यूहन्ना 18
18
यीशु को पकड़वै जाण
(मत्ती 26:47-56; मर 14:43-50; लूका 22:47-53)
1अर इन प्रार्थना करण का बाद यीशु अपणा चेलों का दगड़ा मा किद्रोन नौ का एक गदेरा तैं पार कैरिके दुसरि तरफा गै। उख एक बगिचा छौ अर यीशु अर वेका चेला वे बगिचा मा गैनी। 2अर वेतैं पकड़ौण वळा यहूदा तैं भि ईं जगा का बारा मा पता छौ। किलैकि यीशु जादातर अपणा चेलों का दगड़ा मा उखि जान्दु छौ।
3तब यहूदा, रोमी सिपयों को एक दल तैं, अर मुख्य पुरोहितों अर फरीसी दल का लोगु की तरफा बटि भेज्यां मन्दिर का पैरादारों तैं लेके ऐ। अर ऊंका हाथों मा लालटेन, मसाल अर हथियार भि छा। 4तब यीशु ऊं सब बातों तैं जाणि गै, कि वेका दगड़ा मा क्या-क्या होण वळु च। इलै उ अगनै ऐ अर ऊंकू बोलि, “तुम कैतैं खुज्याणा छाँ?” 5तब ऊंन वेकू बोलि, “नासरत गौं का यीशु तैं।” यीशु न ऊंकू बोलि, “उ मि ही छौं।” तब यीशु तैं पकड़ौण वळु यहूदा भि ऊंका दगड़ा मा उखि खड़ु छौ। 6जब यीशु न इन बोलि, कि “उ मि ही छौं,” तब ऊ पिछनै हटि गैनी अर भूयां मा फरके गैनी।
7तब यीशु न ऊंतैं फिर से पूछी, “तुम कैतैं खुज्याणा छाँ।” ऊंन बोलि, “नासरत गौं का यीशु तैं।” 8यीशु न ऊंतैं जबाब देई, “मिन त तुमतै बतैयालि, कि मि उई छौं। अगर जु तुम मितैं ही खुज्याणा छाँ, त यों तैं जाण द्या।” 9अर यू सब इलै ह्वे ताकि उ वचन पूरु हो, जु यीशु न एक बार बोलि छौ। अर वु इन च कि,
#
यूहन्ना 6:39; 17:12 “जु लोग तुमुन मि मा सौंप्यां छिन,
ऊंमा बटि मिन एक तैं भि नि हरचै।”
10तब शमौन पतरस मा एक तलवार छै। अर वेन वींतैं निकाळि के महा पुरोहित का नौकर पर चलै के वेको देणु कन्दूड़ उड़ै दिनी। अर वे नौकर को नौ मलखुस छौ। 11तब यीशु न पतरस कू बोलि, “अपणी तलवार तैं म्यान मा रखी दे। किलैकि जु कटोरा#18:11 जु दुख भुगणु खुणि पिता न मितैं दियूं च, क्या मि वेतैं नि भोगु? पिता न मितैं दियूं च, क्या मि वेतैं नि प्यों?”
