Mateo 24
24
Jesús ijwil japa 'najla'wet ti janetiajne'n
(Mc 13.1-2; Lc 21.5-6)
1Jesús ti iniuye kisie'e ti tal kiajwe jlaja 'najla'wet, k'iejli pi iyoyeyi ka inek, ti 'nesa'ni japo t'eyasajnas ti ijioyisi, ti iyoyits'i 'ate ti i'yenis'ni jawa 'wukiu'ul yi'i jlajak 'najla'wet:
—¡'Yaka'niona, isis wat 'niwa 'wukiu'ul yiji jla'a 'najla'wet!
2'Yina Jesús isiujlie'ne ti iyo'ate:
—¿Ji'wena' siu'niwa 'wukiu'ul? Ataj enayijna'a 'ate siunie jayo, ti ja lajak'i japa ka 'wanjliye ape'e niwa ijia siuniwa sisajas, jano'we ti janwasits'i janetiajne'n.
Siuniwa wask'i'nelaja jawo ka majletieje ka ineyi ni jlaj jane'yi 'ni ajnat
(Mc 13.3-13; Lc 21.7-19)
3Sekyi'i ti yama'ni ti ijioyits'i ape'e jlaja tikijnaki jle' iyo'ate Olivokiet. 'Yina ti 'nesa'ni Jesús siojopo t'eyasajnas iyonisi'ne 'ate ti i'yasis'ni:
—Jwelkiamts'e'm kiu', ¿tepat'iyi japak jloma ti kiak jawo? Siuka je tojwata'ana'a japak siojopa jloma ti ja apimet, ti ajnat jano'we, ¿ten siupa jana'an ti ja'nakaj?
4Jesús isiujlie ti iyo'ate:
—Joskiyeyijna'a, 'lojwinie'e ka ink'emijieta. 5Kajeyepa ti ja ke piniye napo ti jlajma initeyine wek ki yi' ijio'we, ti janwoyits'i 'ate, “Ya'am ti Injwajietik'i'm siunie Sinia' jijliujwanik.” 'Yina ja ke piniye napo i'nio' ti jank'emijiete'n. 6Ja ajieyeyi ni inwak ti janejyits'i niwa ajnatis je tose siu'neje niwa ajnatis ti je jnanjliyi, 'yina 'esiji ka 'otale t'onitienie'e. 'Yina jlam kiak janwo 'ni ajnat, siuniwa ja'nakaj janak jloma. Jlam'ne je yijliyi'ijyi janak jloma ti jano'we 'ni ajnat. 7Napo i'nio' siunapo yi' ape'e 'ni ajnat janilajne'n ti janapits'i wita'm. Siunapo anechiyasas kiak janwojliyi jantats'i wita'm. Nel'lias japoye ape'e 'ni ajnat. Siu'neje ti ajnat ti'wesi ja pansisak'i. 8Niwaka'ne siuniwa jawo ti ja 'nelanjie'aja ja jlajlasa napo i'nio', jawo'ate iyo jana asejnia ti k'iejli inilatata, ti janejyi'n ni jlas.
9“Ti asa'am ja inekiajlayi siunie ti ja anilayitieyi, ja inlanajajyi'n asa'am ti jiniamajyin'ni ijyik'i, naka 'neje ti jant'emina ti ja tini'wajak'iase'm. 10Janak siojona jloma ti ja 'lojwa napo i'nio' janlek'i, janetiajnat nak jitienkiujnieye ti 'es. Ja ke insesk'i wita'm kajeyepa ti ja ke ini'nama. Ja kiajatajak'i'ni jawopi pa janekial pa ji'niayi ijwienjliyi, siupapo ijia ti ne'waja'm. 11Sek jane'yi'ne ti ja 'nakaj napok siunapo i'nio' ti janjwel ka Sinia' jijwejlanawosa', ja ke piniye napo i'nio' jankajmank'iji'n. 12'Yina ti ja wujwa ni siunie je 'es ti japoye, ja 'lojwa siunapo talk'i pet, janleyisi siunie iyo ti ininemijne'n. 13Ja jlama pet siunie i'nio' ti ja ke k'asa'a, siunie iyo ti je sakakiu, 'nak janjwa'. 14Jlampet siunie inka'niye ti 'es ti ijwil ki iyo nak Sinia' jika anechijiayas jantej'w ape'e 'ni ajnat ti ja tijwelaja ape'e, ja 'nakayeyi ti wikie'eyeyi napo i'nio' yi' ape'e 'ni ajnat jampe'ya pet. Jiwekie'ajana'a ka ajnat ino'we.
