मत्ती 4
4
येशूला ल्हन्डीक गेल्बो शैतानगी ल्वा चालाते
(मर्कूस १:१२-१३; लूका ४:१-१३)
1थेकी बप्तिस्मा लानामेकी येशूला परमेश्वर आत्मेकी री नाङपा टीकीन खेरसुङ। ल्हन्डीक गेल्बो शैतानगी थे सेम तारस्यीत सिन थेला थेङपा खेरा ओतान। 2थेमे येशू थे री नाङलाराङ देत्कीन ङीमा खाल ङिसाक साप मास्साबा खाईन देता ओतान। थोक खाला देत्जीन थेला आउदी खाईन त्वाबाङ लाबा ओतान। 3थे थोक खाईन त्वाबेकी स्याप खाबा ओते बेलालाराङ पाप खित ज्युता छोल्कान्ते शैतानगी वाकीन थेला ल्वा छोल्गीन “खो परमेश्वर फुज्युङ ईन, मेन ओना? लो परमेश्वर फुज्युङ ईन सासीन खो उदि दोओनला साप डोर छ्युत,” सिन सिदुक। 4थोक सिरजीन येशूकी “ङा दोक मिक्किओ। च्यिला सासीन परमेश्वर बातला ‘मि जुनीला गाङे भन्दा छ्येते बात साच्या थुङच्येते मेन, बरू परमेश्वरगी च्यि च्यि सिका थे थेराङ ङेन्च्येते ईन,’ सिन साबा ओत,” सिन सिदुक।#व्यवस्था ८:३
5थेमे थेकी येशूला परमेश्वर सार सिरच्येते यरूशलेमपा खेरगीन परमेश्वर मन्दिर टुप्पो लाक्तु जेत्कीन 6“खो परमेश्वर फुज्युङ मेनरो? लो दुरूकी फाल ग्योप। च्यिला सासीन खोल्ला छ्याःङ मेलेबा मेङगो सिन परमेश्वर बातला दोक सिन टिबा ओत। चुक सासीन ‘खोल्ला जोए खिताला परमेश्वरगी थे खोरोङ दूतओन तोङगो। खुई काम्बा दोई लाक्तु माफाप्स्यीत थेमे खोल्ला माज्यीगोङ मोथोत्स्यीत सिन परमेश्वर दूतओनगी लाक्पा सेत्ला खोल्ला जिन्ग्यो,’ सिन टिबा ओत,” सिन सिदुक।#भजन ९१:११-१२ 7थोक सिरजीनोङ येशूकी थेला “ ‘प्रभु परमेश्वरगी साबा च्योकराङ खित्च्या ईन्दाकाना मेन्दाका सिन नोमुङ थे सेम ता मेङगो,’ सिनोङ परमेश्वर बातला टिबा ओत,” सिन सिदुक।#व्यवस्था ६:१६
8लोईन थेकी येशूला आउदी थोम्बोज्यीक बोमदु खेरगीन दि सा लुङबा खाङ ओताते जोदाते टेक्टेते लुङबा गाङे थेमे लुङबा लुङबाला ओताते जेसुकै सम्पत्तिताङ गेल्बो दरवारतेबा गाङे तेन्सुङ। 9थेमे “लो खुई ङाला माने खिओ सिन से खासीन थाल्ला ङे तेन्दाते जति लुङबे गेल्बो जोला खुई थाल्ला थोङाते जेसुकै सम्पत्तिओनोङ तेरग्यो,” सिन सिरजीन 10येशूकी “खो दुरूकी ग्युक शैतान। परमेश्वर बातला ‘प्रभु परमेश्वरला माने खिओ सिन से खि। थेमे थेलाकामा माने खिता फाप्क्यो,’ सिन साबा ओत,” सिन ङारसुङ।#व्यवस्था ६:१३ 11थेमे ईन्सीन थेकी येशूला ताङगीन गाल्सुङ। थेरूई परमेश्वर दूतओन वाकीन येशूला च्यि खाला तेरा फाप्च्या दुका थोक खाईन बिन्सुङ।
येशूकी थे खोरोङ काम खिताला स्यूबाते
(मर्कूस १:१४-१५; लूका ४:१४-१५)
12यूहन्नाला जुम्गीन जेलला लुक्तुक्लो सिरा थोकीन येशू यहूदिये अञ्चलदुकी गालील अञ्चलपा ग्युरगीन गाल्सुङ। 13तर थे नासरत सारदु काल्बा मेदेता खाईन गालील समुन्द्रे छेउदु फाप्च्येते कफर्नहुम सिराते सारदु देताला गाल्सुङ। दि सारचेन जबूलूनताङ नप्ताली नाङराङ फाप्कीन ओतान। 14थोक खाईन येशू थेपा गाल्नामेई परमेश्वर बात खित्कान्ते यशैयेकी थाङबो दोक सिन साबाते बात साबा च्योकराङ ओङसुङ। 15थेकी च्यि साबा ओताने सासीन
