खास चेलों 7
7
स्तिफनुस को भासण
1तब महा पुरोहित न स्तिफनुस बटि पूछी, “तेरा बारा मा बुलिं यू सब बात सच्च छिन क्या?”
2अर स्तिफनुस न जबाब दिनी, “हे मेरा भैयों अर दाना-स्यांणा लोगु, मेरी बातों तैं ध्यान से सुणा, जब हमरु पितर अब्राहम हारान नगर मा रौणु कू गै छौ, वेसे पैलि उ मेसोपोटामिया का मुलक मा छौ। अर उख हमरा महान परमेस्वर न वेतैं अपणु दरसन दिनी। 3अर वेकू बोलि कि,
#
उत्पति 12:1
“‘अब्राहम तू अपणा रिश्तेदारों अर अपणा देस तैं
छोड़ि के वे देस मा चलि जा, जु मि त्वेतै दिखौलु।’
4“तब #उत्पति 11:31अब्राहम अपणा पिता का दगड़ा मा कसदियों का मुलक बटि निकळि के हारान नगर मा रौण लगि गै, अर वेका बुबा की मौत का बाद परमेस्वर न वेतैं उख बटि निकळणे की आज्ञा दिनी। अर उ उख बटि निकळि के ये देस मा रौणु कू ऐ गै जख अब तुम रौणा छाँ। 5मगर परमेस्वर न वेतैं ये मुलक मा कुछ भि हिस्सा नि दिनी, इख तक कि थुड़ी सि जमीन भि ना। पर परमेस्वर न वे बटि #उत्पति 13:14-15करार कैरी, कि मि यू देस त्वेतै अर तेरी औण वळी पीढ़ी का लोगु तैं दे द्यूलु, अर वे बगत वेकी कुई भि आस-औलाद नि छै। 6अर परमेस्वर न वेकू बोलि कि, #उत्पति 15:13 ‘तेरु वंश कै दुसरा देस मा परदेसी ह्वेके रालु, अर वे देस का लोग तेरा वंश का लोगु तैं चार सौ साल तक गुलाम बणै के रखला, अर ऊंतैं भौत सताला।’ 7पर परमेस्वर न इन भि बोलि छौ कि, #उत्पति 15:14‘जु लोग ऊंतैं गुलाम बणाला, ऊंतैं मि दण्ड द्यूलु वु लोग वे देस बटि निकळि के ऐ जाला अर ईं जगा मा ऐके मेरी सेवा करला।’ 8अर परमेस्वर न अब्राहम का दगड़ा मा समझौता कैरी अर खतना करण वेकू एक चिन्न छौ। इलै जब #उत्पति 21:2-4इसहाक को जनम ह्वे, त अब्राहम न आठवां दिन मा इसहाक को खतना करवै। अर फिर इसहाक को नौनु याकूब ह्वे अर याकूब का बारह बच्चा ह्वेनि, #उत्पति 17:10अर ऊंन भि इन्नि करवै। अर यों बच्चों का द्वारा ही बारह गोत्र ह्वेनि, अर ऊ सब हमरा पितर छा अर ऊं मदि यूसुफ एक छौ।
9“अर हमरा पितर यूसुफ का ग्यारा भै वे बटि खिरस्योन्दा छा, इलै ऊंन वेतैं मिस्र देस का लोगु तैं गुलाम होणु खुणि बेचि दिनी। मगर परमेस्वर वेका दगड़ा मा छौ, 10अर वेन पितर यूसुफ तैं वेकी सब मुसीबतों से बचै। अर परमेस्वर न मिस्र का राजा फिरौन की नजर मा यूसुफ तैं होसियार ठैरै, अर राजा तैं यूसुफ की अकल की बात पसन्द ऐनी। तब राजा फिरौन न वेतैं अपणा पूरा रजवाड़ा को मुखिया अर मिस्र देस को अधिकारी ठैरै दिनी।
