लूका 18
18
परमेस्वर अपणा लोगु की जरुर सुणलु
1अर यीशु न अपणा चेलों तैं हमेसा प्रार्थना करण का बारा मा अर हिम्मत नि छुड़ण का बारा मा बतौणु खुणि ऊंतैं एक उदारण सुणै। वेन ऊंकू बोलि कि, 2“एक नगर मा एक न्याय करण वळु रौन्दु छौ, जु कि परमेस्वर पर सरदा नि रखदु छौ। अर ना ही कै मनखि की इज्जत करदु छौ। 3अर वे नगर मा एक विधवा जनानि भि रौन्दी छै। अर वा वेमा बार-बार ऐके बुल्दी छै कि, ‘साब, मेरा बैरी बटि मेरु न्याय कैरिके मितैं बचावा।’ 4अर भौत दिनों तक उ वीं की बात टलणु रै, पर बाद मा वेन अपणा मन मा सोची कि, ‘नऽ त मि परमेस्वर पर सरदा रखदु अर ना ही कै मनखि की इज्जत करदु, 5मगर ईं विधवा को मितैं परेसान कैरिके रख्युं च, इलै मिन ईं को न्याय जरुर करण कखि इन नि हो की या विधवा बार-बार ऐके मेरा नाक मा दम कैरी द्यो, अर मेरु जीण हराम ह्वे जौ।’”
6तब प्रभु यीशु न चेलों कू बोलि, “अब ध्यान से सुणा, अर ये अधरमी न्याय करण वळा की ईं बात बटि सीखा? 7अर जब एक अधरमी न्याय करणु वळु इन कैरी सकदु, त क्या परमेस्वर अपणा चुण्यां लोगु को न्याय नि करलु? जु दिन-रात वेसे प्रार्थना करणा रौनदिन, क्या उ अपणा लोगु का खातिर देर करलु? 8नऽ रे ना, मि तुमतै बतै देन्दु कि परमेस्वर तुरन्त ऊंको न्याय जरुर करलु।
“पर अब बात या च कि जब मनखि को पुत्र आलु, त क्या उ धरती का लोगु मा बिस्वास पालु?”
फरीसी अर चुंगी लेण वळो को उदारण
9तब यीशु न ऊं लोगु खुणि जु खुद पर इन भरोसा रखदिन कि हम भौत धरमी छां, मगर दुसरा लोगु को तिरिस्कार करदिन। अर इन्द्रया लोगु खुणि ही यीशु न एक उदारण देके बोलि कि, 10“एक बार दुई मनखि मन्दिर मा प्रार्थना करणु कू गैनी, ऊंमा बटि एक फरीसी दल को मनखि अर दुसरो चुंगी लेण वळु छौ। 11अर फरीसी खड़ु ह्वेके अपणा मन मा इन प्रार्थना करण लगि गै कि, ‘परमेस्वर, मि तुमरो धन्यवाद करदु कि मि दुसरा लोगु का जन ठग, अधरमी, अर ना ही गळत सम्बन्ध रखण वळा का जन छौं, अर ना ही ये चुंगी लेण वळा का जन छौं। 12मि हप्ता मा दुई बार उपवास रखदु अर जु कुछ मितैं मिलदु, वांको दसुं हिस्सा चड़ौन्दु छौं।’ 13पर वे चुंगी लेण वळा न स्वर्ग जनै भि नि देखि, बल्किन दूर खड़ु ह्वेके अपणी छति भटगै-भटगै के बोलि, ‘परमेस्वर, मि एक पापि मनखि छौं मि पर दया कैरा।’”
14यीशु न ऊंकू बोलि, “मि तुमतै बतै देन्दु, कि यू फरीसी मनखि ना पर चुंगी लेण वळु मनखि धरमी ठैरैये गै अर घौर चलि गै। किलैकि जु कुई अफ तैं बड़ु बणालु उ छुटो किये जालु, अर जु अफु तैं दीन कैरिके छुटो बणालु वु बड़ु किये जालु।”
स्वर्ग को राज कै को च
(मत्ती 19:13-15; मर 10:13-16)
15अर फिर लोग अपणा बाल-बच्चों तैं यीशु का पास लैनि, कि उ ऊं पर अपणु हाथ रखी के आसीस द्यो। मगर यू देखि के चेला ऊंतैं झिड़कण लगि गैनी। 16पर वेन ऊं बच्चों तैं अफ जनै बुलै के बोलि, “बच्चों तैं मि मू औण द्या ऊंतैं रोका ना, किलैकि परमेस्वर को राज ऊंको ही च, जु यों बच्चों का जन छिन।” 17अर मि तुम बटि सच्चि बोन्नु छौं, जु कुई भि परमेस्वर का राज तैं एक छुटा बच्चा का जन स्वीकार नि करलु, वेन वे राज्य मा कभि भि नि जै सकण।
सेठ मनखि अर सदनि को जीवन
(मत्ती 19:16-30; मर 10:17-31)
