युहन्ना 3
3
ईसु ने नीकुदेमुस
1यरुसलेम सहर मां नीकुदेमुस नावेन एक माणुस हतलु। चु यहुदी माणसेन एक पंचुन मुख्यु हतलु। चु फरीसी माणसे मायन हतलु। 2चु राते नीकुदेमुस ईसु धड़े आयु ने ईसु काजे कह्यु, “ए मास्तर, हामु जाणजे की तु भगवानेन्चां सी सीकाड़न्यु बणीन आवलु छे, काहाकी जत्यार लग भगवान पुठ्ये नी हय ती माणुस कुय बी असो वारलु कामेन सहलाणी नी देखाड़ सके, जसु तु वारलु कामेन सहलाणी देखाड़े।”
3ईसु नीकुदेमुस काजे कह्यु, “मे तुसेक छाची-छाची कह्वो की जत्यार लग कुय अळी पछु पयदा नी हवे तत्यार लग चु भगवानेन राज नी देख सके।”
4नीकुदेमुस ईसुक पुछ्यु, “काहनु बी माणुस डाहलु हय्न अळी पछु कसु पयदा हय सके? छाचलीन चु आपसी आयसीन कुख मां अळी पछु जाय्न, दीसरी कावा ते, नी पयदा हय सके।”
5ईसु नीकुदेमुस काजे कह्यु, “मे तुसेक छाचली-छाचली कहं, जत्यार लग काहनुक बी माणुस भगवानेन जीव-आत्मा अनसारे आपसा जीव-आत्मा मां पयदा नी हवे, तत्यार लग चु भगवानेन राज मां भराय नी सके। 6काहाकी जु कुय डील सी पयदा हयु च डील छे; ने जु कुय भगवानेन आत्मा सी पयदा हयु चु आत्मात छे। 7मे तुसेक जी वात कहं तुहुं आखा जीव-आत्मा मां पछा पयदा हवण्या छे, हीनी वातेक सामळीन तु घाबरायु मां। 8आहळी तींखुर जाणे लागे तींखुर जाय ने तु तेरी अवाज काजे सामळे ते खरु, बाकुन ची कां सी आवे, ने कां जाय, च तुसेक मालुम नी पड़े। जु-जु भगवानेन जीव-आत्माम सी पयदा हवलु छे, चु हीनी आहळीन तसुत छे।”
9जी वात सामळीन नीकुदेमुस ईसु काजे कह्यु, “ज असो कसों हय सके।”
10ईसु, नीकुदेमुस काजे कह्यु, “तु ईस्रायली माणसेन मास्तर छे, तेबी तुसेक जी वात पल्ले नी पड़ती काय? 11मे तुसेक छाचली-छाचलीन कह्वो हामु जे सरग वाळा छे, हामु ज जाणजे चत कहंजे ने हामु तीनाक देखला छे, तेरीत गवाय देजे, ने तुहुं माणसे हामरी गवाय काजे मान्ता काहनी। 12मे तुहुंक धरती पर हये ची वात देखाड़्यु, तेबी#3:12 प्रथ्वी तुहुं तीनी वात पर भुरसु नी कर्या, ने कदी मे तुहुंक सरगेम हये ची वात देखाड़ीस ती तुहुं कसा भुरसु करसु? 13सरग मां उपर कुय बी नी गुयो, हयु अतरुत गुयु, जु सरग सी आयु तेरो मतलब माणसेन पुर्यु जु सरग मां छे।”
14जसु मुसु माणसे काजे भगवानेन डंडेम सी बचाड़णे करीन उजाड़्या बयड़ा मां घड़सान मुरती बणायन खाम्बा पर टांगलु तसात माणसेन पुर्या काजे बी उपर चहड़ाय टांगसे ने असो हवणु जरुड़ी छे। 15जु काहनुक माणसेन पुर्या पर भुरसु करे, चु तेरेत साहरे अमर जीवाय हात करसे 16काहाकी भगवान ईनी कळीन पापी माणसे काजे अतरु परम कर्यु, की तेरु एकुत लाटेक्लु पुर्यु मरने करीन आप देदु, ने जु कुय तेरे पर भुरसु करे, चु खत्तम नी हवे बाकुन अमर जीवन हात करसे।
17भगवान आपसा पुर्या काजे ईनी कळी मां माणसेन नीयाव करीन डंड आप्णेन हुकुम आपजी करीन नी मकल्यु, बाकुन तेरेमां मकल्यु की कळी मायन माणसे हेरे साहरे छुटकारु हात करसे।
