Marcos 2
2
Jesús ijwiejiet pa i'nio' je t'onk'i
(Mt 9.1-8; Lc 5.17-26)
1'Nak nojwaja'm puwa jlomas, Jesús yapilie'eje 'niji jlaja isi' Capernaum. T'ijieyeje wek ti yi'ni 'ate, 2je paj'ne ti ta'a ti 'loj papo i'nio' ikapajle jak je iyoyiji paj ti laja 'wetayi kiajwe japa 'wuk, jlam yamtijliyi siupi inka'niye ti 'es. 3Sekyi'i 'nes'ni'ne siupapo ijniujlits'i i'nio' ti nojwits'i siupa je t'onk'i ti isimis kiajwe. 4'Yina ti je i'yakanisia'm papo i'nio' ti je pini', i'yujlisi'ne ape'e japa 'wuk sekyi'i ti 'yajlinitieyisi ape'e 'yakama'a siupi yi'i ja Jesús. 5Jesús i'wi'in ti jitienkiujnieye po' pa i'nio', sekyi'i ti kiak iyonayijipi:
—Yas, siuniwa akeyis netia'n.
6'Yina ti sekyi'i ti yik'iji'n papoka taka'neyasane pak Moisés jika'neyasajnaye, jitienkiujnieye iyonisi 'ate ti yinisi'ni jikiowe'e, ti ipi'yayisie, ti kia'iyo: 7“¿Yot'iyi'ni ti ji'lij kiak iyone? 'Yina ti siunie iyo ti tamti, ket'i jwel ka je inta'yi ilia'm pa Sinia', ijwienjlijie'e jla'am pa Sinia' ti 'yijene pi iyone ti initiajnat puwa jikeyis pa i'nio'.” 8Jlam'ne ja Jesús 'yijene ta'a siupi jitienkiujnieye papo i'nio', sekyi'i i'yasam'ne papo ti iyo'ate:
—¿Yot'iyi'ni ti astankiujnieye kiak jiwonayi? 9¿Tepat'e yi'i siupa je istieyiji, nakat'e siunie ti jayo'ate, “Neppijia'm, kim kiajwe ni ajotik, maj askiujni'n”, ni'ne ka nakaye ni siunie ti iyo'ate, “Netia'n ni ake'”? 10'Yina it'imina ti ja'winki'nase'm ti siu'nie I'nio' Jlas jijweye po' ape'e 'ni ajnat, ti initiajnat niwa inkeyis.
Sekyi'i ti kiak iyonayiji paka i'nio' je t'onk'i:
11—A'am ti jayo'na 'ate ti jajwi'la'm, neppijia'm, kim kiajwe ni ajotik, maj ka api.
12Pakajanik'ipe ti siuti yiyik'i wek siupa tiwonaja, sekyi'i yaka jla'm iwo, ti iniyejempe pijia'm, 'yina isimajampe kiajwe pi jlotik ti yamajampe. 'Yina wikie'eyi papo i'nio' i'wi'in, sekyi'i jnots'inayijits'i'ni jiwek sekyi'i ti iyunitisie pa Sinia', ti iyoyits'i 'ate:
—Je kiak iyo paka k'iejliyeyi ka 'wina.
Jesús tane pa Leví
(Mt 9.9-13; Lc 5.27-32)
13Paj ti Jesús yamajampe ti ijio 'niji yi'i siojopa tewuk iliyi, 'yina jikiusk'i jlam 'yiyasanjlijyi'n papo i'nio' ti ijioyi. 14Jak je iyoyiji siuti ijliasajampe'eje, sekyi'i ti i'wina siupa i'nio' jle' iyo'ate Leví, Alfeo jlas, yi'i siupi yi'i'ni ti t'ajlataja'ni papo i'nio' ka inkat'i'n ape'e puwa inkat'ijnieyejes ti ijioyi'ni pa anechiyas yi' Rómaja. Jesús tane ti iyo'ate:
—Naj, na'm ijyik'i.
Takasit'ne pa Leví, sekyi'i yamak'i.
15Pakajanik'ipe siupa ti Jesús ti'yekiu'n ji'wet'e pa Leví siu'neje japo t'eyasajnas, 'loj siupapo isi'm ilia'm puwa inkat'ijnieyejes siu'neje papo ti titiant'ieki ti ijiate ti je isis, siu'neje papo yamk'ijin'ni, papoka ti isijwane. 16Jak je iyoyiji siupapo Fariséojos siu'neje papo taka'neyasane pa Moisés jika'neyasajnaye, ti i'winayis ja Jesús ti isijwane papok i'nio', sekyi'i i'yasisin'ne japo t'eyasajnas ti iyonisi 'ate:
—¿Yot'it'iyi'ni ni aska anechiyasa' ti isijwane napo isi'm ilia'm niwa inkat'ijnieyejes, siu'neje napo i'nio' jike' po'?
