Mateo 26
26
Judíojos initotisi wita'm ape'e pa Jesús ka inkimits'i
(Mc 14.1-2; Lc 22.1-2; Jn 11.47-53)
1Jlampa itimayi siukia iyo ti takamtijnie'n, sekyi'i Jesús iyonayi 'ate japo t'eyasajnas ti ijwijla'm:
2—Mejla'ala ka je 'najanayi paka awonayi, ti siojona Judíojos jiliakijnieye Pascua times jiwek niwa jlomas netia'n ka ineyena'a isia'm.#Ex 12.1-27; Deut 16.1-8 'Yina janak siojona jloma ti ja tekiajla ni I'nio' Jlas, ti ja tik'iejwata'a pijia'm jana cruz.
3Kiwak siukiwa jlomas ti pa'yijis jika anechiyasas, jla'yis napo kijilas, ininenisi 'wet'e ja Caifás siojo jlamt'iyiji ti wuj japo pa'yijis jika anechiyasas. 4Iniwakajlanitis ta'a ti inijlok'ijin'ni siunie janwoyisi ti jankimits'i ja Jesús ti iyo ka inlanis. 5Iyoyis'ne 'ate:
—Je 'esiji ka iyinajaje janak siliakijnieye jana Pascua, 'lojwinie'e ka jlampak iwots'i'ni napo i'nio'.
Siojopa asejnia t'ipi ti isia'yi ape'e pa Jesús pak a'la' jlokiet'e ti jini inkajk'i
(Mc 14.3-9; Jn 12.1-8)
6Ti Jesús yi' Betániaja, yijap jak i'niope jle' iyo'ate Simón, tiwonaja'ni 'ate Inkiso'l Jitio' Lianik. 7'Yina jakayi'ne ti 'nesa jlajak i'nioki ti itiun'ni siojo a'la' jlokiet'e' ti jini inkajk'i, yiji siujlieja jlate ti sisamak. 'Yina Jesús je itime ti ti'yekiu'n, sekyi'i siujlieja i'nioki yami'ni ti isiajia'm jla'a jletik, jak siojo a'la' jlokiet'e' jini inkajk'i. 8T'eyasajnas i'win'ne, sekyi'i ti jwesisa', iyoyis'ne 'ate:
—¿Yot'iyi'ni ti jla'm isia'ni jiwek jlam'ne t'ojni? 9Jlam'ne ka tiwena k'iye napo p'ijliusis.
10'Yina ti Jesús 'yijene ta'a siupuwa jikiojwa'l iyone, it'imina'ne ti iyone 'ate:
—Ena'yate, enayi 'ate siunie iyonk'i. 'Yina wuj ti 'es siunie iyoyi. 11Napoka siunapo p'ijliusis jlajma kiak jawo ti jane'ni aska kiowe'e. Jlampet ti ya'am je itioyeyi'i its'ioye ti a'yasap. 12Siunie iyonk'i siujlie'e i'nioki, ti isia'yi itipe'e ni a'la' jlokiet'e' ti jini inkajk'i, kajeyepa ti jawakajla ta'a siunie janwo ti ja titijik its'ioye. 13Siunie jayoyi ti jajwi'lase'm, ijiatk'i, ti ajnatpe pa jane'yi papo ti janamtiyisi siu'nie inka'niye ti 'es, ja tijwelajape pet siunie iyoyi siujlie'e i'nioki ni iyonk'i.
Judas itime siunie iyo ti janwe'en pa Jesús
(Mc 14.10-11; Lc 22.3-6)
14Ijwienjli'ne siojopo itijwa'm niwa sikioye times tom'niji Jesús t'eyasajnas, jle' iyo'ate Judas Iscariote, ya'am ti ijioyi japo pa'yijis jika anechiyasas, 15sekyi'i iyone'ne 'ate:
—¿Tepi k'ie' siojopa jiwoyetaja kawenak'i'm, siuti jayikiaj'lase ni Jesús?
Iyoyis'ne 'ate ti isiujlieyisi:
—Tréintaja siuniwa wikijniest'ejes.
Yinayis jikiojyi.
16Sek taj'le'ne ja Judas yamjliyi ti iyojyi'n siupa ka 'esiejape'n ka nekiajle japo pa'yijis jika anechiyasas ja Jesús.
Jesús ti'yekiujni japak Pascua ti isijwane papo t'eyasajnas
(Mc 14.12-21; Lc 22.7-14,21-23; Jn 13.21-30)
17Ti yiyeyi jakiak jloma Judíojos jiliakijnieye, siojona jloma ti jijlinkitis je tenajats'i niwa woyejes niwa jikas. Siojona jloma inia'ne janak inlakijnieye t'eyasajnas ijioyi'ni ti iyone'ate:
—Jla'ak Pascua jla'a awakia'm, ¿tempi ji'wet siupa jleminta ka iyinaja'a ka iwiakajlanitie ta'a siupa jatojw?