Siunie ti ijiate jla'am ti ja injlak'aliye
(Mc 13.14-23; Lc 21.20-24)
15“Ja'wena' siunie pini' jloniye jwesie'e, siunie ijiate ti je 'es, Sinia' jijwejlanik jiwo Daniel ijwilt'ipi, yi'i jana Sinia' ji'wuk ti ijiate jlam ti 'es.#Dan 11.31 (Am ti 'najane ti jlamtijie'n ni imp'esinik, tejnisk'i niwa inamtis). 16'Yina siuti janeyi janak jloma, siunapo ji'wet siujlie'e ajnat Judea janekie'nina'a ti ja 'yiltane niwa tikijnakiyis. 17Siunie ja ke int'eki ape'e jana ji'wuk siojona tomi pijia'm, je 'esiji ka inapi ajnat'e ka inapili puwa jikijmatis, ejlo wekie'e. 18Siunie yi' jiwasokia'm ja ke inapili puwa ji'wuye ji'wete.
19“¡Janak siojona jloma ti ja p'ijliusisie napo asejnia ti isiu'ujniejne'n, siu'neje napo ti je iliyi ti itipisiejne'n napo jilis sajmela'aja'n! 20'Ajlayi ni Sinia' ka je intajajam'ni siojona jloma ti wi'yitipata, siu'neje jana jloma i'nio 'wanjlijyi'n. 21Kajeyepa ti japoye na injlak'aliye, ti ja wujwa ti ja a'tiejak'i, injlak'ali ti je kiak iyo ka ti'wena ti k'iejli poye 'ni ajnat. Siu'nie jloma awaki ka kiak iwo ka ti'wena, ts'iji siunie sitieyiji ja lajak'i pa jlomaye ka inekiajle'e. 22Jlamt'itie ka Sinia' ine'nate ka intoyiti puwa ka jlomasa' ka inejni, jlam je tijwata'ne paka i'nioye. Lapakawo ti 'nakayi jla'am ti wuj ti yimi'n siunapo ti pajk'i ti isi'mik'i, it'imina ti kiak iyone ti je itioyiti'i niwa jlomas.
23“Janak jloma jana ajwe'el, ti japoye pa jawo'ate, ti jankajwejla'nase, “Jon ka 'yenayi, siu'nie Injwajieti ti Sinia' jijliujwanik yi'ne”, ni'ne ti japoye pa jawo'ate, “Siusie, yi ts'ijiye.” Ká ak'iuyeyijna'a. 24Sekyi'i ja 'naka'aja siunapo i'nio' ti janjwel ka nakaye injwejlanik jiwo, ti ja ke piniye siuniwa jan'wenki'n, ti jankelitk'i napo i'nio', siu'neje napo i'nio' Sinia' pajk'i ti i'winakit ti isi'mik'i, jawo pa jawo ka inkajli ka ink'emijiet, ni'ne ka jeyena'a. 25¡'Yejne'n, ajwe'lase'm ta'a, ti je yijliyi'ijyi janak jloma ti kiak jawo! 26Jak je iyoyiji, 'wanjliyi ka kia'iwo paka injwe'lase'm ka iwo'ate, “Jon ka 'yenayi siusie I'nio' Jlas yi ts'iji 'lajni”, 'yina ká akinie'ni. Ni'ne ka wo'ate, “Jon ka 'yenayi siu'nie yi'ne, yi kiajwe siujlie'e ti inijweki'n”, ká ak'iuyeyi siunie janwo'nase. 27Kajeyepa ti jawo'ate siunie ti tak'ayetaja, ti tajlap 'niji taj'le ni kilie', ti jlal itie 'nijiye 'yu'yi ni kilie', ka 'nesta ni I'nio' Jlas ti janapimet. 28Siupa ajnat jane'yi siupapo i'nio mases, sek inkapajlajanie'e niwa t'isiukis.”