11“अर जौं दिनों मा मिस्र अर कनान का पूरा देसों मा अकाळ पोड़ि गै अर सब पर बड़ी विपदा ऐ गै, अर हमरा पितरों तैं खाणु नि मिली। 12अर जब याकूब न यू सुणी की मिस्र मा अनाज च, त वेन अपणा नौनो तैं उख भेजि अर इन कैरिके हमरा पितर पैलि बार मिस्र देस मा गैनी। 13अर कुछ दिनों का बाद जब ऊ दुबरा मिस्र मा गैनी, त यूसुफ न अपणा बारा मा सब कुछ अपणा भैयों तैं बतै दिनी। तब यूसुफ का परिवार का बारा मा फिरौन तैं भि पता चलि गै। 14तब यूसुफ न अपणा बुबा याकूब तैं अर अपणा पूरा कुटुम्ब तैं मिस्र देस मा कैतैं भेजि के अपणा इख बुलै दिनी, अर ऊ लोग की गिनती पिचत्तर छै। 15तब याकूब मिस्र देस मा रौण लगि गै अर वे ही देस मा मोरि गै, अर हमरा और पितर भि उखि मुरिनी। 16अर हमरा पितरों की लांशों तैं मिस्र बटि कनान देस का शकेम नगर मा लेके ऐनी, अर हमरा पितरों तैं इख दफनये गै। अर या कबर हमरा पितर #उत्पति 23:16-18; 50:13अब्राहम न हमोर का नौनो बटि चांदी का सिक्का देके खरीदी छै।
17“अर जु करार परमेस्वर न अब्राहम का दगड़ा मा कैरी छौ, जब वेको पूरु होण को बगत नजदीक औण लगि गै, तब तक मिस्र देस मा हमरा पितरों की संख्या भौत जादा ह्वे गै छै। 18अर भौत सालों बाद मिस्र देस मा एक-दुसरो राजा बणि, जु कि यूसुफ तैं जणदु नि छौ। 19अर ये नया राजा न हमरा पितरों का दगड़ा मा बिस्वासघात कैरी अर ऊंका दगड़ा मा भौत गळत ब्यौहार कैरी, वेन ऊंतैं इथगा मजबूर कैरी कि ऊंन अपणा नवजात बच्चों तैं मुरणु खुणि भैर छोड़ दिनी ताकि वु मोरि जा।
20“अर जब यू सब होणु छौ, त ऊं दिनों मा ही परमेस्वर का रैबर्या मूसा को जनम ह्वे। अर मूसा परमेस्वर की नजर मा सुन्दर छौ, अर तीन मैना तक वेका घौर वळो न वेकी देखभाल कैरी। 21पर जब वेका घौर वळो न वेतैं छोड़ दिनी, त फिरौन राजा की नौनि तैं उ मिली अर वींन वेतैं उठे अर अपणु नौनु समझि के वेको पालन-पोसण कैरी। 22अर मूसा तैं मिस्र देस की हरेक विद्या को ज्ञान दिये गै, अर वु बुलण मा अर हरेक करम तैं करण मा भि जबरदस्त छौ। 23अर जब मूसा चालीस साल को ह्वे, त वेका मन मा यू विचार ऐ कि मि अपणा इस्राएली भै-बन्दों बटि मिली के औन्दु।
24“एक दिन मूसा न देखि, कि एक मिस्री मनखि एक इस्राएली भै का दगड़ा मा बुरु ब्यौहार कनु च, त वेन वेतैं बचै अर वे मिस्री तैं जान से मारी दिनी, अर इन के वेन वे इस्राएली भै का दगड़ा मा होयां जुलम को बदला लेई। 25अर मूसा न सोची, कि वेकी जाति का लोग समझि जाला कि परमेस्वर वेका द्वारा इस्राएली लोगु तैं मिस्री लोगु का हाथों से आजाद करौण चान्दु, मगर वु लोग नि समझिनी।