“दि बातचेन समुन्द्रे छेउताङ यर्दन चाङबो फारकेनपा फाप्च्येते जबूलूनताङ नप्ताली लुङबादु देत्कान्ते ज्येन ज्येन जातकी गालील मि गाङे लाईदु ईन।
16थेबा पापताङ लोभकी खाङाते मुन्दाकते ठाउँदु देता ओतान। थानी थेबेकी स्वर्गनेई वाबाते जोदाज्यीक नाम्दाक थोङा ङेत्सुङ।
मुन्दाकते ठाउँदु देत्कीन स्याप छेतराङ गाला ओताते मिओनगी नाम्दाक छ्याङे गाला थोङसुङ,” सिन साबा ओतान।#यशैया ९:१-२
17कफर्नहुमपा गाल्नामेई येशूकी मिओनला “मिवे, था स्वर्गे राज्य दुरू ओङा खाबा ओत। थोगी ख्योकोनगी खेराङ पापी दुका सिन छ्या स्येला परमेश्वर छ्य्वापा लै खि,” सिन गा लाङच्येते बात लोपाला स्यूसुङ।
येशूकी गाङे भन्दा गोमा छाने खाबाते चेलाओन
(मर्कूस १:१६-२०; लूका ५:१-११)
18ङीमाई येशू गालील समुन्द्रे छेउकी नाङपा ख्याम्गीन ओतान। ख्याम्गीन डोजीन थेकी थेरू ङ्या सेत्कान्ते मेन्दा ङि मिला थोङसुङ। थेबाचेन शिमोनताङ थे आज्यो अन्द्रियास ओतान। शिमोनलाचेन तिरी पत्रुस सिनोङ सिन ओतान। थेबा पुन ङिबो ङ्या सेताला जाल देगीन ओतान। 19थेकी थेबाला “ए ख्योकोन ङिबो देपा स्योक, ङात्ताङ ख्योम। ङा ख्योकोनला ज्येनला परमेश्वर छ्य्वापा लै खित ज्युत्कान्ते मि जोइओ,” सिन काताङसुङ। 20थेकी थोक सिरासात्तु थेबा ङिबो जालोङ थेङलाराङ ज्यागीन थेत्ताङ ख्याम्सुङ।
21थेरूई टिक्पी फजेकपा गाल्नामेकी थेकी याङराङ ज्येन पुन ङिलाङ थोङसुङ। थेबा ङिबोचेन जब्दी फुज्युङ याकूबताङ यूहन्ना ओतान। थेबा ङिबो आबातेताङराङ डुङ्गे नाङ देत्ला ङ्या सेत्च्येते जाल तुने खिन ओतान। थेमे येशूकी थेबा पुन ङिबोलाङ थेत्ताङ ख्याम्बाला स्योक सिन काताङसुङ। 22थेकी कातोङा थोकीन थेबा ङिबोङ जराक जुरूक लाकीन आबातेला डुङ्गादुराङ ताङगीन थेत्ताङ ख्याम्सुङ।
येशूकी लोप्च्येतेताङ ठाक्पा खित्च्येते काम खाबाते
(लूका ६:१७-१९)
23थेमे येशू गालील अञ्चल नाङला गाङेपा युगीन थेङला ओताते मिटिङ खित्च्येते खाम्बे नाङला मिओनला स्वर्गे राज्यते गा लाङच्येते बात च्यि ईन्दे सिन लोप्कीन ख्याम्गीन ओतान। थेमे थरी थरीतेन्दे रोग लै खाबाते थेमे नाबाते मिओनला ठाक्पा खिन ओतान। 24थेकी खाबाते दि कामगी बाततेबा सिरिये लुङबा खाङोङ फैले खासुङ। थेमे मिओनगी थरी थरी रोग लै खाईन नाबाते मिओन, ल्हन्डीक खोबातेबा, जा लाङकान्तेबा, कुज्येतेबा गाङेला ठाक्पा खाला तेरस्यीत सिन थे ओत्सादु क्याल्सुङ। थेमे थेकी थे मि गाङेला ठाक्पा खाईन बिन्सुङ। 25थोक ओङनामेकीनी गालील अञ्चल नाङलेते, डेकापोलिस सिराते सार च्युताम्बे नाङलेते, यरूशलेम सारगीते, यहूदिये अञ्चलताङ यर्दन चाङबो फारकेन नाङपेते ङोला ङ्वा मुथुप्च्या मि थे तिङ ङ्याकीन ख्याम्बाला स्यूसुङ।
လက္ရွိေရြးခ်ယ္ထားမွု
मत्ती 4: JUL
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 1992 Wycliffe Bible Translators Inc. All rights reserved.