Jesús janapimet
(Mc 13.24-37; Lc 21.25-33; 17.26-30,34-35)
29Paj ti Jesús iyoye'aja 'ate:
—Janek 'niji niwak jlomas ti injlak'ali janejyi, siunie kilie' ja'no'me, siunie we'la ja laja jlala', siuniwa katese'l janok'iji'n, jlampet siunie jijweye iyo pit niwak yi' poliyi jan'wesiyejets'inie'e.#Is 13.10; 34.4; Jl 2.10,31; Apoc 6.12-13 30Sek jane'yi'ne ka 'nakajayinie'e siunie ja inajnate'n jik'ioye ni I'nio' Jlas, ti jane poliyi. Ja wujwa ti jajnots'ijnits'i napo i'nio' yijits'i niwa ajnatis, ja pajlata ti jajnots'ijnits'i, sekjane'yi ti janapk'i wita'm. Jan'wenisiena'a ilia'm ni I'nio' Jlas ti janapimet ti jantal poliyi, ti janejyi jana poli, jla'yi ti janejyi siupi jijweye iyo ti je jlase', jla'yi ki iyo ni jloniye ti 'es.#Dan 7.13; Apoc 1.7 31Sek jane'yi ka pesiejayinie'e jana 'woso', ni jla'lap jawo ti ja pesiejayi. Siunie I'nio' Jlas ka injloyena'a napo jijliujwajnas poli jlele ti jajnotk'i wita'm siunapo i'nio' pajk'i ti i'winakit ti isi'mik'i, taj'le ni kilie', siu'neje ni 'yu'yi ni kilie', jla'yi 'niji yi'i ni iniwuk, siu'neje 'niji wikinaja, jla'yi 'niji yi'i ni tajlap'e 'ni ajnat, jla'yi 'niji jla'a ni ajnat.
32“Jejlitiakiame kiu' ka ani'neyasanayi siunie inka'neyasajnaye ti tajle jana higok. Je istie' pet ti joyeta ka ji'wole ink'iejyisa', jiwats'oyeyi'i ni siuniwa jik'ase'l, jitijnisieyeyi ka nawopa'. 33'Yina nak kia'iyoyi, siuti ja'wena' niwak wask'i'nelaja niwa ajwel'ni, 'najanayi ti je toj'we janak jloma ti ja'nes ni I'nio' Jlas. 34Ijiatk'i siunie awoyi ti japoye niwak wask'i'nelaja, siuti ja ke int'eki kiu' ape'e 'ni ajnat napo i'nio' yiji siu'niwa jlomas. 35Siunie poli siu'neje 'ni ajnat janetia'n, 'yina jlampet niwa yamtis ja ke paja ka inetia'n jla'am.
36“Jlampet siojona inetitinki janejyi siojona kilie' kie', siu'neje jana jloma ti ja'nesi, nak lajk'ipa ka 'najane paka inwone. Tiwet'ianaja ka napokataja pet napo Sinia' jijliujwajnas ti yi' poliyi ka 'najane paka iwone, siunie Jlas kia'iyojliyi, ijwienjli jla'am ti 'yijene pi iyone, ni Inia'.