18Iyo'ne 'ate ti isiujlie:
—Maye ka ajlonieyi siunie i'nio' yiji jana isi', wonayeyijna'a 'ate ka awayetajanie'e, “Iyo'ate ja inka'neyasajnawo, Je pa sitiojwa'a siojona 'yaka jloma. Jayine'ne a'wet'e siujlie'e Pascua ti ja'yekiujni ti jasijwane napo 'yiyasajnas.”
19'Yina yam'ni'ne, je iyo ka inkamits'i ape'e siukia Jesús iyone, ti ijliuye ka inlesanisi kia jlak. Itimisiji ti yapilieyisi ts'e yi'i ja Jesús.
20Ti ajnaja Jesús sek ijio'weje'n jlajak isi', jla'yi japo itijwa'm niwa sikioye times tom'niji t'eyasajnas. 21Jlampa ti'yekiunieje'n, Jesús iyonayi 'ate:
—Ijiate siu'nie jayoyi, ti ijwienjli 'ni ja siwe'en ti asa'am.
22Sekyi'i ti wujwape ti jijliak'ali poyis, jla'm ininekiajlayisi ti iyoyits'i 'ate:
—'Yaka'niona, ¿je 'yu'we ka je yamat'e?
23Jesús isiujlie ti iyo'ate:
—Siunie i'nio' inijnojlietk'i 'ni woye ti 'otia'm 'ni yak, janakaye ti ja siwe'en.#Sal 41.9 24Siunie I'nio' Jlas janejiam'ne siunie jawo ti janilayiti siunie ja jiliayeja' ti ja tiliana, iyo jla'am niwa inamtis t'ipi. 'Yina ¡jap'ijliusieja' nak siunie ti janwe'en, kajeyepa ti jitis japoye! ¡'Est'itiejepi ka laja ape'e 'ni ajnat!
25Sekyi'i Judas, siunie janwe'en, iyo'ne 'ate:
—Inka'neyasajnawo, ¿ent'a jayama?
Jesús isiujlie ti iyo'ate:
—Jitime ti jinijwe'el.
Jesús kiak iyone ti ilisane jakia Saka'niona Jlak ti 'Es
(Mc 14.22-25; Lc 22.15-20; 1 Co 11.23-26)
26Ti ti'yekiunieje'n, Jesús isimayi jakia woye, sekyi'i ti jinikanitieyi iwinayi pi Jinia'. Itime ti its'isajaja'n, iwinak'i japo t'eyasajnas, ti iyone 'ate:
—Siu'nie towa, 'nak 'yajwes.
27Paj ti isimayi'ijyi jlaja inat jikie' ti at'es yiji, jinikanitieyi iwinayi pi Jinia', sekyi'i ti iwinak'i japo t'eyasajnas ti iyo'ne 'ate:
—'Yayejyi, nitejwayi'ina'a. 28'Nak i'yoyis ti tisa'ni ti ja 'lojwa napo ja'maniti'n, janetiajnat ni jike' iyo. Naka ti 'yakajanit siu'nie iyo ni Inia' ti jlam je iyoyi.#Is 53.12; Jer 31.31-34 29'Yina jajwi'lase'm ti ja ke poye japa ka jlomaye ka yikiajle'e ka isijwa'nase ka 'yaki ni at'es, ijiatjliyijna'a jla'am ka iwiektana'a ts'iji yi'i ni Inia' ti iyo anechiyasa', jiwekie'ejana'aja ka isijwa'nase ti ja'yaki ni at'es ni ink'ie'.
Jesús ijwil pa Pedro ti janjwel ka je intant'ieje
(Mc 14.26-31; Lc 22.31-34; Jn 13.36-38)
30Takelisienaja'n ti yinits'i kiwa sálmojos. Itime ti yama'ni ti ijioyisi jlaja tikijnaki Olivokiet. 31Jesús sekyi'i ti ijwijla'm ti iyone'ate:
—'Yejne'n, siu'nie ajnaj ja inwikie'eyeyi ti ja leyek'i. Iyo niwa Sinia' jlamtis ti iyo'ate, “Jalia'an ni sontas jiwo, siuniwa jiliajwas janitiajnate'n ape'e 'ni ajnat.”#Zac 13.7 32'Yina siuti ja siniujwana kisie'e ti ja tiajla'm ni a'no', ja si'wena ts'iji Galiléaja, kajeyepa ti sek ja iniajni.#Mt 28.16
33Pedro iyo'ne 'ate:
—'Wanjliyijna'a ka kia'iwo ka poye papoka inle'a, ya'am anijwe'la'm ta'a ti ja ke ili'a.
