Luk 2
2
Ogwe wu Jisɔs
(Mat 1:18-25)
1Wa nten ayua minen Sisa wu mpi oyu akamag arɔ Ɔgɔstɔs ale minen wu ntɔ wu balen wa feb bɔpam bu Rom. Aken eben arɔ afai feb bane bale bɔpam bu bole eboi yi Rom. 2(Fa ele mindanen mfai bane yi Kwirinus ale minen wu ntɔ wu mpami Siria.) 3Ka kpe ichamine aloag mpam oyu wa enudi nju yi arun aka seng mpi oyu wa ekpara botiti.
4Ka ntagi Josef arun enud yi nju yu mineni Debid, we aloag mpam yu Nasaret yu ale eboi yi Galili achag mpam yu agwen Debid yu ayenag Betelehem yu ale eboi yi Judia. 5Alon yi Meri, wu we anɔngɔ sɔd. Ale yi bɔla bu bosi egweang. 6Yi ba ale awa Betelehem, nten asi yu mmɔn ogwe. 7Aba gwe ɔkpa mmɔni minine owu. Abɔbing we wa mfɔ anɛmi we wa ekoko beliang yi betug, wa ntag yu bɔ arɔn ekpen yi bɔ akɛmag wa nju bakenken.
Bababag ba bawɔng yi bakamag ba befong bi Ɔsɔwɔ
8Boru abua, efɔning bababag ba bawɔng ba ali kɛmag efi kpedi kpedi yi mpam ababag bawɔng amibɔ yi boru. 9Ebuyid, Minkamag befong bi Ɔsɔwɔ atɛb erɔng eyibɔ bɔbad bu ejeg yi Minfɔni bɔbad bɔfari bɔ. Botig bɔ kɔ bɔ, 10ka minkamag befong bi Ɔsɔwɔ alang bɔ nted atɔ bɔ arɔ, “Kan re anyɔng botig da me mba nyɔ yi etingi nsidi yi ebag yi etɛmi bochoba bu nted bu bane kpɔkpɔg. 11Elei wa Betelehem, mpam yu Debid, agwe nyɔ Minyanyangi. We ale Krais, Minfɔni. 12Nyɔ ting oreni we wa ndeng yufa: Nyɔ ting ɔrɔ mmɔn wu abɔbing wa mfɔ anɔng wa ekoko beliang yi betug.”
13Ebuyid, jugijugi bakamag ba befong bi Ɔsɔwɔ ba mpam esɔ etɛb abodi lɔ yi minkamag befong bi Ɔsɔwɔ akerag Ɔsɔwɔ bakag arɔ,
14“Bakag yi ejeg akɛmi yi Ɔsɔwɔ wu esɔ yi echiming eking,
yi ekunakuna wa nggon yi bane ba achobing we nted.”
15Nten yu bakamag ba befong ahɔ tisɛm mpam esɔ, bababag ba bawɔng atɔ bolom arɔ, “Elo anyɔng Betelehem eka rɔ nyum yifa yi emarɔtɛb, yi Minfɔni amarɔ sidi sɔ abangang.”
16Bɔ asubi aloag mpam aka rɔ Meri yi Josef, yi mmɔn erɔng anɔng wa ekoko beliang yi betug. 17Yi ahɔrɔ we, bababag ba bawɔng asidi kpe ichamine yi etɛbing yi yi minkamag befong bi Ɔsɔwɔ asiding bɔ abangang mmɔn wufa. 18Feb ba awoging bokobi bu bababag ba bawɔng asiding beke beman bɔ. 19Ka Meri anunging nggom bifa feb wa nted oyu akerag abangang bi kpe ichanten. 20Bababag ba bawɔng atisɛm abugag, akɔnag akerag Ɔsɔwɔ ejeg yi bakag wa nggom kpɔkpɔg bi bɔ awoging yi bi bɔ arɔn nkeri minkamag befong bi Ɔsɔwɔ asiding bɔ.
21Wa ndu enyebenye, yi nten asin yu asobag we edɔga, alang we mpi Jisɔs, mpi yu minkamag befong bi Ɔsɔwɔ aken we ka abob bɔla obu.
Aka tɔngi Jisɔs wa Nju Ɔsɔwɔ
22Yi nten yu esoang asin nkeri eben yi Mosis, Josef yi Meri akun we aloag Jerusalim aka tɔngi Minfɔni 23(nkeri asenging wa eben yi Minen, “Kpe icha okpa mmɔni minine ajogag we ake Minfɔni.”) 24Bɔ erɔng asingi esingi ekɛmi nkeri achɔding wa eben yi Minfɔni: “Ebu nyɔ ɔkan kuning bebi befai bi ekan kun anyɔng mbɔn ba bebi bi nju befai wa esingi ayin.”
