Marcos 7
7
T'oniye iyot'iyipi papo inia'an
(Mt 15.1-20)
1'Nesa'ni papo Fariséojos, siu'neje papo taka'neyasane pa Moisés jika'neyasajnaye, tajla'm jlaja ajnat Jerusalén, ti ijioyi ja Jesús. 2Siuti i'winayis japo Jesús t'eyasajnas jikioye je ilij ti majleyeyi kan'yekiujni'n, iwit'ianisi'ne ti je iyo siupa iniwonisi. 3Kajeyepa ti siunapo Fariséojos, napok Judíojos, siu'neje napo ijia yame siupa iniwonisi papo jika kijilas t'ipi, ti siuti jikio' je ilij je ti'yekiujni'n. Jika kijilas mases iyone 'ate ti 'yiyasa'n, “Siunie i'nio' isi'me pi k'iejliyi ti insot, nak kiak iyoye'ejyi pet ti t'ojli jitieyi'i pa Sinia', 'yina Sinia' 'nachiye.” 4Jak je iyoyiji ti 'nesata'ni ti tajlis inak ji'wuki, je nesi'li'yi kan'yekiujni'n siuti je iyoyisi siupa iniwonist'iyipi ti je inilejes kiu'. Je najata, 'yina je pini 'neje niwa ijia, iyoye 'ate siunie ti je 'yaka'm ape'e ti ilijamk'i niwa jika teti'l ti i'yayisiamk'i, siu'neje puwa jlatiwa ti wikijnies, siu'neje puwa isatis, siu'neje puwa jlo'witis. 5It'imina papo Fariséojos siu'neje papo taka'neyasane pa Moisés jika'neyasajnaye ti iyot'iyisijyin'nipe ja Jesús ti iyonisi 'ate:
—¿Yot'iyi'ni napo 'eyasajnas ti 'yaka'm ape'e siunie t'oniye iyot'iyipi kiapo saka kijilas mases, 'yina ti iyo kan'yekiujni'n jla'am nesi'liyits'i, jlam'ne ka inajnatis ka jikio' inlejes kiu'?
6Jesús isiujlie ti iyo'ate:
—Jlamp'an je iyopi pa injwejlanik jiwo t'ipi Isaías ti injwela ti ijnoski'lanajyi'n, ti iyo'ate, ti 'yiti' pa jip'esinik:
“Siunapo i'nio' ti ijwi'l ka siwunitis,
jla'm ji'lijik'i wek jlam'ne ki iyo ni jlosik je jnanjli'ni ijiap.
7Jlajmi wek ka ijwe'el ka yama ka siwunitis,
jlam'ne tajleje napo i'nio' jika'neyasajnaye.”#Is 29.13
8Jiliyeyi siunie Sinia' takajluntieje kawo napo i'nio',
'yaka jiwoyeyi siunie iyo pit napo i'nio',
ti je isiwaliyi'i siupa t'oniye iyot'iyipi kiapo saka kijilas mases.
9'Yina Jesús yinayi'iji ape'e ti iyo'ate:
—Siuti ijiate ti jit'iotata siunie iyot'iyipi kiapo aska kijilas mases, nak it'imina ti jiliyeyi niwa Sinia' jlamtis. 10Siupa Moisés t'ipi iyo'ate: “Emi'n ni ana', siu'neje jana et”,#Ex 20.12; Deut 5.16 'yina iyo 'neje 'ate, “Siunie i'nio' imiesin'ni pa jinia' siu'neje jana jlet ka poye paka jiwet'iaye, nak je tiniaye'e pet.”#Ex 21.17 11Siu'neje ti jijwela' ka 'esieyiji ka wone'ate pa jinia' siu'neje jana jlet, napo i'nio': “Mam pet paka iyone ka iwijna'm pet siu'nie a'we'en, 'yina ti pajk'i ti ekiajle pa Sinia'.” 12Jak je iyoyiji siuti kia'iyo, jijwelaye ka 'esiek'i siunie ti je itis napo jiniewot. 13It'imina ti je woye lajaye niwa Sinia' jlamtis, 'yina ti niwaka jla'm ti inteliajayi ka kinieyi, t'oniye t'ipi papo aska kijilas. Paj ka ineyeyinie'e siunapo aska kia'lis tomi pijia'm. Je niwakata, 'yina 'loj 'neje siuniwa jiwoyeyi ti kia'iyo.
14Jesús sekyi'i ti tanayi papo i'nio', ti iyone 'ate:
—K'iuyek'i'm, tejnisiek'inie'e siu'nie jayo: 15Siuniwa tal kisie'e ti ijiojwa'm ni i'nio', je niwaka ka inkajyi'n ni i'nio' ka je 'esie jitieyi'i ni Sinia'. Jla'm ijiate jla'm siuniwa tajla'm ni jlosik ni i'nio' ti 'yakajyi'n.#7.15 Siojopa v. 16 inkio' lisajna' jlamt'iyijipe laje. Iyo'ate: ¡Siunie jik'iot tiojwa'l po', k'iuyi siu'nie!
