cʋa ‑masɛ nʋ 'lɛ. 20Sa Toa ‑wa 'Cʋa 'nyɩ ɔ palɔɔ ɩmɩa ‑tɛtɛa 'fɩan ɔ nʋ 'lɛ na. Ɔ cɩ 'ka nʋnʋgbɩa ‑ɩ zi 'lɛ ‑da 'kʋ na pala ɩya nikpoo 'ka anyɩ slaa. 21Saa Toa bho 'lɛ 'ku 'kwɩɩn 'kʋ 'nyɩ ɔ nyɩɩ 'lɛ jabhʋa na, 'sɛɛ ‑tɛɛ bhlogbɩɩ, 'Cʋa ‑ma, ɔ nyɩ 'lɛ jabhʋa nclɔɔa ɔ ‑wa 'lɛ na. 22Toa ‑plaa 'ta nclɔɔ bhlogbɩɩ 'tɩtɩ, ɔ ya 'tɩtɩplalɩɛa 'fɩan 'Cʋa wlɩɩn zʋ, 23ɩya ncɛlɩa 'fɩan 'ka 'Cʋa 'klʋgba le saa ma gba 'lɛ Toa 'klʋ na. Ɔmɔa ‑ɔ ‑gba 'ta 'lɛ 'Cʋa 'klʋ na, Toa ‑ɔ lobhuo 'lɛ na, ɔmɔ, ɔ ‑gba 'ta 'lɛ 'klʋ.
24N solu anyɩ, ɩ ‑glɩ ‑nʋawlɛ, ɔmɔa ‑ɔ po 'lɛ 'na niwɔlɩa 'nyukwliin 'nyɩ ‑ɔ zʋ 'lɛ ɔla pɔɔtɛtɛa ɔmɔa ‑ɔ lobhuun 'lɛ na, 'kʋ na, ɔ lɩ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na. Ɔ 'tanɩ 'tɩtɩplalɩɛ ‑ka, ‑ma ɔ ya 'kwɩ 'la ‑gugwiea 'kʋ 'wlʋ 'nyɩ ɔ ya jabhʋa nɩkplaan ble. 25'Nyɩ n solu anyɩ, ɩ ‑glɩ ‑nʋawlɛ, 'ŋwacɩa ci 'yɛpɩ 'nyɩ ɛ ya tooto ŋeni, daa maa ‑ɔ ‑kuo 'lɛ na, cɩ 'ka 'lɛ Laagɔ 'la 'Cʋa 'la ‑blɩɩzɔan 'nu ɩya maa ‑ɔ ‑cɩ 'kʋʋ 'lɛ 'nu na, 'ka jabha na. 26Na, saa Toa ‑ka 'lɛ jabhʋa ɔcɩ nɩkplaan na, 'sɛtɛɛ bhlogbɩɩ ɔ 'nyɩ 'lɛ 'Cʋa ‑jioli le ɔ kalɩmʋ jabhʋa ɔcɩ nɩkplaan. 27Ɔ yɔɔ 'tɩtɩplalɩɛ 'la ‑jioli 'nyɩ, sa ɔmɔ ‑glɩ 'lɛ Nclɔɔa 'Cʋa*.
28Na, ‑anɩ ‑naa 'fɩan 'la slaanɩ anyɩ nikpoo! 'Ŋwacɩa ci 'yɛpɩ ɩya maa 'fɩan ‑ɔ pʋʋ 'lɛ lesia nɩkplaan na, 'ka ɔla ‑blɩɩzɔan 'nu, 29ɩya maa ‑ɔ ya 'lɛ 'nanɩ nʋ na, 'kɩɩ nɩkplaan 'wlʋ ɩya ma 'ka jabhʋa 'lɩ. ‑Ma maa ‑ɔ ya 'lɛ nyinyi nʋ na, cɩ 'kɩɩ nɩkplaan 'wlʋ ɩya ma 'ka gbaylɩsalɩɛ 'lɩ. 30‑Amʋ, 'n 'manɩ 'ta ‑amʋ 'titi 'na 'wluun ɩya n 'ka lʋʋ nʋ. Ɩmɩa Laagɔ soluun 'lɛ na, ɩmɩ 'kʋ n plalɩ 'lɛ nclɔɔ 'tɩtɩ 'nyɩ 'na 'tɩtɩplalɩɛ 'nylugolu 'kʋ, sa 'n 'matɩ 'ta le n 'ka ‑amʋ titi 'na pɔɔsa nʋ, ‑ma ɔmɔa ‑ɔ lobhuun 'lɛ na, 'la pɔɔsa.
Zozii 'la ‑danʋfʋɛcɩa
31Gbazɩ ‑amʋ 'titi n ‑ka ncɩ 'la ‑danʋfʋɛ li na, 'na ‑danʋfʋɛliliea cɩ 'ta ‑nʋawlɛ 'plɩ. 32‑Ma ‑buun nclɔɔ li 'lɛ 'na ‑danʋfʋɛ 'nyɩ n ‑ci sɛɛ lebhe 'na ‑danʋfʋɛa ɔ li 'lɛ na, ɛ ‑glɩ ‑nʋawlɛ.