यीशु तैं महा पुरोहित हन्ना मा लि जाण
12तब सैनिको न अर ऊंका सुबेदार न अर यहूदियों का मन्दिर का पैरादारों न यीशु तैं पकड़ी के बान्धि दिनी। 13फिर ऊ पैलि वेतैं पुरणा महा पुरोहित हन्ना मा लेके गैनी, किलैकि उ वे बगत का महा पुरोहित याने कि काइफा को ससुर छौ। 14अर यू उई काइफा छौ, जैन यहूदियों का मुख्यों तैं इन सला देई छै कि, #यूहन्ना 11:50“हमरा सभि लोगु खुणि एक ही मनखि को मुरण अच्छु च।”
पतरस को यीशु तैं नकरण
15अर जब वु यीशु तैं पकड़ी के लि जाणा छा, तब शमौन पतरस अर एक और चेला भि यीशु का पिछनै-पिछनै गैनी। अर यू चेला महा पुरोहित को जाण-पछ्याण को छौ। इलै उ भि यीशु का दगड़ा मा महा पुरोहित का चौक तक पौंछी सैकी। 16पर पतरस भैर द्वार का ही समणि खड़ु रै। तब उ दुसरो चेला, जु महा पुरोहित की जाण-पछ्याण को छौ भैर ऐ, अर द्वार पर पैरा देण वळी जनानि का दगड़ा मा बात कैरिके पतरस तैं अफ दगड़ा भितर लि गै। 17तब पैरा देण वळी जनानि न पतरस कू बोलि, “कखि तू भि वे मनखि का चेलों मा बटि त नि छैई?” वेन बोलि, “ना, मि नि छौं।”
18अर उबरि ठण्ड भौत होणी छै, इलै नौकरों न अर मन्दिर का पैरादारों न क्वेला धदगै के ऊ सब आग तपणा छा। अर पतरस भि खड़ु ह्वेके ऊंका दगड़ा मा आग तपणु छौ।
हन्ना का द्वारा यीशु की पूछताछ
19तब महा पुरोहित हन्ना न यीशु बटि वेका चेलों का बारा मा अर वेका दियां उपदेस का बारा मा पूछताछ कैरी। 20तब यीशु न वेतैं जबाब देई, “मिन सब लोगु का समणि खुलाआम बात करिनी। अर जख सब यहूदी लोग जमा होनदिन, जन कि प्रार्थना भवनों अर मन्दिर मा भि उपदेस देई। अर मिन लुकि-छिपी के कुछ भि नि बोलि। 21फिर तुम मि बटि किलै पूछणा छाँ? ऊंतैं पूछा जौन मेरु उपदेसों तैं सुणी, कि मिन ऊंमा क्या-क्या बोलि। किलैकि वु जणदा छिन, कि मिन क्या-क्या बोलि।”
22जब यीशु न इन बोलि, तब मन्दिर का एक पैरेदार न जु कि उखम खड़ु होयुं छौ, वेन वे पर थप्पड मारी अर बोलि, “तू महा पुरोहित तैं इन्द्रयो जबाब किलै देणी?” 23तब यीशु न वेकू बोलि, “अगर मिन कुछ गळत बात बोलि त मेरी गळती भि बतै दे, पर अगर जु मिन ठिक बोलि त तू मितैं किलै मरणी छैई?”
24तब हन्ना न यीशु तैं उन्नि बन्धयां महा पुरोहित काइफा का पास भेज दिनी।
पतरस को यीशु तैं दुसरि दौं नकरण
(मत्ती 26:71-75; मर 14:69-72; लूका 22:58-62)
25अर जब शमौन पतरस खड़ु ह्वेके आग तपणु छौ, तब ऊं लोगु न वेतैं पूछी, “कखि तू भि वेका चेलों मा बटि त नि छैई?” तब वेन इनकार कैरिके बोलि, “ना, मि नि छौं।”
26अर महा पुरोहितों का नौकरों मा बटि एक उख छौ, अर यू वे नौकर को रिश्तेदार छौ, जैको कन्दूड़ पतरस न उड़ेयेलि छौ। तब ये नौकर न पतरस कू बोलि, “क्या मिन त्वेतै वेका दगड़ा बगिचा मा नि देखि छौ?” 27अर पतरस न अबरि दौं भि इनकार कैरी दिनी। अर #यूहन्ना 13:38तबरि मैर बासी गै।
गवर्नर पिलातुस का समणि यीशु
(मत्ती 27:1,2,11-14; मर 15:1-20; लूका 23:1-25)