37“Jawo'ate iyot'iyipi siupuwa jlomas Noé yiji, ka inapitiemet naka I'nio' Jlas. 38-39Pak siupa jloma ti je yijliyi'ijyi papo i'nio' pa pejlatiok, papo i'nio' 'es ti ti'yekiujni'n, siu'neje ti i'yayis, jla'yi ti tijwa'yits'iji'n, ka k'iejliyeyi paka iwoyisi ka intejnisijyi'n paka jiwet'iaye, yamite japak jloma ti Noé yajma'm japa kasejkana ti wuj. 'Yina yiyi pak pejlatiok, paka'ne ti yame papo i'nio mases t'ipi, paj ti itijwa'a.#Gén 7.6-24 'Yina 'wena ja ke iwo janak jloma ka inapitiemet ni I'nio' Jlas. 40Siuti times napo yi' jiwasoki, ijwienjli ni ja tikinieje, ijwienjli'ne siunie ja tiliki ajnat'e. 41Times napo asejnia tikiojwajne'n, ijwienjli'ne siojona ja ta'asik, siojona jikiecha ja tiliki ajnat'e.
42'Yina kiak jawo, it'imina ti kiak awo'nase, ke inkiwaliye. 'Wanjliyi je 'najanayi siojona jloma ja'nesi ni Aska'niona. 43Ataj enayi 'ate siu'nie: siunie ji'wuk jana t'oyeja'm ti kajlajnata 'yujia'm, jijwelt'itie ka ma'a ka intejnisijyi'n k'iye ti 'nesata. Jeyi kat'aja, kajeyepa ti jan'yena japa ji'wuk. 44Nak it'imina ti asampet kiak jawoyeyi, 'esiji ka aniwakajlanitie, kajeyepa siojona jloma ti ja'nes ni I'nio' Jlas ja inesi'lieta.
Siupi inkawo jlosik yiji'ni siu'neje pa lajayi'ni jlosikieje
(Lc 12.41-46)
45Jesús iyoye'eje 'ate:
—¿Tepa yi'i siupi jlosik yiji'ni jla'yi ti 'es ni inkawo? 'Yina naka siunie jika anechiyas i'yenkina pet napo ijia ti inkawos ji'wet'e ti 'yakojniejne'n ti yamata, paj ti yiyeyi siojopa jloma 'nesi. 46Iniope siunie jika anechiyas iyone, siunie jikawo ti yiyi ape'e ti iyoyi siunie jika anechiyas ijliuye kawoyi, ti 'nesata siupi tajli. 47Ijiatk'i siunie jayo ti nak inkawo ti 'es, nak janekiajle ti jan'yenkina siupuwa ti jlam ti jikimet.
48“Siut'itie ka ijnoski'la'n pak jikawo siuti i'wi'in ti je ta'a k'iye pi jika anechiyas, 49ka kiak t'ipa iwoyetaja, ka inlaki siupapo ti'yenkinaja pet, ka k'iejliyeyi paka inwone. Sek jane'yi ka inkijwanataja papo ijia 'yatas, jankijwane ti jan'yekiujni'n jla'yi ti jankijwane ti jan'yayis. 50Ataj enayi 'ate siunie jayoyi: siojona jloma ti jankiwaliyiji'ni, siu'neje jana inetitinki jana kilie' kie' ti ja ke 'najane paka inwone, janakaye ti ja'nesi ni jika anechiyas. 51'Yina ja wujwa ti jansa'a, jank'aj'ni nak jikawo, sek jane'yi ka intatayijinie'e siunie jiliaye jane'yi pet napok siunapo i'nio' ti ijiuski'lajne'n, ka sek ineye'ena'a ni jawo ni jlajlas, kajeyepa ti ja wujwa ti ja a'tieja.
လက္ရွိေရြးခ်ယ္ထားမွု
Mateo 24: CRT97
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nuevo Testamento en Chorote © Sociedades Biblicas Unidas, 1997.