मर्कुस 9
9
1अनि येसुइ एतमा तोसास्यावा, “दोङ्सिले ङाइ निङकाय तोनेनाङ्स, परमेस्वरइ लयको मान्तालमकाय महान् जिःङकुसि राज्य जाह्ङो च्यउमाच्युकसम्म इहाङ चिङ्तिमुओलममध्ये गच्युक जनाखे सिलेतेइलि।”
येसुको रुप परिवर्तन स्यावो
(मति १७:१-१३; लुका ९:२८-३६)
2छ दिन लोन्हे, येसुइ पत्रुस, याकुब र युहन्नाकाय मात्र लात्ति यातज्यो यासो दान्दाताङ आल्सास्यावा, र ओहाङ ओउमय बाहेक अरु सुमा नाःआकिलि। अनि चेलालमइ येसुकाय योति मुतोकहाङले येसुको रुप परिवर्तन स्यावा। 3येसुको लावनाय उच्युक प्लिहङ्तोसम्म भाम्तो स्यावा कि पेतोकुस धाःउयाकायमा सङ्सारको मान्तालमइ ओउच्युक भाम्ताक्सा खायाक्निलि। 4ओहाङसयको एलिया र मोसा थाआक्तिको येसुकुस नोःधयमुओ ओउ सुम जना चेलालमइ च्यवाकानि। 5एत च्यउति पत्रुसइ येसुकाय तोआथय, “अ गुरु,#९:५ गुरु इ सब्दकाय हिब्रु भासाहाङ “रब्बि” त दाह्य्ति तोओ मुना, र इ सब्दको मानेखे “गुरु” त स्याउना। यहुदि मान्तालमइ धर्मगुरु अथबा पाको अगुवालमकाय मान-सम्मान जाह्ङ्साको लागि इ उपाधि बइनितो। इ सब्दइ पाथसालाको गुरु अथबा अरु खालको गुरुलमकायखे जनाउलु (मति २३:७; युहन्ना १:३८)। नि जुदा इहाङ मुसा माहा पेतो स्याउसा खाइनउ। निइ इहाङ मुसाकाय सुमज्यो खोल्मा जाह्ङ्नाङ्सु, यातज्यो नाङकाय, यातज्यो मोसाकाय, र यातज्योखे एलियाकाय।” 6तर पत्रुस र अर्को चेलानिस माहा जोक्तो रयोझ्यान्ते, लय दोह नोःआलाङ त दाह्यो कुराले पत्रुसइ चिःसा खायुलु।
7ओहाङसयको मुस वाङ्ति ओउमयकाय बोःमाथास, र परमेस्वरइ ओउमयकाय तोसास्यावो यातज्यो हाउनय मुसभित्रसय एतदाह्य्ति वाङा, “इपाय ङाको माहा राप्तो चोः खेना, र इको आखरकाय निङइ साइसाले परना।” 8ओउ सुम जना चेलालमइ वेःताङ-ङोइताङ योतोकहाङ, अचानक एलिया र मोसा अलपाकाच र ओहाङ ओउमयइ येसुकाय मात्र च्यवाकानि।
9ओहाङसयको ओउमय दान्दासय काःम्ताङ ग्ल्युह्ङ्धय मुतोकहाङ येसुइ लयको चेलालमकाय तोसास्यावा, “ङा मान्ताको चोः सिओसय उह्ति च्योक्माच्युकसम्म, तेन निङइ च्यवो कुराखे सुकायमा तोलाम।”
10येसुइ जाह्ङ्सास्यावो आग्याकाय ओउमयइ पालन जाह्ङाकानि, तर “सिओसय उह्ति च्योक्सा त तोओको माने दोह खेना?” त दाह्य्ति यात-अर्काकुस ह्वत्कायाकाय। 11ओउतझ्यान्ते ओउमयइ येसुकाय ह्वताकानि, “धइति धर्मगुरुलम ‘ख्रिस्त वाङ्सासय ङ्हाखे एलिया अगमबक्ताले द्याह्न्ति वाङ्सा परना’ त दाह्य्नय?”