33A ya Zaan ncɛlɩ 'kʋ lobhu 'nyɩ 'na cɩa wɔlɩa ɔ solu 'lɛ anyɩ na, ɩ ‑glɩ ‑nʋawlɛ. 34‑Amʋ, 'n 'matɩ 'ta lebhe nclɔɔ li 'na ‑danʋfʋɛ, ‑ma a 'ka 'lɛ gbʋʋnsalɩɛ 'lɩ na, dɛ n nyɩtɛ 'lɛ ‑sa. 35Zaan 'la gbɩa ‑kʋa le ‑kaniea ma ŋama 'lɛ 'nyɩ ɛ le 'lɛ na 'bhisa. 'Nyɩ anyɩ, a ya ŋonu le a cɩ clɩɩ ‑zlʋsaasa ɛla lelia nɩkplaan pɔlɛkʋmɛnɔ nʋnʋ.
36‑Ma ‑amʋ, n ‑ka ‑danʋfʋɛliliea ‑ɛ zi 'lɛ Zaan 'nɛa 'kʋ na. Ɛmɛ ‑glɩ 'lɛ nʋnʋgbɩa n To 'nyɩɩn 'lɛ nʋda na. N nʋɩ 'nyɩ ɩmɩ ‑ɩ li 'lɛ 'na ‑danʋfʋɛ lebhe Toa, ɔmɔ ‑ɔ lobhuun 'lɛ.
37'Nyɩ Toa ‑ɔ lobhuun 'lɛ na, ɔmɔ 'titi ‑ma ya 'na ‑danʋfʋɛ li. ‑Ma a 'ta ka ‑azla ɔla ‑blɩɩzɔan 'nu naa, a 'ta ka ‑azla ɔla 'klʋa 'ciinlɩ. 38'Nyɩ ɔla niwɔlɩa 'ta anyɩ nɩkplaan ‑kʋ, sa a 'ta ɔmɔa ɔ lobhu 'lɛ na, 'la pɔɔtɛtɛ ‑ka na. 39A 'matɩ Zieziewɔlɩa* 'ni, sa a gugu lebhe ɩmɩ nɩkplaan a cɩ 'ka 'lɛ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'lɩlɩ. ‑Ma ɩmɩ ‑ma 'na ‑danʋfʋɛ ɩ li 'lɛ. 40'Nyɩ a 'ta 'lɛ ‑wa le a 'kaan cili ɩya a 'ka jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'lɩ.
41'N 'matɩ 'ta ncɛlɩ 'la ŋwleenfalɩlɩɛ. 42Sa n ‑ci anyɩ na, n ‑ci sɛɛ lebhe a 'ta Laagɔ 'la ‑walʋ pɔlɛɛn ‑ka. 43‑Amʋ, n ya n to 'la 'ŋlɩa nɩkplaan cili 'nyɩ a 'ta ‑wa le a 'kaan kla. ‑Ma ‑buun ‑naanɔ bhlo ‑kaa ɔmɔ 'titi ɔla 'ŋlɩ nɩkplaan cili na, a cɩ 'kaa 'mɔɔ kla! 44Anyɩa ‑ɔ ‑wa 'lɛ anyɩ bhlobhlo 'la 'ŋwleenfalɩlɩɛ 'nyɩ ‑ɔ 'matɩ 'ta 'lɛ 'ŋwleenfalɩlɩɛa ‑ɩ 'wlʋlʋ 'lɛ Laagɔ bhlogbɩɩ wlɩɩn na, 'nsasa a cɩ 'kaa 'lɛ nʋnʋnʋ ɩya a 'ka 'lɛ pɔɔtɛtɛ kalɩ bha?
45A 'la gugua lebhe ‑amʋ ‑ɔ cɩ ka 'lɛ anyɩ Toa ‑deliin, wɔlɩ 'kʋ gɩ. Nclɔɔa ‑ɔ ‑cɩ ka 'lɛ anyɩ wɔlɩ 'kʋ gɩ na, ɔmɔ ‑glɩ 'lɛ Moyizi, ɔmɔa a 'tɛlɩ 'lɛ ‑deli 'kʋ na. 46Sa, ɩ ‑ka ‑kʋ lebhe a laa Moyizi 'la zieziewɔlɩa ‑nʋawlɛ na, ‑amʋ ‑ma a cɩ 'kaa 'na pɔɔtɛtɛ ‑kalɩ, sa 'na cɩa wɔlɩ ɔ zie 'lɛ na. 47‑Ma a la 'ta 'lɛ ɩmɩa ɔ zie 'lɛ na ‑nʋawlɛ na, 'nsasa a cɩ 'kaa 'lɛ ɩmɩa n nyɩtɛ 'lɛ na ‑nʋawlɛ lalalɩ bha?»
လက္ရွိေရြးခ်ယ္ထားမွု
Zan 5: NTLD13
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Dida New Testament © Bible Society of Côte d'Ivoire, 2013.