34Jesús isiujlie ti iyo'ate:
—Ijiatk'i siu'nie jayoyi ti jajwi'il, ti siu'nie ajnaj ka majleyetajna'a ka inap ni ajwenta, janajapejayiji ti jajwel ka je intant'iek'i.
35'Yina Pedro isiujlie ti iyo'ate:
—'Wanjliyijna'a ka siliaye inok'i wita'm ka kaslanaja'n, 'yina je kia'iyonie'e ka iyo'ate, “Je sitiant'ieje.”
Ijwienjli ji'lij iniuyi'i japo ijia Jesús t'eyasajnas ti kia'iyo.
Getsemaní Jesús sekyi'i ti iyo t'ajlayeja'
(Mc 14.32-42; Lc 22.39-46)
36Sek taj'le ti yama'aja ti teje 'niji yi'i ja inwasok jle' iyo'ate Getsemaní, t'eyasajnas jla'am japo jla'yis. Yiyi ti ijliuyeyi japo t'eyasajnas ti iyone 'ate:
—Weyets'iji'n kiu' naka'a, jajio ts'e jayo 'yejlayeja'.
37Ya'asi ja Pedro siu'neje japo Zebedeo jilis times jakap'ane ti iyoyi ki iyo, ti iliate ti je inkaj'ni, jla'yi ti jijliak'ali po'. 38Sekyi'i ti iyo'ne 'ate:
—Je jiwekie'e siu'nie ti alate ti yik'i. Si'wena ti je ama'a, 'nak 'wanjliye'yi kiu', ká amayets'iji'n pet.
39Yama wat ts'iji t'akosayi wek seka'a, jitiokiots'i 'yitayi ajnat'e ti inip'elisini pa Sinia', ti iyo'ate:
—Inia', ka poye pi jikiecha paka iniwone, sijwajiete siu'nie yat ti pajyi, 'naka 'nak iliaye jawo ti jats'a'al. 'Yina 'esiji ka ama'a'm ti jantaj'la, je 'esiji ka yama ka intalk'i.
40Itime ti yapilieyi siojo yi'i japo t'eyasajnas, yiyi ape'e ti mawat je t'ok'iji'n. Iyone'ne 'ate ja Pedro:
—¿Ka jwajla'ajat'i wat paka woyeyi, ka je amayets'iji'n kiu wata'a, kawo'ate ti já ama'a ya'am? 41Jwajla'a paka woyeyi, ká amayets'iji'n ja 'nakayeyijna'a ti ja ke injlana'ni ni inkajejlasaye. Ts'ajane pi awone ti jlajlasa ka awoyeyi niwa yamtis, ijiatjliyi je sikiwita siunie asosik jiwonayi ti 'es, 'yina 'nakayi jla'am niwa 'asjwes iyoyi, ti je jitiuma'yi ilia'm naka ti sikiwit'ase'm.
42Sekyi'i ti yama'aja ti iyo t'ajlayeja', jakayi ti timesieyiji ti yam'ni. Iyo t'ajlayeja' ti iyo'ate:
—Inia', siuti kia'iyo ja lajak'iyi paka iniwone ka ijwieji 'na iliaye ti jats'a'al, 'yina kia'iyo lapakawo ka 'esieyijina'a ka ama ti jantaj'la.
43Itime ti yapilietaja'ijyi japo t'eyasajnas, 'yina kia'iyojliyi imiayek'ijijne, lapakawo ti je itieyisi pi jika ijnieti. 44Sekyi'i ti yama'aja ti iyo t'ajlayeja'. Yikiajle'e'ni siukia t'ajlaye iyo ti 'nelanjie'e, jlampa najapajayiji ti yam'ni. 45Iliyi ti iyo t'ajlayeja', yapilie'eje ts'e yi'i japo t'eyasajnas, sekyi'i iyone'ne 'ate:
—¿Mam pa kawoyeyi, jikiniejlip'ane ti jimayets'iji'n, jla'yi ti jlajapats'iji'n? 'Yejne'n, yiyi siojona jika jloma ti siunie I'nio' Jlas ja tekiajla kiojia'm napok siunapo i'nio' inkeyis jiliajnis. 46Neyets'i pijia'm, naja'ni. 'Nes ni siunie i'nio' ti ja siwe'en.