26“अर कैं हैंका दिन मूसा न देखि कि दुई इस्राएली लोग आपस मा झगड़ा कना छिन, त उ ऊंका पास गै। अर ऊं लोगु का बीच मा मेल-जोल करण की कोसिस कैरी अर बोलि, ‘तुम त भै-भै छाँ त अपणा आपस मा झगड़ा किलै कना छाँ?’ 27पर जु मनखि दुसरा का दगड़ा मा मार करणु कू जाणु छौ वेन मूसा तैं धक्का देके बोलि, ‘त्वेतै कैन हमरु अधिकारी अर न्याय करण वळु बणै? 28जन तिन ब्याळि वे मिस्री तैं मार दिनी, क्या तू उन्नि मितैं भि मरण चाणि छैई?’ 29अर या बात सुणी के मूसा मिस्र देस बटि गौळ ह्वे गै, अर मिधान देस मा परदेसीयों की तरौं रौण लगि गै। अर उख वेका दुई नौना ह्वेनि।
30“अर जब मूसा तैं मिधान देस मा चालीस साल ह्वे गैनी, त एक दिन सीनै पाड़ की एक निर्जन जगा पर एक स्वर्गदूत न मूसा तैं जगदी झाड़ि की लपटो मा दरसन दिनी। 31अर यू सब देखि के वु ताजुब करण लगि गै अर करीब से दिखणु खुणि वेका और नजदीक गै, कि तबरि प्रभु की आवाज ऐ, 32‘मूसा, मि तुमरा पितर अब्राहम को परमेस्वर, इसहाक को परमेस्वर, अर याकूब को परमेस्वर छौं।’ तब मूसा परमेस्वर की डौऽर से कौंपण लगि गै, अर वेकी हिम्मत नि ह्वे कि वु वेतैं देखि सैको। 33अर प्रभु न वेकू बोलि, #निर्ग 3:5‘या जगा पवित्र जगा च जख तू खड़ु होईं छैई, इलै अपणा जुतों तैं उतारि दे। 34अर आज मि इख अपणा लोगु तैं छुड़ाणु खुणि उतरयुं छौं, किलैकि मिन मिस्र मा अपणा लोगु तैं कुदसा मा पोड़्यूं देखि, अर ऊंको कणाट भि मिन सुण्यालि। इलै अब चल मि त्वेतै मिस्र भेजणु छौ।’
35“अर यू उई मूसा च जैतैं इस्राएली लोगु न इन बोलि के नकारी छौ कि, ‘त्वेतै कैन हमरु अधिकारी अर न्याय करण वळु बणै?’ मगर परमेस्वर न वे ही मूसा तैं इस्राएली लोगु को अधिकारी अर छुड़ौण वळु ठैरै, अर जगदी झाड़ि मा वे स्वर्गदूत का द्वारा बात कैरिके मूसा तैं मिस्र देस मा भेजि दिनी। 36अर यू उई मूसा च जैन हमरा पितरों तैं मिस्र देस बटि भैर निकाळि। अर मूसा न चालीस साल तक मिस्र देस मा, लाल समुन्दर, अर निर्जन जगों मा चिन्न अर चमत्कारिक काम कैरिके दिखै छा। 37अर यू उई च जैन इस्राएल का लोगु कू बोलि छौ कि, ‘परमेस्वर तुम लोगु का बीच मा बटि मि जन एक रैबर्या तैं चुणी के तुम खुणि खड़ु करलु।’ 38अर यू उई मूसा छौ जु की निर्जन जगा मा इस्राएली लोगु का दगड़ा मा छौ, अर जैन बिचलु को काम कैरी छौ। अर #निर्ग 19:1—20:17सीनै पाड़ पर उ वे स्वर्गदूत का दगड़ा मा छौ जैन वेका दगड़ा मा बात कैरी छै, अर उ हमरा पितरों का दगड़ा मा छौ। अर वेन ही यू वचन हमतै देणु खुणि ज्यून्दा पिता परमेस्वर बटि पै। 39अर वु लोग मूसा की बातों तैं नि मनण चाणा छा, बल्किन मा ऊ वेतैं नकरण लगि गैनी, तब ऊंन अपणु-अपणु मन मिस्र जनै लगौण शुरु कैरी दिनी। 