28तब रात खुलण का बगत ऊ लोग यीशु तैं काइफा का इख बटि रोमी गवर्नर पिलातुस का राजमहल मा लि गैनी। अर ऊ यहूदी लोग खुद राजमहल का भितर नि गैनी, किलैकि कखि ऊ अशुद्ध#18:28 यहूदी रीति का मुताबिक अगर कुई मनखि ऊं लोगु का घौर मा चलि जौ जु यहूदी जाति का नि छिन, त उ अशुद्ध ह्वे जान्दु तब उ फसह का त्योवार को खाणु नि खै सकदु, अर ना ही परमेस्वर की भक्ति कैरी सकदु। नि ह्वे जा, अर फसह को त्योवार को खाणु नि खै सैका। 29इलै पिलातुस न भैर ऐके ऊंतैं पूछी कि, “तुम ये मनखि पर कै बात को दोष लगौणा छाँ?” 30तब ऊंन वेतैं जबाब देई, “अगर यू मनखि अपराधि नि होन्दु, त हम येतैं तुमरा सुपुर्द नि करदा।” 31तब पिलातुस न ऊंकू बोलि, “तुम येतैं लि जा, अर अपणा नियम-कानूनों का मुताबिक येको न्याय कैरा।” यां पर यहूदी मुख्यों न वेकू बोलि, “हम मा यू अधिकार नि च कि कैतैं भि मौत#18:31 रोमी सासन का मुताबिक क्रूस पर चड़ौणु को अधिकार यहूदी लोगु का पास नि छौ। की सजा दे सैका।” 32अर यू इलै ह्वे, किलैकि यीशु न जु वचन अपणा चेलों मा बोलि छौ, उ पूरु ह्वे जौ कि वेकी #मत्ती 20:18-19; मर 10:33-34; लूका 18:32-33मौत कनकै होण। अर इन बोलि के वेन अपणा चेलों तैं पैलि ही संकेत दियाली छौ।
33तब पिलातुस फिर से राजमहल का भितर गै, अर यीशु तैं बुलै के वेतैं पूछी, “क्या तू यहूदियों को राजा छैई?” 34तब यीशु न बोलि, “क्या तुम ईं बात तैं अपणी तरफा बटि बुलणा छाँ, या मेरा बारा मा तुमतै औरु न बतै?” 35तब पिलातुस न जबाब देई, “मि यहूदी थुड़ी नि छौं? तेरा ही लोगु न अर मुख्य पुरोहितों न त्वेतै मेरा सुपुर्द कैरी, पर तू मितैं इन बतौ कि तिन इन्द्रयो क्या कैरी?” 36तब यीशु न जबाब देई, “मेरु राज ईं दुनियां को नि च। अर अगर जु मेरु राज ईं दुनियां को होन्दु, त मेरा सेवक लड़ै करदा, कि मि यहूदियों का हाथों मा पकड़वै नि जान्दु पर मेरु राज ईं दुनियां को नि च।”
37तब पिलातुस न यीशु तैं पूछी, “त क्या फिर तू राजा छैई?” वेन जबाब देई, “तुम ठिक ही बोन्ना छाँ, कि मि राजा छौं, अर मि त इलै ही जनमियूं अर ईं दुनियां मा मि इलै अयूं, कि सच्चै का बारा मा लोगु तैं बतौ। अर हरेक जु सच्चै का छिन, ऊ मेरी आवाज तैं सुणदिन।” 38तब पिलातुस न वे बटि पूछी, “वा सच्चै क्या च?”
यीशु तैं मौत की सजा दिये जाण
(मत्ती 27:15-31; मर 15:6-20; लूका 23:13-25)
अर इन बोन्न का बाद पिलातुस फिर से यहूदियों का मुख्यों का पास भैर ऐ, अर ऊंकू बोलि, “मिन त वे मनखि मा कुई भि खोट नि पै। 39पर तुमरो त इन रिवाज च, कि फसह का त्योवार पर मि तुम खुणि एक कैदी तैं छोड़ि द्यूं। त क्या तुम इन चन्द्यां, कि मि तुम खुणि यहूदियों का राजा तैं छोड़ि द्यूं?” 40तब ऊंन फिर से चिल्लै-चिल्लै के बोलि, “ये मनखि तैं ना, पर हम खुणि बरअब्बा तैं छोड़ि दे।” पर वु बरअब्बा त एक डाकु छौ।
လက္ရွိေရြးခ်ယ္ထားမွု
यूहन्ना 18: GBM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active) Wycliffe Bible Translators, Inc. All rights reserved.