Genesis 7
7
Ullitornivaksoaᴋ.
1Nalekablo Noa oᴋautivâ: Umiaᴋsoarmut ikkilerit, igvit inuᴋotitillo ilûnatik idluartorigapkit sâmne kinguvarêt ukkua akornganne.
2Nergjutit ivsornaitut sunatuinait illanginik ilaurᴋojilerit illingnut, attunit aiparêngnik sepanik, nergjutillo ivsornartut illanginik attunit aiparêngnik atausingnik.
3Taimaktauᴋ tingmitjat ᴋilaub atânêtut illanginik, attunit aiparêngnik sepanik, kinguvâksaᴋarungnartut nungutaurᴋonagit nunaᴋsoarme ilûnâne.
4Uvlut sepat nâkpatta, uvlut 40 unnuallo 40 nâvlugit sillalurᴋojijomârpunga nunamut, nunamit pêjaromavlugit ômajut tamaita pingortitakka.
5Noable Gûdib perᴋojangit tamaita nâlatsiarlugit piniarutigivait.
6Noa jâreᴋarmat 600nik, ullitornivaksûb nuna tikkipâ.
7Noalo umiaᴋsoarmut ikkivoᴋ ernine nulianelo ernimelo nuliangit illagivlugit, ullitornivaksûb sivorngagut.
8Nergjutit ivsornaitut illangit, ivsornartullo illangit, tingmitjallo illangit, pâmgortullo nunamêtut ilûnatik illangit
9Illauvut Noamut umiaᴋsoarmut attunit aiparêklutik, sorlo Nâlekab Noa perᴋongmago.
10Uvlulle sepatt nâlermatta, ullitornivaksûb nuna tikkilerpâ.
11Noa jâreᴋarmat 600nik, taᴋᴋerub aipangata uvlungita sepasenangane, uvlorme tamattomane ittinersûb puilavingit ilûnatik aitangalerput ᴋilaublo igalângit ilûnatik angmalerput.
12Sillaluᴋarporlo nuname uvlut 40 unnuallo 40 nâvlugit.
13Uvlorme taipsomaneluatsiaᴋ Noa ikkivoᴋ umiaᴋsoarmut, Semelo, Hamelo, Jafetelo, ernine, nulianelo, ernimelo nuliangit pingasut illagivlugit.
14Taimaktauᴋ ômajut sunatuinait ingmikut pitjutilît, nergjutillo sunatuinait ingmikut pitjutilît, pâmgortullo sunatuinait pâmgorpaktut nuname ingmikut pitjutilît, tingmitjallo sunatuinait ingmikut pitjutilît, tingijungnartut ilûnatik, esaroᴋartut ilûnatik.
15Tâpkoa ilûnatik aiparêklutik ikkivut Noamut umiaᴋsoarmut, uvinilît ômanartomik anernelît ilûnatik illangit.
16Aiparêklutik ikkivut, uvinilît ilûnatik illangit, sorlo Gûdib perᴋongmago. Nâlegarlo pallangairsivoᴋ kingorngagut.
17Tagva ullitornivaksoaᴋ nunamut nelliutilerpoᴋ uvlut 40 nâvlugit, imaᴋsoarlo angijororlerpoᴋ, umiaᴋsoaᴋ pokilaktilugo ᴋangatartilugolo nunab ᴋânganit.
18Imaᴋsoarlo sugaluluarpoᴋ angijororlune nuname, umiaᴋsoarlo imaᴋsûb ᴋângagut ingergavoᴋ,
19Imaᴋsoarlo sugaluluarpoᴋ angijomik nuname, ᴋaᴋᴋaᴋsuit tamaita ᴋilaub atânêtut ulliklugit.
20Tallertut 15tut ittitigijomik imaᴋsoaᴋ sugaluluarpoᴋ ᴋaᴋᴋat ulliklugit.
21Tagva ippidlarput uvinilît ilûnamatsiatik aulajut nuname: tingmitjallo nergjutillo ômajullo pâmgortullo ilûnatik pâmgorpaktut nuname inuillo ilûnatik.
22Ilûnamatsiatik panertomêtut, ômanartomik anernermik anerterijut ᴋingâmikkut toᴋolerput.
23Taimak nunamêtut ilûnamatsiatik nungutauvut; inuillo nergjutillo pâmgortullo tingmitjallo ᴋilaub atânêtut, ilûnamatsiatik nunamit pêjartauvut. Noalo kissime amiakôvoᴋ umiaᴋsoarmioᴋatingillo.
24Imaᴋsoarlo sugaluluarpoᴋ nuname uvlut 150 nâvlugit.
လက္ရွိေရြးခ်ယ္ထားမွု
Genesis 7: LIHB08
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Labrador Inuttitut Heritage Bible © Canadian Bible Society, 2008.