Jesús tikima'a
(Mc 14.43-50; Lc 22.47-53; Jn 18.2-11)
47Jesús je iliyi ti takamtijnien'ni, sekyi'i ti 'nesa jak t'eyasanik jla'am tajla'm siunapo itijwa'm niwa sikioye times tom'niji jle' iyo'ate Judas. Namk'i napo i'nio' 'loj siunapo pa'yijis jika anechiyasas napok jikio' jlele, siu'neje napo kijilas. Iyoyis jitisajnatis jitioye, ijia napo iyo jik'iulisie'. 48Judas jlam'ne pajk'i ta'a ti initeme, ti ijwijla'm siupa janwone, siuti ja ineyisi wek, ti iyone 'ate papok i'nio':
—Siupa jats'iu k'iolo'we, japakaye, sekjane'yi ka akimaye'yina'a.
49Ijiatjliyi yamitayipi ja Jesús ti iyone 'ate:
—¡'Es 'ni ajnaj, 'ni inka'neyasajnawo!
Yiyik'i wek ti kia'iyo, ti its'iuye k'iolo'we. 50'Yina Jesús isiujlie'ne ti iyo'ate:
—Isiecha, jlam woni'ni 'ate siunie jawonk'i.
Ijiatjliyi ijliasayisi sekyi'i ti isimayits'i.
51Jakayi'ne ti siojo kia'iyo yamk'ijin'ni ja Jesús itiona kisie'e ni jitisajnat ti ijwieje jla'a jik'iote ja pa'yijis jika anechiyasas jikawo. Jik'iote ilie'ne. 52'Yina Jesús iyone'ne 'ate jaka:
—¡Ekialk'i ni atesajnat jana jiwe! Siunie 'yakawisa'n ni jitisajnat, nak ja sijnat ja tikienaja pet. 53¿Jijwelt'itie ka je 'yakajli pet ka iyo ka 'yejle ni Inia', ka injlok'i napo jijliujwajnas poli jlele ti 'loj? 54Siut'itie ka kia'iwo, ¿tepat'e jota iwo niwak inamtis ti ijwil siunie iwit'ia, siu'nie ajyi?
55Sekyi'i ti kiak iyonayi japo i'nio':
—¿Yot'iyi'ni ti jiwoye astesajnatisie', jla'yi ti jiwoye ask'iulisie', ti jiniamak'i, siwonayeyi 'ate ni i'nio' kajlajnata? Jlam'ne wikie'eyi kiwa jlomas ti si'wenayeta'ni ka jakayetaja ka akimak'i'm. 56'Yina kia'iyo kajeyepa ti kiak iyoyi niwak inamtis t'ipi, iyot'iyipi papo Inia' jijwejlanawos t'ipi.
Jakayi'ne ti lajk'i pa ka 'wanjliyejap japo t'eyasajnas ja Jesús, 'yina yam'ni ti i'yiltajne'n.#Mt 26.31
Jesús tena jitieyi'i papo pa'yijis ti ijnosikis jiwos ti jlameje
(Mc 14.53-65; Lc 22.54-55,63-71; Jn 18.12-14,19-24)
57Jesús tikinieje ji'wete ja Caifás, pa'yijis jika anechiyas ti wuj. Yame jla'am siojopo jiwos pet siunie Moisés jika'neyasajnaye, siu'neje japo kijilas ti ijioyisi siojo ininenisi'i'ni ti initotk'i wita'm. 58Pedro je iyo ka inkienik'i ti ijwil ka inekk'i, paj ti yamitayi ja jika aj'leje'n ja pa'yijis jika anechiyas ti wuj. Ti iyojonk'iye ka in'wenaja siupa janwo ts'iji jlaja, it'imina ti 'yuyeyi yijin'ni ts'e yi'i napo tokis ti i'yena jlaja 'najla'wet.
59'Yina siojopo pa'yijis jika anechiyasas, siu'neje japo ijnosikis jiwos, wikie'eyi ijyijlitayisi ti i'yasis'ni pi k'iejliyi pi ijiutkinisi ape'e, ti iyoyisink'iye ka poye pa ka intajlatisie, ka inlanisie. 60Ijiate 'lojwata japo ti itiejkinisi pi jitis ijwil ka woyi, 'yina je i'winis paka iwonisi, kajeyepa ti je ijiatk'i siupi ijwil ka woyi. Paj ti 'nesa'nijne japo times, 61japoka'ne japo ti iyo'ate:
—Iyope 'ate 'nak i'nio', “Ts'ajane pa awone ka yikial pijia'm siujlie'e Sinia' ji'wuk, siuti janitiajnate'n, jlomas janajapeja ja neyi ka wakajlana'a.”#Jn 2.19
62Sekyi'i takasit'ne ja pa'yijis jika anechiyas, ti iyo'ate ti i'yase'n ja Jesús:
—¿Ma lajk'iyi paka a'leja'? ¿Jlam'ne siunie totkinaja atepe'e?