12अनि येसुइ ओउमयकाय जवाफ बइसास्यावा, “दोङ्सिले एलियाखे जुदा कुरालम तयार जाह्ङ्साको लागि ङ्हाले वाङ्लेना। तर ‘मान्ताको चोःइ माहा जोक्तो दुख दोःसा र मान्तालमकसय इन्कार स्याउसाले परना’ त दाह्यो कुरा दोह धर्मसास्त्रइ तोओ नाःल र? 13तर ङाइ निङकाय तोनेनाङ्स, एलियाखे ङ्हाखाले वाङ्तिखायो मुना, र धर्मसास्त्रइ ओउको बारेहाङ तोओ अनुसार मान्तालमइ ओउकाय लय चाहओलेखाले पेमालो बेबहार जाह्ङाकानि।”
दुस्त ग्वालामइ ङाःयो यातचाक गोय्चो मान्ताकाय येसुइ स्याक्ताक्सास्यावो
(मति १७:१४-२१; लुका ९:३७-४३क)
14जब येसु पत्रुस, याकुब र युहन्नाकुस अरु चेलालमकहाङ द्याह्न्ति दाह्सास्यावा, अनि नाःतो मान्तालमको हुल अरु चेलालमको वरिपरि हुम्तिमुओ, र धर्मगुरुलममा चेलालमकुसि बहस जाह्ङ्काइतिमुओ येसुइ च्यउसास्यावा। 15अनि जब मान्तालमको हुलइ येसुकाय च्यवाकानि, ओउमय माहा जोक्तो ग्याह्ङाकाय, र तन्ति वाङ्ति येसुकाय स्वागत जाह्ङाकानि। 16येसुइ ओहाङ मुओ चेलालमकाय ह्वत्सास्यावा, “निङइ ओउमयकुस दोह कुराको बारेहाङ बहस जाह्ङ्धय मुतेनय?”
17मान्तालमको हुलसय यातचाक मान्ताइ येसुकाय तोआथय, “अ गुरु, नाङइ स्याक्ताक्ति बइसास्याउपाना त दाह्य्ति ङाइ लयको चोःकाय नाङकहाङ वानो मुनाङ, धइतिदाह्य्सा दुस्त ग्वालामइ ङाःयोझ्यान्ते ओउइ नोःसाले खायुलु। 18जब ओउकाय दुस्त ग्वालामइ ङाइनाथय, ओउकाय साःहाङ प्लाह्ताक्नाथय, र ओउइ म्होतोङसय भोप क्लाःनउ। अनि ओउइ सय्क हिक्सा फाःङ्नउ, र ओउको जुदा ज्यान सेन्थेने त क्रोङ्तो स्याउना। ओउतझ्यान्ते ङाइ नाङको चेलालमकाय ओउ दुस्त ग्वालाम रुःन्ति ल्होक्साको लागि बिन्ति जाह्ङालाङ, तर ओउमयइ रुःन्ति ल्होक्साले खाइनिलि।”
19येसुइ ओउमयकाय तोसास्यावा, “निङपाय परमेस्वरहाङ बिस्वास नाःमालो मान्तालम खेतेनय! ङा निङकुसि गलसम्म ब्रक्त मुचाङ र? अनि निङइ गल बिस्वास जाह्ङ्तेनानि त दाह्य्ति ङा निङको लागि गलसम्म ल्युह्ङ्ति मुचाङ र? ओउकाय ङाकहाङ लात्ति वान्न।” 20अनि केहि मान्तालमइ ओउ गोय्चोकाय येसुकहाङ लात्ति वानाकानि।
तर जब ओउ दुस्त ग्वालामइ येसुकाय च्यवाथय, अचानकले ओउ दुस्त ग्वालामइ ओउ गोय्चोकाय ल्याःउ-ल्याःउ त रिह्ङ्तो जाह्ङाथय। अनि ओउ साःहाङ प्लाहा र म्होतोङसय भोप क्लाःधय यउलन्ति वाह्तो स्यावा। 21येसुइ ओउ गोय्चोको आपाकाय ह्वत्सास्यावा, “इकाय गलहाङसय एत ताह्ङ्तो स्यावो खेतो र?”
