Genesis 9
9
Perᴋojat nutât. Gûdib angerninga. Noab erningit.
1Gudiblo saimauserpait Noa erningillo oᴋarvigivlugit: Kinguvâktâᴋattarluse unuksivallialeritse, nuna nâmavlugo.
2Nergjutit ilûnatik nunamêtut, tingmitjallo ilûnatik ᴋilaub atânêtut, aulajullo ilûnatik nunamêtut, mingeritjallo ilûnatik imarbingmêtut erᴋsigijaksarivâse ᴋoaᴋsârutigivluselo; aggapsingnut tunijaumavut.
3Aulajut ilûnatik ômajut nerᴋiksauvut illipsingnut; taimaktauᴋ perortunik tungujoᴋtarnik tamainik tunitjivigivapse.
4Kissianele nerᴋe, aungminik sulle ômajutelik, nerrijaksaringilase.
5Illâle, ause inôtigijase aperᴋutigijomârpara, ômajunut tamainut aperᴋutigijomârpara; inublo inôtigijanga aperᴋutigijomârpara inungmut kinamullônêt, ᴋattangutigingmago.
6Nalliat inub aunganik kovisijoᴋ, tâpsoma aungatauᴋ inungmut kovijaujuksauvoᴋ; Gûdib inuk sanangmago ingminik adsilivlune.
7Kinguvâktâᴋattarluse unuksivallialeritse, ômaridlaritse nuname unuksivalliavluse.
8Gudiblo Noa erningillo oᴋarvigivait oᴋarlune:
9Ahâk, illipsingnut angerpunga kinguvâksapsingnullo,
10Omajunullo tarnelingnut tamainut illipsingnêtunut, tingmianullo, nergjutinullo, nunablo ômajunginut tamainut najortapsingnut, illa, umiaᴋsoarmit anisimajunut ilûnamatsianginut, ômajut nallîlônêt nunamêtut illautilugit,
11Illipsingnut angerpunga, mattoma kingorngane uvinigit ilûnatik asserortauniarungnairtuksaungmatta ullitornivaksûb imaᴋsoanginut, mattomalo kingorngane ullitornivaksoaᴋarniarungnairtuksaungmat nunab asserortautiksanganik.
12Gûdelo oᴋarpoᴋ: Tamadja nallunaikutaksaᴋ, illipsingnut angerama ômajunullo tarnelingnut tamainut illipsingnêtunut, kingorlerpaujuksanut aglât:
13Ajagutaᴋotiga nuvujanut illivara; tâmna nallunaikutaksauvoᴋ, angerama nunamut.
14Nuvujaniglo saᴋᴋijârtitsilerangama nunab ᴋollâgut, ajagutaᴋotigalo takuksaulerangat nuvujane,
15Tagva angernera erᴋaumajomârpara, illipsingnut angerama ômajunullo tarnelingnut tamainut, uvinilingnut tamainut, mattoma kingorngagut ullitornivaksoaᴋarniarungnairtuksaungmat uvinigit ilûnatik asserortautiksanganik.
16Ajagutarlo nuvujanêtuksauvoᴋ, uvangalo takosarlugo erᴋaumajomârpara Gûdib angerninga soᴋᴋosijuitoᴋ ômajunut tarnelingnut tamainut, uvinilingnut nunamêtunut tamainut.
17Gûdelo oᴋarpoᴋ Noamut: Tamadja nellunaikutaksaᴋ angernimnut, uvinigit tamaitaᴋsuit nunamêtut angervigigapkit.
18Tamadja Noab erningit umiaᴋsoarmit anisimajut: Semelo Hamelo Jafetelo. Hamelo Kânaanib atâtagivâ.
19Pingasut tâpkoa Noab ernerivait, tâpkutigunalo nunaᴋsoaᴋ ilûnane inuᴋalerpoᴋ.
20Noale perorsêvilerilerpoᴋ, vaineliksatalingmiglo perorsêviliorpoᴋ.
21Vainemiglo imerame, âmaingavoᴋ, tupperminelo inangavoᴋ ᴋipiksimanane.
22Hamible, Kânaanib atâtangata, atâtame kangusûtinga takogamiuk, oᴋautigivâ ᴋattangutîngminut sillatânêtûngnut.
23Tagva Semib Jafetiblo ᴋipiksaᴋ tiguvâk tuimingnut illivlugo, tunungavlugolo ulligiartorpâk atâtamik kangusûtinga; kênâgiglo allaumavuk, atâtamik kangusûtinga takojomanago.
24Noale vainetornerminit tuppalerame tussarlarmelo illiorvionerminik ernerminut nukardlermut,
25Oᴋarpoᴋ: Ominarsijaule Kânaane; kivganut kivgaujuksauvoᴋ ᴋattangutimine.
26Amma oᴋarivoᴋ: Nakorijaule Nâlegaᴋ, Semib Gûdinga; Kânaanelo kivgaujuksauvoᴋ tâpsomunga.
27Gûdib Jafete kinguvâksaᴋartiliuk unuktunik, iniksaᴋartilugo Semib tupingine, Kânaanelo kivgaujuksauvoᴋ tâpsomunga.
28Noale ullitornivaksûb kingorngagut inôvoᴋ jârinik 350nik.
29Noable jâringit ilûnatik 950ovut; toᴋovorlo.
လက္ရွိေရြးခ်ယ္ထားမွု
Genesis 9: LIHB08
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Labrador Inuttitut Heritage Bible © Canadian Bible Society, 2008.