KEJADIAN 4
4
Kain ru Habel
1Adam kibesama ru ikenah Hawa, lalu ikenah ajeh pen kimakok. Ikenah ajeh kiperyos numom kenon keral lalu kiurok, “Ya tenulog Yahweh, eng ya ngkep numom kenon keral.” Jadi, kek kiog muh ikenon ajeh Kain. 2Telas ajeh Hawa kiperyos nij numom kenon keral imuh Habel. Bile Kain ru Habel ya bairaknak, Habel kijadi gembale binatag ru Kain kibekerjak ku selai.
3Memerip iluniu ju kenjeh, Kain kikot engleg ju hasel ikiknej lalu kipesembah nu Yahweh. 4Habel kigoj memerip ikor kenon dombe de sulog, lalu kiog sengyet sej de ihad bor sebegei pesembahan nu Yahweh. Yahweh Kibekenan nu Habel ru ipesembahan ajeh 5tapi Kek pek Kibekenan nu Kain ru ipesembahan. Kerana ajeh, Kain kibelal ru irenes jadi bebintunj. 6Yahweh Kiurok nu Kain, “Yama hek habelal? Yama renes hek bebintunj? 7Amen hek habeh hal de betol, hek doh biterima. Tapi amen pek habeh hal de betol, dosa kipoj kaha-muj nu kateh sengik hek. Dosa kaha-bekuasa ku diri hek, tapi hek hodloh hapealah dosa ajeh.”
8Ku nanek arik, Kain kiurok nu imenang Habel, “Beiloh haret nu padag.” Bile ya bailei nu majeh, Kain kiserag Habel lalu kiperdat imenang ajeh.
9Telas ajeh Yahweh Kitanya nu Kain, “Ku belok Habel menang hek?”
Kain kiberlag, “Eng pek ngpanei. Eng enyuk pek penjaga menang eng!”
10Yahweh Kiurok, “Ma de ya habeh? Behip menang hek kicereg nu Eng ju tik kisemanj benalas. 11Kerana ajehloh, hunen hek bisumpah ru pek buleh hausehe tik nij. Tik ya kibuka iempag ru kihuj behip menang hek ku mase haperdat kek. 12Bile hek hacekcet, tik doh pek kiperhol ma-ma pen hasel. Hek doh hajadi pengembare de walah itempat ginei ku bumi adeh.”
13Lalu Kain kiurok nu Yahweh, “Nehukom ajeh ihad nyeh ru eng pek dapat ngtanggong. 14Enjen halau eng ju tik adeh ru ju ngar Jen. Eng doh ngjadi pengembare de walah itempat ginei ku bumi adeh ru eng doh biperdat ya bok-bok de beburuk eng.”
15Tapi Yahweh Kiurok, “Tok. Bok-bok de perdat hek doh kiterima tujoh kali lebeh terok inehukom.” Telas ajeh Yahweh Kibeh nanek tanda ku Kain supaye bok imai de beburuk kek pek naiperdat kek. 16Kain kiet ju ngar Yahweh lalu kigei ku tik Nod ku englag timur Eden. Nod imaksod ‘Pengembaraan.’
Kenon-cenok Kain
17Telas ajeh Kain kibesama ru ikenah lalu ikenah pen kimakok ru kiperyos numom kenon keral imuh Henokh. Ku mase ajeh, Kain kibeh nanek kote ru kisebot kote ajeh Henokh begei muh ikenon keral. 18Henokh mong numom kenon keral imuh Irad. Irad ajeh apak Mehuyael, Mehuyael ajeh apak Metusael, ru Metusael ajeh apak Lamekh. 19Lamekh mong nar mom ikenah. Muh ubai ikenah ajeh Ada ru Zila. 20Ada kiperyos Yabal. Yabal ajeh sengoi de mula-mula kigei ku kateh kemah ru kidek binatag daknek. 21Menang Yabal imuh Yubal. Yubal ajeh sengoi de mula-mula kimaen muzik kecapi ru seruling. 22Zila kiperyos Tubal-Kain. Tubal-Kain ajeh sengoi de mula-mula kibeh bebegei barang ju gangse ru besi. Menang kerdor Tubal-Kain imuh Naama.
23Lamekh kiurok nu ikekenah,
“Ada ru Zila, cerngailoh engrok eng!
Kekenah eng, peratikloh nu bengwal eng adeh!
Eng ya ngperdat numom litau
kerana kek kipet ru kipeluka eng.
24Amen tujoh kali lebeh terok inehukom nu sengoi de kiperdat Kain,
77 kali lebeh terok nij inehukom nu sengoi de kiperdat eng!”
Set ru Enos
25Adam kibesama nij ru ikenah lalu baikep numom kenon keral nij. Hawa kiurok, “Jenang ya Kiog nu eng numom kenon keral ha genanti Habel de biperdat ya Kain.” Hawa kisebot muh ikenon ajeh Set. 26Set mong numom kenon keral imuh Enos. Ku jaman ajehloh sengoi mula naicereg muh Yahweh ku mase naisembah ha Kek.
လက္ရွိေရြးခ်ယ္ထားမွု
KEJADIAN 4: AEH
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.