ओउ गोय्चोको आपा त्याङा, “इ मयो बालाख खेतोकहाङसयले एत स्यावो खेना। 22दुस्त ग्वालामइ इकाय नाःतो पल्तले म्हेः र तिःहाङ काति सात्सा कोसिस जाह्ङाथय। यदि हजुरइ केहि जाह्ङ्सा खाइसास्याउना त खेया, निकाय योःन्ति सहयोग जाह्ङ्ति बइसास्याउपाना।”
23अनि येसुइ ओउकाय ह्वत्सास्यावा, “‘यदि नाङइ खाइसास्याउना त खेया’ त दाह्य्ति नाङ धइति दाह्य्तेना? धइतिदाह्य्सा परमेस्वरहाङ बिस्वास जाह्ङो मान्तालमको लागिपाय परमेस्वरइ जुदा थोकले जाह्ङ्सा खाइसास्याउलेना।”
24अचानक ओउ गोय्चोको आपा हिह्ति एत दाह्या, “अ गुरु, ङाइ परमेस्वरहाङ बिस्वास जाह्ङ्नाङ, तर अझ नाःतो बिस्वास जाह्ङ्साको लागि ङाकाय सहयोग जाह्ङ्ति बइसासास्याउपाना।”
25जब मान्तालमको हुलहाङ झन् नाःतो मान्तालम पाःधय लयकताङ वाङ्धयमुओ येसुइ च्यउसास्यावा, अनि येसुइ ओउ दुस्त ग्वालामकाय थत्ति तोसास्यावा, “इ गोय्चोकाय साइसा र नोःसा खाइताक्मालो अ दुस्त ग्वालाम, ङाइ नाङकाय इ गोय्चोकसय ग्ल्युह्ङ्ति पाह्य्सा र ओउकहाङ गलमा द्याह्न्ति पोक्मासाको लागि आग्या जाह्ङ्नेनाङ।”
26अनि ओउ दुस्त ग्वालाम माहा जोक्तो हिह्आ, र ओउ गोय्चोकाय रिह्ङ्ताकाक्तिको साःहाङ प्लाह्ताकाथय ओहाङसयको ओउकसय ग्ल्युह्ङ्ति पाह्या। ओउ गोय्चो सिओलेखाले सेन्थेने त स्यावा, र मान्तालमइ “ओउपाय सिलेआ” त दाह्य्सा फाःङाकानि। 27तर येसुइ ओउ गोय्चोको क्रुतहाङ चुमाक्तिको ओउकाय चिङसाको लागि सहयोग जाह्ङ्सास्यावा, र ओउ गोय्चो चिङा।
28ओहाङसयको येसु किमताङ द्याह्न्ति पाह्य्सास्यावा, र चेलालमइ येसुकाय सुतुक्त ह्वताथय, “निइखे ओउ दुस्त ग्वालामकाय धइति रुःन्ति ल्होक्सा खाइङसुलु?”
29अनि येसुइ ओउमयकाय तोसास्यावा, “एतताह्ङो दुस्त ग्वालामकायखे प्राथना बाहेक अरु तरिकासय रुःन्ति ल्होक्सा खाइलेल।”
येसुइ फेरि लयको सिमयको बारेहाङ तोसास्यावो
(मति १७:२२-२३; लुका ९:४३ख-४५)
30येसु र ओउको चेलालम ओउ थाउ फेआक्तिको गालिल छेत्र स्याउधय यात्रा जाह्ङाकानि। लय मुओ थाउको बारेहाङ अरु मान्तालमइ चिःमालोले येसुइ चाहसास्यावो खेतो। 31धइतिदाह्य्सा येसुइ लयको चेलालमकाय स्यान्धय बल नाःतो समय ओउमयकुस ब्रक्त मुति हुत्सा इच्छ्या जाह्ङ्सास्यावो खेतो। येसुइ तोसास्यावा, “ङा मान्ताको चोःकाय कुनय मान्ताइ बइरिलमको क्रुतहाङ सुम्पनाताङ, अनि ओउमयइ ङाकाय सात्नाताङ्स। तर सुम दिनहाङखे ङा फेरि सिओसय उह्ति च्योक्लेनाङ।”
32तर येसुइ तोसास्यावो ओउ कुराको मानेखे ओउको चेलालमइ चिःसाले खाइनिलि, र इको माने दोह खेना त दाह्य्ति येसुकाय ह्वत्सामा ओउमय रयाकाय।
साःरो सु खेना?