25Wa mpam yu Jerusalim ekwe minine wu mpi oyu akamag arɔ Simiɔn, we ale mine wu nnɔ wu afɔning botig bu Ɔsɔwɔ. We ali worag arɔ mine wu anyangag Isrel. Ka Nyɔganyɔ yu Ɔsɔwɔ ale yi we. 26Nyɔganyɔ yu Ɔsɔwɔ aleming we amai yi arɔ we ahɔ kwɔ tata arɔ Krais wu Minfɔni achɔn enyɔ arɔ we afongag. 27Nyɔganyɔ yu Ɔsɔwɔ akun Simiɔn achag etengebam yi nju yu Ɔsɔwɔ. Nteni nsi yi nyen aban yi mmɔn Jisɔs abalem ake we nkeri egweni yi eben eken. 28Simiɔn arami we wa babɔ ami akob Ɔsɔwɔ, achɔdag arɔ:
29“Minen, nkeri enyɔ yi ɔchɔn,
we fafa jog mingban ɔwa abugag wa ekunakuna.
30Da mmɛd angama arɔ minyanyangi ɔwa,
31yi wu amarɔ oloni wa mmɛd ma bane feb,
32enwɔi yi etɔngi bane ba akan sid bane ba Ju nnen enungi eruafa Ɔsɔwɔ anyangi bɔ,
ka eting elem bane agwa ba Isrel afɔn ejeg.”
33Nsi yi nyeni mmɔn agberi wa yi achɔding abangang we. 34Ka Simiɔn ake bɔ ɔfa wu Ɔsɔwɔ atɔ nyen eyi Meri arɔ: “Mmɔn wufa ebang eyi elemag etunang yi eloag belag yi jugijugi wa Isrel, erɔng ekɛmi ndeng yu bɔ ahɔ kam, 35eru afa bekikere bi boted jugijugi ting betɔngi. Bayig abangang mmɔn wufa ajimag we wa mmɛd ma nted ala ekangkang.”
36Erɔng efɔning minkani wu arɔag eyammɛd yi Ɔsɔwɔ, wu ayenag we Ana, mmɔni minkani wu Fanel, wu eri mpam yi Ashei. We akoi gbɔg. We akɛming yi minum owu nya enyibisia yi bɔ aban bolom, 37we achan minkai ekud tata asi nya erɛm bene nsɛm nya enye. We achan nju yu Ɔsɔwɔ acha ajegag we epen yi boru, akɛmag nsɔng yi nsɔm yu nsoang. 38Ebang ebuyid aba kpɔgi bɔ nten ayua, we ake Ɔsɔwɔ ekob achɔd abangang mmɔn asidag feb bane ba ali mmɔnag mmɛd wa nten yu Ɔsɔwɔ abag anyangi Jerusalim.
39Nteni Josef yi Meri amarɔ lem feb nggom nkeri eben yi Minfɔni, bɔ atisɛm abugag Nasaret yu ale mpam oyubɔ wa Galili. 40Mmɔn akoi yi ɔsa; ɔmanyum oson we eri, ka erienɔ yi Ɔsɔwɔ ele yi we.
Jisɔs wa nju yu Ɔsɔwɔ
41Kpeicha eya nyen yi nsi Jisɔs bachag Jerusalim wa Efɔg yi Enwanang.
42Yi we asin nya ɔfɔ yi efai, bɔ alo achag efɔg nkeri ele egweni yi nsisi. 43Yi efɔg ehɔ man nyen yi nsi Jisɔs alo abugag mpam oyubɔ, ka mmɔn Jisɔs acha nsɛm wa mpam yu Jerusalim. Josef yi Meri amang arɔ we chang yi bɔ. 44Bɔ akerag arɔ ale wa erɔng eyibɔ, bɔ aken eken yi epo yid. Nyining bɔ ato we ɔkei arɔ ebu ale wa erɔng yi bane ba enud yi nju yi erong. 45Ka yi bɔ akan rɔn we, bɔ atisɛm Jerusalim aka kei we. 46Ka bɔ aba rɔ we wa ɔyɔgɔ ndu isia wa eteng ebam yi nju yu Ɔsɔwɔ, akig erɔng yi bakɔkɔi, awogag bɔ abebag bɔ bebeb. 47Kpeicha mine wu awoging Jisɔs beke beman we wa ɔmanyum owu yi nkeri we ali bɔrag bebeb bi bakɔkɔi. 48Nten yu nyen yi nsi Jisɔs arɔn we beke beman bɔ. Nyen eyi atɔ we arɔ, “Mmɔn ye ka we olem sɔ lafa? Nsi eya yi me ele eyangang ekeag we.”
49We abeb bɔ arɔ, “Ye ka nyɔ ɔkeag me? Nyɔ ɔmmang ɔrɔ me nkɛmag wa nju yu nsi ema a?” 50Ka erɛbing bɔ yi we ali sidag bɔ.
51Afa we alon yi bɔ achag Nasaret erɔng awog bɔ. Ka nyen eyi anungi nggom bifa feb wa nted oyu. 52Jisɔs akoi wa ɔmanyum yi wa beke yi erienɔ yi Ɔsɔwɔ yi yi bane.
လက္ရွိေရြးခ်ယ္ထားမွု
Luk 2: NBB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©️2024 Luke Initiative for Scripture Translation