40अर हारुन कू बोलि, #निर्ग 32:1‘हम खुणि द्यबतों तैं बणौ, जु हमरा अगनै-अगनै चला, किलैकि मूसा जु कि हमतै मिस्र देस बटि निकाळि के लै, हम नि जणद्यां कि वेको क्या ह्वे।’ 41तब ऊं दिनों मा ऊंन #निर्ग 32:4-6एक बछड़ा की मूरत बणवै, अर वीं मूरत का अगनै एक बलि चड़ै, अर जु कुछ भि ऊंन बणै वेका खातिर ऊ बड़ु आनन्द मनौण लगि गैनी। 42इलै परमेस्वर ऊं बटि दूर ह्वे गै, अर सूरज, चाँद अर गैंणो की पूजा करणु खुणि छोड़ि दिनी। अर जन रैबर्यों की किताबों मा लिख्यूं च कि,
#
आमो 5:25-27
“‘हे इस्राएल का कुटुम्ब, निर्जन जगा मा चालीस सालों तक जु दान-बलिदान तुमुन चडैनी,
क्या वु तुमुन मि खुणि ही चडैनी?
43ना, वु मि खुणि नि छौ यू त तुमुन मोलेक द्यबता का तम्बू खुणि,
अर ज्वा मूरत रिफान नौ का गैंणा द्यबता की लेके तुम घूमदा छा तुमुन यू सब ऊं खुणि ही कैरी।
अर यों सब मूरतों तैं तुमुन इलै बणै ताकि तुम ऊंकी पूजा कैरी सैका।
इलै मि भि तुमतै तुमरा देस बटि निकाळि के बेबीलोन नगर से भि भौत दूर लि जैके बसौलु।’
44“अर साक्षी#7:44 “साक्षी को तम्बू” को मतलब इन च कि जख यहूदी लोग परमेस्वर की भक्ति करणु खुणि अर अपणा जीवन की गवै देणु खुणि, अर बलिदान चड़ौणु खुणि जान्दा छा अर वे जमना मा यू सब एक तम्बू का रुप मा छौ, अर या खुणि गवै को तम्बू भि बुले जान्दु छौ। को तम्बू जु कि निर्जन जगा मा हमरा पितरों का पास छौ, अर जैतैं बणौण की आज्ञा परमेस्वर न मूसा तैं देई छै अर इन बोलि छौ कि, #निर्ग 25:40‘तम्बू को जु नमूना त्वेतै दिखये गै, वेका मुताबिक वेतैं बणौ।’ 45अर तब हमरु यू देस पैलि ऊं लोगु को छौ जु की हमरि जाति-बिरादरी का नि छा। अर वे बगत मा हमरा परमेस्वर न ऊं सब लोगु तैं इख बटि भैर निकाळि के यू देस हमरा पितरों का अधिकार मा दे दिनी। अर वे बगत मा हमरा पितर साक्षी का तम्बू तैं पितर यहोशू का दगड़ा मा लेके ये देस मा ऐनी, अर वु तम्बू राजा दाऊद का दिनों तक इख रै। 46अर परमेस्वर की किरपा राजा दाऊद पर छै, अर दाऊद न वेसे बिन्ती कैरी कि #2 शमू 7:1-16मि पितर याकूब का परमेस्वर खुणि रौणे की एक जगा बणौ। 47मगर रौण की वा जगा पितर दाऊद का नौना #1 राजा 6:1-38सुलैमान राजा न बणवै। 48पर क्या इन ह्वे सकदु च कि सबसे महान परमेस्वर मनखि द्वारा बणईं जगा मा रौ, ना, इन नि ह्वे सकदु किलैकि परमेस्वर न अपणा रैबर्या का द्वारा बोलि छौ कि,
49 #
यशा 66:1,2 “‘प्रभु बुल्दु कि,
स्वर्ग मेरी राजगद्दी अर धरती मेरा खुटा रखण की जगा च,
अब बता तुम मि खुणि कन्द्रयो घौर बणैल्या?