18तब कै मुखिया न यीशु तैं पूछी, “गुरुजी, तुम अच्छा गुरु छाँ, मि इन्द्रयो कु जि काम कैरुं कि सदनि का जीवन को हकदार ह्वे जौ?” 19अर यीशु न वेकू बोलि, “तू मिकू अच्छु किलै बोन्नि छैई? परमेस्वर का अलावा कुई भि अच्छु नि च। 20तू आज्ञाओं तैं त जणदी ही छैई, #निर्ग 20:12-16‘दुसरि जनानियों का दगड़ा मा गळत सम्बन्ध नि रखी, हत्या नि कैरी, अर चोरी नि कैरी, झूठ्ठी गवै नि देई, अपणा ब्वे-बुबों को आदर-सम्मान कैरी।’” 21वेन बोलि, “गुरुजी, यों सब बातों तैं त मि बाळ्पन बटि मणदी औणु छौं।” 22अर यू सुणी के यीशु न वेकू बोलि, “त्वेमा अभि भि एक बात की कमी च। इन कैर कि जु कुछ भि त्वेमा च, ऊ सब कुछ बेचि दे अर वे बटि जु कुछ भि मिललु वु सब गरीबों मा बांटि दे, अर ऐके मेरु चेला बणि जा तब त्वेतै स्वर्ग मा खजानु मिललु।” 23जब वेन यू सुणी त उ भौत उदास ह्वे गै, किलैकि उ भौत बड़ु सेठ छौ। 24अर यीशु न देखि की मेरी बात तैं सुणी के यू उदास ह्वे गै तब यीशु न बोलि कि, “सेठ लोगु को परमेस्वर का राज मा दाखिल होण बड़ु कठिन च। 25मि तुम बटि बोन्नु छौं, कि एक ऊंट को स्यूण का छेद बटि निकळण सरल च, मगर सेठ मनखि को परमेस्वर का राज मा जाण बड़ु कठिन च।”
26अर जु लोग यीशु की बातों तैं सुनणा छा, ऊंन वेतैं पूछी, “गुरुजी, त फिर इन कैरिके कु बचि सकदु?” 27अर वेन बोलि, “जु मनखियों बटि नि ह्वे सकदु उ परमेस्वर बटि ह्वे सकदु च।” 28तब चेलों मा बटि पतरस न बोलि, “गुरुजी देखा, हम त अपणु सब कुछ छोड़ि के तुमरा पिछनै ह्वे ग्यां।” 29अर यीशु न ऊंकू बोलि, “मि तुम बटि सच्चि बोन्नु छौं कि, वु सभि लोग जौन परमेस्वर का राज का बानो अपणु घौर, अपणी घरवळी या अपणा भै-बैंणो या अपणा ब्वे-बबों या अपणा बाल-बच्चों तैं छुड़यूं च, 30वु ये जमना मा भौत जादा पाला, अर औण वळा युग मा ऊ सभि सदनि का जीवन तैं भि पाला।”
अपणी मौत का बारा मा यीशु की तिसरी भविष्यबाणी
(मत्ती 20:17-19; मर 10:32-34)
31फिर यीशु न अपणा बारह चेलों तैं अलग मा लि जैके बोलि, “सुणा, हम लोग यरूशलेम नगर जाणा छां, अर जु-जु बात मनखि का पुत्र का बारा मा परमेस्वर का रैबर्यों की लिखीं छिन, वु सब पूरि होलि। 32किलैकि ऊ वेतैं ऊं लोगु का हवाला करला जु कि यहूदी जाति का नि छिन, ताकि वु वेको मजाक उड़ा अर वेका दगड़ा मा गळत बरतौ कैरा, अर वे पर थुकला, 33अर ऊ वे पर कोड़ा मरला, इख तक की जान से मार द्याला, पर उ तिसरा दिन ज्यून्दु ह्वे जालु।” 34अर जौं बातों तैं यीशु बोन्नु छौ, ऊ बात वु नि समझ सकिनी। अर यों बातों को मतलब ऊं बटि छिप्यूं रै, इलै या बात चेलों का समझ मा नि ऐ।
अन्धा भिकारी तैं खूब करण
(मत्ती 20:29-34; मर 10:46-52)
35जब यीशु अर वेका चेला यरीहो नगर का नजदीक पौंछिनी, त उख एक अन्धु मनखि सड़क का किनरा बैठि के भीक मंगणु छौ। 36जब वे अन्धा मनखि न भीड़ की आवाज सुणी, त उ पूछण लगि गै, “अरे, इख क्या होणु च?” 37लोगु न वेकू बोलि, “नासरत गौं को यीशु जाणु च।” 38अर यू सुणी के वेन जोर से बोलि कि, “हे राजा दाऊद का वंशज यीशु, मि पर दया कैर।” 39अर जु अगनै-अगनै जाणा छा ऊं लोगु न झिड़की के बोलि, चुप रौ। मगर उ और भि जादा चिल्लै के बोन्न लगि गै, “हे दाऊद का वंशज, मि पर दया कैर।” 40तब यीशु रुकी गै अर वेन आज्ञा दिनी, कि वेतैं मेरा पास लेके आ। अर जब उ मनखि नजदीक ऐ त यीशु न वेतैं पूछी, 41“तू क्या चान्दी, कि मि त्वे खुणि कैरुं?” अर वेन बोलि, “प्रभु, मि चान्दु, कि मि फिर से दिखण लगि जौ।” 42अर यीशु न वेकू बोलि, “दिखण लगि जा, तेरा बिस्वास न त्वेतै खूब कैरियाली।” 43अर उ तुरन्त दिखण लगि गै, अर परमेस्वर की बडै करद-करद यीशु का पिछनै चलण लगि गै। अर यू काम देखि के सब लोग परमेस्वर को गुणगान करण लगि गैनी।
လက္ရွိေရြးခ်ယ္ထားမွု
लूका 18: GBM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active) Wycliffe Bible Translators, Inc. All rights reserved.