18ने जु काहनुक भगवानेन पुर्या ईसु पर भुरसु करे, तीनाक डंडेन हुकुम नी आपे; बाकुन जु कुय ईसु पर भुरसु नी करे, चु गुनावाळु गीणाय गुयलु छे, काहाकी चु भगवानेन एखला पुर्यान नाव पर भुरसु नी कर्यु। 19भगवान नीयावेन दाहड़े माणसे काजे डंडेन फेसलु जु सामळावसे की ईसु वीजाळो हय्न कळी मां आवलु, बाकुन माणसे काजे वीजाळो नी बाकुन आंदारला सी अदु परम राख्या, काहाकी तींद्रा काम भुंडात हतला। 20काहाकी जु कुय कुहराय करे, तीनाक वीजाळो गमे नी, ने तेरा कुहराय्न काम उजन्ता हय जासे करीन चु वीजाळा धड़े नी आवे। 21बाकुन जु कुय छाचली वातेन अनसारे चाल्या करे, चु जी हिम्मत करीन वीजाळा धड़े आवे, ने जे वारलु काम भगवानेन मदत सी करलु छे, चे काम, ने जी वात दीसरा अगळ उजन्ती हय जाणु चाहजे।
युहन्नु ईसु काजे बपतीस्मा आपे
22थुड़ाक दाहड़ा हय गुया ने अळी ईसु, आपसा चेला भेळतुत यरुसलेम सहर छुड़दीन यहुदीया जीलान दीसरा जागाम जाती रयु। ने चां चु तींद्रे पुठ्ये रय्न बपतीस्मा आपणे बाजी गुयु। 23तीनी टेमे चु युहन्नु बी सालेम सहर धड़े एनोन गांव मां पाणीन बपतीस्मा आपतेलु, काहाकी चां बेसको पाणी हतलो, ने माणसे आवीन बपतीस्मा लेदला। 24बपतीस्मा आपण्या युहन्ना काजे राजु हेरोदेस तीनी टेम लग जेल मां नी कुंडाड़्यु।
25चां युहन्नान चेला एक यहुदी माणसे साते चुखो करनेन रीतीन बारामां जखड़ी पड़्यु। 26ने चे युहन्नान चेला युहन्ना धड़े आवीन कह्या, “ए मास्तर, जु माणुस यरदन नदीन पली धड़े तारे पुठ्ये हतलु, ने तेरी तु गवाय देदलु, ने चु बपतीस्मा आपणे बाजी रयु, ने आखा माणसे तेरे धड़े जाय।”
27युहन्नु जपाप आप्यु, “काहना बी माणसेक सरग वाळु भगवान वाटु आपसे तीत असला सेवान काम जड़से। 28मे तुहुंक ज कय देदलु की, ‘मे मसी नी हय, बाकुन मसीन काम सुरु हवणेन पेहेल भगवान मेसेक मकेल्लु छे।’ ने तुहुं मारी हीनी वातेन गवा छे। 29नवली लाडी नवला लाडा धड़े रवे, बाकुन नवला लाडान खास दुस्तीदार, चु नवला लाडा धड़े हुबु रय्न तेरी सामळे चु तेरी वात सामळीन बेसकु खुस हय जाय। तसीत हय मारी खुसी पुरी हय गुय। 30ज जरुड़ी छे, की चु बड़तु जाय ने मे कम हवतु जाम।
ईसु मसी सरगे सी उतर्यु
31“जु उपर सी आवे, चु आखा सी मट्लु छे। ईसु अतरुत सरग वाळा भगवानेन्चां सी आयु, हेरेसी चु आखाम सी मट्लु छे, धरती सी छे, बाकुन चु धरती पर रवण्यु छे, चु धरतीन छे, ने धरती पर वाळान तसात वात करे 32ईसु ज काय चु देख्यु ने सामळ्यु, तेरीत गवाय देय; ने कुय तेरी गवाय नी माने। 33जु कुय ईसुन गवाय मान लेदु, चु ईनी वात पर छाप लागाड़ देदु की, भगवान छाचलु छे। 34काहाकी तीनाक भगवान मकेल्लु छे, चु भगवानेन वात कहें, काहाकी भगवान आत्मा अमर जीवाय आपलु छे। 35भगवान बास पुर्या सी परम करे, ने चु आखी चीज तेरा हात मां सुप देदु। 36जु भगवानेन पुर्या ईसु पर भुरसु करे, अमर जीवन तेरीत छे, बाकुन जु ईसुक नी माने, चु अमर जीवन काजे नी देखे, बाकुन भगवानेन रीस तेरे पर रहे ने तीनाक डंड जड़से ने जड़से।”
လက္ရွိေရြးခ်ယ္ထားမွု
युहन्ना 3: NTBSP23
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.