अर इन्दरि जगा कख च जख मि आराम कैर सैकु?
50अर क्या यों सब चीजों तैं मिन नि बणै?’
51“अर स्तिफनुस न ऊंकू इन भि बोलि कि, ‘हे जिद्दमार लोगु, तुम ऊं लोगु का जन किलै होणा छाँ जु परमेस्वर की बातों तैं सुनण अर मनण नि चनदिन, अर तुम हमेसा किलै पवित्र आत्मा को विरोध करद्यां? जन तुमरा पितरों न कैरी ठिक उन्नि तुम भि करद्यां। 52अर तुमरा पितरों न परमेस्वर का कै रैबर्यों तैं नि सतै? अर जौं रैबर्यों न वे धरमी मनखि का औण का बारा मा पैलि ही बतैयालि छौ ऊंतैं भि ऊं लोगु न जान से मारी दिनी। अर ऊंका मुताबिक तुमुन वे धरमी मनखि तैं बिस्वासघात कैरिके पकड़वै अर वेतैं जान से मरवै के तुम वेका हत्यारा ह्वे ग्यां। 53तुम त उई छाँ, जौन नियम-कानूनों तैं परमेस्वर का स्वर्गदूतों का द्वारा पै, मगर फिर भि तुमुन ऊंको पालन नि कैरी।’”
स्तिफनुस तैं ढुंग्योण
54अर स्तिफनुस की यों बातों तैं सुणी के न्याय समिति का लोग भौत गुस्सा ह्वेनि। अर ऊंतैं इथगा गुस्सा ऐ, कि ऊ गुस्सा से तमतमै गैनी। 55मगर स्तिफनुस न पवित्र आत्मा से भरपूर ह्वेके स्वर्ग जनै देखि, अर वेन परमेस्वर की दिब्य चमक देखि अर यीशु मसीह तैं परमेस्वर का दैंणी तरफा खड़ु होयुं देखि अर बोलि कि, 56“सुणा, मि स्वर्ग तैं खुल्यूं अर मनखि का पुत्र तैं परमेस्वर की दैंणी तरफा खड़ु होयुं दिखणु छौं।” 57अर या बात सुणी के ऊंन अपणा कन्दूड़ बन्द कैरी दिनी अर जोर से चिल्लैनि, अर वेतैं जान से मरणु खुणि वे जनै झट गैनी। 58अर वेतैं ढुंग्योण खुणि ऊ लोग वेतैं नगर बटि भैर खिखोड़ी के लि गैनी। अर जथगा गवा स्तिफनुस का खिलाप मा छा ऊंन अपणा-अपणा कपड़ों तैं शाऊल नौ का एक ज्वान मनखि का समणि जमा करिनी। 59जब ऊ लोग स्तिफनुस तैं ढुंग्योणा छा, त वेन प्रभु से प्रार्थना कैरी, “मेरा प्रभु यीशु, मेरी आत्मा तैं स्वीकार कैरा।” 60फिर वेन घुंडा टिकनी अर चिल्लै के बोलि, “मेरा प्रभु, ये पाप को दोष यों पर नि लग्यां” अर इन बोलि के वेन ईं दुनियां तैं छोड़ि दिनी।
လက္ရွိေရြးခ်ယ္ထားမွု
खास चेलों 7: GBM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active) Wycliffe Bible Translators, Inc. All rights reserved.