17Siuti tajlayi papo i'nio', siojopo t'eyasajnas jla'am i'yasen'ne siupi ijio'we pa taka'neyasane, ti yinisi kiajwe japa 'wuk. 18'Yina isiujlie ti iyone 'ate:
—¿Kiakp'an jiwoyeyi pit je tijnisiek'i? ¿Je 'najanayi ti siunie tal kisie'e ti ijiojwa'm ni i'nio', je 'yakajyi'n ka nak int'emina ka je 'esie jitieyi'i ni Sinia'? 19Kajeyepa ti je ijiojwa'm ni jlosik ni i'nio', 'wenajliyi jla'am jana jits'i', sekyi'i ti ijliamayi. Jlam'ne Jesús nak ijwilata ti siuniwa inkas je niwaka ka int'emina ka je 'esie pa i'nio' ti itiujw. 20Sekyi'i ti iyoye'eje 'ate:
—Siunie tajla'm ni i'nio' jlosik, nak jla'm ijiate ti it'iojlinit. 21Kajeyepa ti jitiowiji, ka iyot'e 'ate ni jlosik ni i'nio', sek taj'le siunie: ti jitienkiujnieyejes je isis, ti ijiuski'lan'ni ni i'nio' asejnia kiak iyojliyi, inkajlajnaye, inkalankijnieye. 22Siunie 'nelijieye, siunie ti itiliaja pa k'iejliyi ti jikiecha jikimet, siunie iyoyi ni i'nio' ti je 'es, ink'eminkiye, siu'neje ni ti inisayi niwa jiniliaja wask'i'nelaja, siu'neje na ti yiyiji'ni pa jikiecha, siunie ti initonit. 23Siuti netia'n ni jlosik 'es, sekyi'i 'yakajyi'n ni i'nio' it'iminayi ti t'ojli.
Siojopa i'nioki tajle japa ajnat jikiecha, je 'yakakiu pa Jesús
(Mt 15.21-28)
24Sektaj'le ti tejeye'eje 'niji yi'i puwa isi'il yiji japa ajnat jle' iyo'ate Tiro. Siuti 'nes'ni, ta'ajimpe ti yamit kiajwe japa 'wuk, lapakawo ti je iyotaja ka ti'niejenaja paka tiwonaja, 'yina ijialasata wat paka iniwone ka inijweki'n. 25Je paja wat ti 'nesajampe siojopa i'nioki, jlase' japa jitiej je 'es, ti t'ijieyeyi. Sekyi'i t'akosjlete'l itiyeyijin kiajwe ja Jesús. 26Siojopa i'nioki sek je 'wet'e, siojopa ajnat Fenicia ti yiji japa Siria japak tajle. 'Yina wuj ti inip'elisine ja Jesús ka inojwa'n kisie'e siupa yiji japa jlase'. 27Jesús isiujlie ti iyo'ate:
—Ene kiu 'ate napo ti ijiat ti inlese ka inane kan'yekiujni'n, kajeyepa ti je 'esiji ka talaja jikiojyi ni jlak, ka sekjane'yi ka tiwenaja'm niwa alenas.
28Siojopa i'nioki iyo'ate ti isiujlie:
—Ijiatataja wek 'ni 'Yaka'niona, 'yina siuniwa alenasata, 'yina je iyojliyi pit ti itiujwk'i'ni niwa jikas jijwa'l napo jika'nionas ti iniuk'iji'n ti yi' kiajwe siojopa tejeyits'i ape'e.
29Ti Jesús ipi'ya ti kia'iyo, 'yina iyo'ne 'ate:
—Ka jla'm awo wat. Maj ka api, apili japa ase'. Siojo imosik yiji jlaja ase' tajli.
30Sekyi'i ti yama japa i'nioki, siuti 'nes, siupa Jesús iyone ti tajli siupa yiji, ijiate kiak iyo japa jlase' ti 'es.
Jesús ijwiejiet siupa je tipechi'ni siu'neje ti 'ne'liajliyiji'ni
31Sekyi'i ti Jesús yama'aja ti tal Tírojo, ti iniujwap japa ajnat Sidón. Paj ti yiye 'niji jlaja i'niat Galilea, ti yiji japa ajnat jle' iyo'ate “Itijwa'm Sikioye Isi'il”. 32'Yina sekyi'i ti tikiniejayi siupa i'nio' je tipechi'ni siu'neje ti 'ne'liajliyiji'ni, inip'elisinisi ja Jesús ka jikioye ne'n ape'e. 33Jesús ijwienjliyiji'n siupa ijioyiji pak i'nio', sekyi'i ti jijwuki 'yutiek'i puwa jik'iot tiojwa'l. Itime ti kiak iyone sekyi'i ti isimayi pa jlats'ilis ti 'yilink'i pa jipajnat pak i'nio'. 34Siuti ti i'yena poliyi, sekyi'i ti jiyel iyoma, iyonayi 'ate pak i'nio' t'ipi:
—¡Efata!
(Ti iyo 'ate, ¡Ni'najlinitia'm!)
35Pakayi'ne ti 'ajlak'iji'n puwa jik'iot tiojwa'l, siu'neje ti 'yakajak'i ti tamti, lapakawo ti 'es. 36Jesús ijwijla'm papo i'nio' ti iyone'ate:
—Ke sijwelanie'e.
'Wanjliyi kiak iyonataja, 'yina je iyoyisjliyi ti ijwilis. 37Lapakawo ti yisi'lietk'i papo i'nio', sekyi'i ti iyoyis'ne 'ate:
—¡Ijiat ti 'es wat siu'nie iyoyi, 'yina 'wanjlip'ane ka je impechi'ni pa ti 'yijene pi iyone ti ipichijien'ni, siunie 'ne'lia kiak iyojliyi ti 'yijene ti yamtijie'n!
လက္ရွိေရြးခ်ယ္ထားမွု
Marcos 7: CRT97
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nuevo Testamento en Chorote © Sociedades Biblicas Unidas, 1997.