17Jesús ipi'yayi sekyi'i iyo'ne 'ate:
—Siunapo lajk'i pa ka inlate, je isitia'n ni inkakiewo, 'yina jlampet siunapo je isis napok jla'm ijiate ti isitia'n. Je napok ka iniame siunapo isis, 'wenajliyi siunapo je isis napok aname.
“¿Yot'iyi'ni pet napo 'eyasajnas ti je ininel'liajaniti'n?”
(Mt 9.14-17; Lc 5.33-39)
18Pojompe japa jloma siupa Juan inajiejnawo t'eyasajnas siu'neje papo Fariséojos t'eyasajnas pet ti ininel'liajaniti'n. 'Yina papo i'nio' ti i'winayis, sekyi'i ijioyisi'ni ja Jesús ti i'yasisi'n, ti iyonisi 'ate:
—¿Yot'iyi'ni pet napo 'eyasajnas ti je ininel'liajaniti'n, jlam'ne pet napo Juan t'eyasajnas, siu'neje napo Fariséojos t'eyasajnas je 'yaka'm ape'e naka?
19Jesús isiujlie ti iyo'ate:
—Tepi iyo siunapo i'nio' ijioyi siunie k'iejli tijwa'yi ti iyo jiliakijnieyeja', ¿mi janinel'liajaniti'n ti siuti sek yijli'yiji? ¡Jeyi kat'aja! 20'Yina ijiatjliyijna'a jla'am ka tikinietaja ni siunie janjwa'yi, jiwekie'ajana'a ka ininel'liajaniti'n.
21“Ent'a ji'wena' pa ti ji'wuye ji'yusis ip'ioneje pa lotakinie ti ink'ie'. Kajeyepa siunie tip'onaja ti ink'ie' yapijlia'm ti tilijikieta, sekyi'i ti ijiatayiji ti its'isk'i siunie ji'yusie, 'yina ti je to'm ilia'm. 22Ent'a ja'wena 'neje siunie at'es ti ink'ie' ka tisiayek'iji'n siuniwa jijwa'al ti 'nejes ti ji'yusis. Kajeyepa ti tosiyetaje sekyi'i yikisatajamk'i niwa jijwa'al, sekyi'i ti tisaye'ni ni at'es, 'yina ikajyina ni at'es, kia'iyojliyi puwa jijwa'al. At'es siunie ink'ie' tejeye pet siuniwa ti ink'iejyis jijwa'al ti 'nejes.”
Sinia' 'yotate siojona jloma ti i'nio 'wanjlijyi'n, ka 'esieyi napo i'nio'.
(Mt 12.1-8; Lc 6.1-5)
23Siojopa jloma ti i'nio 'wanjlijyi'n, Jesús iniu kiowik'i pa inwomik. Siuti t'iskiunk'iji'n siojopo t'eyasajnas i'nijmajliyi pet ti isiojwits'i puwa ipiatatiok t'ejes 'wanjle'e jla' ti jiwats'o. 24'Yina ti je 'esiji ti Fariséojos i'winayi, sekyi'i ti iyonajanisipe 'ate ja Jesús:
—'Yene siapo 'eyasajnas. ¿Yot'iyi'ni ti iyoyisi siunie ti je 'esiji ka tiwoki siujlie'e jloma ti i'nio 'wanjlijyi'n?
25-26Jesús iyo'ne 'ate ti isiujlie:
—¿Jet'i jlamtijiena'ijyi siunie iyot'iyipi siupa anechiyas t'ipi David? Siojopa jloma ti Abiatar ti jla'am ti iyo pa'yi jika anechiyasa' ti wuj. Yit'iyipe japa jloma ti David lajk'i paka intojwis siu'neje papo jla'yis, 'yina inil'liajne'n. David 'yuyi siupuwa woyejes yi kiajwe japa 'najla'wet, siupuwa ti t'otataje k'iye pi Sinia', sekyi'i ti ikojniene papo jla'yis,#1 S 21.1-6 siupuwa woyejes ti papokata jla'am siupapo pa'yijis wus ti 'esiji ti itiujw.#Lev 24.5-9
27Jesús itiujmate ape'e ti iyo'ate:
—Siuti Sinia' jla'am ti ilisane siojona jloma ti i'nio 'wanjlijyi'n, 'yaka iyojonk'iye ka 'esieyi napo i'nio'. 'Yina je ka siuti Sinia' ilisanayi napo i'nio' ka siojona jloma i'nio 'wanjlijyi'n ka 'esieyi. ¡Je'e! 28Jak je iyoyiji ti siojona jloma ti i'nio 'wanjlijyi'n kia'iyo pit yi kiajwe ni jijweye ni I'nio' Jlas.
လက္ရွိေရြးခ်ယ္ထားမွု
Marcos 2: CRT97
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nuevo Testamento en Chorote © Sociedades Biblicas Unidas, 1997.