63Ijiate Jesús je isiujlie.#Is 53.7 Yikiajle'e 'neje ja pa'yijis jika anechiyas ti i'yas'ni ti iyone 'ate:
—¡Siuti awak'ne, jitieyi'i pa Sinia' ti jla'am ti je paj ka inetia'n, awoktajank'iye ka ajwelts'e'm siunie ijiatk'i! ¿Ma amt'e siunie Injwajieti siunie Sinia' jijliujwanik? ¿Ma a'm Sinia' Jlajts'a'm?
64Jesús isiujlie ti iyo'ate:
—Siunie jiwone. Jajwi'lase'm 'neje siu'nie, ti je ijiat ka je a'wena' ni I'nio' Jlas ti janejyi'n 'nijiye jijweyeje ni Sinia' ti lajk'ipa ka ijnojliji, siu'neje ti jana'am ti janejyi jana poli.#Sal 110.1; Dan 7.13
65'Yina siojopo pa'yijis jika anechiyas its'isatayisk'i kiwa ji'wuye, lapakawo ti jwesis. Iyonayi 'ate japo ijia:
—¡Ijiate wat ti iliaki pi Sinia'! ¡Sek jla'a, je asetiana paka jikiechaye ka na'am ka injwel paka jitis inwo! ¡Jipe'yaye ala ki iyo niwa jlamtis jiniliaja! 66¿Tepi jiwoyeyi pit?
Iyoyis'ne 'ate ti isiujliesi:
—Jitis po'. 'Esiji ka tiliana.#Lev 24.15-16
67Sekyi'i ti ijwiets'iunayis'ni jitiokio'we, siu'neje ti it'iowasisi'ni. Po' papo ipiejes'ni, 68ti iyonisi 'ate:
—¡Siuti a'am ti Injwajieti'a'm siunie Sinia' jijliujwanik, ¿ten siupa impaj?!
Pedro ijwil ka je intant'ieje pa Jesús
(Mc 14.66-72; Lc 22.56-62; Jn 18.15-18,25-27)
69Pedro yijin'ni kisie'e, je 'esiji ti tajla 'niji jlaja i'nioki ti inkawoki ti ijioyi, sekyi'i iyone'ne 'ate:
—Am 'neje ti jlek'ijin'ni jaka Jesús Nazaret jlele.
70'Yina Pedro inikakiu'ne ti yine jitieyi'i japo i'nio', ti ijwil ka je intant'ieje, ti iyo'ate:
—Ijiat ti je ts'ajane paka iyone siupa jijwel'ni.
71Sekyi'i Pedro ijliasayi ja 'wuk kiwet, jakayi ti siujlieja jikiecha inkawoki ti i'wina pet, kia'iyojliyi ijwijlaja'm japo ijia ti iyo'ate:
—'Naka siu'nie i'nio' yamk'ijin'ni 'neje jaka Jesús Nazaret jlele.
72Pedro ijwila'aja ka je intant'ieje, sekyi'i ti ijiatayiji ti ji'lij 'yitk'i ti je takalakijie'n, ti iyo'ate:
—¡Je sitiant'ieje pak i'nio'!
73Je pajayi'iji wat ti 'nesa'nijne japo i'nio', kia'iyojliyi ti iyone 'ate:
—'Yaka ijiatayi ti am'neje ti a'yis napoka. Je insta ti Galilea jlele'a'm, jla'yi ti je istie' niwa amtis jiwone.
74Jakayi'ne ti Pedro je ilisanayiji, ti jwesie'ni ti kia'iyo ti ijwil ka je intant'ieje.
—Ejlowek ka Sinia' intajlatk'i'm siuti kiak jawo ja ke ijiatak'i siunie awoyi, ti awo'ate, “Je sitiant'ieje”.
'Yina yiyik'i wek ti kia'iyo, yapa ja ajwenta. 75Sekyi'i ti Pedro jiwekie'eja ti jitiej wujk'i siojo iyo ja Jesús, ti iyo'ate, “Ka majleyetajna'a ka inap ni ajwenta, ja najapajayiji ka nikakiu'ni ti jajwel ka je intant'iek'i.” Pedro sekyi'i ti yama ti tal seka'a, yap kajeyepa a'tieje pi iyo.
လက္ရွိေရြးခ်ယ္ထားမွု
Mateo 26: CRT97
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nuevo Testamento en Chorote © Sociedades Biblicas Unidas, 1997.