(मति १८:१-५; लुका ९:४६-४८)
33येसु लयको चेलालमकुस कफर्नहुम सहरहाङ दाह्सास्यावा, र किमभित्र पोकापछि येसुइ लयको चेलालमकाय ह्वत्सास्यावा, “नि ल्यामहाङ यात्रा जाह्ङ्धय मुतोकहाङ निङ दोह कुराको बहस जाह्ङ्धय खेतेइतो?”
34तर ओउमयइ येसुकाय दोह जवाफ बइसामा खाइनिलि, धइतिदाह्य्सा ओउमय ल्यामहाङ यात्रा जाह्ङ्धय मुतोकहाङ, “नि मध्येहाङ साःरो सु खेनातहि?” त दाह्य्ति बहस जाह्ङ्कायो खेइतो। 35येसु च्युःङ्सास्यावा अनि लयको बाह्र जना चेलालमकाय ब्रक्त गोताक्तिको ओउमयकाय तोसास्यावा, “यदि कुनय मान्ताइ साःरो मान्ता स्याउसा इच्छ्या जाह्ङ्नउ त खेया, ओउखे जुदासय मयो स्याउति जुदाको सेवा जाह्ङ्सा परलेना।” 36ओहाङसयको येसुइ यातचाक मयो बालाखकाय ओउमयको माझहाङ चिङताक्सास्यावा, र ओउकाय लयको खोसहाङ गमाक्तिको चेलालमकाय तोसास्यावा, 37“सुखेइ एतताह्ङो बालाखकाय ङाको मय्ङहाङ सुइकार जाह्ङ्नानि, ओउमयइ ङाकाय सुइकार जाह्ङ्नाताङ्स, अनि सुखेइ ङाकाय सुइकार जाह्ङ्नाताङ्स, ओउमयइ ङाकाय मात्र खेल तर ङाकाय ल्होक्सास्यावो परमेस्वर आपाकायमा सुइकार जाह्ङ्लेनानि।”
सुखे निको बिरोतहाङ नाःइलि ओउखे निकोले खेना
(लुका ९:४९-५०)
38युहन्नाइ येसुकाय तोआथय, “गुरु, यातचाक मान्ताइ नाङको मय्ङहाङ लानलम रुःन्ति ल्होक्धयमुओ निइ च्यवालाङ्सु, अनि निइ ओउकाय एत हाइलाम त दाह्य्ति तोआलाङ्सु, धइतिदाह्य्सा ओउखे निको समुहको मान्ता खेआक्ल।”
39तर येसुइ ओउमयकाय तोसास्यावा, “निङइ ओउकाय ओउत जाह्ङ्सासय रोकलाम, धइतिदाह्य्सा यदि कुनय मान्ताइ ङाको मय्ङको जिःङ दुवारा ग्याह्ङ्सिओ कामलम जाह्ङ्नउ त खेया, ओउइ रेह्न्तोले ङाको बिरोतहाङ नोःसा खाइलेउलु। 40ओउतझ्यान्ते सुखे निको बिरोतहाङ स्याउल ओउखे निकोले खेना। 41यदि कुनय मान्ताइ निङकाय ङाको मय्ङहाङ यात कचउरा तिः मात्र बइतेनय त खेयाकायमा, दोङ्सिले ङाइ निङकाय तोनेनाङ्स, ओउ मान्ताइखे पक्काले इनाम दोःलेना।”
अरुको बिस्वासकाय मिह्तो जाह्ङ्लाम
(मति १८:६-९; लुका १७:१-२)
