यूहन्ना 3
3
यीशु अर नीकोदिमुस
1फरीसी दल का लोगु मदि नीकोदिमुस नौ को एक मनखि छौ, जु कि यहूदियों को एक मुखिया छौ। 2उ एक रात यीशु का पास ऐ अर बोलि, “गुरुजी, हम जणदा छां, कि तुम परमेस्वर की तरफा बटि गुरु ह्वेके अयां छाँ, किलैकि जौं चमत्कारिक कामों तैं तुम करद्यां, यू सिरफ उई कैरी सकदु जैका दगड़ा मा परमेस्वर हो।” 3तब यीशु न वेतैं जबाब देई, “मि तुम से सच्चि बोन्नु छौं, जबरि तक कुई नई रीति बटि जनम नि ल्यालु, तबरि तक कुई भि परमेस्वर का राज तैं देखि नि सकदु।” 4तब नीकोदिमुस न वेकू बोलि, “मनखि जब बुढ्या ह्वे जान्दु, त उ फिर कनकै जनम ले सकदु? क्या उ दुबरा अपणी माँ की कोख मा वापिस जैके दुसरि दौं जनम ले सकदु च?” 5अर यीशु न बोलि, “मि तुम से सच्चि बोन्नु छौं, कि जबरि तक कुई मनखि पाणि अर पवित्र आत्मा से जनम नि ल्यालु, तबरि तक उ परमेस्वर का राज मा दाखिल नि ह्वे सकदु। 6जु मनखि सरील बटि जनम लेन्दु, उ त सरील च, पर जु पवित्र आत्मा बटि जनम लेन्दु, उ आत्मा#3:6 इख मा यीशु को बोन्न को मतलब इन च कि वेको आत्मिक जीवन मा जनम ह्वे जान्दु च। 7अर तुम ईं बात पर ताजुब नि कैरा, कि मिन तुमकु इन बोलि कि, ‘तुमतै नई रीति बटि जनम लेण जरुरी च।’ 8किलैकि हवा जनै चान्दी उनै जान्दी अर तुम बस वीं की आवाज सुणद्यां, पर नि जणद्यां कि वा कनै बटि औणी अर कख कू जाणि च। ठिक उन्नि हरेक मनखि जु पवित्र आत्मा बटि जनम ल्युन्दु उ भि इन्द्रयो ही च।”
9तब नीकोदिमुस न वे बटि बोलि, “गुरुजी, इन कनकै ह्वे सकदु?” 10अर यीशु न वेकू बोलि, “तुम त इस्राएली लोगु का गुरु छाँ, फिर भि यों बातों तैं नि समझद्यां? 11अर मि तुम सच्चि ही बोन्नु छौं, कि हम जु जणदा छां, उई बुल्द्यां, अर जु हमुन देखि च, वेकी गवै देन्दा छां, पर तुम हमरि गवै तैं स्वीकार नि करद्यां। 12अर जब मिन तुमतै ईं दुनियां की बात बतैनि त तुम बिस्वास नि कैरी, अगर मि तुमतै स्वर्ग की बात बतौलु त फिर कनकै बिस्वास करिल्या। 13अर कुई भि स्वर्ग मा नि गै पर केवल उई स्वर्ग मा गै जु कि स्वर्ग बटि ऐ, याने कि मनखि को पुत्र। 14अर जै ढंग से मूसा#3:14 निर्जन जगा मा जब परमेस्वर न इस्राएली लोगु तैं भौत गुरौ भेजि के दण्ड देई छौ। तब परमेस्वर की आज्ञा का मुताबिक मूसा न पितळा गुरौ तैं ऊँचा पर उठे, अर जथगा भि लोगु न वे पितळा का गुरौ तैं देखि वु सब बचि गैनी (गिन 21:4-9)। न निर्जन जगा मा पितळा का गुरौ तैं ऊँचा पर चड़ै छौ, ठिक उन्नि जरुरी च कि मनखि का पुत्र तैं भि ऊँचा#3:14 इख मा यीशु इन बतौणु च कि क्रूस पर चड़ै जौ। पर चड़ै जौ। 15ताकि जु कुई भि वे पर बिस्वास करलु, वेतैं सदनि को जीवन दिये जौ। 16किलैकि परमेस्वर न दुनियां बटि इथगा प्यार कैरी, कि वेन अपणु इकलौतु पुत्र दे दिनी ताकि जु कुई वे पर बिस्वास कैरो, उ नास ना हो बल्किन मा सदनि को जीवन पौ। 17परमेस्वर न अपणा पुत्र तैं इलै नि भेजि कि उ दुनियां का लोगु को न्याय कैरो, बल्किन मा वेन अपणा पुत्र तैं दुनियां का लोगु तैं बचौणु खुणि भेजि।