42येसुइ एतमा तोसास्यावा, “यदि इ मयो बालाखलम मध्येको कुनय यातचाकइ ङाकाय जाह्ङो बिस्वासकाय कुनय मान्ताइ मिह्ताक्नउ त खेया, ओउकायपाय कय्कहाङ ताह्ङो ग्राइबाङ योकोति समुन्द्रहाङ तातिवाइसा पेतो स्याउना। 43ओउतझ्यान्ते यदि नाङको क्रुतइ नाङको बिस्वासकाय मिह्तो जाह्ङ्नउ त खेया, ओउकाय तात्ति वायु! धइतिदाह्य्सा निसज्यो क्रुत दोहिले नरकको गलमा सिमालो म्हेःहाङ परसासयपाय बरु यातज्यो क्रुत नाःमातले लाङकाको अजम्बरि रुवाङ दोःति स्याक्सा माहा पेतो स्याउना। 44[नरकहाङपाय न पेःलम सिनय, न ल्युङो म्हेःले म्हेत्ना।]#९:४४,४६ नया नेम ङ्हापाय ग्रिक भासाहाङ लेखओ खेना र ओउबेलाहाङ मान्तालमइ जुदा कितापलम क्रुतइ लेखति तयार जाह्ङ्नितो। मान्तालमइ क्रुतइ लेखओ ङ्हाको कुनय-कुनय कितापलमहाङखे ओउ ताह्ङो कोस्थभित्र मुओ कुरालम लेखओ नाःल। 45ओउतले यदि नाङको दोमइ नाङको बिस्वासकाय मिह्तो जाह्ङ्नउ त खेया, ओउकाय तात्ति वायु! धइतिदाह्य्सा निसज्यो दोम दोहिले नरकहाङ ताति वाइसा भन्दापाय बरु यातज्यो दोम नाःमातले लाङकाको अजम्बरि रुवाङ दोःति स्याक्सा माहा पेतो स्याउना। 46[नरकहाङपाय न पेःलम सिनय, न ल्युङो म्हेःले म्हेत्ना।] 47ओउतले यदि नाङको मिकइमा नाङको बिस्वासकाय मिह्तो जाह्ङ्नउ त खेया, ओउकाय त्युःल्ति वायु! धइतिदाह्य्सा निसज्यो मिक दोहिले नरकहाङ ताति वाइसा भन्दापाय बरु यातज्यो मिक नाःमातले परमेस्वरको राज्यको मान्ता स्याउसा माहा पेतो स्याउना। 48नरकहाङपाय न पेःलम सिनय, न ल्युङो म्हेःले म्हेत्ना।#यस ६६:२४
49 जुदा मान्तालमको बिस्वासकाय # ९:४९ बिस्वास येसुइ बिस्वासको बारेहाङ तोसाको लागि छेः त तोओ सब्द प्रयोग जाह्ङ्सास्यावा। ओउको मानेखे परमेस्वरहाङ बिस्वास जाह्ङो जुदा मान्तालमइ सतावतलम सहसा परलेनय त तोओ खेना। म्हेःइले सुद्ध जाह्ङ्नउ। 50छेः पेओ थोक खेना, तर छेको स्वाद आल्ना त खेया, फेरि गतहाइति ओउकाय ल्हाम्ताक्सा र? ओउतले निङको बिस्वासमा छेः लेखाले खेना। ओउतझ्यान्ते निङको बिस्वास परमेस्वरहाङ गम्नु, र यात-अर्काकुस मेलमिलापहाङ मुन।”
လက္ရွိေရြးခ်ယ္ထားမွု
मर्कुस 9: CHEP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024 (Active), Mother Tongue Translators Society and Wycliffe Bible Translators, Inc. All rights reserved.