18“अर जु कुई भि वे पुत्र पर बिस्वास करदु, उ दोषी नि ठैरैये जालु, पर जु बिस्वास नि करदु, उ दोषी ठैरैये गै। किलैकि वेन परमेस्वर का इकलौता पुत्र पर बिस्वास नि कैरी। 19अर दोष लगौण को कारण यू च, कि उज्याळु ईं दुनियां मा ऐ, पर मनखियों न उज्याळा बटि ना बल्किन मा अन्धेरा तैं खूब माणी, किलैकि ऊंका काम बुरा छा। 20किलैकि जु कुई बुरा काम करदु, उ उज्याळा बटि खार खान्दु अर उज्याळा का नजदीक नि औन्दु, अर इन वु इलै करदु ताकि वेका बुरा काम लोगु का समणि परगट नि ह्वे जा। 21पर जु सच्चै का बाटा पर चलदु, उ उज्याळा का समणि औन्दु, ताकि इन परगट ह्वे जौ कि वेका काम परमेस्वर की मनसा से होनदिन।”
यूहन्ना की यीशु का बारा मा दुसरि दौं गवै
22येका बाद यीशु अर वेका चेला यहूदिया का मुलक मा ऐनी। अर उ उख ऊंका दगड़ा मा रै के बपतिस्मा देण लगि गै। 23अर यूहन्ना भि शालेम नगर का नजदीक ऐनोन नौ की जगा मा बपतिस्मा देन्दु छौ। किलैकि उख बिजांम पाणि छौ, अर लोग ऐके बपतिस्मा लेन्दा छा। 24(अर तब तक त यूहन्ना तैं जेलखाना मा नि डळै गै छौ)।
25फिर एक दिन एक यहूदी मनखि को यूहन्ना का चेलों का दगड़ा मा शुद्धिकरण का खातिर बहसबाजी ह्वे। 26अर ऊंन यूहन्ना का पास ऐके वेकू बोलि, “गुरुजी, जु मनखि यरदन गाड का वे छाला तुमरा दगड़ि छौ, अर जैका बारा मा तुमुन गवै दे छै, उ बपतिस्मा देणु च, अर सब मनखि वेका पास जनदिन।” 27तब यूहन्ना न बोलि, “जबरि तक मनखि तैं परमेस्वर#3:27 कुछ कागज्दों मा “स्वर्ग की तरफा बटि” लिख्यूं च। की तरफा बटि नि दिये जौ, तबरि तक उ कुछ नि पै सकदु। 28मिन बोलि छौ कि, ‘मि मसीह नि छौं पर वेसे पैलि भेज्यूं ग्यों।’ अर ईं बात मा तुम खुद ही मेरा गवा छाँ। 29अर ब्यौला उ च जैतैं ब्यौलि मिलदी च, पर ब्यौला को खास दगड़्या जु कि वेका समणि खड़ु ह्वेके वेकी सुणदु। अर उ ब्यौला की आवाज सुणी के बिजांम खुश होन्दु, ठिक उन्नि मेरी खुशी को भि कुई ठिकाणु नि च। 30अर यू जरुरी च, कि यीशु बढ़ो अर मि घटु।
31“अर जु स्वर्ग#3:31 कुछ कागज्दों मा इख मा “मथि बटि” लिख्यूं च। बटि औन्दु उ सभ्यों मदि महान च। अर जु दुनियां बटि औन्दु उ दुनियां को ही च, अर दुनियां की ही बात तैं बुल्दु, पर जु स्वर्ग बटि औन्दु उ सभ्यों मदि महान च। 32अर जु कुछ भि वेन देखि अर सुणी च, वेका बारा मा उ गवै देन्दु, पर कुई भि वेकी गवै तैं स्वीकार नि करदु। 33अर जैन भि वेकी गवै तैं स्वीकार कैरी, वेन छाप लगै के इन परमाण दियाली की परमेस्वर सच्चु च। 34किलैकि जैतैं परमेस्वर न भेजि, उ त केवल परमेस्वर की ही छुईं करदु। अर इन वु इलै करदु किलैकि परमेस्वर वेतैं पवित्र आत्मा भरपूरी से देन्दु। 35अर पिता अपणा पुत्र से प्यार करदु, अर वेन सब कुछ वेका हाथों मा सौंप्याली। 36अर जु कुई वे पुत्र पर बिस्वास करदु, वेतैं ही सदनि को जीवन मिलदु। अर जु कुई पुत्र पर बिस्वास नि करदु, वेतैं जीवन नि मिललु, बल्किन मा परमेस्वर को परकोप वे पर पोड़दु।”
လက္ရွိေရြးခ်ယ္ထားမွု
यूहन्ना 3: GBM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active) Wycliffe Bible Translators, Inc. All rights reserved.